Ed Lezot Pour Aksepte Sa Mesaz Rwayonm

“Agripa ti dir avek Pol: ‘Dan en pti moman ou pou persyad mwan pour vin en Kretyen.’”—AKT 26:28, NW.

 1, 2. Akoz zapot Pol ti la devan Gouverner Festis ek Lerwa Erod Agripa 2?

LANNEN 58 N.L., Lerwa Erod Agripa 2 ek son ser Berenis ti vin rann vizit Gouverner Porsiis Festis an Sezare. Envite par Gouverner Festis, zot ti vini “dan en gran seremoni avek lafanfar, ti antre dan lasal lodyans ansanm avek bann sef militer, ek bann dimoun enportan dan lavil.” Festis ti donn lord pour zapot Pol ganny anmennen dan zot prezans. Ki mannyer sa disip Zezi Kri ti’n ariv la devan Gouverner Festis pour ganny zize?—Akt 25:13-23.

² Sa ki Festis ti dir son bann envite i reponn sa kestyon. I ti dir: “Lerwa Agripa e zot tou ki la avek nou, zot war sa zonm kont ki tou bann Zwif in vin port plent avek mwan isi ensi ki Zerizalenm an kriyan ki i pa merit viv. Dan mon kote mon’n dekouver ki i pa’n fer nanryen ki merit lanmor, me parski limenm in fer rapel devan Sezar, mon’n deside pour anvoy li. Me mon napa nanryen byen kler pour ekri lo son ka pour Sezar. Pour sa rezon mon’n fer li prezant devan zot e sirtou devan ou, lerwa Agripa, pour ki ler zot a’n poz li kestyon mon a ganny keksoz pour ekri. I paret mwan pa rezonnab, annefe, pour anvoy en prizonnyen san fer byen kler ki plent i annan kont li.”—Akt 25:24-27.

 3. Akoz bann sef relizye ti fer bann fo lakizasyon kont Pol?

³ Sa ki Festis ti dir i endike ki ti annan serten fo lakizasyon kont Pol konmkwa i ankouraz rebelyon. Sa i en krim ki ti kapab anmenn santans lanmor. (Akt 25:11) Me Pol ti inosan. Se zalouzi bann sef relizye an Zerizalenm ki ti fer zot fer sa bann lakizasyon. Zot ti opoz travay Pol konman en proklanmater Rwayonm e zot ti ankoler akoz i ti pe ed lezot pour vin disip Zezi Kri. I ti ganny pran Zerizalenm e ganny eskorte avek solda dan lavil Sezare, kot sant prensipal lafors militer Romen. Laba i ti fer rapel pour prezant devan Sezar e i ti ganny transporte an Ronm.

 4. Ki Lerwa Agripa ti dir san ekspekte?

⁴ Imazin Pol dan pale gouverner devan en group dimoun parmi lekel ti annan dirizan en landrwa enportan dan Lanpir Romen. Lerwa Agripa i vir avek Pol e dir: “Mon donn ou permisyon pour prezant ou defans.” Pandan ki Pol pe koze, en keksoz ekstraordiner i arive. Sa ki Pol i dir i konmans enfliyans lerwa. Anfet, Lerwa Agripa i dir: “Dan en pti moman ou pou persyad mwan pour vin en Kretyen.”—Akt 26:1-28, NW.

 5. Akoz parol ki Pol ti dir Agripa ti sitan efikas?

⁵ Zis mazinen! Pol ti defann son lekor sitan byen ki en dirizan ti ganny enfliyanse par sa pouvwar Parol Bondye pour penetre dan leker. (Ebre 4:12) Kwa ki ti fer defans Pol sitan efikas? Ki nou kapab aprann avek Pol ki kapab ed nou dan nou travay pour fer disip? Si nou egzamin byen son defans, nou pou vwar de pwen prensipal ki resorti byen: (1) Pol ti prezant son ka dan en fason konvenkan. (2) I ti byen servi son konnesans lo Parol Bondye, zis parey en artizan i byen servi en zouti.

Servi ou Abilite pour persyad lezot

 6, 7. (a) Ki sa mo “persyade” i vedir dan Labib? (b) Konman ki persyade i kapab ed lezot dimoun pour aksepte en lansennyman Labib?

⁶ Dan liv Akt, mo Grek pour persyade i ganny servi souvan letan pe dekrir predikasyon Pol. Ki persyade i annan pour fer avek nou travay pour fer disip?

⁷ Dapre Vine’s Expository Dictionary of New Testament Words, sa mo “persyade” dan langaz ki Labib ti orizinalman ganny ekrir, i vedir “konvenk” oubyen ‘fer en dimoun sanz son lide par rezonn avek li oubyen par pran kont bann prensip moral.’ Egzamin sans orizinal sa mo i donn nou plis leklersisman. I donn lide konfyans. Alors, si ou persyad en dimoun pour aksepte en lansennyman Labib, ou’n ganny son konfyans, ki fer ki i met lafwa dan sa lansennyman laverite. I kler ki i pa sifi zis pour dir en dimoun sa ki Labib i dir pour li krwar ladan e fer sa ki i demann li. Sa dimoun i bezwen konvenki ki sa ki ou dir i vre, ki swa i en zanfan, en vwazen, en koleg travay, en kanmarad lekol, oubyen en fanmiy.—2 Timote 3:14, 15.

 8. Kwa ki enplike dan konvenk en dimoun pour krwar en laverite sorti dan Labib?

⁸ Ki mannyer ou kapab konvenk en dimoun ki sa ki ou pe proklanmen dan Parol Bondye i laverite? Pol ti sey fer tou pour sanz fason panse bann dimoun ki i ti koz avek. I ti fer sa an servan rezonnman lozik, bon largiman, ek siplikasyon senser.a Alors, olye zis dir ki en keksoz i vre, ou bezwen donn bann laprev satisfezan pour siport sa ki ou dir. Ki mannyer ou kapab fer sa? Fer sir sa ki ou dir i solidman baze lo Parol Bondye, pa lo ou pwennvi personnel. Servi osi lezot laprev pour apiy ou bann komanter senser baze lo Labib. (Proverb 16:23) Par egzanp, si ou fer resorti ki bann imen obeisan pou rezwir lavi dan paradi lo later, apiy sa pwen avek en teks Labib parey Lik 23:43 oubyen Izai 65:21-25. Ki mannyer ou kapab donn lezot laprev pour siport ou pwen biblik? Ou kapab servi bann legzanp ki sa dimoun i familye avek. Ou kapab atir son latansyon lo sa senp plezir ki nou gannyen gratwitman kan nou admir labote en soley kouse, kan nou santi loder agreab en fler, kan nou manz en fri delisye, oubyen sa lazwa pour vwar en manman zwazo ki pe nouri son piti. Ed li pour vwar ki sa bann plezir i laprev ki nou Kreater i anvi nou rezwir lavi lo later.—Eklezyast 3:11, 12.

 9. Ki mannyer nou kapab montre nou rezonnab dan nou travay predikasyon?

⁹ Kan ou pe sey persyad en dimoun pour aksepte en serten lansennyman Labib, fer atansyon ki ou lantouzyasm pa donn lenpresyon ki ou pa pare pour ekout pwennvi lezot. Liv Lekol Minister i donn nou sa konsey: “Ordinerman en dimoun pa pou byen aksepte en deklarasyon ki fran e direk ki demanti son krwayans menm si sa deklarasyon i kontyen plizyer verse pour siporte. Par egzanp, si ou zis kondann bann selebrasyon popiler akoz i sorti dan lorizin payen, sa i kapab pa sanz pwenn-vi sa dimoun lo bann selebrasyon. Ou pou pli reisi si ou rezonn avek dimoun.” Akoz nou devret fer bokou zefor pour rezonn avek dimoun? Sa liv i dir: “En lapros ki fer rezonnen i ankouraz konversasyon, i donn en dimoun serten keksoz pour reflesir lo la, e i kree loportinite pour lezot diskisyon plitar. I kapab azout plis lafors pour persyad lezot.”—Kolosyen 4:6.

Persyade pour tous Leker

10. Konman Pol ti konmans son defans devan Agripa?

¹⁰ Aprezan annou egzamin pli pre defans Pol dan Akt sapit 26. Remarke konman i konmans son diskour. Pour konmanse, Pol i vwar en rezon pour felisit Agripa, menm si sa lerwa ti annan en relasyon avek son ser Berenis, en keksoz ki ti vreman sokan. Pol ti dir: “Lerwa Agripa, mon konsider sa en privilez pour mwan ozordi defann mon lekor devan ou, kont tou sa bann keksoz ki bann Zwif i akiz mwan. Annefe, ou konn tre byen tou bann koutim Zwif ek zot bann size diskisyon. Alor mon demann ou pour ekout mwan avek pasyans.”—Akt 26:2, 3.

11. Konman sa ki Pol ti dir Agripa i demontre respe, e ki byenfe sa ti anmennen?

¹¹ Eski ou’n remarke ki Pol ti rekonnet pozisyon Agripa par adres li par son tit, Lerwa? Sa i montre respe. Pol ti osi akord loner Agripa par byen swazir parol ki i pou dir li. (1 Pyer 2:17) Pol ti rekonnet ki Agripa i konn tre byen bann koutim ek lalwa konplike son bann sitwayen Zwif e dir ki i ti kontan pour defann son lekor devan en dirizan byen enformen koumsa. Pol ki ti en Kretyen pa ti krwar i pli siperyer ki Agripa ki pa ti en Kretyen. (Filipyen 2:3) Okontrer, Pol ti sipliy lerwa Agripa pour ekout li avek pasyans. Dan sa fason, Pol ti kree en latmosfer ki ti pou fer Agripa, ensi ki lezot ki ti pe ekoute, pli pare pour aksepte sa ki i ti pe al dir. I ti pe poz en fondasyon, en pwen komen, lo ki i ti pou kapab batir son largiman.

12. Konman nou kapab tous leker bann ki ekout nou dan predikasyon?

¹² Parey Pol devan Agripa, letan nou pe prezant nou mesaz Rwayonm annou sey tous leker sa dimoun depi konmansman nou prezantasyon ziska finisyon. Nou kapab fer sa par demontre respe senser pour sa dimoun ki nou pe pres avek e montre en vre lentere dan son lorizin ek fason panse.—1 Korentyen 9:20-23.

Konn servi byen Parol Bondye

13. Ki mannyer ou kapab motiv bann dimoun ki ou koz avek, zis parey Pol?

¹³ Pol ti anvi motiv bann dimoun ki ti ekout li pour fer keksoz apre ki zot ti’n tann sa bon nouvel. (1 Tesalonisyen 1:5-7) Pour arive fer sa, i ti sey tous zot leker, sa landrwa kot nou ganny motive. Pour retourn ankor lo defans Pol devan Agripa, remarke konman Pol ti ‘anons byen Parol Bondye’ par refer avek bann keksoz ki Moiz ek lezot profet ti’n deza dir.—2 Timote 2:15.

14. Eksplike konman ki Pol ti sey konvenk Agripa.

¹⁴ Pol ti konnen ki Agripa ti en Zwif menm si i pa ti en pratikan. Vi ki i ti konnen ki Agripa ti konn byen larelizyon Zidaism, Pol ti fer li vwar ki son predikasyon “pa pe anons lot keksoz ki sa ki Moiz ek bann profet in dir devre arive” konsernan lanmor ek rezireksyon Mesi. (Akt 26:22, 23) Pol ti adres Agripa direkteman, par demann li: “Lerwa Agripa, eski ou krwar dan bann profet?” Agripa ti vwar li dan en sitiasyon vreman difisil. Si i ti dir i pa krwar dan bann profet, sa ti pou gat son repitasyon konman en krwayan Zwif. Me si i ti dakor avek rezonnman Pol, i ti pou pe pran kote avek sa zapot e i ti riske ganny apele en Kretyen. Pol ti reponn son prop kestyon avek lasazes: “Mon konnen ki ou krwar!” Konman ki leker Agripa ti pous li pour reponn? I ti reponn: “Dan en pti moman ou pou persyad mwan pour vin en Kretyen.” (Akt 26:27, 28, NW ) Kantmenm Agripa pa ti vin en Kretyen, i kler ki Pol ti enfliyans son leker a en serten degre avek son mesaz.—Ebre 4:12.

15. Konman Pol ti kapab konmans en kongregasyon an Tesalonik?

¹⁵ Eski ou’n remarke ki Pol pa ti zis anons sa bon nouvel me i ti osi persyad lezot pour aksepte sa mesaz? Parski Pol ti servi sa lapros e i ti ‘anons byen parol Bondye,’ serten pa ti zis ekout li me zot ti vin bann krwayan. Sa ti leka an Tesalonik kot Pol ti rod bann Zwif ek non-Zwif ki ti annan lakrent pour Bondye dan sinagog. Resi dan Akt 17:2-4 i dir: “Parey son labitid Pol ti al dan sinagog. Pandan trwa saba deswit i ti diskit lo Lekritir avek bann dimoun ki ti la. I ti eksplik zot e montre ki dapre Lekritir Mesi ti bezwen soufer e resisite apre son lanmor . . . Serten parmi zot ti krwar parol Pol.” Pol ti kapab konvenk dimoun. I ti rezonn avek zot, eksplike e prouve par Lekritir ki Zezi ti sa Mesi promiz. Avek ki rezilta? En kongregasyon ti ganny formen.

16. Ki mannyer ou kapab pli apresye predikasyon Rwayonm?

¹⁶ Eski ou kapab devlop en pe plis ou abilite pour persyad lezot letan ou pe eksplik zot Parol Bondye? Si wi, ou pou pli apresye e satisfe avek ou predikasyon ek lansennyman lo Rwayonm Bondye. Se sa ki serten proklanmater ki’n aksepte sizesyon pour servi Labib pli souvan dan predikasyon in eksperyanse.

17. Rakont en leksperyans personnel oubyen rezim sa leksperyans dan paragraf pour montre konman i itil pour servi Labib dan predikasyon.

¹⁷ Par egzanp, en sirveyan rezyonal Temwen Zeova ti ekrir: “Aprezan en bon pe frer ek ser pe anmenn en Labib dan zot lanmen kan zot pres port an port. Sa in ed bann proklanmater pour lir en pasaz Labib avek bokou dimoun ki zot rankontre. I’n ed bann dimoun ki nou pres avek e osi bann proklanmater pour pa zis asosye nou predikasyon avek magazin ek liv, me osi avek Labib.” Byensir, i depan lo diferan fakter, enkli koutim lokal, pour deside si nou pou anmenn Labib dan en fason ki lezot i vwar. Toudmenm, nou devret annan sa dezir pour konn servi byen Parol Bondye pour persyad lezot pour aksepte mesaz Rwayonm.

Annan menm Pwennvi avek Bondye lo Predikasyon

18, 19. (a) Konman Bondye i vwar nou minister, e akoz nou devret annan menm pwennvi avek li? (b) Kwa ki kapab ed nou pour fer bann bon retourn vizit? (Vwar bwat avek tit “Konman fer bann bon Retourn Vizit,” lo paz 14.)

¹⁸ En lot fason pour nou tous leker bann dimoun ki nou koz avek se par vwar predikasyon parey Zeova i vwar e annan pasyans. Bondye i anvi ki tou kalite dimoun i “ganny konnesans laverite.” (1 Timote 2:3, 4) Eski pa nou anvi sa nou osi? Zeova i osi annan pasyans e son pasyans i donn loportinite bokou dimoun pour repantir. (2 Pyer 3:9) Alors, kan nou vwar en dimoun ki pare pour ekout sa mesaz Rwayonm, petet i neseser pour retournen plizyer fwa pour kiltiv sa lentere. I pran letan e i demann pasyans pour kapab vwar lagrenn laverite pouse. (1 Korentyen 3:6) Sa bwat dan sa lartik, ki annan pour tit “Konman fer bann bon Retourn Vizit,” i ofer serten sizesyon pour devlop lentere bann dimoun. Mazinen ki lavi dimoun—zot problenm ek sitiasyon—pe konstaman sanze. Petet nou bezwen vizit zot plizyer fwa avan ki nou zwenn zot se zot, me i vo lapenn fer zefor. Nou anvi donn zot en loportinite pour tann mesaz delivrans Bondye. Alors, demann Zeova lasazes dan lapriyer pour devlop ou abilite pour persyad lezot pour aksepte mesaz Rwayonm.

¹⁹ Enn fwa ki nou’n vwar en dimoun ki anvi tann plis konsernan sa mesaz Rwayonm, ki nou konman bann zouvriye nou kapab fer ankor? Nou lartik swivan i donn serten sizesyon.

[Not anba lo paz]

Eski ou rapel?

• Kwa ki ti fer defans Pol devan Lerwa Agripa efikas?

• Ki mannyer nou mesaz i kapab tous leker dimoun?

• Kwa ki pou ed nou byen servi Parol Bondye pour tous leker dimoun?

• Ki mannyer nou kapab devlop menm pwennvi avek Bondye lo predikasyon?

[Bwat/Portre lo paz 16]

Konman fer bann bon Retourn Vizit

• Montre en lentere senser dan sak dimoun.

• Swazir en size enteresan dan Labib pour diskite.

• Poz en fondasyon pour sak retourn vizit.

• Kontinyen mazin sa dimoun apre ki ou’n kit li.

• Retourn vitman, petet enn oubyen de zour apre, pour gard kontak avek sa dimoun enterese.

• Gard antet ki ou lobzektif se pour konmans en letid Labib.

• Priy Zeova pour ki sa lentere i grandi.

[Portre lo paz 15]

Pol ti servi son abilite pour persyade kan i ti paret devan Gouverner Festis ek Lerwa Agripa