“Lespri sen i konfirm dan nou leker”

1-2. Ki levennman ekstraordiner ti arive zour Lapannkot lannen 33?

I DIMANS bomaten Zerizalenm e i zour Lapannkot lannen 33. En group apepre 120 disip in rasanble ansanm dan en lasanm anler dan en lakaz. (Akt 1:13-15; 2:1) Detrwa zour pli boner, Zezi ti’n demann zot pour reste Zerizalenm akoz zot ti pou ganny en kado spesyal. (Akt 1:4, 5) Ki ti arive apre?

² “En sel kou, i ti annan en tapaz sorti dan lesyel parey tapaz en gro divan.” Sa tapaz ti rezonnen partou dan lakaz. Apre, sa bann disip ti kapab vwar “sa ki ti resanble bann lalang dife” apoz lo latet sakenn antre zot. Zot tou zot ti “ranpli avek lespri sen.” (Akt 2:2-4) Dan sa fason ekstraordiner, Zeova ti donn lespri sen sa bann disip. (Akt 1:8) Zot ti bann premye dimoun pour ganny swazir par lespri senb e zot ti ganny donnen sa lespwar pour al dirize ansanm avek Zezi dan lesyel.

 3. Akoz bann ki ti la zour Lapannkot lannen 33 pa ti doute ki zot ti’n ganny swazir par lespri sen?

³ Si ou ti enn sa bann disip ki ti dan sa lasanm sa zour, ou pa ti pou zanmen oubliy sa ki ti arive. Sa ki ti resanble bann lalang dife ti apoz lo ou latet e ou ti konmans koz dan diferan langaz! (Akt 2:5-12) Ou ti pou napa okenn dout ki ou ti’n ganny swazir par lespri sen. Me eski tou bann ki ganny swazir par lespri sen i ganny swazir dan en fason ekstraordiner e an menm tan dan zot lavi? Non. Ki mannyer nou konnen?

 4. Eski tou Kretyen swazir dan premye syek ti ganny swazir an menm tan? Eksplike.

⁴ Annou diskit lo kan ki en dimoun i ganny swazir par lespri sen. Pa zis sa group 120 Kretyen ki ti ganny swazir par lespri sen zour Lapannkot lannen 33. Pli tar sa zour, apepre 3,000 lezot disip ti osi ganny lespri sen. Zot ti ganny swazir par lespri sen ler zot ti batize. (Akt 2:37, 38, 41) Me dan bann lannen ki ti swiv, pa tou Kretyen swazir ki ti ganny swazir zour zot batenm. Bann Samariten ti ganny swazir par lespri sen en pe letan apre zot batenm. (Akt 8:14-17) An plis, Korney ek son fanmir ti ganny swazir dan en fason ki pa ti parey pour lezot Kretyen. Zot ti ganny swazir menm avan ki zot ti batize.​—Akt 10:44-48.

 5. Dapre 2 Korentyen 1:21, 22, ki arive ler en dimoun i ganny swazir par lespri sen?

⁵ Annou osi diskit lo ki i arive ler en dimoun i ganny swazir par lespri sen. O konmansman, serten i kapab vwar li difisil pour aksepte ki Zeova in swazir zot. Zot kapab demann zot lekor, ‘Akoz Bondye in swazir mwan?’ I kapab ki serten pa santi koumsa. Nenport ki fason en dimoun i santi, zapot Pol i eksplike ki i arive avek en dimoun ki’n ganny swazir par lespri sen. I dir: “Apre ki zot in krwar dan li, zot in ganny selec avek lespri sen ki ti’n ganny promet gras a li. Lespri sen i en garanti ki konfirm davans nou leritaz.” (Efe. 1:13, 14; not) Alor, Zeova i servi son lespri sen pour fer kler avek sa bann Kretyen ki i’n swazir zot. Dan sa fason, lespri sen i “en garanti” ki asir sa bann Kretyen ki a lavenir zot pou viv pour touzour dan lesyel e pa lo later.​—Lir 2 Korentyen 1:21, 22.

 6. Ki en Kretyen swazir i bezwen fer pour ganny son rekonpans?

⁶ Si en Kretyen i ganny swazir par lespri sen, eski sa i vedir i pou definitivman al dan lesyel? Non. Sa Kretyen i asire ki i’n ganny swazir pour al dan lesyel. Par kont, i bezwen rapel sa konsey: “Mon bann frer, fer touzour plis zefor pour fer sir ki zot gard zot privilez konman sa bann ki’n ganny apele e swazir, parski si zot kontinyen fer sa bann keksoz, zot pa pou zanmen abandonn lafwa.” (2 Pyer 1:10) Alor, menm si en Kretyen in ganny swazir par lespri sen pour al dan lesyel, i pou ganny son rekonpans selman si i reste fidel.​—Fili. 3:12-14; Ebr. 3:1; Rev. 2:10.

 7. Ki mannyer en dimoun i konnen ki in ganny swazir pour al dan lesyel?

⁷ Me ki mannyer en dimoun i konnen ki i’n ganny swazir pour al dan lesyel? Nou kapab vwar larepons dan sa ki Pol ti dir bann Kretyen Ronm ki ti’n “ganny swazir pour vin bann sen.” I ti dir zot: “Parski lespri sen pa fer nou vin lesklav e fer nou per ankor, me gras a lespri sen nou ganny adopte konman bann garson Bondye e lespri sen i fer nou kriy: ‘Aba, Papa!’ Lespri sen i konfirm dan nou leker ki nou bann zanfan Bondye.” (Rom. 1:7; 8:15, 16) Alor, Bondye i servi son lespri sen pour fer bann Kretyen swazir konnen ki zot in ganny swazir pour al dan lesyel.​—1 Tesa. 2:12.

 8. Ki mannyer 1 Zan 2:20, 27 i montre ki bann Kretyen swazir pa bezwen personn dir zot ki Zeova in swazir zot?

⁸ Zeova i fer sir ki sa bann ki’n ganny swazir i asire ki zot pou al dan lesyel. (Lir 1 Zan 2:20, 27.) Byensir, bann Kretyen swazir i bezwen ganny ansennyen par Zeova atraver kongregasyon parey tou lezot dimoun. Me zot pa bezwen personn dir zot ki Zeova in swazir zot. Zeova in servi son lespri sen, sa lafors pli pwisan, pour fer li byen kler ki zot in ganny swazir!

 9. Dapre Efezyen 1:18, ki sanzman en Kretyen i eksperyanse ler i ganny swazir pour al dan lesyel?

⁹ Laplipar serviter Bondye ozordi i kapab vwar li difisil pour konpran ki arive ler en dimoun i ganny swazir pour al dan lesyel. Sa i normal akoz zot pa’n ganny swazir pour al dan lesyel. Apre tou, Bondye ti kree bann imen pour zot viv pour touzour lo later e pa dan lesyel. (Zen. 1:28; Ps. 37:29, NWT) Me Bondye in swazir serten pour viv dan lesyel. Alor ler i swazir zot, i sanz zot lespwar e zot fason panse pour zot enpasyan pour al dan lesyel.​—Lir Efezyen 1:18.

10. Ki savedir “ne ankor”? (Vwar not.)

¹⁰ Ler en Kretyen i ganny swazir par lespri sen, i “ne ankor” oubyen “ne par lesyel.”d Zezi ti osi montre ki i enposib pour eksplik en dimoun ki pa’n ganny swazir ki mannyer en dimoun i santi ler i “ne ankor” oubyen “ne par lespri sen.”​—Zan 3:3-8; not.

11. Eksplike ki mannyer fason panse en dimoun i sanze ler i ganny swazir par lespri sen?

¹¹ Ki mannyer fason panse en Kretyen i sanze ler i ganny swazir pour al dan lesyel? Avan ki Zeova ti swazir sa bann Kretyen, zot ti kontan pour viv pour touzour lo later. Zot ti vreman enpasyan pour vwar sa letan kan Zeova pou tir tou bann move keksoz e fer later vin en paradi. Petet zot ti imazin zot pe akeyir en manm fanmir oubyen zanmi ki’n mor. Me apre ki zot in ganny swazir, zot fason panse i sanze. Akoz sa? Zot pa ti konmans krwar ki viv lo later pour touzour pa ti pou satisfer zot. Zot pa ti sanz zot nide akoz zot ti’n soufer en kantite e zot ti’n tonm dan depresyon. Osi, zot pa ti santi en sel kou ki lavi lo later pa ti pou gou. O kontrer, Zeova ti servi son lespri sen pour sanz zot fason panse e pour sanz sa lespwar ki zot annan.

12. Dapre 1 Pyer 1:3, 4, ki mannyer bann Kretyen swazir i santi konsernan zot lespwar?

¹² En dimoun ki’n ganny swazir i kapab santi ki i pa merite ganny sa privilez. Me i pa zanmen doute ki Zeova in swazir li. O kontrer, i vreman kontan e i rekonesan ler i mazin son lespwar pour al viv dan lesyel.​—Lir 1 Pyer 1:3, 4.

13. Ki mannyer bann Kretyen swazir i santi konsernan zot lavi lo later?

¹³ Me eski sa i vedir ki bann Kretyen swazir i anvi mor? Zapot Pol i reponn sa kestyon. Pol ti konpar lekor imen bann Kretyen swazir avek en latant. I ti dir: “Anfet, nou ki dan sa latant, nou pe plennyen, nou anba presyon, parski nou pa anvi tir sa enn, me nou anvi met sa lot lo nou, pour ki sa ki mortel i ganny ranplase par lavi.” (2 Kor. 5:4) I pa konmsi sa bann Kretyen nepli anvi viv e zot anvi mor vitman. O kontrer, zot kontan zot lavi e zot anvi servi Zeova sak zour, ansanm avek zot fanmir ek zanmi. Nenport keksoz ki zot pe fer, zot toultan gard antet sa zoli lespwar ki zot annan pour lavenir.​—1 Kor. 15:53; 2 Pyer 1:4; 1 Zan 3:2, 3; Rev. 20:6.

14. Kwa ki pa montre ki en dimoun in ganny swazir par lespri sen?

¹⁴ Petet ou pe demann ou lekor si ou osi ou’n ganny swazir par lespri sen. Si wi, demann ou lekor sa bann kestyon enportan: Eski ou vreman anvi fer lavolonte Zeova? Eski ou santi ki ou vreman devoue dan predikasyon? Eski ou kontan etidye Labib e aprann “bann keksoz profon konsernan Bondye”? (1 Kor. 2:10) Eski ou’n vwar ki Zeova in donn ou bann bon rezilta dan sa travay predikasyon? Eski ou santi ki ou annan sa gran responsabilite pour ed lezot aprann lo Zeova? Eski ou’n vwar laprev ki Zeova in ed ou dan bann fason spesifik dan ou lavi? Si ou larepons i wi pour tou sa bann kestyon, eski sa i vedir ki ou’n ganny swazir pour al dan lesyel? Non, sa pa vedir ki ou’n ganny swazir pour al dan lesyel. Akoz? Parski tou serviter Bondye i kapab santi koumsa, ki swa zot in ganny swazir pour al dan lesyel oubyen non. Atraver son lespri sen, Zeova i kapab ed nenport ki parmi son bann serviter pour fer sa bann keksoz. Anfet, si ou pa asire si ou’n ganny swazir pour al dan lesyel, sa i montre ki ou pa’n ganny swazir. Bann ki Zeova in swazir pa doute ki zot in ganny swazir! Zot konnen!

15. Ki mannyer nou konnen ki pa tou bann ki ganny lespri sen ki’n ganny swazir pour al dan lesyel?

¹⁵ Dan Labib, i annan plizyer legzanp bann serviter fidel ki ti ganny lespri sen, me zot ti napa sa lespwar pour al viv dan lesyel. Par egzanp, David ti ganny gide par lespri sen. (1 Sam. 16:13) Lespri sen ti ed li konpran bann keksoz profon konsernan Bondye e osi pour ekri serten verse dan Labib. (Mark 12:36) Kantmenm sa, zapot Pyer ti dir ki David “pa ti mont dan lesyel.” (Akt 2:34) Zan ki batize ti “ranpli avek lespri sen.” (Lik 1:13-16) Zezi ti dir ki napa en zonm lo later ki pli gran ki Zan, me Zezi ti osi dir ki Zan pa ti pou form parti sa bann ki pou al dan Rwayonm lesyel. (Mat. 11:10, 11) Zeova ti servi son lespri sen pour donn sa bann serviter sa pouvwar pour fer bann keksoz enkrwayab me i pa ti servi son lespri sen pour swazir zot pour al viv dan lesyel. Me eski sa i vedir ki bann Kretyen swazir i pli fidel ki sa bann lezot serviter Bondye? Non, parski Zeova pou resisit sa bann serviter pour zot viv dan Paradi lo later.​—Zan 5:28, 29; Akt 24:15.

16. Ki rekonpans laplipar serviter Bondye pou gannyen?

¹⁶ Laplipar serviter Zeova lo later ozordi, napa sa lespwar pour al viv dan lesyel. Parey Abraam, Sara, David, Zan ki batize e lezot bann serviter fidel dan letan Labib, zot annan sa lespwar pour viv lo later ler Rwayonm Bondye pou dirize.​—Ebr. 11:10.

17. Ki nou pou reponn dan sa lot lartik?

¹⁷ Vi ki i ankor annan serten Kretyen swazir parmi pep Bondye ozordi, sa i fer nou demann serten kestyon. (Rev. 12:17) Par egzanp, ki pwennvi bann Kretyen swazir i bezwen annan lo zot menm? Si en dimoun dan ou kongregasyon i konmans manz sa dipen e bwar sa diven pandan Memoryal, ki mannyer ou devret tret li? Eski nou devret enkyet si lakantite bann ki dir zot in ganny swazir i kontinyen ogmante? Dan sa lot lartik, nou pou reponn sa bann kestyon.