Mesaz ki nou devret proklanmen

BYEN lontan avan lepok Kretyen, Zeova ti dir avek fidel Abraam konsernan en laranzman ki “tou bann nasyon lo later” pou ganny beni. (Zen. 22:18) I ti osi enspir Salomon pour ekrir en demann fondamantal ki tou dimoun i bezwen fer: “Annan lakrent pour sa vre Bondye e gard son bann komannman. Akoz sa i tou lobligasyon zonm.” (Ekle. 12:13) Me konman ki dimoun ki pe viv dan lemonn antye pou konn sa bann keksoz?

Kantmenm i’n toultan annan enpe dimoun ki krwar Parol Bondye, Labib i endike ki sa temwannyaz mondyal entans ki pou an realite tous tou nasyon avek sa bon nouvel ti’n ganny rezerve pour “zour Senyer.” Sa ti konmans an 1914. (Rev. 1:10) Konsernan sa letan, Revelasyon 14:6, 7 dan Traduction du monde nouveau ti predir ki en proklanmasyon enportan anba direksyon bann lanz ti pou ganny fer “pour tou nasyon ek tribi ek lalang ek pep.” Zot pou ganny ankouraze pour: ‘Annan lakrent pour Bondye e donn li laglwar, parski ler son zizman in arive. Ador sa Enn ki’n fer lesyel, later, lanmer ek bann sours delo!’ I lavolonte Bondye ki sa mesaz i ganny prezante. Nou annan sa privilez pour partisip dan sa travay.

“Sa vre Bondye.” Ler Zeova ti deklare, “Zot mon bann temwen,” sa ti en moman kot sa kestyon lekel ki vre Bondye ti pe ganny diskite. (Iza. 43:10) Sa mesaz ki devret ganny prezante i pa zis endike ki dimoun i devret annan en relizyon oubyen krwar dan en bondye. Plito, zot bezwen ganny sa loportinite pour aprann ki Kreater lesyel ek later i sa sel vre Bondye. (Iza. 45:5, 18, 21, 22; Zan 17:3) Se selman sa vre Bondye ki nou kapab depan lo la pour predir lavenir. I nou privilez pour fer resorti ki lakonplisman parol Zeova dan lepase i donn en baz solid pour annan konfyans ki tou keksoz ki i’n promet pour lavenir pou vin vre.—Zoz. 23:14; Iza. 55:10, 11.

Byensir, bokou dimoun ki nou pres avek i ador lezot bondye oubyen dir ki zot pa ador okenn bondye. Pour en dimoun kapab ekout nou, petet nou bezwen konmans koz lo en keksoz ki konsern nou tou le de. Nou kapab benefisye atraver legzanp rikorde dan Akt 17:22-31. Remarke, ki kantmenm zapot Pol ti fer atansyon sa ki i dir, i ti klerman deklare ki tou dimoun i bezwen rann kont anver Bondye ki Kreater lesyel ek later.

Fer konnen Non Bondye. Pa manke pour fer konn sa vre Bondye par son non. Zeova i kontan son non. (Egz. 3:15; Iza. 42:8) I anvi dimoun konn sa non. I ti fer son non glorye ganny enkli dan Labib pour plis ki 7,000 fwa. I nou responsabilite pour fer dimoun konn byen sa non.—Det. 4:35.

Sa posibilite pour tou limanite ganny lavi dan lavenir i depan ki zot konn Zeova e apel li avek lafwa. (Yoel 2:32; Mal. 3:16; 2 Tesa. 1:8) Toudmenm, laplipar dimoun pa konn Zeova. Sa i enkli en kantite dimoun ki pretann pour ador sa Bondye ki dan Labib. Kantmenm zot annan en Labib e zot lir li, i kapab ki zot pa konn non personnel Bondye vi ki sa non in ganny retire dan bokou tradiksyon modern. Pour serten dimoun zot in konn sa non Zeova selman ler zot dirizan relizye in dir zot pour pa servi sa non.

Konman nou kapab fer dimoun vin familye avek non Bondye? Montre zot sa non dan Labib i vreman pli efektiv—si i posib dan zot prop Labib. Dan serten lezot tradiksyon Labib, sa non i aparet plizyer milye fwa. Dan lezot, i kapab aparet selman dan Psonm 83:18 oubyen Egzod 6:3-6, oubyen i kapab trouve dan en not anba lo paz baze lo Egzod 3:14, 15, oubyen 6:3. Dan plizyer tradiksyon, zot ekrir bann lekspresyon parey “Senyer” ek “Bondye” ki zot servi pour ranplas sa non, dan en lot kalite lekritir ki disteng kot non personnel Bondye i aparet dan bann verse dan langaz orizinal. Dan bann tradiksyon modern kot non personnel Bondye in ganny retire konpletman, la petet ou bezwen servi en tradiksyon Labib ki pli ansyen pour montre zot sa ki’n arive. Dan serten pei ou kapab fer resorti sa non divin dan bann kantik relizye oubyen bann lekritir lo en batiman piblik.

Menm pour bann ki ador lezot bondye, Zeremi 10:10-13 dan Traduction du monde nouveau i kapab ganny servi avek lefikasite. I pa zis mansyonn non Bondye me i osi klerman eksplik sa ki i ete.

Pa kasyet non Zeova par deryer bann tit parey “Bondye” ek “Senyer” parey Kretyente i fer. Sa pa vedir ki sa non i devret ganny servi sak fwa ki ou konmans en konversasyon. Akoz pour rezon prezidis, serten dimoun pou termin sa diskisyon ler ou mansyonn sa non. Me apre ki ou’n konmans en konversasyon, pa evite pour servi sa non divin.

I vo lapenn note ki Labib i servi non personnel Bondye pli souvan ki tou son bann tit ansanm parey “Senyer” ek “Bondye.” Kantmenm sa i leka, bann ekriven Labib pa ti esey enkli sa non divin dan tou fraz. Zot ti senpleman servi sa non dan en fason natirel, avek respe e libreman. Sa i en bon model pour swiv.

Sa Dimoun ki sa Non i idantifye. Konn non Bondye i zis premye pa pour kapab arive byen konn li.

Pour kapab kontan Zeova e apel li avek lafwa, dimoun i bezwen konn sa kalite Bondye ki i ete. Ler Zeova ti fer Moiz konn son non lo Montanny Sinai, i pa ti zis repet sa mo “Zeova,” i ti fer plis ki sa. I ti atir latansyon lo serten Son bann kalite remarkab. (Egz. 34:6, 7) Sa i en legzanp pour nou imite.

Ki swa ou pe rann temwannyaz avek bann dimoun nouvo ki enterese oubyen pe donn bann diskour dan kongregasyon, ler ou koz konsernan bann benediksyon Rwayonm, fer resorti ki sa bann keksoz i endike lo sa Bondye ki’n fer bann tel promes. Ler pe refer lo son bann komannman, aksantye sazes ek lanmour ki zot reflekte. Fer kler ki sa ki Bondye i ekspekte nou fer pa enpoz en difikilte lo nou, me okontrer zot in ganny fer avek lentansyon pour benefisye nou. (Iza. 48:17, 18; Mik. 6:8) Montre konman ki sak fwa ki Zeova i demontre son pwisans i revel serten keksoz lo son personnalite, son bann standar, lo son plan. Atir latansyon lo konman ki Zeova i ekilibre ler i manifeste son bann kalite. Eksprim ou prop santiman lo Zeova avek lezot. Ou lanmour pour Zeova i kapab kontribye pour ankouraz en tel lanmour dan lezot.

Sa mesaz irzan pour nou letan i ankouraz tou dimoun pour annan lakrent pour Bondye. Par sa ki nou dir, nou devret stimil en tel lakrent pour Bondye. Sa lakrent i en lafreyer saliter, en ladmirasyon pour Zeova, en respe profon pour li. (Pson. 89:7) I enkli rekonnet ki Zeova i Ziz siprenm e ki nou bezwen ganny son laprouvasyon pour nou kapab ganny lavi dan lavenir. (Lik 12:5; Rom. 14:12) Alor, en tel lakrent i asosye avek profon lanmour pour li e an konsekans en profon dezir pour fer li plezir. (Det. 10:12, 13) Lakrent pour Bondye i osi pous nou pour ay sa ki move, pour obeir bann komannman Bondye, e pour ador li avek en leker konplet. (Det. 5:29; 1 Kron. 28:9; Prov. 8:13) I sovgard nou kont esey servi Bondye anmenmtan kontan bann keksoz lemonn.—1 Zan 2:15-17.

Non Bondye—“En Latour for.” Dimoun ki vreman arive konn Zeova i eksperyans gran proteksyon. Sa i pa selman akoz zot servi son non personnel oubyen kapab mansyonn serten son bann kalite. I akoz zot met zot konfyans dan Zeova li menm. Konsernan sa bann dimoun, Proverb 18:10 i deklare: “Non Zeova i en latour for. Bann zis i tay ladan e zot ganny proteksyon.”

Servi byen bann loportinite pour ankouraz lezot pour met konfyans dan Zeova. (Pson. 37:3; Prov. 3:5, 6) En tel konfyans i demontre lafwa dan Zeova ek son bann promes. (Ebr. 11:6) Ler dimoun i ‘envok non Zeova’ akoz zot konnen ki i Souvren Liniver, akoz zot kontan son bann prensip, e totalman krwar ki selman avek li ki zot pou ganny vre delivrans, alor—Parol Bondye i asir nou—zot pou ganny sove. (Rom. 10:13, 14) Anmezir ki ou ansenny lezot, ed zot pour devlop sa kalite lafwa an relasyon avek tou laspe zot lavi.

Bokou dimoun i fer fas avek bann problenm personnel ki ekstrememan difisil. Petet zot pa vwar en solisyon. Ankouraz zot pour aprann kisisa lavolonte Zeova, pour met konfyans dan Zeova, e pour aplik sa ki zot aprann. (Pson. 25:5) Ankouraz zot pour priy senserman pour led Bondye e pour remersi li pour son bann benediksyon. (Fili. 4:6, 7) Ler zot arive konn Zeova par eksperyans lakonplisman son bann promes dan zot lavi, e non pa par zis lir serten deklarasyon dan Labib, zot pou konmans eksperyans sa sekirite ki vin atraver vreman konpran ki sa non Zeova i reprezante.—Pson. 34:8; Zer. 17:7, 8.

Servi byen tou loportinite pour ed dimoun konpran e estim bokou lasazes pour annan lakrent pour sa vre Bondye Zeova, e gard son bann komannman.

APRE son rezireksyon e avan ki i ti retourn dan lesyel, Zezi Kri ti donn lenstriksyon avek son bann disip, an dizan: “Zot a vin mon bann temwen . . . ziska tou bann landrwa pli elwannyen lo later.” (Akt 1:8) Bann serviter fidel Bondye dan nou letan i ganny dekrir konman sa bann ki “posed sa travay pour rann temwannyaz Zezi.” (Rev. 12:17, NW) Eski ou pe travay dir pour rann sa temwannyaz?

Bokou dimoun ki senserman dir ki zot krwar dan Zezi pa konn ditou ki i ti egziste avan ki i ti vin lo later. Zot pa realize ki i ti vreman en zonm ler i ti lo later. Zot pa konpran ki savedir ler Zezi i ganny adrese konman Garson Bondye. Zot konn pti gin konsernan son plan dan lakonplisman plan Bondye. Zot pa konnen ki i pe fer konmela, e zot pa realize konman ki zot lavi pou ganny afekte par sa ki i pou fer dan lavenir. Zot menm kapab fer sa fot pour mazinen ki bann Temwen Zeova pa krwar dan Zezi. I nou privilez pour esey fer konnen laverite lo sa bann keksoz.

I annan lezot ki pa krwar ki en tel dimoun parey Zezi ki ganny dekrir dan Labib ti vreman egziste. Serten i konsider Zezi konman selman en zonm renonmen. Bokou i rezet sa lide ki i Garson Bondye. Pour rann “temwannyaz Zezi” parmi bann tel kalite dimoun i demann bokou zefor, pasyans, ek prekosyon dan nou fason koze.

Nenport ki pwenn-vi bann ki ou koz avek i annan, zot bezwen ganny konnesans lo Zezi Kri pour zot kapab benefisye laranzman Bondye pour lavi eternel. (Zan 17:3) Lavolonte Bondye ki klerman ganny eksprimen i ki tou sa ki viv i bezwen “proklanmen, ki Zezi-Kri i Senyer” e bezwen soumet avek son lotorite. (Fili. 2:9-11) Alors, nou pa kapab senpleman evit sa size ler nou rankontre dimoun ki annan bann lopinyon ki zot atase avek me ki mal oubyen ki antyerman baze lo prezidis. Tandis ki dan serten ka nou kapab koz libreman lo Zezi Kri—menm lo nou premye vizit—me dan lezot ka, petet nou bezwen pridan dan nou bann komanter pour ki sa bann ki nou koz avek i konmans mazin korekteman lo li. Petet nou osi bezwen mazin bann fason pour entrodwir lezot laspe sa size lo bann lezot vizit. Toutfwa, i kapab pa posib pour diskit tou sa ki enplike ziska ki nou kapab kondwir en letid Labib avek sa dimoun.—1 Tim. 2:3-7.

Rol enportan Zezi dan Plan Bondye. Nou bezwen ed dimoun pour konpran ki, vi ki Zezi i “semen” e ‘personn pa kapab ariv kot son Papa san pas par li,’ i enposib alor pour annan en relasyon aprouve avek Bondye san annan lafwa dan Zezi Kri. (Zan 14:6) Amwen ki en dimoun i realiz sa rol enportan ki Zeova in konfye son Garson premye ne, i enposib pour konpran Labib. Akoz? Parski Zeova ti fer sa Garson vin personnaz prensipal dan lakonplisman tou son plan. (Kol. 1:17-20) Profesi Labib i santre lo sa laverite. (Rev. 19:10) Zezi Kri i sa enn atraver ki solisyon i ganny fourni pour tou problenm ki ti ganny souleve par rebelyon Satan ek pese Adan.—Ebr. 2:5-9, 14, 15.

Pour konpran rol Kris, en dimoun i bezwen rekonnet ki bann imen i dan en kondisyon deplorab kot zot pa kapab liber zot lekor. Nou tou nou’n ne dan pese. Sa i kapab afekte nou dan plizyer kalite fason pandan nou lavi. Sepandan, to-ou-tar, pese i anmenn lanmor. (Rom. 3:23; 5:12) Rezonn lo sa fe avek sa bann ki ou pres avek. Apre fer resorti ki atraver sakrifis ranson Zezi Kri, Zeova par son gran lanmour in fer delivrans avek pese ek lanmor posib pour sa bann ki demontre lafwa dan sa dispozisyon. (Mark 10:45; Ebr. 2:9) E sa i ouver semen pour zot rezwir lavi eternel dan perfeksyon. (Zan 3:16, 36) Napa okenn lezot fason ki sa i posib. (Akt 4:12) Si ou ansenny swa an prive oubyen dan kongregasyon, fer plis ki zis dir sa bann laverite. Avek pasyans ek labonte devlop en santiman rekonesans pour rol Zezi konman nou Sover dan sa bann ki ekout ou. Lapresyasyon pour sa don i kapab annan en lefe profon lo latitid, kondwit, ek lobzektif dan lavi en dimoun.—2 Kor. 5:14, 15.

Byensir, Zezi ti donn son lavi konman sakrifis zis enn fwa. (Ebr. 9:28) Sepandan, ozordi i pe aktivman servi konman Gran Pret. Ed lezot konpran ki sa i vedir. Eski zot pe eksperyans presyon, dezapwentman, soufrans, oubyen problenm akoz lezot dimoun otour zot pe mal azir? Ler Zezi ti en imen, i ti eksperyans tousala. I konnen konman nou santi. Akoz lenperfeksyon, eski nou santi ki nou bezwen mizerikord Bondye? Si nou priy Bondye pour pardonn nou lo baz sakrifis Zezi, Zezi i azir konman ‘en asistan kot Bondye.’ Avek konpasyon i “pe entersede pour nou.” (1 Zan 2:1, 2; Rom. 8:34) Lo baz sakrifis ranson Zezi e atraver son servis konman Gran Pret, nou kapab apros “tronn lagras” Zeova pour resevwar led dan moman neseser. (Ebr. 4:15, 16) Kantmenm nou enparfe, sa led ki Zezi i fourni konman Gran Pret i permet nou servi Bondye avek en konsyans kler.—Ebr. 9:13, 14.

Deplis, Zezi i annan gran lotorite konman sa enn ki Zeova in swazir pour vin Sef kongregasyon Kretyen. (Mat. 28:18; Efe. 1:22, 23) E dan en tel kapasite, i fourni gidans neseser ki an armoni avek lavolonte Bondye. Ler ou ansenny lezot, ed zot pour konpran ki se Zezi Kri ki Sef kongregasyon, e pa okenn zonm. (Mat. 23:10) Omoman ki ou rankontre bann ki enterese, envit zot bann renyon kongregasyon, kot nou etidye Labib avek led lenformasyon ki ‘lesklav fidel e pridan’ i fourni. Pa zis eksplik zot lekel sa ‘lesklav’ me eksplik osi lekel sa Met pour ki zot konn lotorite Zezi. (Mat. 24:45-47) Entrodwir zot avek bann ansyen, e eksplik bann kalifikasyon Biblik ki sa bann ansyen i devret ranpli. (1 Tim. 3:1-7; Tit 1:5-9) Eksplik zot ki kongregasyon pa pour bann ansyen me zot ed nou mars dan lepa Zezi Kri. (Akt 20:28; Efe. 4:16; 1 Pyer 5:2, 3) Ed sa bann ki enterese pour vwar ki i annan en lasosyete byen organize dan lemonn antye ki pe fonksyonnen anba lotorite Kris.

Atraver Levanzil, nou aprann ki ler Zezi ti antre dan Zerizalenm zis avan son lanmor, son bann disip ti salye li konman ‘sa Lerwa ki pe vin onon Zeova!’ (Lik 19:38) Anmezir ki dimoun i etidye Labib pli oprofon, zot aprann ki Zeova in donn Zezi dominasyon ki afekte dimoun dan tou nasyon. (Dan. 7:13, 14) Ler ou donn bann diskour dan kongregasyon oubyen kondwir bann letid, ed zot konpran e rekonnet lenportans ki dominasyon Zezi i devret annan pour nou tou.

Aksantye ki nou fason viv i demontre si nou vreman krwar ki Zezi Kri i Lerwa e si nou pe volonterman soumet avek son lotorite. Diriz latansyon lo travay ki Zezi, apre ki ti’n ganny swazir konman Lerwa ti ordonn son bann disip pour fer. (Mat. 24:14; 28:18-20) Diskit sa ki Zezi, sa Konseye Merveye ti dir konsernan bann keksoz ki devret ganny vwar konman pli enportan dan lavi. (Iza. 9:6, 7; Mat. 6:19-34) Diriz latansyon lo sa leta lespri ki sa Prens Lape ti dir son bann disip ti pou manifeste. (Mat. 20:25-27; Zan 13:35) Fer atansyon pour pa asim sa responsabilite pour zize si lezot pe fer otan ki zot devret, me ankouraz zot pour reflesir lo ki zot aksyon i endike konsernan zot soumisyon anver lotorite Kris. E ler ou fer sa, montre ki ou osi ou bezwen fer menm keksoz.

Etablir Kris konman sa Fondasyon. Labib i konpar travay fer en disip avek batir en batiman lo Zezi Kri konman fondasyon. (1 Kor. 3:10-15) Pour akonpli sa, ed dimoun pour konn Zezi parey i ganny dekrir dan Labib. Fer atansyon ki zot pa get ou konman sa enn ki zot pe swiv. (1 Kor. 3:4-7) Diriz zot latansyon lo Zezi Kri.

Si sa fondasyon in ganny byen etablir, bann etidyan pou konpran ki Kris in les en legzanp pour nou “swiv.” (1 Pyer 2:21) Pour batir lo sa fondasyon, ankouraz bann etidyan pour lir bann Levanzil pa zis konman listwar ki vre me konman en model pour swiv. Ed zot pour pran aker bann latitid ek kalite ki Zezi ti annan. Ankouraz zot pour port latansyon lo santiman ki Zezi ti annan pour son Papa, konman i ti reziste bann tantasyon ek leprev, konman i ti montre soumisyon anver Bondye, e konman i ti azir avek bann imen dan plizyer sirkonstans. Fer resorti aktivite ki Zezi ti okip son lavi avek. Alor, ler i fer fas avek bann desizyon ek leprev dan lavi, en etidyan pou demann son lekor: ‘Ki Zezi ti pou fer dan sa sitiasyon?’ Eski lafason ki mon fer i demontre rekonesans apropriye pour sa ki i’n fer pour mwan?’

Ler ou koz devan dan en kongregasyon, pa mazinen ki akoz ou bann frer ek ser i deza annan lafwa dan Zezi, napa nesesite pour atir latansyon spesyal lo li. Si ou batir lo sa lafwa, sa ki ou dir pour annan plis sans. Kan ou koz konsernan bann renyon, asosye sa avek rol Zezi konman Sef kongregasyon. Ler ou diskit lo predikasyon, atir latansyon lo leta lespri ki Zezi ti demontre ler i ti pe akonpli son minister e prezant minister dapre sa ki nou konnen Kris konman Lerwa pe fer pour rasanble dimoun pour prezerv zot dan nouvo monn.

I evidan ki i pa sifi pour zis aprann bann fe debaz konsernan Zezi. Pour vin bann vre Kretyen, dimoun i devret demontre lafwa dan li e vreman kontan li. En tel lanmour i motiv lobeisans fidel. (Zan 14:15, 21) I permet dimoun pour debout solid dan lafwa, dan difikilte, pour kontinyen mars dan lepa Kris toudilon zot lavi, pour prouve ki zot bann Kretyen matir ki solidman “anrasinen e byen etabli” lo sa fondasyon. (Efe. 3:17) En tel fason viv i anmenn laglwar pour Zeova, Bondye ek Papa Zezi Kri.

LER i ti pe donn bann detay konsernan siny son prezans ek konklizyon sa sistenm, Zezi ti predir: “Sa Bonn Nouvel Rwayonm pou ganny anonse partou dan lemonn pour tou dimoun konnen; e apre sa, lafen pou arive.”—Mat. 24:14.

Alor, ki sa mesaz i kontyen egzakteman ki i devret ganny pibliye partou? I konsernan sa Rwayonm ki Zezi ti ansenny nou pour priy Bondye, an dizan: “Ki ou Renny i ganny etabli; Ki ou lavolonte i ganny akonpli lo later parey dan lesyel.” (Mat. 6:10) Revelasyon 11:15 i dekrir li konman “Rwayonm nou Senyer [Zeova], e son Kris” akoz lotorite pour dirize i sorti kot Zeova e i ganny donnen avek Kris konman Lerwa. Sepandan, remarke ki sa mesaz ki Zezi ti dir pou ganny proklanmen dan nou letan i al pli lwen ki sa ki son bann disip ti prese dan premye syek. Zot ti dir dimoun: “Rwayonm Bondye in ariv pre avek zot.” (Lik 10:9) Zezi, sa enn ki’n ganny swazir pour vin Lerwa, ti parmi zot. Me dan Matye 24:14, Zezi ti predir proklanmasyon mondyal en lot levennman enportan dan lakonplisman plan Bondye.

Profet Danyel ti ganny en vizyon sa levennman. I ti vwar “fis de lonm,” Zezi Kri, pe resevwar avek “Ansyen bann zour,” Zeova Bondye, “dominasyon ek dinite ek rwayonm, pour ki bann pep, kominote nasyonal ek bann lalang, zot tou zot servi li.” (Dan. 7:13, 14) Sa levennman ki annan lenportans mondyal ti ariv dan lesyel dan lannen 1914. Apre sa, Dyab ek son bann demon ti ganny zete lo later. (Rev. 12:7-10) Sa vye sistenm ti’n antre dan son bann dernyen zour. Me avan ki i ganny retire konpletman, en proklanmasyon mondyal pe ganny fer ki Lerwa Mesyanik Zeova i aprezan pe dirize atraver son tronn seles. Partou dimoun pe ganny averti. Zot reaksyon i montre zot latitid anver sa enn Tre O konman Sef dan “rwayonm limanite.”—Dan. 4:32.

I vre, i annan ankor bokou levennman pour arive—bokou plis! Nou ankor pe priye, “Ki ou Renny i ganny etabli,” me pa avek lide ki letablisman Rwayonm Bondye i ankor dan lavenir. Olye, i avek lide ki sa Rwayonm seles pou azir dan en fason konkret pour akonpli bann tel profesi parey Danyel 2:44 ek Revelasyon 21:2-4. I pou transform later dan en paradi ki pou ranpli avek dimoun ki kontan Bondye e kontan zot prosen. Ler nou pres “sa bonn nouvel Rwayonm,” nou fer resorti sa bann lespwar pour lavenir. Me osi avek konfyans nou fer konnen ki Zeova in deza donn tou lotorite son Garson. Eski ou pe met lanfaz lo sa bon nouvel ler ou temwanny konsernan Rwayonm?

Eksplik sa Rwayonm. Konman nou kapab akonpli nou travay pour anons Rwayonm Bondye? Nou kapab stimil lentere par konmans koz lo diferan size, me nou pa devret tarde pour byen fer resorti ki nou mesaz i konsernan Rwayonm Bondye.

En laspe enportan sa travay i enplik lir oubyen sit bann verse ki refer avek Rwayonm. Ler ou refer avek Rwayonm, fer sir ki sa bann ki ou koz avek i konpran kwa sa Rwayonm. Petet ou bezwen dir plis ki zis dir ki Rwayonm i en gouvernman. Serten dimoun i kapab vwar li difisil pour imazin en gouvernman envizib. Ou kapab rezonn avek zot dan plizyer fason. Par egzanp, gravitasyon i envizib me annan en lefe pwisan lo nou lavi. Nou pa kapab vwar sa enn ki fer lalwa gravitasyon, me i evidan ki i annan en gran pouvwar. Labib i apel li konman “Lerwa eternel.” (1 Tim. 1:17) Oubyen i kapab dir ki dan en gran pei, bokou dimoun pa’n zanmen al dan sa lavil kot gouvernman i baze oubyen vwar zot dirizan an personn. Zot aprann lo sa bann keksoz atraver medya. Pareyman, Labib, ki’n ganny pibliye dan plis ki 2,200 langaz, i dir nou konsernan Rwayonm Bondye; i les nou konnen lekel ki’n ganny konfye avek lotorite e ki sa Rwayonm pe fer. Latour Veyer, ki’n ganny pibliye dan plis langaz ki okenn lezot magazin, i devoue pour “anons Rwayonm Zeova,” parey i ganny ekrir lo son premye paz.

Pour ed en dimoun konpran kwa sa Rwayonm, ou kapab mansyonn serten keksoz ki zot anvi bann gouvernman i fourni: sekirite ekonomik, lape, elimin krim, egalite pour tou group etnik, ledikasyon, ek lasante. Montre ki selman par mwayen Rwayonm Bondye ki sa bann keksoz ek lezot bon dezir limanite pou ganny plennman satisfe.—Pson. 145:16.

Esey stimil dan dimoun en dezir pour vin bann size sa Rwayonm, dan ki Zezi Kri i dominen konman Lerwa. Fer zot vwar ki bann mirak ki i ti fer i en apersi sa ki i pou fer konman Lerwa seles. Koz souvan lo bann kalite atiran ki i ti manifeste. (Mat. 8:2, 3; 11:28-30) Eksplike ki i ti donn son lavi pour nou e apre Bondye ti lev li pour lavi imortel dan lesyel. I pe dirize konman Lerwa apartir lesyel.—Akt 2:29-35.

Aksantye ki Rwayonm Bondye i aprezan pe dominen apartir lesyel. Sepandan gard antet, ki laplipar dimoun pa vwar bann kondisyon lemonn konman en levidans ki Rwayonm Bondye pe dominen. Rekonnet sa, e demann zot si zot konn bann levidans ki Zezi Kri ti endike ki rwayonm pe dominen dan lesyel. Fer resorti serten laspe dan sa siny konpoze dan Matye sapit 24, Mark sapit 13, oubyen Lik sapit 21. Apre demande akoz ki kouronnman Kris dan lesyel ti pou anmenn bann tel kondisyon lo later. Diriz latansyon lo Revelasyon 12:7-10, 12.

Par egzanp, pour en levidans konkret konsernan sa ki Rwayonm Bondye pe fer konmela, lir Matye 24:14, e dekrir sa travay mondyal ledikasyon Labib ki pe arive konmela. (Iza. 54:13) Dir dimoun konsernan sa plizyer lekol atraver ki bann Temwen Zeova i benefisye—zot tou zot baze lo Labib, zot gratwit. Eksplike ki apard nou minister port-an-port, nou ofer lenstriksyon gratwit lo Labib kot lakour avek bann endividi ek fanmiy dan plis ki 230 pei. Lekel sa gouvernman imen ki dan en pozisyon pour fourni en tel progranm edikasyonnel pa zis pour son prop pep me osi pour dimoun dan lemonn antye? Envit dimoun pour vin kot Lasal Rwayonm, pour asiste bann diferan lasanble Temwen Zeova, pour vwar levidans ki mannyer en tel ledikasyon pe fer lefe lo lavi dimoun.—Iza. 2:2-4; 32:1, 17; Zan 13:35.

Me eski sa dimoun pou realize ki mannyer son prop lavi i ganny afekte? Ou kapab avek latansyon fer resorti ki bi ou vizit se pour diskit loportinite ki ouver pour tou dimoun swazir lavi konman bann size Rwayonm Bondye. Konman? Par aprann sa ki Bondye i ekspekte nou fer e viv an armoni avek sa konmela menm.—Det. 30:19, 20; Rev. 22:17.

Ed lezot met Rwayonm premye. Menm apre ki en dimoun in aksepte mesaz Rwayonm i annan bokou desizyon ki i bezwen fer. Ki kantite lenportans ki i pou donn Rwayonm Bondye dan son prop lavi? Zezi ti ankouraz son bann disip pour kontinyen “rod plito Rwayonm Bondye.” (Mat. 6:33) Konman nou kapab ed bann konpanyon Kretyen pour fer sa? Par etablir en bon legzanp nou menm e par diskit bann loportinite ki disponib. Parler, par demann en dimoun si i’n konsider serten posibilite e par partaz bann leksperyans pour montre ki lezot pe fer. Par diskit bann resi Labib dan en serten fason ki zot ogmant lanmour en dimoun pour Zeova. Par aksantye realite sa Rwayonm. Par fer resorti ki degre enportan travay predikasyon i vreman ete. Laplipar-di-tan bokou dibyen i ganny akonpli, non pa par dir dimoun sa ki bezwen fer, me par stimil en dezir dan zot pour fer li.

San okenn dout, sa mesaz enportan ki nou tou nou devret anonse i konsantre latansyon premyerman lo Zeova Bondye, Zezi Kri, ek sa Rwayonm. Bann laverite enportan konsernan sa bann keksoz i devret ganny aksantye dan nou predikasyon, dan nou kongregasyon, e dan nou lavi personnel. Ler nou fer sa, nou demontre ki nou vreman pe benefisye atraver nou ledikasyon dan Lekol Minister Teokratik.