Rann Glwar Bondye avek “en sel Lavwa”

“Avek en sel lavwa, zot rann glwar Bondye, Papa nou Senyer Zezi-Kri.” —Romen 15:6.

 1. Ki leson lo konman pour vwar diferan pwennvi Pol ti partaz avek bann konpanyon Kretyen?

PA TOU Kretyen ki fer menm swa oubyen kontan menm keksoz. Pourtan, tou Kretyen i bezwen mars lanmen dan lanmen lo sa semen ki anmenn ver lavi. Eski sa i posib? Wi, si nou pa fer sa bann pti diferans vin en gro zafer. Sa i en leson ki zapot Pol ti partaz avek bann konpanyon Kretyen dan premye syek. Ki mannyer i ti eksplik sa pwen enportan? Konman nou kapab aplik son konsey enspire ozordi?

Linite i enportan parmi Kretyen

 2. Ki mannyer Pol ti met lanfaz lo nesesite pour ini ansanm?

² Pol ti konnen i tre enportan pour annan linite parmi Kretyen, e i ti donn bann bon konsey pour ed bann Kretyen siport kanmarad avek lanmour. (Efezyen 4:1-3; Kolosyen 3:12-14) Toudmenm, apre ki i ti’n etablir plizyer kongregasyon e vizit lezot kongregasyon pandan en peryod plis ki 20 an, i ti konnen ki prezerv linite pa ti pou en keksoz fasil pour fer. (1 Korentyen 1:11-13; Galat 2:11-14) Alors, i ti konsey bann frer ek ser an Ronm: “Ki Bondye, ki donn pasyans ek konsolasyon, i rann zot byen dakor avek kanmarad . . . pour ki zot tou ansanm, avek en sel lavwa, zot rann glwar Bondye, Papa nou Senyer Zezi-Kri.” (Romen 15:5, 6) Ozordi, nou osi konman pep Bondye ki ini nou bezwen rann li glwar “avek en sel lavwa.” Ki nou pe fer dan sa domenn?

 3, 4. (a) Ki lorizin diferan bann Kretyen an Ronm ti annan? (b) Ki mannyer bann Kretyen an Ronm ti pou kapab servi Zeova “avek en sel lavwa”?

³ Bokou Kretyen an Ronm ti bon zanmi avek Pol. (Romen 16:3-16) Kantmenm zot lorizin ti diferan, Pol ti aksepte tou son bann frer konman bann “ki Bondye i kontan.” I ti ekrir: “Mon remersi Bondye, par Zezi-Kri pour zot tou, parski lemonn antye in tann koz lo zot lafwa dan Zezi-Kri.” I kler ki bann Romen ti egzanpler dan plizyer domenn. (Romen 1:7, 8; 15:14) Me anmenmtan, serten manm dan kongregasyon ti annan diferan pwennvi lo serten size. Vi ki bann Kretyen ozordi i sorti dan diferan lorizin ek kiltir, egzamin konsey Pol lo konman pour konsider sa bann diferans i kapab ed zot pour koz “avek en sel lavwa.”

⁴ An Ronm ti annan bann Kretyen Zwif ensi ki lezot nasyonalite. (Romen 4:1; 11:13) Serten Kretyen Zwif pa ti kapab aret serten koutim ki zot ti obzerve anba Lalwa Moiz, kantmenm zot ti’n devret realize ki bann tel pratik pa ti neseser pour ganny sove. De lot kote, plizyer Kretyen Zwif ti aksepte ki sakrifis Kris ti’n liber zot avek sa bann restriksyon ki zot ti pe swiv avan vin Kretyen. Alors, zot ti aret swiv serten koutim oubyen fer serten keksoz ki zot ti fer oparavan. (Galat 4:8-11) Kantmenm sa, zot tou zot ti bann “ki Bondye i kontan,” parey Pol ti fer resorti. Zot tou zot ti pou kapab loue Bondye “avek en sel lavwa” si zot ti gard sa bon latitid anver kanmarad. Nou osi ozordi nou kapab annan diferan pwennvi lo serten keksoz. Alors, i ti a byen si nou port bokou latansyon lo konman Pol i eksplik sa prensip enportan.—Romen 15:4.

“Resevwar Kanmarad”

 5, 6. Akoz ti annan diferan pwennvi dan kongregasyon Ronm?

⁵ Dan son let ki i ti ekrir bann Romen, Pol i koz lo en sitiasyon kot lopinyon ti diferan. I ekrir: “I annan ki kwar ki i kapab manz tou keksoz, tandis ki en lot ki feb, i manz zis legim.” Akoz sa? Anba Lalwa Moiz, ti defann manz lavyann koson. (Romen 14:2; Levitik 11:7) Me sa Lalwa ti nepli aplikab apre ki Zezi ti mor. (Efezyen 2:15) Trwa an edmi apre lanmor Zezi, en lanz ti dir zapot Pyer ki dapre Bondye okenn manze pa devret ganny konsidere konman enpir. (Akt 11:7-12) Avek sa bann fakter antet, serten Kretyen Zwif ti’n kapab mazinen ki aprezan zot kapab manz lavyann koson oubyen lezot manze ki Lalwa ti defann manze.

⁶ De lot kote, pour lezot Kretyen Zwif, petet zis sa lide pour manz bann manze ki zot ti konsider enpir avan ti donn zot repinyans. Pour zot ki ti pli sansib, zot ti’n kapab ofanse kan zot ti vwar zot bann frer ki annan menm lorizin Zwif avek zot pe manz sa bann manze. Deplis, lezot Kretyen ki ti sorti dan en larelizyon ki pa ti defann manz nanryen, ti kapab sirprann pour vwar sa bann Zwif pe argimant lo manze. Byensir, i pa ti mal pour serten deside pa manz serten manze, pour vi ki zot pa ti ensiste ki sa ti neseser pour ganny sove. Toudmenm, sa bann diferan pwennvi ti’n kapab fer lev en gro dispit dan kongregasyon. Bann Kretyen an Ronm ti pou bezwen fer atansyon ki bann tel diferans pa anpes zot rann glwar Bondye “avek en sel lavwa.”

 7. Ki pwennvi diferan ti egziste konsernan obzerv en zour spesyal sak semenn?

⁷ Pol i donn en dezyenm legzanp: “En dimoun i konsider en zour pli enportan ki en lot; tandis ki en lot i konsider tou zour parey.” (Romen 14:5a) Anba Lalwa Moiz, zot ti napa drwa fer okenn travay zour Saba. Menm vwayaze ti severman restrikte sa zour. (Egzod 20:8-10; Matye 24:20; Akt 1:12) Me kan Lalwa ti ganny aboli, sa bann restriksyon ti nepli neseser. Kantmenm sa, petet serten Kretyen Zwif pa ti santi zot alez pour fer okenn travay oubyen gran vwayaz sa zour ki zot zot ti konsider sakre avan sa. Menm apre ki zot ti’n vin Kretyen, petet zot ti’n met sa setyenm zour dekote zis pour keksoz spirityel, kantmenm Bondye ti nepli pe demann zot pour obzerv Saba. Eski zot ti pe mal fer? Non, pour vi ki zot pa ti ensiste ki Bondye ti pe demann zot pour obzerv Saba. Alors, pour rezon konsiderasyon pour konsyans son bann frer Kretyen, Pol ti ekrir: “Fodre ki sak dimoun i annan lasirans dan son prop lespri.”—Romen 14:5.

 8. Kantmenm zot ti kapab montre konsiderasyon pour konsyans lezot, ki bann Kretyen an Ronm pa ti devret fer?

⁸ Pol ti ankouraz son bann frer pour pran pasyans avek bann ki ti pe lalit avek bann size ki annan pour fer avek zot konsyans. Anmenmtan, Pol ti osi kondann bann ki ti pe esey fors zot konpanyon Kretyen pour soumet avek Lalwa Moiz pour ki zot ganny sove. Par egzanp, apepre lannen 61 N.L., Pol ti ekrir liv Ebre, ki ti en let pwisan pour bann Kretyen Zwif ki ti eksplike byen kler ki obeir Lalwa Moiz ti napa okenn valer akoz bann Kretyen ti annan en lespwar pli siperyer ki baze lo sakrifis Zezi.—Galat 5:1-12; Tit 1:10, 11; Ebre 10:1-17.

 9, 10. Ki bann Kretyen i devret evite fer? Eksplike.

⁹ Parey nou’n vwar, Pol ti argimante ki fer diferan swa pa devret vin en menas pour nou linite osi lontan ki okenn prensip Kretyen pa pe ganny vyole. Se pour sa ki Pol ti demann bann Kretyen ki ti annan en konsyans feb: “Ou, akoz ou ziz ou frer?” I ti osi demann bann ki ti pli for (petet bann ki zot konsyans ti permet zot pour manz serten manze oubyen fer serten travay zour Saba ki Lalwa ti defann): “Akoz ou mepriz ou frer?” (Romen 14:10) Dapre Pol, bann Kretyen ki ti annan en konsyans feb ti bezwen evite ziz zot frer ki annan en pwennvi pli toleran. Anmenmtan, bann Kretyen ki for pa devret mepriz bann ki zot konsyans i ankor feb dan serten domenn. Zot tou zot devret respekte motivasyon lezot osi lontan ki i en bon motivasyon, e pa annan “en tro gran lopinyon lo zot menm.”—Romen 12:3, 18.

¹⁰ Pol ti eksplik sa pwennvi balanse koumsa: “Sa enn ki manze, pa devre mepriz sa enn ki pa manze, e sa enn ki pa manze pa devre kritik sa enn ki manze, parski Bondye in byen resevwar li.” Apre i ti dir: “Kris in resevwar zot, pour laglwar Bondye.” Vi ki Bondye ek Kris in aksepte tou le de, sa ki for ek sa ki feb, alors nou devret demontre menm latitid e “resevwar kanmarad.” (Romen 14:3; 15:7) Lekel ki pa pou dakor avek sa?

Lanmour fraternel i fer nou ini ozordi

11. Ki sitiasyon inik ti egziste dan letan Pol?

¹¹ Dan son let ki i ti ekrir bann Romen, Pol ti adres en sitiasyon ki ti inik. Zeova ti’n fek aboli en lalyans e etabli enn nouvo. Serten ti pe vwar li difisil pour aziste zot pwennvi. Sa kalite sitiasyon pa egziste ozordi, me bann problenm parey i kapab leve parler.

12, 13. Dan ki sitiasyon ozordi bann Kretyen i kapab montre konsiderasyon pour konsyans zot frer ek ser?

¹² Par egzanp, i kapab ki en ser Kretyen ti dan en larelizyon avan ki atas bokou lenportans avek en resanz vreman senp e ini. Kan i aksepte laverite, i kapab vwar li difisil pour sanz son pwennvi dan sa domenn. Petet i pa fasil pour li aksepte sa lide ki i pa defann met en lenz kouler e modes dan bann lokazyon apropriye oubyen met en pti gin makiyaz. Vi ki napa okenn prensip Labib ki pe ganny vyole, i pa ti pou apropriye pour personn sey konvenk sa ser Kretyen pour fer sa ki kont son konsyans. Anmenmtan, sa ser i realize ki i pa devret kritik lezot ser Kretyen ki zot konsyans i permet zot pour servi sa bann keksoz.

¹³ Annou vwar ankor en lot legzanp. Meton en frer Kretyen in ganny elve dan en lanvironnman kot zot kont lalkol. Apre ki i’n konn laverite, i aprann dan Labib ki diven i en kado sorti kot Bondye e nou kapab servi li avek moderasyon. (Psonm 104:15) I aksepte sa pwennvi. Kantmenm sa, akoz lafason ki i’n ganny elve, i prefere pa servi lalkol ditou. Me i pa kritik bann ki servi lalkol avek moderasyon. Dan sa fason i aplik parol Pol: “Annou rod sa bann keksoz ki prodwi lape, e rann nou for ansanm dan lafwa.”—Romen 14:19.

14. Dan ki sitiasyon bann Kretyen i kapab aplik konsey ki Pol ti donn bann Romen?

¹⁴ I annan lezot sitiasyon kot nou kapab aplik konsey ki Pol ti donn bann Romen. Dan kongregasyon Kretyen i annan plizyer dimoun, e zot annan diferan gou. Alors, zot kapab fer diferan swa. Par egzanp, dan domenn resanz ek laparans fizik. Byensir, dan Labib i annan bann prensip kler ki tou Kretyen senser i swiv. Nou pa devret met en lenz oubyen fer en stil seve ki drol, ki pa desan, oubyen ki idantifye nou avek bann move tre sa lemonn. (1 Zan 2:15-17) Bann Kretyen i devret mazinen ki zot toultan bann minis ki reprezant Souvren Iniversel, menm kan zot pe relaks. (Izai 43:10; Zan 17:16; 1 Timote 2:9, 10) Parkont, dan plizyer domenn, i annan plizyer swa ki akseptab pour en Kretyen.a

Evite fer tonbe lezot

15. Dan ki sirkonstans en Kretyen i kapab swazir pour pa egzers son drwa?

¹⁵ I annan ankor en lot prensip enportan ki Pol i fer resorti dan son konsey ki i ti donn bann Kretyen an Ronm. Parfwa, en Kretyen ki annan en konsyans ki’n byen formen i kapab deside pour pa fer en keksoz ki pa neseserman mal. Akoz? Akoz i realize ki i kapab afekte lezot si i fer sa. Dan sa ka, ki nou devret fer? Pol i dir: “I byen si ou pa manz lavyann, ou pa bwar diven, oubyen nenport ki keksoz ki kapab fer ou frer tonbe.” (Romen 14:14, 20, 21) Alors, “nou ki for nou devre siport febles bann ki feb, non pa rod nou prop plezir. Sakenn antre nou i devre esey fer plezir son prosen pour fer li vin pli for dan lafwa.” (Romen 15:1, 2) Kan sa ki nou fer i kapab ofans en konpanyon Kretyen ki son konsyans i feb, lanmour pour li pou pous nou pour montre konsiderasyon e pa fer sa keksoz. Par egzanp an rapor avek lalkol. En Kretyen i kapab servi diven avek moderasyon. Me si i kapab fer tonbe lezot ler i fer sa, i pa pou ensiste lo son drwa pour fer li.

16. Ki mannyer nou ti a kapab montre konsiderasyon pour bann ki dan nou teritwar?

¹⁶ Sa prensip i kapab osi aplikab dan lafason ki nou tret bann ki pa dan kongregasyon Kretyen. Par egzanp, meton nou reste dan en landrwa kot pli gran larelizyon i ansenny son bann dimoun pour konsider en zour dan lasemenn konman en zour repo. Alor, pour pa fer tonbe nou bann vwazen e pour pa kree okenn lobstak pour predikasyon, nou pou evite fer okenn keksoz sa zour ki pou ofans nou vwazen. Dan en lot sitiasyon, en Kretyen ki annan larzan i kapab deplase pour al servi kot i annan en pli gran bezwen parmi bann dimoun ki mwen fortinen. I kapab swazir pour montre konsiderasyon pour son bann nouvo vwazen par sanz dan en fason ki senp oubyen par viv en lavi senp menm si i annan larzan pour viv en lavi pli konfortab.

17. Akoz i rezonnab pour pran konsiderasyon pour lezot kan nou pe fer en swa?

¹⁷ Eski i rezonnab pour ekspekte bann “ki for” fer sa bann sanzman? Pour reponn sa, reflesir lo sa legzanp: Nou pe ale dan en transpor e la nou vwar detrwa manrmay dan lwen pe zwe obor semen. Eski nou pou kontinyen dray menm vites, kantmenm i permet, zis akoz nou annan sa drwa pour fer li? Non, nou pou ralanti en pe pour evit okenn danze ki kapab arive avek sa bann manrmay. Parfwa, nou bezwen montre sa menm lanvi pour ralanti, oubyen sede dan relasyon avek nou bann frer ek ser oubyen lezot dimoun. I kapab ki nou pe fer en keksoz ki nou annan tou drwa pour fer li. Nou pa pe kas okenn prensip Labib. Parkont, si nou kapab ofans oubyen bles bann ki zot konsyans i feb, lanmour pour zot pou pous nou pour fer atansyon. (Romen 14:13, 15) Prezerv nou linite e promot lentere Rwayonm i pli enportan ki egzers nou prop drwa.

18, 19. (a) Ki mannyer nou kapab swiv legzanp Zezi par montre konsiderasyon pour lezot? (b) Dan ki domenn nou tou nou azir an armoni total, e ki nou pou diskite dan prosen lartik?

¹⁸ Kan nou azir koumsa, nou pe imit sa pli bon legzanp. Pol i dir: “Kris li pa ti esey rod sa ki ti fer li plezir, me parey Lekritir i dir: ‘Ensilt ou bann ensilter ti tonm lo mwan.’ ” Zezi ti pare pour sakrifye son lavi pour nou. Sirman nou pare pour sakrifye serten drwa ki nou annan, si sa pou ed “bann ki feb” glorifye Bondye avek nou dan linite. Vreman, ler nou demontre en latitid toleran e zenere anver bann Kretyen ki annan en konsyans feb, oubyen ler nou deside pa fer serten keksoz e pa ensiste lo nou drwa, nou pe demontre menm latitid ki Kris ti annan.—Romen 15:1-5.

¹⁹ Kantmenm nou annan diferan pwennvi dan bann domenn ki pa enplik prensip Labib, nou azir an armoni total avek kanmarad kot i konsern nou ladorasyon. (1 Korentyen 1:10) Par egzanp, en tel linite i evidan dan nou reaksyon anver bann ki opoz laverite. Parol Bondye i apel sa bann ki opoz nou bann etranze e i met nou an gard kont ‘lavwa bann etranze.’ (Zan 10:5) Ki mannyer nou kapab rekonnet sa bann etranze? Konman nou devret reazir anver zot? Sa bann kestyon pou ganny diskite dan nou prosen lartik.

[Not anba lo paz]

Ki ou pou reponn?

• Akoz annan diferan pwennvi dan bann zafer personnel pa devret menas nou linite?

• Akoz nou ki Kretyen nou devret montre konsiderasyon ranpli avek lanmour pour kanmarad?

• Ki serten fason nou kapab aplik konsey Pol lo linite ozordi, e kwa ki pou motiv nou pour fer sa?

[Portre lo paz 24]

Konsey Pol lo linite ti enportan pour kongregasyon

[Portre lo paz 25]

Bann Kretyen i ini malgre zot lorizin i diferan