Lavi fanmir e lanmitye avek lezot
Pour bokou dimoun, i difisil pour zot annan en bon lanmitye avek zot fanmir ek zanmi. Annou vwar serten prensip Labib ki kapab ed nou amelyor nou lavi.
PA MAZIN ZIS OU PROP LEKOR
PRENSIP LABIB: “Pa rod zis zot prop lentere, me lentere lezot osi.”—Filipyen 2:4.
KI I VEDIR: Nou annan bann bon lanmitye avek lezot ler nou konsantre lo sa ki nou kapab fer pour zot dan plas sa ki lezot i kapab fer pour nou. Si nou mazin zis nou prop lekor, sa i kapab gat nou lanmitye avek lezot. Par egzanp, en konzwen ki mazin zis son prop lekor i kapab vin enfidel avek son msye oubyen madanm. An plis, personn pa anvi fer zanmi avek en dimoun ki toultan ponp son lekor lo sa ki i konnen e annan. Alor parey sa liv The Road to Character i dir: “Dimoun ki enterese zis avek zot prop lekor e pa zanmen mazin lezot pour ganny bokou problenm.”
SA KI OU KAPAB FER:
Ed lezot. Bann bon lanmitye i baze lo fidelite ek konfyans ki dimoun i annan dan kanmarad. Serten letid in montre ki dimoun ki ed lezot i ganny mwens depresyon e sa i ogmant zot konfidans.
Konpran santiman lezot. Ler ou konpran santiman lezot, sa i montre ki ou osi ou pe santi douler sa dimoun. Si ou montre ki ou konpran santiman lezot, ou pa pou fer bann dyok ki pou anbaras oubyen bles zot santiman.
Ler ou konpran santiman lezot, ou osi kapab aksepte zot ki mannyer zot ete. Sa i kapab ed ou pour evite annan prezidis e i kapab ed ou fer zanmi avek dimoun ki sorti dan diferan kiltir.
Pas letan avek lezot dimoun. Pli ou pas letan avek lezot, pli ou pou konn zot pli byen. Si ou anvi ganny en bon zanmi, ou bezwen koz lo bann keksoz ki enportan pour li e ki enteres li. Alor ou bezwen ekout byen. Montre ki ou enterese avek sa ki ou zanmi pe dir. En letid ki’n ganny fer resaman i montre ki “en bon konversasyon i kapab fer en dimoun vreman ere.”
SWAZIR BYEN OU ZANMI
PRENSIP LABIB: “Move frekantasyon i gat bann bon labitid.”—1 Korentyen 15:33, not.
KI I VEDIR: Dimoun ki ou pas letan avek i kapab annan en bon oubyen move lenfliyans lo ou. En dimoun ki etidye konportman imen (sosyolog) i dir ki sa kalite lenfliyans i kapab annan en lefe lo ou lavi. Par egzanp, zot dir ki si ou antoure avek dimoun ki fimen oubyen ki pe rod divors, ou kapab konmans anvi fimen oubyen divorse.
SA KI OU KAPAB FER: Fer zanmi avek dimoun ki annan bann bon kalite ki ou kontan oubyen anvi imite. Par egzanp, frekant bann dimoun ki dous, zenere e ki kontan ofer lospitalite.
LEZOT PRENSIP LABIB
Get bann video baze lo Labib ki’n ganny fer pour ed bann koup marye, adolesan ek bann zenn pour annan en bon lavi fanmir
VEY BYEN SA KI OU DIR.
“Bann parol san reflesi i parey bann kou lepe, me lalang en dimoun saz i en gerizon.”—PROVERB 12:18, NWT.
VIN ZENERE.
‘Sa enn ki zenere pour prospere.’—PROVERB 11:25.
TRET LEZOT PAREY OU TI POU KONTAN GANNY TRETE.
“Tou sa ki zot anvi dimoun i fer pour zot, zot osi zot devret fer parey pour zot.”—MATYE 7:12.