Servi Zeova san ganny distrer

1, 2. Akoz Zezi ti kontan Mart, me kwa ki montre ki Mart pa ti parfe?

KWA ki vin dan ou lespri ler ou mazin lo Mart, en personnaz dan Labib? Malgre i ti sa sel madanm ki ganny mansyonnen par son non konman enn ki Zezi ti kontan, Zezi ti osi demontre son lanmour senser pour lezot madanm Kretyen. Par egzanp i ti osi kontan Mari, son manman lo later ek Mari, ser Mart. (Zan 11:5; 19:25-27) Alor, akoz Mart i ganny mansyonnen dan sa fason dan Levanzil?

² Zezi ti kontan Mart, pa zis akoz son lospitalite e ki i ti en dimoun debrouyer, me san dout akoz i ti en dimoun spirityel. I ti en madanm ki ti senserman krwar dan bann lansennyman Zezi. Mart ti vreman annan lafwa ki Zezi ti sa Mesi ki ti’n ganny promet. (Zan 11:21-27) An menm tan, parey nou menm, Mart pa ti parfe. En zour ler Zezi ti’n ganny envite kot son lakour, Mart pa ti ezite pour dir Zezi ki pour fer pour koriz en sityasyon ki i ti panse ti mal. Mart ti dir, “Senyer, ou pa dir nanryen mon ser, i les mwan tousel pour servi? Dir li vin ed mwan.” (Lir Lik 10:38-42.) Ki leson nou kapab aprann atraver sa resi?

3, 4. Dan ki fason Mari ti swazir sa “meyer par” e ki leson Mart ti pran aker? (Vwar portre lo paz 18.)

³ Zezi ti ganny pouse pour donn Mart ek Mari en kado spirityel an retour pour zot lospitalite. Mari ti profit sa loportinite pour ganny enstrir direkteman avek sa pli Gran Ansenyan e pour asiz “obor lipye Zezi e ekout son parol.” Mart ti’n kapab fer parey. San dout, Zezi ti pou’n felisit Mart pour aret sa ki i ti pe fer pour ekout li.

⁴ Par kont, Mart ti plito okipe pour prepar en repa spesyal e fer lezot keksoz pour fer Zezi pli alez. Me tou sa bann travay ti pe donn Mart bann traka ki pa ti neseser e sa ti fer li ankoler kont Mari. Zezi ti remarke ki Mart ti pe esey fer tro bokou keksoz, alor i ti dir li zantiman: “Mart, Mart, ou pe trakas ou e trouble ou avek bokou keksoz.” Apre sa i ti sizer avek li ki zis en pla ti pou ase. Aprezan Zezi i tourn son latansyon ver Mari e asir li ki i pe fer sa ki byen, i dir: “Mari in swazir meyer par ki pa pou ganny pran avek li.” Mari ti kapab bliy sa ki i ti manze pandan sa lokazyon spesyal, me i pa ti pou zanmen bliy sa felisitasyon ek sa bon repa spirityel ki i ti gannyen, parski i ti donn Zezi tou son latansyon. Plis ki 60 an pli tar, zapot Zan ti ekrir: ‘Zezi ti kontan Mart ek son ser.’ (Zan 11:5, NW) Sa parol enspire pe fer nou konpran ki Mart ti pran aker sa koreksyon ranpli avek lanmour sorti kot Zezi e ki i ti fer bokou zefor pour servi Zeova senserman tou dilon son lavi.

 5. Akoz espesyalman ozordi i difisil pour reste konsantre lo sa ki pli enportan e ki kestyon nou pou reponn?

⁵ Nou realize ki ozordi i annan bokou plis keksoz ki kapab distrer nou dan nou servis pour Zeova ki i ti annan dan letan Labib. Latour Veyer le 15 Septanm 1958 ti averti bann frer ek ser pour pa les teknolozi distrer zot dan zot servis pour Zeova. Menm sa letan, i ti paret ki tou le zour i ti annan en nouvo keksoz. Bann keksoz parey magazin, radyo, film ek televizyon ti’n vin popiler. Sa Latour Veyer ti dir ki anmezir ki nou apros avek lafen sa lemonn, “i tre probab ki bann distraksyon pou ogmante.” Ozordi, plis ki zanmen oparavan, i annan en kantite keksoz ki kapab distrer nou. Ki nou kapab fer pour vin pli parey Mari e reste konsantre lo bann keksoz spirityel?

 6. Dan ki fason Temwen Zeova pe byen servi bann teknolozi sa lemonn?

⁶ Parti lorganizasyon Bondye lo later in toultan servi byen bann teknolozi sa lemonn pour devlopman vre ladorasyon. Pran par egzanp, “Photo-Drama of Creation,” en progranm bann film ek slayd an kouler avek son. Avan e pandan Premye Lager Mondyal, plizyer milyon dimoun ti ganny rekonforte avek sa prezantasyon, kot a lafen ti koz lo Renny Mil An Zezi Kri kot pou annan lape. Pli tar, mesaz Rwayonm ti ganny pase lo radyo, kot la plizyer milyon dimoun partou lo later ti ganny sans tande. Ozordi, teknolozi konpiter ek Enternet pe byen ganny servi pour propaz sa bon nouvel, partou dan bann zil elwannyen e dan tou kwen lemonn.

 7. (a) Akoz i danzere pour tro profit sa lemonn? (b) Kwa ki nou devret pli konsernen avek? (Vwar not.)

⁷ Labib i averti nou ki i en danze pour tro profit sa ki lemonn i annan pour ofer. (Lir 1 Korentyen 7:29-31.) En Kretyen i kapab fasilman gaspiy en kantite letan dan bann keksoz ki pa mal dan li menm, par egzanp lwazir, pran letan pour lir, get televizyon, vizit landrwa, mars marse get dan laboutik, rod bann dernyen teknolozi modern oubyen kontan en lavi deliks. I annan lezot keksoz osi ki kapab fer nou gaspiy nou letan e vin en obsesyon, tel parey pas letan lo bann sit sosyal lo Enternet, anvoy mesaz, anvoy imel e tyek souvan bann dernyen nouvel ek nouvel sport.a (Ekle. 3:1, 6) Si nou pa kontrol lakantite letan nou pase dan bann aktivite ki pa sitan enportan, nou kapab vwar nou pe negliz nou ladorasyon pour Zeova ki sa keksoz pli enportan dan nou lavi.​—Lir Efezyen 5:15-17.

 8. Akoz sa konsey pour pa kontan bann keksoz ki dan lemonn i enportan?

⁸ Satan in form sa lemonn pour atir e distrer nou. Sanmenm ki ti arive dan premye syek e plis ankor dan nou letan. (2 Tim. 4:10) Alor, nou devret gard antet sa konsey: “Pa bezwen kontan . . . bann keksoz ki dan lemonn.” Si nou kontinyen fer tou pour viv annakor avek sa konsey, nou pou evite ganny distrer e nou “lanmour pour nou Papa” pou kontinyen ogmante. An retour, i pou pli fasil pour nou fer lavolonte Zeova e kontinyen ganny son laprouvasyon pour touzour.​—1 Zan 2:15-17.

 9. Ki Zezi ti dir konsernan nou lizye senbolik e ki mannyer i’n kit en legzanp pour nou?

⁹ Sa bon konsey ki Zezi ti donn Mart ti al byen avek son bann lansennyman ek legzanp. I ti ankouraz son bann disip pour gard zot lizye senbolik “kler,” pour arive pourswiv lentere Rwayonm san ganny distrer. (Lir Matye 6:22,b 33.) Zezi pa ti enkyet pour bann keksoz materyel, i ti napa ni lakaz ni later.​—Lik 9:58; 19:33-35.

10. Ki legzanp Zezi in kite pour nou o konmansman son minister?

¹⁰ Pandan minister Zezi lo later, bokou keksoz ti arive ki ti’n kapab distrer li, me Zezi pa ti les sa arive. O konmansman son minister, apre ki i ti’n ansenny en lafoul e fer bann mirak dan Kapernaoum, bann dimoun ti sipliy li pour pa kit sa lavil. Ki mannyer Zezi ti reakte? I ti dir: “Mon bezwen anons Bonn Nouvel konsernan Rwayonm Bondye dan bann lezot lavil osi, parski se pour sa, ki Bondye in anvoy mwan.” (Lik 4:42-44) Annakor avek son parol, Zezi ti pas partou dan Palestin pour prese e ansennyen. Kantmenm i ti parfe, i ti annan bann bezwen parey nenport ki imen e parfwa i ti menm santi li fatige parski i ti’n donn tou dan servis Bondye.​—Lik 8:23; Zan 4:6.

11. Ki Zezi ti dir avek en zonm ki ti annan en problenm fanmir e ki lavertisman Zezi ti donnen?

¹¹ Pli tar, ler Zezi ti pe ansenny son bann disip ki mannyer pour fer fas avek lopozisyon, en zonm ti enteronp li e dir: “Met, dir mon frer partaz avek mwan bann byen ki nou’n erite.” Me Zezi ti refize mel dan sa problenm. I ti reponn sa zonm, “Mon zanmi, lekel ki’n apwent mwan ziz pour fer zot partaz?” Apre sa Zezi ti kontinyen avek son lansennyman. I ti averti son lodyans lo danze ki annan pour les zot ganny distrer dan zot servis pour Bondye par bann dezir pour keksoz materyel.​—Lik 12:13-15.

12, 13. (a) Kwa ki ti evey lentere bann Grek ki ti’n vin Kretyen detrwa zour avan lanmor Zezi? (b) Ki mannyer Zezi ti fer fas avek en sityasyon ki ti’n kapab distrer li?

¹² Zezi ti vreman anba presyon son dernyen semenn lo later konman en imen. (Mat. 26:38; Zan 12:27) I ti annan bokou travay pour fer e i ti pe al fer fas avek en leprev anbarasan ek en lanmor kriyel. Par egzanp, annou get sa ki ti arive Dimans le 9 Nizan lannen 33 N.L. Parey i ti’n ganny predir, Zezi ti antre Zerizalenm lo en bourik e lafoul ti aplodir li konman sa “Lerwa ki vin o non Senyer.” (Lik 19:38) Lannmen, Zezi ti antre dan tanp e avek kouraz i ti sas bann marsan malonnet ki ti pe servi lakaz Bondye pour fer frod e pran larzan zot bann kanmarad Zwif.​—Lik 19:45, 46.

¹³ Parmi sa lafoul Zerizalenm i ti annan bann Grek ki ti’n vin Kretyen. Zot ti telman enpresyonnen avek sa ki Zezi ti’n fer, ki zot ti demann zapot Filip pour fer laranzman pour zot zwenn Zezi. Me Zezi pa ti pe esey rod dimoun pour siport li e defann li kont son bann lennmi. I ti konnen kwa ki ti pli enportan. I ti reste konsantre lo sa ki Zeova ti anvi i fer, setadir ofer son lavi konman en sakrifis. Alor, apre ki i ti’n dir ki byento i ti pou mor, i ti dir avek Andre ek Filip: “Sa ki kontan son prop lavi pou perdi li, sa ki ay son prop lavi lo sa later pou gard li pour lavi eternel.” Olye satisfer kiryozite sa bann Grek, Zezi ti sizere ki zot swiv sa menm leta lespri sakrifis e i ti fer sa promes: “Si en dimoun i servi mwan, mon Papa pou fer li loner.” San dout, Filip ti anmenn sa mesaz kot sa bann Grek.​—Zan 12:20-26.

14. Anmezir ki Zezi ti met son minister premye dan son lavi, kwa ki montre ki i ti annan en bon balans dan son lavi?

¹⁴ Menm si Zezi pa ti les nanryen distrer li dan son minister ki ti sa travay pli enportan dan son lavi, i pa ti toultan pe mazin zis travay. I ti aksepte en lenvitasyon maryaz, kot i ti menm fer en mirak ler i ti fer delo vin diven ki ti anmenn bokou plis lazwa. (Zan 2:2, 6-10) I ti osi aksepte pour al dinen avek son bann zanmi pros ek bann ki ti kapab vin son disip pli tar. (Lik 5:29; Zan 12:2) Pli enportan ankor, Zezi ti tanzantan rod letan pour priye, medite e repoze.​—Mat. 14:23; Mark 1:35; 6:31, 32.

15. Ki konsey Pol ti donnen e ki mannyer i’n kit en bon legzanp?

¹⁵ Zapot Pol ti konpar parkour en Kretyen devoue avek en lakours landirans e i ti dir pour fini sa lakours zot bezwen “debaras [zot] avek tou fardo.” (Lir Ebre 12:1.) Sirman Pol ti aplik sa ki i ti prese. I ti’n kit deryer li en karyer prometan dan larelizyon Zwif, ki ti’n kapab fer li ris e popiler. I ti konsantre lo “sa ki pli enportan” e donn tou dan son servis pour Bondye. I ti vwayaz ale vini ant Siri, Lazi Miner, Masedwann ek Zide. Konsernan son lespwar pour ganny lavi eternel dan lesyel, Pol ti dir: “Mon oubliy tou sa ki deryer mwan, e mon fer tou pour ganny sa ki par devan. Mon tay for pour mwan ariv lo bit, pour ganny sa pri.” (Fili. 1:10, NW; 3:8, 13, 14) Pol ti profit byen son lavi selibater e i ti reisi ‘fer tou pour ki i atas li avek Senyer san rezerv’ oubyen distraksyon.​—1 Kor. 7:32-35.

16, 17. Ki swa nou’n marye ouswa selibater, ki mannyer nou kapab swiv legzanp Pol konman en disip Zezi? Rakont en leksperyans.

¹⁶ Parey Pol, serten serviter Bondye in swazir pour reste selibater pour ki zot annan mwens responsabilite fanmir e pour ki zot kapab donn tou zot letan dan servis Bondye. (Mat. 19:11, 12) Souvandfwa, bann serviter Bondye ki’n marye i annan plis responsabilite fanmir. Ki swa nou selibater ouswa nou’n marye, nou tou nou kapab “debaras nou avek tou fardo” e servi Bondye avek mwens distraksyon posib. I kapab ki nou pou bezwen redwir letan ki nou gaspiye lo bann keksoz initil e etablir bann lobzektif pour ogmant nou letan dan servis Bondye.

¹⁷ Annou vwar legzanp en koup sorti Wales, Mark ek Claire. Tou le de ti pionye apre ki zot ti’n fini lekol e kontinyen fer pionye apre zot maryaz. Mark ti dir: “Nou ti arive senplifye nou lavi par vann nou lakaz trwa lasanm e kit nou travay a mitan, pour nou kapab antre dan travay konstriksyon enternasyonal.” Pour sa dernyen 20 an, zot in vwayaz dan bann pei Lafrik, pe ede konstrir bann nouvo Lasal Rwayonm. En fwa, ti reste zis 15 dolar dan zot kont, me Zeova ti pran swen avek zot. Claire i dir: “I donn nou en profon satisfaksyon, pour servi Zeova tou le zour. Nou’n fer bokou zanmi e nou pa mank nanryen. Sa ptigin ki nou’n abandonnen pa kapab ganny konpare avek sa lazwa ki nou gannyen dan servis Zeova a plen tan.” Bokou serviter a plen tan in pas atraver menm leksperyans.c

18. Ki bann kestyon serten i bezwen egzaminen?

¹⁸ Me ou menm, ki ou kapab fer si ou remarke ki ou nepli annan sa menm lantouzyasm pour met lentere Rwayonm premye dan ou lavi, parski ou pe ganny distrer avek bann keksoz initil? Petet ou bezwen konsantre dan ou lektir Labib personnel e amelyor ou fason etidye. Ki mannyer ou kapab fer sa? Sa prosen lartik pou eksplike.