Zeova i rekonfort nou dan tou nou bann leprev

1, 2. Ki mannyer Zeova i rekonfort nou dan nou bann leprev e ki promes nou vwar dan son Parol?

EN ZENN frer selibater ti’n mazin lo 1 Korentyen 7:28 ki dir ki bann ki marye “pou ganny problenm dan zot lavi.” Sa frer ti koz avek en ansyen ki’n marye e ki pli vye ki li e demann li: “Ki sa ‘problenm’ ki sa verse pe koz lo la e ki mannyer mon pou kapab fer fas avek li si mon marye?” Avan reponn sa zenn frer, sa ansyen ti demann li pour reflesir lo en lot keksoz ki zapot Pol ti ekri: Zeova i “Bondye . . . ki donn rekonfor dan tou sityasyon. I rekonfort nou dan tou nou bann leprev.”​—2 Korentyen 1:3, 4.

² Nou konnen ki nou Papa Zeova i kontan nou e i rekonfort nou ler nou dan difikilte. Petet ou kapab rapel serten moman kot Zeova in servi son Parol pour siport e gid ou. Nou kapab asire ki i oule sa ki pli bon pour nou parey i ti oule pour son bann serviter dan lepase.​—Lir Zeremi 29:11, 12.

 3. Ki sa de kestyon nou pou reponn dan sa lartik?

³ Ordinerman, i pli fasil pour andir bann problenm ler nou konn zot lakoz. Alor, akoz nou kapab ganny problenm dan nou maryaz oubyen dan nou fanmir? Ki bann legzanp dan letan Labib e dan nou letan ki kapab ed nou ganny sa rekonfor ki nou bezwen? Annou reponn sa de kestyon e vwar ki mannyer nou kapab andir bann leprev.

4, 5. Ki bann problenm en msye ek son madanm i kapab annan?

⁴ Apre ki Zeova ti’n kree sa premye madanm, i ti anmenn li kot sa zonm e i ti vin son madanm marye. Apre Zeova ti dir: “En zonm i kit son papa ek son manman pour atas li avek son fanm, e tou le de zot vin en sel laser.” (Zenez 2:24) Byensir nou tou nou enparfe. (Romen 3:23) Alor, i pour sa rezon ki ler en zonm ek en madanm i marye, zot kapab ekspekte ki pou annan problenm. Par egzanp, avan ki en madanm i marye, normalman i ti bezwen obei son paran. Me Parol Bondye i dir ki apre maryaz, zonm i vin sef son madanm. (1 Korentyen 11:3) Premye kou, sa msye i kapab vwar li difisil pour desarz son responsabilite konman sef son madanm. Sa madanm osi i kapab vwar li difisil pour soumet avek son msye olye son paran. Deplis, ler zot fek marye, zot kapab annan dezakor avek fanmir zot konzwen e sa osi i kapab en leprev.

⁵ Pran kont osi ki mannyer en msye ek son madanm i kapab santi ler zot konnen ki zot pe al ganny en pti baba. Menm si i kapab ki zot vreman kontan, normalman zot osi trakase. Zot kapab pe mazinen si sa lansentman pou al byen e zot kapab enkyet pour lasante sa pti baba. Zot osi konnen ki zot pou bezwen depans plis larzan. Apre ki sa zanfan in ne, zot pou bezwen fer bann azisteman. Sa manman i kapab pas preski tou son letan pe pran swen avek zot pti baba. Alor sa msye ek madanm pou napa menm kantite letan pour kanmarad parey avan. Sa papa osi pou annan plis responsabilite aprezan. I pou bezwen fer sir ki son madanm ek zanfan i ganny tou sa ki zot bezwen.

6-8. Ki mannyer en koup marye i kapab santi si zot pa kapab fer zanfan?

⁶ Serten koup marye i annan en lot kalite problenm. Zot vreman anvi zanfan me zot pa kapab fer zanfan. Ler sa madanm pa tonm ansent, i kapab tonm dan en profon latristes. (Proverb 13:12) Dan letan Labib, i ti vreman enportan pour en madanm marye e fer zanfan. I ti pour sa rezon ki Rasel, madanm Zakob, ti dan en gran depresyon akoz i pa ti kapab tonm ansent menm si son ser ti kapab. (Zenez 30:1, 2) Dan serten pei ozordi, dimoun i krwar ki i vreman enportan pour annan en kantite zanfan. Dan sa bann pei, souvandfwa dimoun i demann bann misyonner akoz zot napa zanfan. Menm ler bann misyonner i esey eksplike akoz zot napa zanfan, zot dir, “Nou a priy pour zot!”

⁷ Annou vwar en lot legzanp. En ser Langleter ti toultan anvi zanfan. Ler i ti konnen ki i pa ti pou kapab fer zanfan dan sa lemonn, i ti dezespere. Alor, li ek son msye ti deside pour adopte en zanfan. Kantmenm sa, i ti sagren pour en serten letan. I ti dir, “Mon ti konnen ki ladopsyon pa ti pou parey donn nesans mon prop zanfan.”

⁸ Labib i dir bann madanm “pou ganny proteze par vin bann manman.” (1 Timote 2:15) Me sa pa vedir ki en madanm pou ganny lavi eternel zis akoz i annan zanfan. Alor, ki sa verse i vedir? En manman i byen okipe pe pran swen avek son zanfan ek lakour. Sa i kapab ed li pour evit bann keksoz tel parey fann rimer oubyen mel dan zafer ki pa konsern li. (1 Timote 5:13) Kantmenm sa, i touzour kapab ganny problenm dan son maryaz e avek son fanmir.

 9. Ki en lot problenm ki bann koup marye i kapab pas ladan?

⁹ En lot problenm ki serten koup marye i kapab pas ladan i ler zot perdi zot konzwen dan lanmor. Menm si zot ti’n kapab mazinen ki sa pa ti pou zanmen ariv zot, plizyer in bezwen fer fas avek sa sityasyon ki vreman difisil. Bann Kretyen i vreman krwar dan promes rezireksyon e sa i rekonfort zot en kantite. (Zan 5:28, 29) Dan son Parol, nou Papa Zeova in fer en kantite promes ki rekonfort nou dan bann letan difisil. Aprezan, annou vwar ki mannyer serten serviter Zeova in santi sa rekonfor e ki mannyer sa in ed zot.

10. Ki mannyer Ana ti ganny rekonforte? (Vwar portre o konmansman sa lartik.)

¹⁰ Mazin sa ki ti arive avek Ana, madanm Elkana ki i ti kontan en kantite. I ti anvi zanfan, me i pa ti kapab fer zanfan. Par kont, Penina, lot madanm son msye ti annan en kantite zanfan. (Lir 1 Samyel 1:4-7.) Pli pir ankor, Penina ti sifok li “lannen apre lannen” akoz sa. Sa ti bles Ana en kantite. Ki i ti fer pour ganny rekonforte? I ti priy Zeova. Ana ti menm al kot landrwa ladorasyon Zeova e priy pour en bon pe letan. I ti demann Zeova pour donn li en garson e i ti annan konfyans ki I ti pou ed li. Ler i ti’n fini fer son lapriyer, i ti santi li pli byen e “i ti nepli tris.” (1 Samyel 1:12, 17, 18) I ti konnen ki Zeova ti pou swa donn li en garson ouswa rekonfort li dan en lot fason.

11. Ki mannyer lapriyer i kapab rekonfort nou?

¹¹ Vi ki nou enparfe e pe viv dan lemonn Satan, nou pou kontinyen pas dan leprev. (1 Zan 5:19) Me nou annan led. Nou kapab priy Zeova, “Bondye . . . ki donn rekonfor dan tou sityasyon.” Se sa ki Ana ti fer. I ti dir Zeova egzakteman sa ki i ti santi e sipliy li pour ed li. Pareyman, ler nou pe soufer, nou devret fer plis ki zis mansyonn nou problenm avek Zeova. Nou bezwen sipliy li pour ed nou e dir li egzakteman sa ki nou santi.​—Filipyen 4:6, 7.

12. Kwa ki ti ed Ann pour annan lazwa malgre son bann leprev?

¹² Nou kapab sagren en kantite akoz nou napa zanfan oubyen akoz en dimoun ki nou kontan in mor. Me nou ankor kapab trouv rekonfor. Annou vwar legzanp Ann, ki ti viv dan letan Zezi. I ti’n marye pour zis set an ler son msye ti mor. I osi paret ki i ti napa zanfan. Kwa ki ti ed li? “I pa ti zanmen manke pour vin dan tanp.” Menm ler i ti annan 84 an, i ti ankor pe al dan tanp pour priye e ador Zeova. (Lik 2:37) Sanmenm ki ti donn li rekonfor e ed li pour annan lazwa malgre son bann leprev.

13. Ki mannyer bann vre zanmi i kapab rekonfort nou si nou fanmir i dezapwent nou?

¹³ Nou osi kapab ganny rekonfor avek bann vre zanmi ki nou fer dan kongregasyon. (Proverb 18:24) Paula ti annan zis senk an ler son manman ti aret servi Zeova. Paula ti sagren en kantite e son lavi ti difisil. Me en ser pionye ki apel Ann ti ankouraz li e demontre lentere ek lanmour anver li. Paula i dir: “Menm si Ann pa ti mon fanmir, son lentere ek lanmour pour mwan ti vreman ed mwan. Sa ti ed mwan pour kontinyen servi Zeova.” Depi sa, manman Paula in retourn dan kongregasyon e sa i fer Paula vreman kontan. Ann osi i kontan ki i’n kapab ed Paula pour kontinyen servi Zeova.

14. Ki byenfe nou gannyen ler nou rekonfort lezot?

¹⁴ Souvandfwa, ler nou okipe pe fer bann bon keksoz pour lezot, sa i fer nou oubliy nou prop problenm. Par egzanp, en kantite ser, ki swa zot in marye oubyen non, i konnen ki ler zot partaz sa bon nouvel lo Rwayonm avek lezot, zot pe travay avek Zeova e zot pe fer son lavolonte. Sa i fer zot ere. Anfet, nou tou nou kapab demontre lentere dan lezot par anons sa bon nouvel avek zot. Ler nou fer bon keksoz pour nou bann frer ek ser, nou vin pli pros avek zot. (Filipyen 2:4) Sanmenm sa ki zapot Pol ti fer. I ti pran swen avek lezot parey “en manman ki pran swen avek son bann zanfan.” I ti osi rekonfort e ankouraz son bann frer ek ser “parey en papa i fer avek son bann zanfan.”​—Lir 1 Tesalonisyen 2:7, 11, 12.

15. Lekel ki annan sa responsabilite pour ansenny zanfan lo Zeova?

¹⁵ Ki mannyer nou kapab rekonfort bann fanmir dan kongregasyon? Par ler, bann nouvo i kapab demann nou pour ansenny zot zanfan lo Zeova oubyen menm fer letid Labib avek zot. Selman, Labib i dir ki Zeova in donn bann paran sa responsabilite pour ansenny e form zot zanfan. (Proverb 23:22; Efezyen 6:1-4) Menm si lezot i kapab ede dan serten ka, i tre enportan ki paran i ansenny zot zanfan zot menm. Paran i bezwen koz avek zot zanfan regilyerman.

16. Ki nou devret rapel ler nou pe ed bann zanfan?

¹⁶ Ler en paran i demann nou pour etidye Labib avek son zanfan, i byen pour nou rapel ki nou napa menm lotorite ki sa paran. Par ler nou kapab fer letid avek en zanfan ki son paran pa dan laverite. Ler nou fer letid avek zanfan en lot dimoun, i ti pou saz ki nou fer letid se li ler son paran i la oubyen dan prezans en lot Temwen matir ouswa fer sa letid dan en landrwa piblik. Koumsa, nou pa pou donn dimoun en move lenpresyon. Avek letan, petet bann paran pou kapab ansenny zot zanfan lo Zeova zot menm.

17. Ki mannyer bann zanfan i kapab rekonfort zot fanmir?

¹⁷ Bann zenn ki’n aprann konn Zeova i kapab rekonfort e ankouraz zot fanmir. Ki mannyer? Par annan respe pour zot paran e par travay dir pour ed zot dan bann fason pratik. Deplis, ler bann zanfan i reste fidel avek Zeova, sa i kapab ankouraz lafanmir antye. Avan Deliz, Lamek ti ador Zeova. I ti dir sa lo son garson Noe: “I pou en konsolasyon pour nou dan nou travay ek fatig lo sa later modi.” Sa profesi ti ganny akonplir apre Deliz, ler Zeova ti dir ki i pa pou zanmen modi later ankor. (Zenez 5:29; 8:21) Ozordi, bann zanfan ki reste fidel avek Zeova i osi kapab rekonfort zot fanmir. Zot kapab ed tou zot fanmir andir bann leprev la konmela e a lavenir.

18. Kwa ki kapab ed nou andire malgre nenport ki leprev ki nou rankontre?

¹⁸ Pep Bondye ozordi pe trouv rekonfor ler zot priye, medit lo bann legzanp dan Labib e fer vre zanmi avek bann frer ek ser. (Lir Psonm 145:18, 19.) Nou konnen ki Zeova i toultan pare pour rekonfort nou e i pou sirman ed nou andir nenport ki leprev ki nou rankontre!