Pol ti konvenki ki sa ki bann Kretyen ti krwar pa ti baze lo en mansonz. I ti konnen ki Zezi ti’n resisite e i ti fer en rezimen lo bann laprev ki sa ti’n vreman arive. Par egzanp, i ti dir: “Kris in mor pour nou pese, parey Lekritir in dir, i ti ganny antere e i ti resisite son trwazyenm zour dapre Lekritir, i ti aparet avek Pyer e apre avek son douz zapot.”b Apre, Pol ti azoute: “Answit i ti aparet avek plis ki senk san son bann disip ansanm, laplipar i ankor vivan, me i annan de trwa ki’n mor. Answit i ti aparet avek Zak e apre avek tou bann zapot. Anfen apre zot tou, i’n osi aparet avek mwan.”​—1 Korentyen 15:3-8.