LESON 35
Ki mannyer nou kapab fer bann bon desizyon?
Nou tou nou annan desizyon pour fer. Bokou desizyon ki nou fer i annan lefe lo nou e lo nou lanmitye avek Zeova. Par egzanp, petet nou bezwen deside kote nou pou reste, ki travay nou pou fer oubyen si nou pou marye. Ler nou fer bann bon desizyon, nou lavi pou ere e nou pou fer plezir Zeova.
1. Ki mannyer ou kapab servi Labib pour ed ou fer bann bon desizyon?
Avan ou fer en desizyon, priye pour demann Zeova son led e egzamin Labib pour vwar ki mannyer i vwar sa sityasyon. (Lir Proverb 2:3-6.) Dan serten ka, Zeova i dir nou klerman ki pour fer. Si sa i leka, obeir li i sa pli bon swa ki ou kapab fer.
Me si Labib pa dir nou direkteman ki pour fer? Kantmenm sa Zeova pou gid ou “lo sa semen ki ou devret marse.” (Izai 48:17) Ki mannyer sa? I kapab annan bann prensip ki kapab gid ou. Bann prensip Labib i bann laverite de baz ki montre ki Bondye i panse oubyen santi lo serten keksoz. Souvandfwa, nou arive konnen ki mannyer Bondye i santi lo en keksoz ler nou lir en resi dan Labib. Ler nou realize ki mannyer Zeova i santi, nou kapab fer bann desizyon ki fer li plezir.
2. Ki nou devret pran an konsiderasyon avan nou fer en desizyon?
Labib i dir: “Sa enn ki pridan i reflesir byen lo sa ki i pou fer.” (Proverb 14:15) Savedir avan nou fer en desizyon, nou bezwen pran letan pour reflesir lo nou bann swa. Anmezir ki ou reflesir lo sak opsyon ki ou annan, demann ou lekor: ‘Ki prensip Labib ki mon bezwen aplike dan sa sityasyon? Ki desizyon ki pou donn mwan lape lespri? Ki lefe mon desizyon pou annan lo lezot? Pli enportan ankor, eski Zeova pou kontan mon desizyon?’—Deterononm 32:29.
Zeova i annan sa drwa pour dir nou sa ki byen ek sa ki mal. Ler nou konn son bann lalwa ek prensip e nou determinen pour swiv zot, nou devlop en bon konsyans. Nou konsyans i fer nou konnen si nou pe fer sa ki byen ouswa sa ki mal. (Romen 2:14, 15) En konsyans ki’n ganny byen formen pou ed nou pour fer bann bon desizyon.
AL PLI O PROFON
Gete ki mannyer bann prensip Labib ek nou konsyans i kapab ed nou pour fer bann bon desizyon.
3. Les Labib gid ou
Ki mannyer bann prensip Labib i kapab gid nou ler nou fer bann desizyon? Zwe sa VIDEO e apre reponn sa bann kestyon.
Kisisa liberte pour swazir?
Akoz Zeova ti donn nou sa liberte pour swazir?
Ki i’n donn nou pour ed nou pour nou servi nou liberte pour swazir dan sa pli bon fason posib?
Pour vwar legzanp en prensip Labib, lir Efezyen 5:15, 16. Apre diskite ki mannyer ou kapab “servi byen [ou] letan” pour . . .
lir Labib regilyerman.
vin en pli bon msye oubyen madanm, paran, garson oubyen fiy.
asiste bann renyon kongregasyon.
4. Antrenn ou konsyans pour fer bann bon desizyon
I kapab fasil pour fer sa bon swa ler Labib i dir klerman ki pou fer dan en sityasyon. Me si Labib pa koz lo sa size? Zwe sa VIDEO e apre reponn sa kestyon.
Dan sa video, ki sa ser ti fer pour li kapab antrenn son konsyans e fer en desizyon ki ti pou fer plezir Zeova?
Akoz nou pa devret demann lezot pour fer desizyon dan nou plas? Lir Ebre 5:14 e apre reponn sa bann kestyon:
Kantmenm i kapab pli fasil pour demann lezot pour fer desizyon dan nou plas, ki nou devret kapab fer lo nou menm?
Ki nou annan ki kapab ed nou antrenn nou konsyans e fer bann bon desizyon?
Zis parey en map, nou konsyans i ed nou deside kote pour ale dan lavi
5. Respekte konsyans lezot
Sak dimoun i fer diferan desizyon. Ki mannyer nou kapab montre respe pour konsyans lezot? Annou vwar de sityasyon:
Sityasyon 1: En ser ki kontan makiye i al dan en nouvo kongregasyon kot bokou ser pa santi zot alez ler zot vwar lezot makiye.
Lir Romen 15:1 ek 1 Korentyen 10:23, 24 e apre reponn sa bann kestyon:
Baze lo sa bann verse, ki sa ser i kapab deside pour fer? Ki ou pou fer si ou avek en dimoun ki son konsyans i anpes li fer en keksoz ki ou konsyans i permet ou fer?
Sityasyon 2: En frer i konnen ki Labib pa anpes nou servi lalkol avek moderasyon me i swazir pour pa bwar ditou. I ganny envite dan en rankont sosyal kot i vwar bann frer pe konsonm lalkol.
Lir Eklezyas 7:16 ek Romen 14:1, 10 e apre reponn sa bann kestyon:
Baze lo sa bann verse, ki sa frer i kapab deside pour fer? Ki ou pou fer si ou vwar en dimoun pe fer en keksoz ki ou konsyans pa permet ou fer?
Bann keksoz ki kapab ed ou fer bann bon desizyon
1. Demann Zeova pour ed ou deside ki pour fer.—Zak 1:5.
2. Fer resers dan Labib ek bann piblikasyon ki baze lo Labib pour vwar bann prensip ki ou kapab servi. Ou kapab osi koz avek bann Kretyen ki annan bokou leksperyans.
3. Pran an konsiderasyon lefe ki ou desizyon pou annan lo ou konsyans e osi lo konsyans lezot.
SERTEN DIMOUN I DIR: “Ou annan drwa fer sa ki ou anvi. Sa ki lezot i panse pa enportan.”
Akoz nou devret pran an konsiderasyon santiman Bondye ensi ki santiman lezot dimoun?
REZIMEN
Nou fer bann bon desizyon ler nou konnen ki mannyer Zeova i santi lo en keksoz e apre nou gete si nou aksyon pou ed lezot ouswa fer zot ditor.
Revizyon
Ki mannyer ou kapab fer bann desizyon ki fer plezir Zeova?
Ki mannyer ou kapab antrenn ou konsyans?
Ki mannyer ou kapab montre respe pour konsyans lezot dimoun?
FER PLIS RESERS
Ki mannyer ou kapab fer bann desizyon ki pou fer ou lanmitye avek Bondye vin pli for?
“Fer bann desizyon ki onor Bondye” (Latour Veyer 1 Avril 2011)
Konpran pli byen ki mannyer Bondye i donn nou konsey.
Gete kwa ki ti ed en msye fer en desizyon difisil.
Aprann plis lo ki mannyer pour fer plezir Zeova ler i pa’n dir direkteman ki pour fer dan en sityasyon.
“Do You Always Need a Bible Command?” (Latour Veyer 1 Desanm 2003 an Angle)