“Kontan ou prosen parey ou kontan ou prop lekor”

“Dezyenm konmannman i parey li: ‘Kontan ou prosen parey ou kontan ou prop lekor.’”​—MAT. 22:39.

KI OU POU REPONN?

Lekel nou prosen?

Akoz ou krwar ki nou kapab e devret montre lanmour pour nou prosen?

Ki serten laspe lanmour ki 1 Korentyen 13:4-8 i koz lo la?

1, 2. (a) Dapre Zezi ki ti sa dezyenm pli gran komannman dan Lalwa? (b) Ki kestyon nou pou egzaminen aprezan?

POUR teste Zezi, en fwa en Farizyen ti demann li: “Met, lekel pli gran konmannman dan Lalwa?” Parey sa ki’n ganny fer resorti dan lartik avan, Zezi ti reponn par dir: “Kontan [Zeova] ou Bondye avek tou ou leker, avek tou ou lam, e avek tou ou lespri.” Zezi ti osi azoute: “Dezyenm konmannman i parey li: ‘Kontan ou prosen parey ou kontan ou prop lekor.’”​—Mat. 22:34-39.

² Zezi ti dir ki nou devret kontan nou prosen parey nou kontan nou prop lekor. Alor i ti a byen nou demande: Lekel nou prosen? Ki mannyer nou kapab demontre lanmour pour nou prosen?

LEKEL NOU PROSEN?

3, 4. (a) Ki legzanp Zezi ti servi pour reponn sa kestyon: “Me lekel mon prosen?” (b) Ki mannyer sa Samariten ti ed sa zonm ki ti’n ganny vole, bate e ganny kite demi mor? (Vwar portre anler.)

³ Nou kapab panse ki nou prosen i sa dimoun ki reste o bor nou, ki en zanmi pros e ki pare pour ed nou. (Prov. 27:10) Me remarke ki Zezi ti dir kan en zonm ki ti pe esey zistifye son lekor ti demann li: “Me lekel mon prosen?” Zezi ti reponn par donn sa legzanp bon Samariten. (Lir Lik 10:29-37.) Nou ti kapab ekspekte ki en pret Izraelit ek en Levit ti pou azir konman bann bon prosen kan zot ti vwar en zonm ki ti’n ganny vole, bate e kite demi mor. Annefe, zot ti pas o bor li san ed li. Sa zonm ti ganny ede par en Samariten, setadir en dimoun ki form parti en pep ki ti obei Lalwa Moiz me ki bann Zwif ti meprize.​—Zan 4:9.

⁴ Sa bon Samariten ti vid delwil ek diven lo blesir sa zonm pour ed li geri pli vit. I ti donn propriyeter lotel de denye, ki ti lavaler lapey de zour travay pour pran swen avek sa zonm. (Mat. 20:2) Alor, atraver sa legzanp i fasil pour vwar lekel ki ti vreman prosen sa zonm ki ti’n ganny blese. Legzanp Zezi i vreman ansenny nou pour montre konpasyon ek lanmour pour nou prosen.

 5. Ki mannyer bann serviter Zeova ti demontre lanmour pour zot prosen apre en dezas ki ti arive resaman?

⁵ Souvan i difisil pour zwenn dimoun ki annan konpasyon pour lezot parey sa bon Samariten. Sa i sirtou leka dan sa bann “dernyen zour” kot bokou i annan leker dir, kriyel e lennmi sa ki fer dibyen. (2 Tim. 3:1-3) Par egzanp, bann sityasyon difisil i kapab devlope ler i annan en dezas. Annou vwar sa ki ti arive kan siklonn Sandy ti tap lavil New York lafen Oktob 2012. En landrwa ki ti’n pli ganny tape, bann voler ti vol bann dimoun ki ti’n deza ganny afekte akoz i ti napa elektrisite, sofaz ek lezot nesesite. Dan sa menm landrwa, bann Temwen Zeova ti organiz en progranm ki ti permet zot pour ed kanmarad ek lezot dimoun. Bann Kretyen i fer sa akoz lanmour pour zot prosen. Ki lezot fason nou kapab demontre lanmour pour nou prosen?

KONMAN NOU KAPAB DEMONTRE LANMOUR POUR NOU PROSEN

 6. Ki mannyer predikasyon i relye avek lanmour pour nou prosen?

⁶ Ofer dimoun led spirityel. Nou fer sa par fer zefor pour atir latansyon bann dimoun lo “konsolasyon ki Lekritir” i donnen. (Rom. 15:4) San dout, kan nou partaz avek lezot laverite baze lo Labib dan predikasyon, nou pe demontre lanmour pour nou prosen. (Mat. 24:14) Pa i en privilez pour partaz mesaz Rwayonm sorti kot sa “Bondye, ki donn lesperans”!​—Rom. 15:13.

 7. Kisisa Lareg-d-or e ki pou arive si nou swiv li?

⁷ Swiv Lareg-d-or. Sa lareg i ganny eksplike dan sa bann parol ki Zezi ti dir dan son Sermon lo Montanny: “Fer pour lezot sa ki ou oule lezot i fer pour ou: sanmenm ki Lalwa ek bann profet i dir fer.” (Mat. 7:12) Ler nou tret lezot parey Zezi ti ankouraz nou pour fer, nou pe azir an armoni avek sa leta lespri par deryer “Lalwa” (Zenez ziska Deterononm) ek “bann Profet” (bann liv profetik dan Lekritir Ebre). Sa bann liv i montre ki Bondye i beni bann ki demontre lanmour anver lezot. Par egzanp, atraver Izai, Zeova ti dir: “Fer sa ki zis e drwat . . . Ere sa zonm ki fer sa.” (Iza. 56:1, 2) Wi, nou ganny beni akoz nou azir avek lanmour ek ladrwatir dan lafason ki nou tret nou prosen.

 8. Akoz nou devret kontan nou lennmi e kwa ki kapab arive si nou fer sa?

⁸ Kontan ou lennmi. Zezi ti dir: “Zot in tande ki i’n ganny dir: ‘Kontan zot zanmi e ay zot lennmi.’ Me mwan mon dir zot: kontan zot lennmi e priy pour bann ki persekit zot, koumsa, zot a vin garson zot Papa ki dan lesyel.” (Mat. 5:43-45) Zapot Pol ti fer resorti menm pwen kan i ti ekrir: “Si ou lennmi i lafen, donn li manze; si i swaf, donn li bwar.” (Rom. 12:20; Prov. 25:21) Dapre Lalwa Moiz, en dimoun ti devret ed son lennmi par sov son zannimo ki ti’n tonbe akoz sa ta pake ki sa zannimo ti pe anmennen. (Egz. 23:5) Par travay ansanm dan sa fason, sa ti fer ki bann lennmi ti kapab vin bann bon zanmi. Lefet ki bann Kretyen i demontre lanmour, bokou nou bann lennmi in sanz zot latitid anver nou. Si nou demontre lanmour pour nou lennmi menm anba bann gran persekisyon, pa nou pou kontan si apre serten parmi zot i aksepte laverite!

 9. Ki Zezi ti dir konsernan fer lape avek nou bann frer ek ser?

⁹ “Fer lape avek tou dimoun.” (Ebr. 12:14) Byensir, sa i enkli nou bann frer ek ser, parski Zezi ti dir: “Si . . . ou vin prezant Bondye ou lofrann devan lotel, e ki la ou rapel ki ou frer i annan keksoz kont ou, kit ou lofrann devan lotel, e al fer lape avek ou frer; apre retournen e prezant ou lofrann.” (Mat. 5:23, 24) Bondye pou beni nou ler nou demontre lanmour anver nou bann frer ek ser e azir deswit pour fer lape avek zot.

10. Akoz nou pa devret tir lizye lo defo lezot?

¹⁰ Pa tir lizye lo defo lezot. Zezi ti dir: “Pa zize e ou pa ava ganny zize. Parski Bondye pou ziz ou parey ou ziz lezot, e i pou servi menm mezir pour ou, parey ou’n servi pour lezot. Ki mannyer ou war lapay ki dan lizye ou frer me ou pa remark poto ki dan sa ki pour ou? Oubyen ki mannyer ou kapab dir ou frer: ‘Les mwan tir sa lapay dan ou lizye’ kan ou annan en poto dan sa ki pour ou? Ipokrit, tir poto dan ou lizye avan, apre ou a war ase kler pour tir lapay ki dan lizye ou frer.” (Mat. 7:1-5) Pa sa parol i montre nou klerman ki nou pa devret kritik bann pti defo lezot kan nou menm nou kapab annan bann gro defo!

EN FASON SPESYAL POUR DEMONTRE LANMOUR ANVER NOU PROSEN

11, 12. Dan ki fason inik nou demontre lanmour pour nou prosen?

¹¹ Nou anvi demontre lanmour anver nou prosen dan en fason inik. Parey Zezi, nou osi nou pres sa bon nouvel Rwayonm. (Lik 8:1) Zezi ti dir bann ki ti swiv son lansennyman, “fer tou pep vin mon bann disip.” (Mat. 28:19, 20) Par fer nou par pour akonpli sa demann, nou esey ed nou prosen pour kit sa semen fasil ki anmenn perdisyon e pran sa semen difisil ki anmenn ver lavi. (Mat. 7:13, 14) I napa okenn dout ki Zeova i beni sa bann kalite zefor.

¹² Parey Zezi, nou ed dimoun pour konsyan zot bezwen spirityel. (Mat. 5:3, NW) Dan ka bann dimoun ki demontre lentere, nou ed zot satisfer zot bezwen spirityel par partaz avek zot ‘bon nouvel.’ (Rom. 1:1) Bann dimoun ki aksepte mesaz Rwayonm i ganny rekonsilye avek Bondye atraver Zezi Kri. (2 Kor. 5:18, 19) Alor, kan nou pres sa bon nouvel, nou pe vreman demontre lanmour pour nou prosen dan en fason vreman enportan.

13. Ki mannyer ou santi ou lefet ki ou pe partisip dan sa aktivite pour anons sa bon nouvel?

¹³ Atraver bann vizit efikas ek letid Labib, nou ganny satisfaksyon pour ed dimoun swiv bann standar Bondye ki drwat. Sa i kapab ed en dimoun ki pe etidye Labib fer bann gran sanzman dan son lavi. (1 Kor. 6:9-11) Sirman i vreman tousan pour vwar ki mannyer Bondye i ed bann ki “annan sa bon kondisyon leker pour lavi eternel.” (Akt 13:48, NW) Pour bokou, lazwa in ranplas dezespwar e zot nepli annan en ta traka me zot met konfyans dan nou Papa ki dan lesyel. Pa nou kontan pour vwar bann progre spirityel ki bann etidyan i fer! Pa ou pou dakor ki i en benediksyon pour demontre lanmour pour nou prosen dan sa fason spesyal ler nou anons sa bon nouvel?

DESKRIPSYON LANMOUR DAPRE LABIB

14. Dan ou prop mo, mansyonn serten laspe lanmour ki ganny site dan 1 Korentyen 13:4-8?

¹⁴ Kan nou aplik sa ki Pol ti ekri konsernan lanmour anver nou prosen, sa i kapab evit en ta problenm, anmenn lazwa e nou kapab ganny benediksyon Bondye. (Lir 1 Korentyen 13:4-8.) Annou vwar serten detay lo sa ki Pol ti dir konsernan lanmour e vwar ki mannyer nou kapab aplik son bann parol dan nou relasyon avek nou prosen.

15. (a) Akoz nou devret annan pasyans ek labonte? (b) Akoz nou devret evite zalou e vant nou lekor?

¹⁵ “Lanmour i pasyan, e i bon.” Zis parey Bondye in demontre pasyans ek labonte dan lafason ki i azir anver bann imen enparfe, nou bezwen demontre pasyans ek labonte ler lezot i fer fot e pa reflesir avan fer en keksoz oubyen menm azir brit. “Lanmour pa zalou,” alor vre lanmour pa pou fer nou groker keksoz en lot dimoun oubyen privilez dan kongregasyon. Deplis, si nou annan lanmour, nou pa pou vant nou prop lekor. Apre tou, “lizye orgeye ek en leker arogan, sanmenm lalanp ki gid bann mesan e tou le de i en pese.”​—Prov. 21:4.

16, 17. Ki mannyer nou kapab azir an armoni avek 1 Korentyen 13:5, 6?

¹⁶ Lanmour pou fer nou konport nou dan en bon fason anver nou prosen. Nou pa pou koz manti avek li, nou pa pou vol li oubyen fer okenn keksoz ki pou kas bann lalwa ek prensip Zeova. Dan plas rod zis nou prop lentere, lanmour pou osi pous nou pour montre konsiderasyon anver lezot.​—Fili. 2:4.

¹⁷ Vre lanmour pa pran lakoler vitman e “i pa gard rankin” konmsi nou pe fer antre dan en liv tou pti fot kan lezot i fer en keksoz ki pa byen. (1 Tesa. 5:15) Si nou gard rankin, nou pa pou fer plezir Bondye. Annefe, i pou parey nou pe vant en labrez dife ki kapab flanbe en sel kou e bles nou ek lezot dimoun. (Lev. 19:18) Lanmour i fer nou rezouir dan laverite, me i anpes nou “montre kontantman dan lenzistis,” menm ler dimoun ki ay nou i ganny trete dan en move fason oubyen sibir en lenzistis.​—Lir Proverb 24:17, 18.a

18. Ki nou aprann konsernan lanmour dan 1 Korentyen 13:7, 8?

¹⁸ Annou kontinyen koz lo definisyon lanmour ki Pol ti koz lo la. I ti dir ki “lanmour i pardonn tou.” Si en dimoun i ofans ou me i demann ou pardon, lanmour pou pous ou pour pardonn li. Lanmour “i krwar tou” sa ki dan Parol Bondye e fer nou apresye bann nouritir spirityel ki nou gannyen. Lanmour i “esper tou” sa ki’n ganny ekrir dan Labib e pous nou pour fer nou mye pour koz avek lezot lo lespwar ki nou annan. (1 Pyer 3:15) Nou osi priye e espere ki tou keksoz i pas byen dan bann sityasyon difisil. Lanmour “i siport tou,” menm si en dimoun i komet pese anver nou, persekit nou oubyen kan nou pas atraver lezot leprev. Deplis, “lanmour i reste pour touzour.” Bann dimoun obeisan pou demontre lanmour pour leternite.

KONTINYEN KONTAN OU PROSEN PAREY OU KONTAN OU PROP LEKOR

19, 20. Ki konsey Labib ki devret pous nou pour kontinyen demontre lanmour anver nou prosen?

¹⁹ Si nou aplik bann konsey Labib nou pou arive kontinyen demontre lanmour pour nou prosen. Nou bezwen annan lanmour pour tou dimoun nenport kiltir ki zot annan. Nou osi bezwen mazin sa ki Zezi ti dir: “Kontan ou prosen parey ou kontan ou prop lekor.” (Mat. 22:39) Tou le de, Bondye ek Zezi, i ekspekte ki nou kontan nou prosen. Si nou pa asire ki pour fer dan serten sityasyon kot i konsern nou prosen, annou priy Bondye pour gid nou atraver son lespri sen. Si nou fer sa, nou pou ganny benediksyon Zeova e sa pou ed nou azir dan en fason ki demontre lanmour.​—Rom. 8:26, 27.

²⁰ Sa komannman pour kontan nou prosen parey nou prop lekor i apel ‘lalwa rwayal.’ (Zak 2:8) Apre ki i ti’n refer avek serten komannman dan Lalwa Moiz, Pol ti dir: “Tousala ek lezot ankor i konpri dan sa sel konmannman: ‘Kontan ou kanmarad parey ou prop lekor.’” Lanmour pa fer nou fer sa ki mal anver nou prosen, alor lanmour i akonpli lalwa konpletman. (Rom. 13:8-10) Alor nou bezwen kontinyen demontre lanmour anver nou prosen.

21, 22. Akoz nou devret kontan Bondye ek nou prosen?

²¹ Anmezir nou medit lo akoz nou devret demontre lanmour pour nou prosen, i bon pour mazin lo sa ki Zezi ti dir konsernan son Papa, ki “i fer leve son soley lo bann ki move parey lo bann ki bon, e i fer tonbe lapli lo bann ki fer dibyen parey lo bann ki fer dimal.” (Mat. 5:43-45) Nou bezwen demontre lanmour anver nou prosen, ki swa i fer sa ki byen ouswa sa ki mal. Parey nou’n vwar pli boner, en fason enportan pour demontre sa lanmour i pour pres mesaz Rwayonm avek li. Pa nou prosen pou ganny bokou benediksyon si i ekoute ler nou pres sa bon nouvel!

²² Nou annan bokou rezon pour kontan Zeova avek tou nou leker. I osi annan diferan fason pour montre lanmour pour nou prosen. Par demontre lanmour pour Bondye ek nou prosen nou pe demontre respe pour sa ki Zezi ti dir konsernan sa de pli gran komannman. Par lao tou, nou pou fer plezir Zeova, nou Papa lanmour dan lesyel.

[Not anba lo paz]

[Portre lo paz 19]

Zapon

Kanada

Bann serviter Zeova i pare pour demontre lanmour anver zot prosen (Vwar paragraf 5)