Rezireksyon Zezi i vedir lavi!

REZIREKSYON ZEZI pa zis en levennman ki’n arive dan lepase me ki napa bokou sinifikasyon pour nou ozordi. Zapot Pol ti met lanfaz lo sinifikasyon rezireksyon Zezi ler i ti dir: “Kris in resisite parmi bann mor. I premye resisite parmi bann mor. Annefe, parey lanmor in arive par en zonm, demenm rezireksyon in arive par en zonm. Parey tou dimoun i mor dan Adan, demenm dan Kris tou pou reviv.”​—1 Korentyen 15:20-22.

Zezi ti resisit le 16 Nizan lannen 33 N.L., sa menm zour ki bann Zwif ti abitye ofer Zeova bann premye fri dan zot rekolt legren kot tanp Zerizalenm. Par dir ki Zezi ti premye pour resisite oubyen ki i ti premye fri, Pol ti pe montre ki i ti pou annan lezot dimoun ki ti pou resisite apre.

Apre zapot Pol ti eksplike kwa ki rezireksyon Zezi in fer posib. I ti dir: “Parey lanmor in arive par en zonm, demenm rezireksyon in arive par en zonm.” Vi ki nou tou nou’n erit pese ek lenperfeksyon avek Adan, nou tou nou mor. Par kont, par donn son lavi parfe konman en sakrifis, Zezi ti fer li posib pour limanite ganny libere avek lefe pese ek lanmor atraver rezireksyon. Zapot Pol ti fer en zoli pti rezimen konsernan sa size dan Romen 6:23: “Rekonpans pour pese i lanmor, me don gratwit ki Bondye i donnen i lavi eternel dan Kris-Zezi nou Senyer.”

Zezi li menm ti eksplik sinifikasyon son lanmor ek rezireksyon pour nou. I ti dir: “Fis-de-Lonm i devret ganny leve . . . , pour ki tou sa ki krwar dan li i a ganny lavi eternel. Parski Bondye in telman kontan lemonn ki i’n donn son sel Garson, pour ki nenport ki, ki krwar dan li, pa pou mor, me i a ganny lavi eternel.”​—Zan 3:14-16.

Zis imazin sa, lavi eternel kot pou nepli annan ni douler, ni soufrans, ni sagrinasyon! (Revelasyon 21:3, 4) Pa sa i en zoli lespwar! En spesyalis Labib i dir sa: “Latonm i kapab fer nou mazinen ki lavi i kourt, me rezireksyon i garanti ki lanmor pa pou dir pour lontan.” Wi, rezireksyon Zezi i vedir lavi!

[Portre lo paz 7]