“Ki mannyer bann mor pou resisite?”

1-2. Akoz tou Kretyen i bezwen aprann konsernan bann ki pou resisite pour al dan lesyel?

LAPLIPAR dimoun ki pe servi Zeova ozordi i annan sa lespwar pour viv pour touzour lo later. Me i ankor annan en ptigin Kretyen swazir lo later ki annan sa lespwar pour ganny resisite pour al viv dan lesyel. Sa bann Kretyen swazir i anvi konnen ki mannyer zot lavi pou ete dan lesyel. Me akoz bann ki annan lespwar pour viv lo later i anvi konn sa? Parey nou pou vwar dan sa lartik, bann ki pou resisite pour al dan lesyel pou anmenn bann benediksyon pour bann ki annan lespwar pour viv pour touzour lo later. Alor, ki swa nou annan lespwar pour viv pour touzour dan lesyel oubyen lo later, nou tou nou devret anvi konn plis lo sa ki pou arive avek bann ki pou resisite pour al dan lesyel.

² Bondye ti enspir serten disip Zezi dan premye syek pour ekri konsernan bann ki annan sa lespwar pour al dan lesyel. Zapot Zan ti eksplike: “La nou zanfan Bondye, nou pa ankor konnen ki mannyer nou pou ete. Me nou konnen ki ler i pou ganny revele, nou pou vin parey li.” (1 Zan 3:2) Alor bann Kretyen swazir pa konnen ki mannyer zot pou ete ler zot ganny resisite pour al dan lesyel. Par kont, zot pou vwar Zeova ler zot ganny zot rekonpans dan lesyel. Labib pa donn nou tou detay konsernan bann ki ganny resisite pour al dan lesyel me Pol ti donn serten lenformasyon lo la. Bann Kretyen swazir pou ansanm avek Kris ler i “detri tou gouvernman, lotorite ek pouvwar.” Sa i enkli “dernyen lennmi, lanmor.” Apre, Zezi ek bann ki pou dirize ansanm avek li pou soumet zot lekor e soumet tou keksoz avek Zeova. (1 Kor. 15:24-28) Sa pou en letan vreman merveye!b

 3. Parey nou vwar dan 1 Korentyen 15:30-32, ki lafwa Pol dan rezireksyon ti ed li fer fas avek?

³ Lafwa ki Pol ti annan dan rezireksyon ti ed li fer fas avek plizyer problenm. (Lir 1 Korentyen 15:30-32.) I ti dir bann Kretyen Korent: “Tou le zour mon fer fas avek lanmor.” I ti osi dir: “Mon’n lager avek bann bebet feros Efez.” I kapab ki i ti pe dir ki i ti lager avek bann zannimo dan en stad Efez. (2 Kor. 1:8; 4:10; 11:23) Oubyen i kapab ki i ti pe refer avek bann Zwif ek lezot dimoun ki ti opoz li konman bann “bebet feros.” (Akt 19:26-34; 1 Kor. 16:9) Nenport kwa ki Pol ti pe refer avek, Pol ti fer fas avek bann gro problenm me kantmenm sa i ti kontinyen krwar ki i ti pou annan en lavenir pli meyer.​—2 Kor. 4:16-18.

 4. Ki mannyer sa lespwar dan rezireksyon i fer lafwa bann Kretyen ozordi vin pli for? (Vwar portre lo kouvertir.)

⁴ Nou pe viv dan en letan difisil. Serten nou bann frer ek ser in vin viktim krim. I annan lezot ki viv dan bann landrwa ki annan lager e zot pa santi zot an sekirite. Dan serten pei, pep Zeova pa lib pour anons sa bon nouvel e zot servi Zeova menm si zot kapab ganny met dan prizon oubyen ganny touye. Kantmenm sa, tou sa bann frer ek ser i kontinyen ador Zeova e zot bann bon legzanp pour nou. Zot pa per akoz zot konnen ki menm si zot mor, Zeova in promet pour donn zot en keksoz bokou pli meyer dan lavenir.

 5. Ki move pwennvi ki kapab afebli nou lafwa dan rezireksyon?

⁵ Pol ti averti son bann frer konsernan en move pwennvi ki serten ti annan. Zot ti dir: “Si bann mor pa pou ganny resisite, ‘annou manze e bwar, parski demen nou pou mor.’” Menm avan sa, dimoun ti annan sa menm pwennvi. I kapab ki Pol ti pe sit Izai 22:13, ki montre ki bann Izraelit ti annan sa menm pwennvi. Olye esey vin pros avek Zeova, zot ti pli anvi anmiz zot lekor. Bann Izraelit ti krwar zot devret “diverti kontan akoz lanmor i voler” e sa i en pwennvi ki bokou dimoun i annan ozordi. Me Labib i montre ki sa kalite pwennvi ti anmenn bann move konsekans pour bann Izraelit.​—2 Kron. 36:15-20.

 6. Ki mannyer nou lespwar konsernan rezireksyon i kapab ed nou ler nou pe swazir nou zanmi?

⁶ Nou konnen ki Zeova pou resisit bann dimoun mor alor sa i devret ed nou pour swazir byen nou zanmi. Bann Kretyen dan lavil Korent ti bezwen evite frekant bann ki ti refize krwar dan rezireksyon. I annan en leson pour nou ozordi. Si nou pas bokou letan avek bann dimoun ki oule zis diverti kontan e ki pa enterese avek sa ki pou arive dan lavenir, zot pou annan en move lenfliyans lo nou. En Kretyen ki pas bokou letan avek sa bann kalite dimoun i kapab gat son bann bon labitid. Anfet, sa bann dimoun i menm kapab enfliyans li pour fer keksoz ki Bondye pa kontan. Alor, Pol i ankouraz nou: “Servi zot lespri e fer sa ki drwat. Aret fer pese.”​—1 Kor. 15:33, 34.

 7. Dapre 1 Korentyen 15:35-38, ki kestyon serten i kapab demande konsernan rezireksyon?

⁷ Lir 1 Korentyen 15:35-38. En dimoun ki anvi fer lezot annan dout konsernan rezireksyon i kapab demande: “Ki mannyer bann mor pou resisite?” I ti pou byen si nou reflesir lo sa ki Pol ti dir, vi ki bokou dimoun ozordi i annan zot prop krwayans konsernan sa ki arive avek en dimoun ler i mor. Me ki Labib i dir?

 8. Ki legzanp ki kapab ed nou konpran ki mannyer rezireksyon bann ki pou al dan lesyel pou ete?

⁸ Ler en dimoun i mor, son lekor i pouri. Me sa Enn ki’n kree tou keksoz dan liniver i kapab resisit sa dimoun e donn li en lekor konvenab. (Zen. 1:1; 2:7) Pol ti servi en legzanp pour montre ki Bondye pa pou bezwen refer sa menm lekor ankor. Mazin sa ki arive avek “en lagrenn.” Ler sa lagrenn i ganny plante dan later, i zermen e i vin en nouvo plant. Sa nouvo plant i diferan avek sa lagrenn ki ou’n plante. Pol ti servi sa legzanp pour montre ki nou Kreater i kapab donn nou “en lekor dapre sa ki fer li plezir.”

 9. Ki 1 Korentyen 15:39-41 i dir konsernan bann diferan kalite lekor?

⁹ Lir 1 Korentyen 15:39-41. Pol ti dir ki Bondye pa ti kree tou keksoz menm parey. Par egzanp, lekor bann bef, zwazo ek pwason i diferan. I ti dir ki dan lesyel, lalin ek soley i diferan. I ti osi dir ki “laglwar en zetwal i diferan avek laglwar en lot zetwal.” Sa i vre menm si nou pa kapab vwar sa bann diferans avek nou lizye. Bann syantis i dir ki i annan diferan kalite zetwal. Serten zetwal i gro, serten i pti, i annan ki rouz, i annan ki blan e i annan ki zonn parey nou soley. Pol ti osi dir ki “i annan bann lekor pour lesyel ek bann lekor pour later.” Ki i ti pe esey dir? Lo later i annan bann lekor fizik me dan lesyel i annan bann lekor spirityel parey bann lanz.

10. Ki kalite lekor bann ki ganny resisite pour al dan lesyel pou annan?

¹⁰ Remark sa ki Pol ti dir apre: “I parey avek bann ki pou ganny resisite. Parey en lagrenn ki ganny senmen, lekor ki mor i pouri me lekor ki ganny resisite pa kapab pouri.” Byensir, ler en dimoun i mor son lekor i pouri e apre i revin lapousyer. (Zen. 3:19) Me dan ki fason en lekor ki ganny resisite “pa kapab pouri”? Pol pa ti pe refer avek en dimoun ki ganny resisite pour viv lo later, parey bann dimoun ki Eliya, Elisa ek Zezi ti resisite. I ti pe refer avek en dimoun ki ganny resisite avek “en lekor spirityel,” setadir en lekor ki kapab viv dan lesyel.​—1 Kor. 15:42-44.

11-12. Dan ki fason Zezi ti sanze apre ki i ti’n ganny resisite e ki mannyer bann Kretyen swazir pou pas atraver sa menm sanzman?

¹¹ Ler Zezi ti lo later, i ti annan en lekor imen. Me ler i ti ganny resisite, i ti “vin en lespri ki donn lavi” e i ti retourn dan lesyel. Pareyman, bann Kretyen swazir pou ganny resisite avek en lekor spirityel. Pol ti eksplike: “Zis parey nou dan resanblans sa enn ki’n ganny fer avek lapousyer, nou pou osi dan resanblans sa enn ki’n al dan lesyel.”​—1 Kor. 15:45-49.

¹² I enportan pour rapel ki Zezi pa ti ganny resisite avek en lekor imen. Pol ti eksplike akoz sa i leka ler i ti ariv ver lafen son diskisyon. I ti dir: “Lekor imen pa kapab antre dan Rwayonm Bondye” ki dan lesyel. (1 Kor. 15:50) Bann zapot ek lezot Kretyen swazir pa pou ganny resisite pour al dan lesyel avek bann lekor imen ki kapab pouri. Kan ki zot pou ganny resisite? Pol ti dir ki zot pa pou ganny resisite deswit apre ki zot in mor me pli tar dan lavenir. Ler Pol ti ekri 1 Korentyen, serten disip, tel parey zapot Zak, ti’n “fini mor.” (Akt 12:1, 2) Lezot zapot ek Kretyen swazir pa ti ankor mor.​—1 Kor. 15:6.

13. Ki pou arive ler “Kris i la”?

¹³ Zezi ek Pol ti predir ki dan lavenir “ler Kris i la,” sa pou en letan enportan dan listwar imen. Ler Kris i la, i pou annan lager, tranblemandter, lepidemi ek lezot move keksoz ki pou arive partou dan lemonn. Nou’n vwar sa profesi pe ganny akonplir depi 1914. I annan en lot parti enportan sa profesi ki pou ganny akonplir. Zezi ti dir ki sa bon nouvel konmkwa Rwayonm Bondye pe dirize pou ganny anonse “partou lo later pour donn en temwannyaz avek tou nasyon e apre sa, lafen pou arive.” (Mat. 24:3, 7-14) Pol ti dir ki “ler Senyer i la,” bann Kretyen swazir “ki’n fini mor” pou ganny resisite pour al dan lesyel.​—1 Tesa. 4:14-16; 1 Kor. 15:23.

14. Ki arive avek bann Kretyen swazir ki mor pandan ki “Kris i la”?

¹⁴ Bann Kretyen swazir ki mor ozordi i ganny resisite deswit pour al dan lesyel. Sanmenm sa ki zapot Pol ti dir dan 1 Korentyen 15:51, 52: “Pa nou tou ki pou tonm dormi dan lanmor, me nou tou nou pou sanze, dan en pti moman, dan en klendey, pandan dernyen son tronpet.” Sa bann parol pe ganny akonplir la konmela! Ler bann frer Kris i resisite, zot pou vreman zwaye e zot “pou touzour avek Senyer.”​—1 Tesa. 4:17.

15. Ki travay sa bann ki al dan lesyel “dan en klendey” pou fer?

¹⁵ Labib i dir nou ki travay sa bann ki al dan lesyel “dan en klendey” pou fer. Zezi i dir zot: “Sa enn ki ranport laviktwar e ki fer sa ki mon’n demande ziska lafen, mon pou donn li lotorite pour diriz bann nasyon, parey mwan mon’n gannyen avek mon Papa. Parey en berze, i pou diriz bann dimoun avek en baton feray e zot pou ganny detrir parey bann resipyan larzil ki’n ganny kase an morso.” (Rev. 2:26, 27) Sa bann ki al dan lesyel pou swiv Zezi e diriz bann dimoun avek en baton feray.​—Rev. 19:11-15.

16. Ki mannyer bann imen pou ganny laviktwar lo lanmor?

¹⁶ I kler ki bann Kretyen swazir pou ganny laviktwar lo lanmor. (1 Kor. 15:54-57) Vi ki zot in resisite e zot in al dan lesyel, zot pou kapab ede retir tou move keksoz pandan lager Armagedon. Plizyer milyon lezot Kretyen pou “pas atraver sa gran ladetres” e zot pou antre dan nouvo lemonn. (Rev. 7:14) Sa bann dimoun pou vwar ler plizyer bilyon dimoun ki’n mor dan lepase i ganny resisite. Zis mazinen ki kantite nou pou kontan ler sa i arive! (Akt 24:15) Tou bann ki fidel avek Zeova pou osi ranport laviktwar lo lanmor ki nou’n erite avek Adan e zot pou kapab viv pour touzour.

17. Ki 1 Korentyen 15:58 i ankouraz nou pour fer?

¹⁷ Tou Kretyen ozordi i devret rekonesan pour sa bann parol rekonfortan ki Pol ti ekri bann Kretyen Korent konsernan rezireksyon. Nou annan bann bon rezon pour obei konsey Pol pour fer tou sa ki nou kapab la konmela “dan travay Senyer.” (Lir 1 Korentyen 15:58.) Si nou toultan fer nou mye dan sa travay, nou kapab annan sa lespwar pour annan en lavi ere dan lavenir. Sa lavi pou pli merveye ki okenn keksoz ki nou kapab imazinen. I pou montre ki nou travay pour Senyer pa ti anven.