“Ranpli ou Devwar dan Servis Bondye”

“Fer ou servis oprofon.”—2 TIMOTE 4:5, Byington.

 1, 2. Menm si tou Kretyen i bann proklanmater, ki Labib i dir bann ansyen i devret fer?

ESKI ou en proklanmater Rwayonm? Si wi, dir Zeova mersi pour sa privilez merveye. Eski ou en ansyen dan kongregasyon? Sa i en privilez anplis sorti kot Zeova. Me nou bezwen pa zanmen oubliye ki i pa ni nou ledikasyon skoler ouswa nou abilite pour koz byen ki fer nou kalifye pour predikasyon oubyen pour vin ansyen dan kongregasyon. Se Zeova ki fer nou kalifye pour predikasyon, e serten zonm parmi nou i ganny privilez pour servi konman ansyen, akoz zot ranpli bann standar spesifik ki Labib in etabli.—2 Korentyen 3:5, 6; 1 Timote 3:1-7.

² Tou Kretyen batize i partisip dan travay predikasyon. Me sirtou bann ansyen i bezwen donn en bon legzanp dan predikasyon. Bondye ek Kris, osi byen bann konpanyon Kretyen i apresye bann ansyen ki “donn lapenn pour prese e ansennyen.” (1 Timote 5:17; Efezyen 5:23; Ebre 6:10-12) Atou moman, lansennyman en ansyen i bezwen batir sa ki ekout li spirityelman. Zapot Pol ti dir Timote, ki ti en ansyen, rezon akoz bann ansyen i bezwen fer sa: “Parski en letan pe vini, kot dimoun pou nepli siport lansennyman laverite. Me zot pou swiv zot prop dezir, zot pou rasanble en kantite ansennyan otour zot pour dir zot sa ki zot zorey i oule tande. Zot pou nepli oule ekout laverite, me zot pou prefer bann fab. Me ou, kontrol ou dan tou sirkonstans, siport lasoufrans, fer ou travay konman predikater levanzil, e ranpli ou devwar dan servis Bondye.”—2 Timote 4:3-5.

 3. Pour ki fo lansennyman pa kree en danze pour spirityalite kongregasyon, ki fodre ganny fer?

³ Pour fer sir ki bann fo lansennyman pa kree en danze pour spirityalite kongregasyon, en ansyen i devret azir an armoni avek konsey Pol: “Demontre ou serye dan tou keksoz, . . . fer ou servis oprofon.” (2 Timote 4:5, Byington) Wi, en ansyen i bezwen ‘ranpli byen son devwar dan servis Bondye.’ I bezwen akonpli son servis afon, fer li oprofon oubyen plennman. En ansyen ki akonpli son minister oprofon i donn en latansyon apropriye tou son responsabilite. I pa negliz nanryen e i konplet sa ki i fer. En zonm koumsa i fidel menm dan bann pti keksoz.—Lik 12:48; 16:10.

 4. Kwa ki kapab ed nou akonpli plennman nou minister?

⁴ Pa fodre absoliman ki nou annan plis letan pour kapab akonpli plennman nou devwar dan servis Bondye. Me i neseser ki en dimoun i byen servi son letan pour li kapab reisi. Si tou Kretyen i annan en progranm regilye e balanse, sa i ed nou akonpli bokou keksoz dan minister. Pour ki en ansyen i pas plis letan dan predikasyon, i bezwen byen organiz li pour li balans son progranm e konnen kwa ki i pou les lezot fer e konman pour fer li. (Ebre 13:17) Normalman, en ansyen ki lezot i respekte, i fer son par, zis parey Neemya ti donn lanmen rebatir miray Zerizalenm. (Neemya 5:16) Deplis, tou serviter Zeova i devret partisip regilyerman dan travay predikasyon Rwayonm.—1 Korentyen 9:16-18.

 5. Ki mannyer nou devret santi konsernan predikasyon?

⁵ Konman bann proklanmater sa Rwayonm ki’n ganny etabli dan lesyel, nou annan en travay merveye! Byensir, nou apresye nou privilez pour partisip dan predikasyon sa bon nouvel partou dan lemonn avan lafen i arive. (Matye 24:14) Menm si nou enparfe, nou kapab trouv lankourazman dan parol Pol: “Me sa trezor, nou pe anmenn li dan bann vaz later, pour montre ki sa pisans ki napa son parey i ava sorti kot Bondye e non pa kot nou.” (2 Korentyen 4:7) Wi, nou kapab rann en servis akseptab. Me sa i selman gras a lafors ek lasazes ki Bondye i donn nou.—1 Korentyen 1:26-31.

Reflekte Laglwar Bondye

 6. Ki diferans i annan ant pep Izrael ek Izrael spirityel?

⁶ Konsernan bann Kretyen swazir, Pol ti dir ki Bondye ‘in fer zot vin bann serviter en nouvo lalyans.’ Sa zapot ti konpar sa nouvo lalyans ki ti ganny fer avek Izrael spirityel atraver Zezi Kri ek sa ansyen lalyans ki ti ganny fer avek nasyon Izrael atraver Moiz. Pol i azoute ki ler Moiz ti sorti lo montanny Sinai avek sa Dis Komannman ekrir lo sa de tablet ros, son figir ti sitan briye ki bann Izraelit pa ti kapab get li. Me avek letan, en keksoz grav ti arive akoz “zot lentelizans ti fermen” e en vwal ti kouver zot leker. Me ler en dimoun i tourn ver Zeova avek tou son leker, sa vwal i ganny retire. Apre, Pol i refer avek sa minister ki bann dan sa nouvo lalyans ti gannyen. Pol i dir: “Nou tou ki vwal i’n ganny tire lo nou figir, nou reflet laglwar Senyer.” (2 Korentyen 3:6-8, 14-18; Egzod 34:29-35) Ozordi ‘lezot mouton’ Zezi i annan osi sa privilez pour reflekte laglwar Zeova.—Zan 10:16.

 7. Ki mannyer imen i kapab reflekte laglwar Bondye?

⁷ Ki mannyer bann imen enparfe i kapab reflekte laglwar Bondye, vi ki napa okenn zonm ki kapab vwar son figir e reste vivan? (Egzod 33:20) Apard ki laglwar personnel Zeova, i osi annan son plan glorye pour sangtifye son drwa pour dirize par mwayen son Rwayonm. Bann laverite ki relye avek Rwayonm i form parti “bann mervey ki Bondye in fer” ki ti konmans ganny proklanmen par sa bann ki ti ganny lespri sen zour Lapannkot 33 N.L. (Akt 2:11) Avek gidans lespri, zot ti kapab akonpli sa minister ki zot ti’n gannyen oprofon.—Akt 1:8.

 8. An rapor avek minister, ki Pol ti determinen pour fer?

⁸ Pol ti determinen pour pa les nanryen anpes li akonpli son minister oprofon. I ti ekrir: “Se pour sa rezon, alor ki nou posed sa minister, par mizerikord, nou pa perdi kouraz. Nou’n fini rezet tou sa bann keksoz, ki fer onte e ki fer dan kasyet. Nou pa anbet dimoun, e nou pa fer Parol Bondye vin fo. Okontrer, an pibliyan Laverite, nou fer fason ganny konfyans tou dimoun devan Bondye.” (2 Korentyen 4:1, 2) Atraver sa ki Pol i apel “minister,” laverite pe ganny anonse e lalimyer spirityel pe propaz partou.

 9, 10. Konman i posib pour reflekte laglwar Zeova?

⁹ Konsernan lalimyer fizik ek spirityel, Pol i ekrir: “Bondye ki’n dir, ‘Lalimyer pour klere omilye teneb,’ se limenm ki’n briye dan nou leker pour donn lalimyer [konnesans] son laglwar ki iliminen lo figir Kris.” (2 Korentyen 4:6; Zenez 1:2-5) Vi ki nou’n ganny sa sitan gran loner pour vin bann minis Bondye, annou reste prop pour nou kapab reflekte laglwar Zeova, parey bann laglas.

¹⁰ Bann dimoun ki dan fernwanr spirityel pa kapab vwar laglwar Zeova oubyen son refleksyon lo pli gran Moiz, Zezi Kri. Me nou ki bann serviter Zeova, nou resevwar sa lalimyer glorye sorti dan Labib e nou reflekte li anver lezot. Pour ki sa bann ki dan fernwanr spirityel i sov destriksyon Bondye, zot bezwen lalimyer sorti kot Bondye. Alors, avek en gran lazwa ek devouman, nou obeir lord sorti kot Bondye pour les lalimyer briye dan fernwanr pour laglwar Zeova.

Les ou Lalimyer briye ler ou etidye Labib avek lezot

11. Ki Zezi ti dir konsernan les nou lalimyer briye? Nonm en fason ki nou kapab fer sa dan nou minister.

¹¹ Zezi ti dir son bann disip: “Se zot lalimyer lemonn. En lavil konstri lo en montanny pa kapab reste kasyet. Personn pa alim en lalanp pour met anba en bol; i met li anler kot i kapab donn laklerte partou dan en lakaz. Alor zot lalimyer i devre klere devan tou dimoun, pour ki zot war byen zot bann bonn aksyon e glorifye zot Papa ki dan lesyel.” (Matye 5:14-16) Nou bon kondwit i kapab fer lezot donn Bondye laglwar. (1 Pyer 2:12) Nou annan bokou loportinite pour les nou lalimyer briye atraver plizyer laspe nou travay predikasyon. Enn nou bann lobzektif prensipal se pour reflekte lalimyer spirityel sorti dan Parol Bondye par kondwir bann bon letid Labib avek dimoun. Sa i en fason tre enportan pour akonpli nou minister oprofon. Ki bann sizesyon ki kapab ed nou kondwir bann letid Labib ki tous leker bann dimoun ki pe rod laverite?

12. Ki mannyer lapriyer i relye avek kondwir letid Labib?

¹² Ler nou koz avek Zeova dan lapriyer konsernan etidye Labib avek lezot dimoun, sa i demontre ki nou vreman anvi kondwir bann letid Labib. I osi montre ki nou konpran lenportans pour ed lezot ganny sa konnesans lo Bondye. (Ezekyel 33:7-9) Sirman, Zeova pou reponn nou lapriyer e beni nou zefor serye dan minister. (1 Zan 5:14, 15) Me nou pa priy Zeova zis pour nou trouv en dimoun pour fer en letid Labib avek. Apre ki nou’n ganny en letid, lapriyer ek refleksyon lo bezwen sa etidyan Labib pou ed nou fer sak sesyon letid dan en fason efikas.—Romen 12:12.

13. Ki nou kapab fer ki pou ed nou kondwir bann letid Labib dan en fason efikas?

¹³ Pour fer bann letid Labib efikas, nou bezwen prepar byen sak sesyon. Ki nou kapab fer si nou santi nou pa tro tro kalifye? Get byen ki mannyer sirveyan Letid Liv Kongregasyon i fer sak semenn, i kapab ed nou. Parler, nou kapab akonpanny lezot proklanmater ki ganny bann bon rezilta ler zot kondwir bann letid Labib. Byensir, nou bezwen osi egzamin byen latitid ek metod lansennyman Zezi Kri.

14. Konman nou kapab tous leker en etidyan Labib?

¹⁴ Zezi ti pran plezir pour fer lavolonte son Papa e pour koz avek lezot lo Bondye. (Psonm 40:8) Zezi ti annan en karakter dous e i ti reisi tous leker sa bann ki ti ekout li. (Matye 11:28-30) Alors, annou fer zefor pour esey tous leker bann ki etidye Labib avek nou. Pour reisi fer sa, nou bezwen prepar sak letid avek sitiasyon sa etidyan antet. Par egzanp, si i’n grandi dan en kiltir ki pa servi Labib, petet nou bezwen konvenk li ki Labib i vre. Dan sa ka, nou pou bezwen lir bokou verse Labib e apre eksplike.

Ed bann Etidyan konpran bann Legzanp

15, 16. (a) Ki mannyer nou kapab ed en etidyan ki pa konpran en legzanp ki trouve dan Labib? (b) Ki nou kapab fer si enn nou piblikasyon i servi en legzanp ki difisil pour en serten etidyan Labib konpran?

¹⁵ Petet en etidyan Labib pa konn byen en serten legzanp ki’n ganny servi dan Labib. Par egzanp, i kapab pa konpran ki Zezi ti oule dir ler i ti koz konsernan met en lalanp anler lo en keksoz. (Mark 4:21, 22) Zezi ti pe refer avek en ansyen lalanp delwil ki annan en lanmes. En lalanp koumsa ti ganny mete lo en sandelye e alor ekler en landrwa dan en lakaz. Petet i pou neseser fer resers lo sa size “Lalanp” ek sandelye (lamp ek lampstand an Angle) dan bann piblikasyon parey Étude perspicace pour fer legzanp Zezi kler.a Me nou kontan apre ki nou’n kapab byen eksplik en etidyan en keksoz ki i konpran e apresye!

¹⁶ En liv letid baze lo Labib i kapab servi en legzanp ki serten etidyan i vwar li difisil pour konpran. Pran letan pour eksplik li, oubyen servi en lot legzanp ki fer resorti sa menm pwen. Petet en piblikasyon pe fer resorti ki en partner apropriye ek bon korporasyon i enportan dan en maryaz. Pour demontre sa, sa piblikasyon i kapab donn en legzanp en akrobat ki pe balanse lo en lakord dan lezer ki apre larg sa lakord, e depan lo en lot akrobat pour atrap li. Petet ou kapab servi en lot legzanp. Ou kapab servi legzanp bann travayer ki pe pas bann bwat avek kanmarad ler pe desarz en bato pour demontre nesesite en partner apropriye ek bon korporasyon.

17. An rapor avek servi legzanp, ki nou kapab aprann avek Zezi?

¹⁷ Pour nou kapab servi en lot legzanp fodre ki nou prepare davans. Me sa i en fason pour nou montre ki nou enterese avek en etidyan Labib. Zezi ti servi bann legzanp senp pour eklersi bann topik difisil. Dan son Sermon lo montanny i annan plizyer legzanp senp ki i’n servi. Labib i montre ki son lansennyman ti fer en bon lefe lo bann ki ti ekout li. (Matye 5:1–7:29) Zezi ti pran letan pour eksplik keksoz akoz i ti annan en lentere senser dan lezot.—Matye 16:5-12.

18. Ki sizesyon nou gannyen konsernan bann verse ki annan zis son referans dan nou bann piblikasyon?

¹⁸ Lentere pour lezot pou motiv nou servi Labib pour rezonn avek zot. (Akt 17:2, 3) Alor i neseser ki nou fer lapriyer avan nou konmans letid e servi byen bann piblikasyon ki “serviter fidel” i fourni. (Lik 12:42-44) Par egzanp, dan sa liv apele Konnesans Ki Anmenn ver Lavi Eternel, i annan bokou verse ki’n ganny ekrir.b Me vi ki sa liv i pti, serten verse zot in donn zis son referans. Pandan en letid Labib, i enportan pour lir e eksplik serten sa bann verse. Nou bezwen pa oubliye, ki nou lansennyman i baze lo Parol Bondye, ki annan en gran pwisans. (Ebre 4:12) Dan sak letid refer avek Labib toudilon, e servi souvan sa bann verse dan bann paragraf. Ed sa etidyan vwar sa ki Labib i dir lo en serten size oubyen kondwit. Esey fer tou pour montre li konman i pou benefisye ler i obeir Bondye.—Izai 48:17, 18.

Demann Kestyon ki fer reflesir

19, 20. (a) Akoz nou devret servi bann kestyon pwennvi ler pe fer en letid Labib? (b) Ki nou kapab fer si en topik i merit ganny en pe plis latansyon?

¹⁹ Vi ki Zezi ti servi byen kestyon, sa ti ed dimoun pour rezonnen. (Matye 17:24-27) Si nou demann bann kestyon pwennvi ki pa anbaras en etidyan Labib, son larepons i kapab fer nou konnen ki i pe mazinen lo en serten topik. Petet nou kapab dekouver ki i ankor annan bann pwennvi ki pa baze lo Labib. Par egzanp, petet i krwar dan Trinite. SAPIT 3, dan liv Konnesans i dir ki sa mo “Trinite” pa aparet dan Labib. Sa liv i mansyonn e sit plizyer verse Labib ki montre ki Zeova i separe avek Zezi e ki lespri sen i lafors Bondye, me pa en dimoun. Zis lir e diskit sa bann verse i kapab sifi. Me si dan serten ka, sa pa sifi? Petet prosenn fwa ki nou fini fer letid avek sa dimoun, nou kapab pas en pe letan pour fer en bon diskisyon lo sa topik par servi brosir Doit-on croire a la Trinite? Apre sa, nou kapab kontiny letid dan liv Konnesans.

²⁰ Sipoze larepons sa etidyan i sirprann oubyen menm dezapwent nou apre ki nou’n demann en kestyon pwennvi. Ki nou pou fer? Si fimen oubyen lezot topik delika i enplike, nou kapab sizer sa dimoun pour nou kontiny sa letid e diskit lo sa zafer plitar. Ler nou konnen ki sa etidyan i ankor pe fimen, nou pou kapab rod bann lenformasyon ki kapab ed li progrese spirityelman. Anmezir ki nou esey tous leker sa etidyan, nou kapab priye ki Zeova i ed li grandi spirityelman.

21. Ki i kapab arive si nou adapte nou metod lansennyman avek bezwen en etidyan Labib?

²¹ Avek bon preparasyon ek led Zeova, nou pou kapab adapte nou metod lansennyman pour satisfer bezwen en etidyan Labib. Ofiramezir, nou kapab ed li devlop en lanmour profon pour Bondye. Nou osi kapab ed li devlop respe ek lapresyasyon pour lorganizasyon Zeova. I vreman en satisfaksyon ler en etidyan Labib i rekonnet ki ‘Bondye i reelman parmi nou’! (1 Korentyen 14:24, 25) Alors, annou fer bann letid Labib efikas e fer tou sa ki nou kapab pour ed lezot vin bann disip Zezi.

Kontinyen apresye bokou sa Trezor

22, 23. Ki nou bezwen pour nou akonpli oprofon nou minister?

²² Pour akonpli oprofon nou minister, fodre nou depan lo lafors ki Bondye i donn nou. Pol ti ekrir son bann konpanyon Kretyen swazir konsernan sa minister: “Me sa trezor, nou pe anmenn li dan bann vaz later, pour montre ki sa pisans ki napa son parey i ava sorti kot Bondye e non pa kot nou.”—2 Korentyen 4:7.

²³ Ki swa nou form parti ‘lezot mouton’ oubyen en Kretyen swazir, nou parey bann vaz later frazil. (Zan 10:16) Kantmenm sa, Zeova i kapab donn nou lafors neseser pour akonpli nou travay malgre nenport presyon ki nou gannyen. (Zan 16:13; Filipyen 4:13) Annou alor met tou nou konfyans dan Zeova, apresye bokou nou servis presye, e akonpli oprofon nou minister.

[Not anba lo paz]

Ki ou pou reponn?

• Ki bann ansyen i kapab fer pour akonpli zot minister oprofon?

• Ki mannyer nou kapab kondwir bann letid Labib pli byen?

• Ki ou pou fer si en letid pa konpran en legzanp oubyen bezwen plis lenformasyon lo en serten topik?

[Portre lo paz 18]

Bann ansyen i ansenny dan kongregasyon e ede form lezot dan minister

[Portre lo paz 20]

Kondwir bann letid Labib efikas i en fason pour les nou lalimyer briye