I annan en bon nouvel ki tou dimoun i bezwen tande

“Levanzil, [oubyen “bon nouvel,” NW] i en pisans Bondye pour sov tou sa ki kwar.”​—ROM. 1:16.

1, 2. Akoz ou pres “Bonn Nouvel Rwayonm,” e ki bann laspe sa bon nouvel ki ou met lanfaz lo la?

‘M ON kontan pour anons sa bon nouvel tou le zour.’ Tre probab ou osi ou annan menm santiman oubyen ou’n deza dir sa. Konman en Temwen Zeova devoue, ou konnen ki i enportan pour anons sa “Bonn Nouvel Rwayonm.” I posib ki ou kapab resit par ker sa profesi Zezi konsernan sa travay.​—Mat. 24:14.

² Ou pe kontiny sa ki Zezi ti konmanse, ler ou pe “anons Bonn Nouvel konsernan Rwayonm.” (Lir Lik 4:43.) San okenn dout, en pwen ki ou koz plis lo la, se ki Bondye pou byento entervenir dan bann zafer imen. Pandan “gran ladetres,” i pou met en lafen avek fo larelizyon e retir tou lemal lo later. (Mat. 24:21, NW) Petet osi, ou montre ki Rwayonm Bondye pou reetablir Paradi lo later kot i pou annan lape ek lazwa annabondans. Anfet, sa “Bonn Nouvel konsernan Rwayonm” i form parti “sa bonn nouvel” ki ti’n ganny anonse avek Abraam davans ki dir: “Tou nasyon pou ganny beni atraver ou.”​—Gal. 3:8.

 3. Akoz nou kapab dir ki zapot Pol ti met lanfaz lo bon nouvel dan liv Romen?

³ Eski i kapab ki nou pa pe port ase latansyon lo en laspe vreman enportan sa bon nouvel ki bann dimoun i bezwen tande? Dan sa let pour bann Romen, zapot Pol ti servi sa mo “Rwayonm” zis enn fwa, me i ti servi sa lekspresyon “Bonn Nouvel” 12 fwa dan langaz Grek. Sa lekspresyon “Bonn Nouvel” i osi ganny tradwir “Levanzil” dan Nouvo Testaman. (Lir Romen 14:17.) Dan sa liv, ki laspe sa bon nouvel Pol ti souvan refer avek? Akoz sa enn bonn nouvel i vreman enportan e akoz nou devret gard li antet anmezir nou pres “Bonn Nouvel Bondye” avek bann dimoun dan nou teritwar?​—Mark 1:14; Rom. 15:16; 1 Tesa. 2:2.

Ki bann Kretyen Ronm ti bezwen rekonnet?

 4. Ler Pol ti ganny anprizonnen Ronm pour premye fwa, lo kwa i ti prese?

⁴ Annou get sa ki Pol ti ekrir ler i ti ganny anprizonnen Ronm pour premye fwa. Nou lir ki ler serten Zwif ti vin vizit li, i ti koz an detay lo (1) ‘Rwayonm Bondye e i ti esey konvenk zot konsernan (2) Zezi.’ Avek ki rezilta? “I annan ki ti aksepte sa ki i ti pe dir, me i annan ki pa ti krwar.” Apre sa, Pol “ti resevwar tou bann ki ti vin war li” e i ‘ti pres (1) Rwayonm Bondye e ansennyen konsernan (2) Senyer Zezi Kri.’ (Akt 28:17, 23-31) I evidan ki Pol ti koz lo Rwayonm Bondye. Me lo ki laspe i ti met lanfaz ankor? En laspe enportan ki annan pour fer avek Rwayonm, sa i rol Zezi dan plan Bondye.

 5. Lo kwa zapot Pol ti met lanfaz dan son liv pour bann Romen?

⁵ Tou dimoun i bezwen konn Zezi e met lafwa dan li. Zapot Pol ti met lanfaz lo sa pwen dan son liv pour bann Romen. Pli boner, par egzanp, i ti ekrir lo sa “Bondye ki [i] servi avek tou [son] leker an anonsan Bonn Nouvel son Garson.” I ti osi dir: “Mon pa onte pour anons Levanzil, i en pisans Bondye pour sov tou sa ki kwar.” Pli tar, i ti osi dir: “Dapre Levanzil ki mon prese, la sa ki pou arive sa zour kan Bondye par Kris Zezi pou ziz tou bann keksoz sekre dan leker dimoun.” Finalman, i ti rakonte: “Mon’n alor anons plennman Bonn Nouvel konsernan Kris partou depi Zerizalenm ziska Iliri.”a (Rom. 1:9, 16; 2:16; 15:19, nou ki’n met an italik.) Akoz ou krwar Pol ti met lanfaz lo Zezi Kri avek bann Romen?

6, 7. Ki nou kapab dir lo kongregasyon Ronm e lo son bann diferan manm?

⁶ Nou pa konnen ki mannyer kongregasyon Ronm ti konmanse. Eski serten Zwif ouswa bann ki ti’n konverti dan larelizyon Zwif ki ti la zour Lapannkot lannen 33 N.L. ti vin Kretyen e retourn Ronm? (Akt 2:10) Oubyen eski serten marsan ek vwayazer ti ede anmenn laverite Ronm? Ler Pol ti ekrir son liv, apepre 56 N.L., kongregasyon ti’n deza fini ganny etablir depi en bon pe letan. (Rom. 1:8) Ki kalite dimoun ki ti dan kongregasyon Ronm?

⁷ Serten ti bann Zwif. Pol ti fer salanm Andronik ek Zinyas, ‘son bann fanmir’ ki tre probab ti vedir zot ti bann fanmir zapot Pol ki ti Zwif parey li menm. Ronm, i ti osi annan Akilas ki ti fer latant ek son madanm Prisil e zot osi zot ti bann Zwif. (Rom. 4:1; 9:3, 4; 16:3, 7; Akt 18:2) Me Pol ti osi fer salanm bokou lezot frer ek ser ki pa ti Zwif. Serten ti kapab sorti “dan pale Sezar” ki kapab vedir ki zot ti bann lesklav ouswa bann senp zofisye Sezar.​—Fili. 4:22; Rom. 1:6; 11:13.

 8. Ki sityasyon difisil bann Kretyen Ronm ti bezwen fer fas avek?

⁸ Tou Kretyen Ronm ti fer fas avek en sityasyon difisil e parey nou menm. Pol ti fer sa kler ler i ti dir: “Parski tou dimoun in fer pese e pa’n arive ganny laglwar Bondye.” (Rom. 3:23) Tou bann ki Pol ti ekrir ti byen bezwen rekonnet ki zot tou zot ti peser e zot ti bezwen met lafwa dan sa mwayen ki Bondye in met an plas pour regle sa sityasyon.

Aksepte ki nou fer pese

 9. Dapre Pol, ki rezilta sa bon nouvel i kapab annan?

⁹ Pli boner dan son let pour bann Romen, Pol ti koz lo sa rezilta merveye ki sa bon nouvel i kapab annan ler i ti dir: “Mon pa onte pour anons Levanzil, i en pisans Bondye pour sov tou sa ki kwar, premyerman Zwif, answit bann Grek.” Wi, i ti posib pour ganny sove. Selman, i ti neseser pour annan lafwa, parey sa pwen byen enportan dan Abakouk 2:4 i montre, ki dir: “Gras a lafwa, sa enn ki drwat pou viv.” (Rom. 1:16, 17, nou ki’n met an italik; Gal. 3:11; Ebr. 10:38) Me ki mannyer sa bon nouvel ki kapab sov nou, i relye avek sa lide ki “tou dimoun in fer pese”?

10, 11. Akoz sa lide dan Romen 3:23 konsernan pese i kapab drol pour serten dimoun?

¹⁰ Pour ki en dimoun i kapab devlop en lafwa ki sov son lavi, i devret aksepte ki i fer pese. Sa lide i kapab paret fer sans pour bann dimoun ki krwar dan Bondye depi i ptipti oubyen ki konn en pe keksoz dan Labib. (Lir Eklezyast 7:20.b) Ki swa zot dakor avek sa lansennyman oubyen non, omwen zot annan en lide lo sa ki Pol ti pe esey dir konmkwa: “Tou dimoun in fer pese.” (Rom. 3:23) Pourtan, dan nou minister nou riske zwenn bann dimoun ki pa konpran sa ki Pol ti pe dir.

¹¹ Dan serten pei, dimoun an zeneral pa’n grandi avek sa lide ki zot in ne konman bann dimoun ki fer pese ouswa ki’n erit pese. Tre probab, zot realize ki zot fer bann fot oubyen zot annan serten move tre e ki zot in fer serten move keksoz. Zot vwar ki lezot osi i dan en sityasyon parey. Toudmenm, akoz zot lorizin zot pa vreman konpran pour ki rezon nou tou nou azir koumsa. An realite, dan serten langaz, si ou dir ki en dimoun i fer pese, i kapab vedir ki i en kriminel oubyen i’n kas kek lalwa. I evidan ki i pa fasil pour bann tel dimoun aksepte ki zot fer pese, dan sa sans ki Pol ti pe dir.

12. Akoz bokou dimoun pa krwar ki nou tou nou’n fer pese?

¹² Menm dan bann pei Kretyen, plizyer pa krwar dan sa lide ki nou bann peser. Akoz? Menm si annan de ler zot al legliz, zot konsider sa resi dan Labib lo Adan ek Ev konman en zistwar oubyen fo krwayans. Lezot i grandi dan en sosyete kot dimoun i rezet Bondye. Zot pa ni konnen si Bondye i egziste. Pour sa rezon, zot vwar li difisil pour aksepte ki en personnaz pli siperyer i kapab etablir bann standar pour bann imen e ki si zot pa respekte sa bann standar zot pe fer pese. Dan en sans, zot parey bann dimoun dan premye syek ki Pol ti dir zot “san okenn lespwar e san Bondye dan lemonn.”​—Efe. 2:12.

13, 14. (a) Donn en rezon akoz bann ki pa krwar dan Bondye e dan pese napa leskiz. (b) Vi ki zot pa krwar dan Bondye e dan pese, ki sa in fer zot fer?

¹³ Dan let ki Pol ti ekrir bann Romen, i ti donn de rezon akoz lorizin sa bann dimoun pa devret en leskiz ni dan sa letan, ni ozordi. Premye rezon se ki kreasyon i prouv legzistans en Kreater. (Lir Romen 1:19, 20.) Sa i annakor avek sa ki Pol ti ekrir bann Ebre ler i ti Ronm: “Tou lakaz i bezwen annan en dimoun ki’n konstri li, me konstrikter tou keksoz se Bondye.” (Ebr. 3:4) Son rezonnman i aplikab pour prouve ki i annan en Kreater ki ti konstri oubyen kree liniver antye.

¹⁴ Alor, Pol ti annan levidans solid ler i ti ekrir bann Romen ki personn ‘napa leskiz’ pour ador bann zidol mor, e sa ti aplik osi pour bann Izraelit dan letan lontan. Nou kapab dir menm zafer konsernan bann ki’n tonm dan bann pratik seksyel imoral ki kontrer avek relasyon seksyel natirel ant en zonm ek en madanm. (Rom. 1:22-27) Finalman, Pol ti konklir ki “Zwif konman Grek, zot tou zot anba dominasyon pese.”​—Rom. 3:9.

En konsyans

15. Lekel ki annan en konsyans e ki lefe i annan lo zot?

¹⁵ Liv Romen i donn nou en lot rezon akoz bann dimoun i bezwen rekonnet ki zot bann peser e ki zot bezwen led pour sorti dan sa sityasyon difisil. An rapor avek lalwa ki Bondye ti donn bann Izraelit, Pol ti ekrir: “Tou bann ki’n fer pese avek konnesans lalwa pou ganny zize dapre lalwa.” (Rom. 2:12) Dan son rezonnman, i osi montre ki bann dimoun dan lezot nasyon ouswa group etnik ki pa ti konn lalwa Bondye i “obei sa ki lalwa i ordonnen par lobeisans zot konsyans.” Par egzanp, akoz sa bann dimoun pou souvandfwa enterdi relasyon seksyel ant menm fanmir, mert ek vole? Parey Pol ti dir: Parski zot ti annan en konsyans.​—Lir Romen 2:14, 15.

16. Menm si dimoun i annan en konsyans, akoz sa pa vedir ki zot pa pou fer pese?

¹⁶ Par kont, ou pou dakor pour dir ki pa akoz en dimoun i annan en konsyans ki montre li sa ki byen ek sa ki mal ki sa i neseserman vedir ki i pou swiv gidans son konsyans. Legzanp bann Izraelit i montre sa byen. Menm si bann Izraelit ti’n ganny en konsyans avek Bondye ek bann lalwa spesifik konsernan vole e adilter, zot ti souvan kas lalwa Bondye e osi dezobeir zot konsyans. (Rom. 2:21-23) Pour sa de rezon, zot ti koupab, zot ti fer pese, zot pa ti arive swiv bann standar Bondye e fer son lavolonte. Sa ti definitivman afekte sa relasyon ki zot ti annan avek zot Kreater.​—Lev. 19:11; 20:10; Rom. 3:20.

17. Ki lankourazman nou kapab gannyen dan liv Romen?

¹⁷ Sa ki nou’n vwar dan liv Romen i kapab donn lenpresyon ki sityasyon bann imen, enkli nou osi, i vreman deplorab devan Bondye Tou Pwisan. Toudmenm, pa se tou ki Pol ti dir. I ti sit parol David dan Psonm 32:1, 2: “Byennere bann ki ganny pardonnen zot fot, e zot pese i ganny kouver. Byennere sa enn ki Senyer pa pran an konsiderasyon son pese.” (Rom. 4:7, 8) Wi, Bondye in fer provizyon legal pour nou pese ganny pardonnen.

Bon nouvel ki baze lo Zezi

18, 19. (a) Lo ki laspe sa bon nouvel Pol ti met lanfaz lo la dan Romen? (b) Pour resevwar bann benediksyon atraver Rwayonm, ki nou bezwen rekonnet?

¹⁸ Kekfwa ou pou dir: “Sa i en bon nouvel!” Pa i vre! I fer nou mazin sa laspe sa bon nouvel ki Pol ti met lanfaz lo la dan liv Romen. Parey Pol ti dir: “Mon pa onte pour anons Levanzil, i en pisans Bondye pour sov tou sa ki kwar.”​—Rom. 1:15, 16.

¹⁹ Sa bon nouvel i baze lo rol Zezi dan lakonplisman plan Bondye. Pol ti pou vreman kontan pour vwar “dapre Levanzil ki [i ti] prese, . . .  sa ki [ti] pou arive sa zour kan Bondye par Kris Zezi [ti] pou ziz tou bann keksoz sekre” limanite. (Rom. 2:16) Ler zapot Pol ti dir sa, i pa ti pe dir ki “Rwayonm Kris ek Bondye” oubyen lavolonte Bondye atraver son Rwayonm ti napa lenportans. (Efe. 5:5) Me i ti montre ki pour nou viv e ganny bann benediksyon ki Rwayonm Bondye pou anmennen, nou bezwen rekonnet ki (1) nou fer pese devan Bondye e (2) rezon akoz nou bezwen demontre lafwa dan Zezi Kri pour nou pese ganny pardonnen. Ler en dimoun i arive konpran e aksepte sa bann laspe dan plan Bondye e vwar sa lavenir ki i pou gannyen, i kapab dir: “Sa i vreman en bon nouvel!”

20, 21. Dan nou minister, akoz nou devret gard antet sa bon nouvel ki Pol ti met lanfaz lo la dan liv Romen e avek ki rezilta?

²⁰ Nou pa devret zanmen oubliy sa laspe dan sa bon nouvel ler nou partisip dan nou minister Kretyen. Konsernan Zezi, Pol ti sit parol Izai an dizan: “Tou dimoun ki kwar dan li pa pou dezapwente.” (Rom. 10:11; Iza. 28:16) Mesaz de baz lo Zezi pa pou drol pour bann dimoun ki annan en serten konnesans lo sa ki Labib i dir lo pese. Par kont, pour lezot, sa mesaz i kapab en pe nouvo, en keksoz ki zot pa ti konnen ouswa pa ti krwar ladan dan zot kiltir. Anmezir ki sa bann i arive krwar dan Bondye e met konfyans dan Labib, nou pou bezwen eksplik zot rol Zezi. Sa lot lartik pou montre nou ki mannyer Romen sapit 5 i donn plis detay lo sa laspe sa bon nouvel. Tre probab ou pou vwar li vreman itil dan ou minister.

²¹ Pa i vreman gou pour vwar bann dimoun senser arive konpran sa bon nouvel ki liv Romen i koz lo la plizyer fwa! Vreman, sa bon nouvel “i en pisans Bondye pour sov tou sa ki kwar.” (Rom. 1:16) Nou pa pou zis ganny nou rekonpans, me nou pou osi vwar lezot annan menm santiman avek sa ki Pol ti dir dan Romen 10:15: “I en keksoz merveye pour war arive bann ki anons bonn nouvel.”​—Iza. 52:7.

[Not anba lo paz]

Eski ou rapel?

• Ki laspe sa bonn nouvel Pol ti koz lo la dan liv Romen?

• Ki laverite enportan nou bezwen ed lezot konpran?

• Ki mannyer sa “Bonn Nouvel konsernan Kris” i kapab vin en benediksyon pour ou ek lezot?

[Ekstre lo paz 16]

Sa bonn nouvel ki ganny fer resorti dan Romen i enplik rol enportan Zezi dan plan Bondye

[Portre lo paz 17]

Depi nou nesans, nou tou nou’n ganny kondannen akoz pese!