Lafason ki lespri sen Bondye i ed nou

1-2. (a) Kwa ki kapab ed nou andir nou bann problenm? Eksplike. (b) Ki nou pou diskite dan sa lartik?

“LER mon mazin sa ki mon’n pas ladan, mon konnen ki mon pa ti pou’n kapab fer fas avek sa problenm mon tousel.” Eski ou’n deza dir en keksoz en pe parey? Bokou nou in deza dir sa. Petet ou’n fer fas avek en problenm lasante grav oubyen ou’n perdi en dimoun ki ou kontan dan lanmor. Ler ou mazin sa problenm, ou santi ki ou’n kapab andire, gras a lespri sen ki’n donn ou sa “lafors . . . ki pli pwisan ki nou prop lafors.”​—2 Kor. 4:7-9.

² Nou osi bezwen lespri sen pour ed nou reziste lenfliyans sa move lemonn. (1 Zan 5:19) An plis, nou bezwen lalit avek “bann demon.” (Efe. 6:12) Dan sa lartik, nou pou diskit lo de fason ki lespri sen i kapab ed nou fer fas avek sa bann problenm. Nou pou osi vwar ki nou kapab fer pour ganny led lespri sen.

 3. Ki en fason ki Zeova i ed nou andir nou bann problenm?

³ Lespri sen Zeova i donn nou sa pwisans oubyen lafors ki nou bezwen pour fer tou sa ki nou bezwen fer menm ler nou dan problenm. Menm si zapot Pol ti pe pas dan bokou problenm, i ti santi ki i ti kapab kontinyen servi Zeova parski i ti depan lo “pwisans Kris.” (2 Kor. 12:9) Pandan son dezyenm vwayaz misyonner, Pol pa ti zis travay dir dan predikasyon me i ti osi travay pour siport son lekor finansyerman. Ler i ti dan lavil Korent, i ti reste kot Akila ek Prisil, ki ti fer latant. Vi ki Pol ti fer menm metye, serten zour lasemenn i ti travay avek zot. (Akt 18:1-4) Lespri sen ti donn Pol sa lafors pour fer latant e pour anons sa bon nouvel.

 4. Dapre 2 Korentyen 12:7b-9, ki problenm Pol ti annan?

⁴ Lir 2 Korentyen 12:7b-9. Dan sa bann verse, ki Pol ti oule dir ler i ti dir ki i annan “en pikan ki pe pik” li? Si ou ti annan en pikan ki pe pik ou, ou ti pou dan douler. Alor, Pol ti dir ki i ti pe fer fas avek en problenm ki ti pe fer li soufer. I ti dir ki sa problenm ti parey “en lanz Satan” ki pe kontinyen “tap” (“bat,” not) li. Petet pa Satan ek son bann demon ki ti responsab pour problenm Pol, ki ti parey en pikan ki ti pe pik li. Me ler bann demon ti vwar sa problenm ki Pol ti pe gannyen, zot ti fer li vin pli grav. I ti konmsi zot ti pe pous sa pikan pli dan fon. Ki Pol ti fer?

 5. Ki mannyer Zeova ti reponn lapriyer Pol?

⁵ Premye kou, Pol ti anvi ki Zeova i tir sa “pikan.” I dir: “Trwa fwa mon’n sipliy Senyer [Zeova] pour tir sa pikan.” Me kantmenm i ti fer lapriyer, sa pikan ti reste. Eski sa i vedir ki Zeova pa ti reponn lapriyer Pol? Pa ditou. Zeova ti reponn son lapriyer. Zeova pa ti retir sa problenm, me i ti donn Pol lafors pour andire. Zeova ti dir: “Mon pwisans i vin pli for ler ou feb.” (2 Kor. 12:8, 9) Avek led Bondye, Pol ti kapab reste zwaye e kalm!​—Fili. 4:4-7.

 6. (a) Ki mannyer Zeova i kapab reponn nou lapriyer? (b) Ki mannyer sa bann verse dan sa paragraf i kapab donn ou lafors?

⁶ Parey Pol, eski ou’n deza demann Zeova pour retir en problenm ki ou annan? Petet ou’n priy Zeova plizyer fwa me sa problenm in kontinyen oubyen i kapab ki in vin pli pir ankor. Eski sa in fer ou mazinen ki Zeova i ankoler avek ou? Si i leka, mazin legzanp Pol. Zis parey Zeova ti reponn lapriyer Pol, i pou osi reponn ou lapriyer! Petet Zeova pa pou retir sa problenm, me i pou servi son lespri sen pour donn ou lafors pour fer fas avek sa problenm. (Ps. 61:3, 4) Ou kapab ganny “zet ater,” me Zeova pa pou abandonn ou.​—2 Kor. 4:8, 9; Fili. 4:13.

7-8. (a) Dan ki fason lespri sen i parey divan? (b) Ki mannyer Pyer ti dekri lafason ki lespri sen i fer son travay?

⁷ Ki en lot fason ki lespri sen i kapab ed nou? Nou kapab konpar lespri sen avek divan. En bato i kapab servi divan ki pe soufle dan sa bon direksyon pour ariv sen e sof kot son destinasyon menm si lanmer i move. Pareyman, lespri sen i ed nou pour kontinyen servi Zeova malgre problenm, ziska ki nou dan nouvo lemonn ki Bondye in promet.

⁸ Vi ki zapot Pyer ti en peser, i ti abitye vwayaz lo lanmer. Petet i sa rezon akoz i ti servi en lekspresyon ki annan pour fer avek voyaz lo lanmer ler i ti eksplik lafason ki lespri sen i fer son travay. I ti ekri: “Napa okenn profesi ki’n ganny anonse par lavolonte zonm, me bann zonm ti dir sa ki Bondye ti pous zot pour dir gras a lespri sen.” Sa mo Grek ki’n ganny tradwir konman “pous,” i kapab osi vedir “gid, diriz.”​—2 Pyer 1:21; not.

 9. Ki Pyer ti pe esey dir ler i ti servi sa mo “pous”?

⁹ Ki Pyer ti pe esey dir ler i ti servi sa mo “pous”? Lik ki ti ekri liv Akt, ti servi en lekspresyon Grek ki en pe parey, pour dekri en bato ki pe les divan “trenn” li. (Akt 27:15) En spesyalis Labib ti dir ki sa lekspresyon ki Pyer ti servi ti fer dimoun mazin en vwayaz lo lanmer. Pyer ti pe dir ki zis parey divan i pous en bato ver son destinasyon, lespri sen ti diriz bann ekriven Labib pour fer zot travay. Sa menm spesyalis Labib ti dir ki bann ekriven Labib ti parey bann bato ki ti’n “fer monte zot lavwal,” setadir zot ti pare pour fer sa travay ki lespri sen ti diriz zot pour fer. Zeova ti fer son par. I ti donn “sa divan” oubyen lespri sen. Bann ekriven Labib ti fer sa travay ki zot ti’n ganny donnen pour fer. Zot ti les lespri sen diriz zot.

10-11. Ki de keksoz nou bezwen fer pour fer sir ki nou ganny led lespri sen? Donn en legzanp.

¹⁰ Byensir, ozordi Zeova nepli servi son lespri sen pour fer dimoun ekri bann liv Labib. Par kont, Zeova i ankor pe servi son lespri sen pour diriz son bann serviter. Zeova i ankor pe fer son par. Ki mannyer nou kapab fer sir ki lespri sen Bondye pe diriz nou? Nou bezwen fer sir ki nou kontinyen fer nou par. Ki mannyer nou fer sa?

¹¹ Annou pran en legzanp. Pour en maren profit byen divan, i bezwen fer de keksoz. Premyerman, i bezwen met son bato dan direksyon ki divan pe soufle. Apre tou, son bato pa pou bouze si i reste dan por lwen avek kot divan pe soufle. Dezyenmman, i bezwen fer monte son lavwal pli o posib. Menm si divan pe soufle, si i pa pe soufle dan sa lavwal, bato pa pou bouze. Pareyman, pour nou kapab kontinyen servi Zeova, nou bezwen led lespri sen. Pour nou kapab ganny led lespri sen, nou bezwen fer de keksoz. Premyerman, nou bezwen fer bann keksoz ki lespri sen Bondye i diriz bann serviter Bondye pour fer. Dezyenmman, nou bezwen “fer monte nou lavwal” pli o posib, setadir donn nou meyer ler nou pe fer sa bann keksoz. (Ps. 119:32) Ler nou fer sa, lespri sen pou donn nou sa lafors pour kontinyen servi Zeova fidelman ziska ki nou dan nouvo lemonn ki Bondye in promet.

12. Ki nou pou vwar aprezan?

¹² Ziska aprezan nou’n diskit lo de fason ki lespri sen i ed nou. Lespri sen i donn nou lafors e i ed nou reste fidel ler nou fer fas avek problenm. Lespri sen i ed nou pour kontinyen servi Zeova e sa pou fer nou ganny lavi eternel. Aprezan, nou pou vwar kat keksoz ki nou bezwen fer pour nou ganny led lespri sen.

13. Dapre 2 Timote 3:16, 17, ki mannyer Lekritir i kapab ed nou e ki nou bezwen fer?

¹³ Premyerman, etidye parol Bondye. (Lir 2 Timote 3:16, 17.) Bondye ti servi son lespri sen pour met son panse dan lespri bann ekriven Labib. Ler nou lir Labib e reflesir lo sa ki nou lir, lenstriksyon Bondye i antre dan nou lespri ek leker. Sa bann panse enspire i pous nou pour fer bann sanzman dan nou lavi pour fer plezir Zeova. (Ebr. 4:12) Me pour nou kapab ganny led lespri sen, nou bezwen fer letan pour etidye Labib regilyerman e pour reflesir byen lo sa ki nou lir. Koumsa, Parol Bondye pou annan en lefe lo tou sa ki nou dir e fer.

14. (a) Akoz nou kapab dir ki lespri sen i la dan bann renyon? (b) Ki mannyer nou kapab ganny led lespri sen dan nou bann renyon?

¹⁴ Dezyenmman, ador Bondye ansanm avek nou bann frer ek ser. (Ps. 22:22) Lespri sen Zeova i la dan nou bann renyon. (Rev. 2:29) Akoz nou kapab dir sa? Parski ler nou zwenn ansanm avek nou bann frer ek ser pour ador Bondye, nou priye pour ganny lespri sen, nou sant bann kantik ki baze lo Parol Bondye e nou ekout bann lenstriksyon sorti dan Labib ki ganny prezante par bann frer ki’n ganny apwente par lespri sen. Sa menm lespri sen i ed bann ser prepar e fer zot bann prezantasyon. Par kont, pour ganny led lespri sen, nou bezwen prepar davans pour nou kapab partisipe dan renyon. Dan sa fason, ler nou asiste renyon, nou pare pour resevwar led lespri sen zis parey en bato i fer monte son lavwal pour divan soufle ladan.

15. Ki mannyer lespri sen i ed nou dan predikasyon?

¹⁵ Trwazyenmman, anons sa bon nouvel. Ler nou servi Labib pour anons sa bon nouvel e pour ansennyen, nou les lespri sen ed nou dan predikasyon. (Rom. 15:18, 19) Pour nou kapab ganny led lespri sen Bondye, nou bezwen regilye dan predikasyon e servi Labib otan ki posib. Ou pou ganny bann bon konversasyon dan predikasyon si ou servi bann prezantasyon ki dan Kaye renyon.

16. Ki sa pli bon fason pour ganny led lespri sen?

¹⁶ Katriyenmman, priy Zeova. (Mat. 7:7-11; Lik 11:13) Pour nou kapab ganny led lespri sen, nou bezwen priy Zeova. Napa nanryen ki pou anpes nou lapriyer ariv kot Zeova oubyen anpes nou ganny led lespri sen Zeova. Lespri sen i kapab ed nou menm si nou dan prizon e Satan pa pou kapab anpes nou ganny led lespri sen. (Zak 1:17) Ki mannyer nou devret priye pour nou ganny led lespri sen? Annou vwar en legzanp ki ganny trouve zis dan Levanzil Likb ki pou ed nou aprann plis konsernan lapriyer.

17. Dapre Lik 11:5-9, 13, ki leson nou aprann lo lapriyer?

¹⁷ Lir Lik 11:5-9, 13. Zezi i servi sa legzanp pour montre nou ki mannyer nou devret priye pour ganny led lespri sen. Dan sa legzanp, sa zonm ti ganny sa ki i ti bezwen “akoz i [ti] pe vreman persiste.” I pa ti per pour demann son zanmi led menm si i ti tar dan lannwit.c Me ki sa legzanp i ansenny nou lo lapriyer? Zezi ti dir: “Kontinyen demande e zot pou gannyen, kontinyen rode e zot pou trouve, kontinyen tap laport e i pou ouver.” Alor, ki nou aprann? Pour ganny led lespri sen, nou bezwen persiste dan lapriyer.

18. Dapre sa legzanp ki Zezi ti donnen dan Lik 11:5-9, 13, akoz nou kapab asire ki Zeova pou donn nou lespri sen?

¹⁸ Sa legzanp ki Zezi ti donnen dan Lik 11:5-9, 13, i osi montre akoz Zeova pou donn nou lespri sen. Sa zonm dan sa legzanp ti anvi demontre lospitalite anver son zanmi. I ti santi ki i ti bezwen ofer manze son zanmi ki ti’n vin tar dan lannwit, me i ti napa nanryen pour ofer li. Zezi ti dir ki sa vwazen ti donn sa zonm dipen akoz i ti vreman persiste. Ki Zezi ti pe ansennyen? Si en dimoun enparfe i pare pour ed en vwazen ki persiste, konbyen plis nou bon Papa ki dan lesyel pou ed bann ki persiste ler zot demann li lespri sen! Alor, nou kapab asire ki Zeova pou reponn nou lapriyer ler nou demann li lespri sen.​—Ps. 10:17; 66:19.

19. Akoz nou asire ki nou pou kapab andire?

¹⁹ Nou asire ki nou pou kapab andire menm si Satan pe toultan atak nou. Akoz? Parski lespri sen i ed nou dan de fason. Premyerman, i donn nou sa lafors pour fer fas avek nou bann problenm. Dezyenmman, i sa lafors ki ed nou kontinyen servi Zeova ziska nou ariv dan nouvo lemonn. Alor, annou fer tou sa ki nou kapab pour nou kontinyen ganny led lespri sen!