Zenn, les lezot vwar ou progre

“Pran byen a-ker sa responsabilite e met tou ou zefor ladan, pour ki tou dimoun i a war ou progre.”—1 TIM. 4:15.

1. Ki Bondye i anvi pour bann zenn?

“ZENN, anmiz ou lekor ler ou ankor zenn! Les ou leker fer ou rezwir dan letan lazenes.” (Ekle. 11:9, Tanakh—The Holy Scriptures) Se sa ki Salomon, en lerwa saz dan ansyen Izrael ti ekrir. Zeova ki Sours sa mesaz e sirman i anvi ki zot bann zenn zot ere. An plis ki sa, Zeova i anvi ki zot zwaye menm apre zot zenes. Parkont, pandan letan lazenes bann zenn i souvan fer bann fot ki anmenn douler e ki kapab afekte zot boner pour lavenir. Menm Zob, sa zonm fidel, ti soufer akoz i ti bezwen sibir “konsekans bann fot [son] zenntan.” (Zob 13:26) Pandan laz adolesan ek bann lannen lazenes ki swiv, en zenn Kretyen i souvan annan bann gro desizyon pour fer. En move desizyon i kapab kit deryer bann gro problenm emosyonnel ki pa zanmen kit ou zis parey en sikatris.—Ekle. 11:10.

2. Ki konsey Labib bann zenn i kapab aplike dan zot lavi ki pou ed zot evite sibir bann move konsekans pli tar?

² Bann zenn i bezwen annan bon zizman. Egzamin konsey ki zapot Pol ti donn bann Korentyen. I ti ekrir: “Pa fer konman zanfan dan zot rezonnman. . . . Dan zot rezonnman montre matirite.” (1 Kor. 14:20) Si bann zenn i pran aker sa konsey pour devlop zot abilite pour reflesir e rezonn parey en dimoun matir, sa pou ed zot evite fer bann fot ki pou anmenn move konsekans pli tar.

3. Ki ou kapab fer pour vin matir?

³ Si ou en zenn, gard antet ki i demann zefor pour ou vin matir. Zapot Pol ti dir Timote: “Pa les personn mepriz ou akoz ou ankor zenn, me montre ou en legzanp pour bann krwaryan dan ou fason koze, dan ou kondwit, dan ou lanmour, dan ou lafwa, e ou [la]pirte. . . . Pas ou letan dan lektir parol Bondye an piblik, pres laparol e ansennyen. . . . Pran byen a-ker sa responsabilite e met tou ou zefor ladan, pour ki tou dimoun i a war ou progre.” (1 Tim. 4:12-15; nou ki’n met an italik.) Bann zenn Kretyen i bezwen fer progre pour ki lezot i vwar sa progre ki zot pe fer.

Ki savedir progrese?

4. Kwa ki enplike pour progrese spirityelman?

⁴ Progrese i donn sa lide “pa reste menm nivo, sanze pour amelyore.” Zapot Pol ti pe ankouraz Timote pour kontinyen devlop son lekor pour ki i fer progre dan son fason koze, kondwit, lanmour, lafwa ek lapirte, ensi ki lafason ki i akonplir son minister. Dan son fason viv i ti devret fer bokou zefor pour vin en legzanp. Alor, Timote ti bezwen kontinyen progrese spirityelman.

5, 6. (a) Kan ki progre Timote ti konmans ganny remarke? (b) Konsernan fer progre, ki mannyer bann zenn ozordi i kapab imit Timote?

⁵ Kan zapot Pol ti ekrir sa konsey, ant lannen 61 a 64 N.L., Timote ti deza en ansyen eksperyanse. I pa ti’n fek konmans progrese spirityelman. Dan lannen 49 ouswa 50 N.L., ler Timote ti petet apepre 20-t-an, “bann frer ki ti reste Lis ek Ikonyonm ti dir bokou dibyen lo li,” zot ti’n obzerv progre ki i ti’n fer spirityelman. (Akt 16:1-5) Sa letan, zapot Pol ti anmenn Timote avek li lo son vwayaz misyonner. Apre ki i ti’n obzerv lezot progre Timote pour serten mwan, zapot Pol ti anvoy li Tesalonik pour ki i kapab afermi lafwa e ankouraz bann Kretyen dan sa lavil. (Lir 1 Tesalonisyen 3:1-3, 6.) I kler ki lezot ti vwar progre Timote depi ler i ti ankor zenn.

⁶ Ou ki en zenn dan kongregasyon, travay depi la konmela pour devlop bann kalite spirityel ki neseser, pour ki ou progre dan ou fason viv konman en Kretyen ek ou abilite pour ansenny laverite dan Labib i ava vin aparan. Depi laz 12 an, Zezi ti “devlope an sazes.” (Lik 2:52) Aprezan, annou egzaminen ki mannyer ou kapab progrese dan trwa laspe ou lavi: (1) kan ou rankontre difikilte, (2) anmezir ou prepare pour marye e (3) anmezir ou fer zefor pour vin “en bon minis” sa bon nouvel.—1 Tim. 4:6, NW.

Servi “bon zizman” pour fer fas avek difikilte

7. Ki mannyer bann sityasyon difisil i kapab afekte bann zenn?

⁷ En zenn Kretyen 17 an ki apel Carol ti dir: “Parler, mon ti epwize emosyonnelman, fizikman e mantalman ziska en degre ki mon pa ti anvi leve dan bomaten.”a Akoz i ti santi li koumsa? Kan Carol ti annan di-z-an, son fanmir ti kase akoz divors e i ti vwar li pe viv avek son manman, ki ti rezet pwennvi Labib lo standar moral. Parey Carol, ou osi ou kapab pe fer fas avek bann sityasyon vreman enkyetan ki pa paret pou annan okenn amelyorasyon.

8. Ki difikilte Timote ti fer fas avek?

⁸ Ler i ti pe progrese spirityelman, Timote osi ti fer fas avek bann sityasyon difisil. Par egzanp, i ti “souvan malad” akoz en problenm lestoman. (1 Tim. 5:23) Kan zapot Pol ti anvoy li Korent pour tret serten problenm kot serten dimoun ti pe kestyonn lotorite bann zapot, i ti ankouraz kongregasyon pour korpere, pour ki Timote i “santi [li ganny] byen resevwar” parmi zot. (1 Kor. 4:17; 16:10, 11) I paret ki Timote ti kanmi ouswa timid.

9. Ki savedir annan bon zizman e ki mannyer i diferan avek ler nou per pour fer fas avek en sityasyon?

⁹ Pour ed Timote, pli tar zapot Pol ti rapel li: “Bondye pa’n donn ou en lespri timidite, me okontrer, en lespri ki ranpli nou avek lafors, lanmour ek moderasyon [oubyen “bon zizman,” NW].” (2 Tim. 1:7) En dimoun ki annan “bon zizman” i kapab reflesir e rezonn byen. I enplik sa abilite pour get keksoz parey i ete, pa lafason ki ou ti a kontan i ete. Serten zenn ki pa matir i per pour fer fas avek zot problenm e dan zot lespri zot esey sov sa bann difikilte par pas tou zot letan dormi oubyen get televizyon en kantite, servi drog e abiz lalkol, al parti tou lazournen ouswa angaz zot dan limoralite seksyel. Bann Kretyen i ganny konseye pour “abandonn [zot] move lavi ek son bann move dezir, pour viv en lavi rezonnab, zis e fidel avek Bondye lo sa later.”—Tit 2:12.

10, 11. Ki mannyer bon zizman i kapab ed nou pour depan lo lafors Bondye?

¹⁰ Labib i ankouraz “bann zenn zan pour byen kontrol zot lekor [oubyen “annan bon zizman,” NW].” (Tit 2:6) Si ou swiv sa konsey sa pou vedir ki ou pou priye pour fer fas avek problenm e ou pou depan lo lafors ki Bondye i donnen. (Lir 1 Pyer 4:7.) Si ou fer sa, o fon ou leker ou pou met ou konfyans dan ‘lafors ki Bondye i donnen.’—1 Pyer 4:11.

¹¹ Carol ti annan bon zizman e i ti priye, se sa ki ti ed li. I ti dir: “Pour konfront mon manman konsernan sa lavi imoral ki i ti pe anmennen ti sa keksoz pli difisil ki mon’n deza fer. Me lapriyer ti vreman ed mwan. Mon konnen Zeova i avek mwan, alor mon nepli per.” Mazinen, difikilte i kapab rafin ou e fortifye ou. (Ps. 105:17-19; Lam. 3:27) Malgre nenport kwa ki ou fer fas avek, Bondye pa pou zanmen abandonn ou. I pou “vreman ed ou.”—Iza. 41:10.

Bon preparasyon ki fer en maryaz reisi

12. Akoz en Kretyen ki pe mazin pour marye i devret aplik sa prensip ki dan Proverb 20:25?

¹² Serten zenn adilt in taye pour marye an krwayan zot pe sap en lavi malere, lasolitid, annwiyan ek problenm kot lakour. Parkont, fer bann ve maryaz i en keksoz vreman serye. Serten dimoun dan letan ki Labib ti pe ganny ekrir, ti taye pour fer sa ve sakre oubyen sen, san ki zot ti analiz byen sa ki i ti enplike. (Lir Proverb 20:25.) Parler, bann zenn adilt pa vreman evalye sa ki en maryaz i enplike. Pli tar zot dekouver ki i enplik plis ki sa ki zot ti krwar.

13. Ki kestyon bann ki pe mazin pour pwente i devret demande e ki bon konsey ki disponib pour zot?

¹³ Alor, avan konmans pwente, demann ou lekor: ‘Akoz mon anvi marye? Ki mon pe ekspekte? Eski i vreman sa dimoun ki mon anvi marye avek? Eski mon pare pour desarz byen mon responsabilite dan maryaz?’ Pour ed ou fer en bon egzaminasyon lo ou lekor, “lesklav fidel e pridan” in pibliy bann lartik vreman presi.b (Mat. 24:45-47, NW) Konsider sa bann lenformasyon konman en fason ki Zeova pe konsey ou. Analiz byen sa ki’n ganny ekrir e aplik li. Pa les ou vin “parey en seval oubyen bourik ki san konprenezon.” (Ps. 32:8, 9) Vin bann adilt dan ou rezonnman oubyen konprenezon lo sa ki en maryaz i enplike. Si ou santi ki ou pare pour konmans pwente, touzour mazinen pour vin “en legzanp” an sa ki konsern ‘lapirte.’—1 Tim. 4:12.

14. Ki mannyer progre spirityel i kapab ed ou si ou deside marye?

¹⁴ Matirite spirityel i osi anmenn sikse apre maryaz. En Kretyen ki matir spirityelman pou fer bokou zefor pour “konn en devlopman konplet parey Kris.” (Efe. 4:11-14) I travay dir pour devlop en personnalite parey pour Kris. Konman nou Legzanp “Kris li pa ti esey rod sa ki fer li plezir.” (Rom. 15:3) Kan tou le de konzwen pa rod zot prop lentere me plito sa ki pour sa lot, zot lavi fanmir pou ranpli avek lape ek konfor. (1 Kor. 10:24) En mari pou demontre en lanmour sakrifis e sa madanm pou determinen pour soumet avek son mari, parey Zezi i soumet avek son Sef.—1 Kor. 11:3; Efe. 5:25.

‘Ranpli ou devwar plennman’

15, 16. Ki mannyer ou kapab fer ou progre evidan dan ou minister?

¹⁵ Pour met lanfaz lo responsabilite enportan ki Timote ti annan, zapot Pol ti ekrir: “Mon demann ou devan Bondye e devan Kris Zezi. . . . Anons Laparol, ensiste dan tou lokazyon ki prezante.” I ti azoute: “Fer ou travay konman predikater levanzil, e ranpli ou devwar [“plennman,” NW] dan servis Bondye.” (2 Tim. 4:1, 2, 5) Pour akonplir sa travay, Timote ti devret ganny “nouri par bann parol lafwa.”—Lir 1 Timote 4:6.

¹⁶ Ki mannyer ou kapab ganny “nouri par bann parol lafwa”? Zapot Pol ti ekrir: “Pas ou letan dan lektir parol Bondye an piblik, pres laparol e ansennyen. Pran byen a-ker sa responsabilite e met tou ou zefor ladan.” (1 Tim. 4:13, 15) Pour amelyore fodre annan en letid personnel o profon. Sa lekspresyon “met tou ou zefor ladan” i donn lide en dimoun ki vreman konsantre afon dan en keksoz. Ki mannyer ou abitye etidye? Eski ou met tou ou zefor pour konsantre lo bann keksoz profon parol Bondye? (1 Kor. 2:10, NW) Ouswa eski ou pa fer bokou zefor? Si ou pran byen aker sa ki ou etidye, ou pou ganny motive.—Lir Proverb 2:1-5.

17, 18. (a) Ki abilite ou devret fer bokou zefor pour devlope?(b) Ki mannyer ler ou devlop menm latitid avek Timote sa pou ed ou dan ou minister?

¹⁷ Michelle, en zenn ser pionye ti dir: “Pour vreman vin efikas dan minister, mon annan en bon progranm letid personnel e mon asiste renyon regilyerman. Gras a sa, mon touzour pe progrese spirityelman.” Servi konman en pionye pou sirman ed ou amelyor ou abilite pour servi Labib dan minister e pour progrese spirityelman. Fer bokou zefor pour vin en bon lekter e fer bann komanter ki batir dan renyon. Konman en zenn ki matir spirityelman, ou pou anvi prepar bann ekspoze ki enstriktif dan Lekol Minister Teokratik e servi byen sa lenformasyon ki ou’n gannyen.

¹⁸ ‘Fer travay konman en predikater levanzil’ i vedir fer ou minister pli efikas e ed lezot pour ganny delivrans. Sa i enplik devlop sa “lar pour ansennyen.” (2 Tim. 4:2, NW) Si ou fer laranzman pour partisip dan minister avek bann ki eksperyanse dan sa travay, ou pou kapab aprann zot metod lansennyman, parey Timote ti aprann ler i ti travay avek zapot Pol. (1 Kor. 4:17) Kan i ti pe refer avek bann dimoun ki i ti’n ede, i ti dir ki i pa ti zis anons zot sa bon nouvel, me ki i ti osi donn son “prop lavi” oubyen servi son lavi pour ed zot akoz i ti kontan zot. (1 Tesa. 2:8) Pour swiv legzanp zapot Pol dan ou minister, ou devret annan menm leta lespri avek Timote, ki ti senserman pran swen avek lezot e travay dir pour anons sa bon nouvel. (Lir Filipyen 2:19-23.) Eski ou osi ou demontre sa leta lespri sakrifis dan ou minister?

Progre i anmenn vre satisfaksyon

19, 20. Akoz i en lazwa pour fer bann progre spirityelman?

¹⁹ I demann bokou zefor pour progrese spirityelman. Me si ou devlop ou abilite pour ansennyen avek pasyans, avek letan ou pou kapab annan sa privilez pour “anrisi bokou dimoun” spirityelman e zot pou vin ou “lazwa e [ou] kouronn lafyerte.” (2 Kor. 6:10; 1 Tesa. 2:19) Fred, en serviter aplentan, ti eksplike: “Plis ki zanmen oparavan mon pas mon letan pour ed lezot. I sirman vre ki i annan plis lazwa pour donnen ki resevwar.”

²⁰ Konsernan lazwa ek satisfaksyon ki i ti eksperyanse anmezir ki i ti progrese spirityelman, en zenn pionye ki apel Daphne ti dir: “Mon ti devlop en relasyon pli pros avek Zeova anmezir ki mon ti konmans apresye li konman en Bondye reel. Kan ou fer plezir Zeova par servi tou ou abilite, ou santi ou pli byen e ou vreman annan sa satisfaksyon!” Menm si lezot pa touzour remark progre ki ou pe fer spirityelman, Zeova i touzour vwar e i vreman apresye li. (Ebr. 4:13) San okenn dout, zot bann zenn Kretyen, zot kapab rann glwar e loue nou Papa ki dan lesyel. Kontinyen fer son leker rezwir anmezir ki ou senserman les lezot vwar ou progre.—Prov. 27:11.

[Not anba lo paz]

Ki ou’n aprann?

• Kwa ki enplike dan fer progre spirityelman?

• Ki mannyer ou kapab les lezot vwar ou progre . . .

kan pe fer fas avek difikilte?

kan pe prepare pour marye?

dan minister?

[Portre lo paz 18]

Lapriyer i kapab ed ou fer fas avek difikilte

[Portre lo paz 18]

Ki mannyer bann zenn proklanmater i kapab devlop metod lansennyman ki efikas?