Eski ou fason sanze i glorifye Bondye?

1, 2. Akoz Temwen Zeova i annan bann standar apropriye lo zot fason sanze? (Vwar portre anler.)

EN ZOURNAL Laolann ti dekrir labiyman bann sef relizye ler zot kot zot legliz. I ti dir: “Ou ti kapab vwar en kantite dimoun dan lenz casual sirtou ler letan i so.” Par kont, sa menm zournal i dir ki Temwen Zeova pa sanz koumsa dan zot lasanble. Sa zournal ti dir ki bann garson ek zonm i met palto ek kravat e bann fiy ek madanm i met bann zip ki zot longer i respektab menm si sa bann zip i modern. Temwen Zeova i souvandfwa ganny felisite pour zot fason sanze. Zapot Pol ti dir ki bann Kretyen i devret abiy zot dan en fason ki “respektab e avek bon avek bon zizman,” ki apropriye pour bann ki ador Bondye. (1 Timote 2:9, 10, NW) Menm si Pol ti pe refer avek labiyman bann madanm, sa menm standar i aplik pour bann zonm Kretyen.

² Bann bon standar lo fason sanze i enportan pour pep Zeova e i osi enportan pour sa Bondye ki zot adore. (Zenez 3:21) Labib i montre klerman ki Zeova, Souvren liniver, i annan bann standar lo lenz ki son bann serviter i devret mete. Alor, nou labiyman pa devret zis fer nou plezir, me pli enportan ankor, i devret fer plezir nou Souvren Senyer Zeova.

 3. Dapre Lalwa Bondye pour bann Izraelit, ki nou kapab aprann lo fason sanze?

³ I ti annan bann lareg dan Lalwa Moiz ki ti protez bann Izraelit kont imoralite bann nasyon otour zot. Lalwa ti montre ki pour Zeova, i ti devret annan en diferans kler ant lenz en msye ek en madanm. Ozordi, sa stil sanze i ganny apele lanmod unisex, ki vedir ki i napa okenn diferans ant lenz en msye ek en madanm. (Lir Deterononm 22:5.) Nou kapab aprann atraver Lalwa ki Zeova pa kontan ki bann msye i sanz parey en madanm ek ki bann madanm i sanz parey en msye. I osi pa kontan bann lenz ki ou ganny difikilte pour konnen si zot pour bann msye ouswa bann madanm.

 4. Kwa ki kapab ed bann Kretyen fer bann bon desizyon konsernan zot fason sanze?

⁴ Bann prensip Labib i kapab ed nou fer bann bon desizyon konsernan nou fason sanze. Sa bann prensip i aplik pour nenport ki pei, klima ek kiltir. Nou pa bezwen en lalis lo bann lenz ki akseptab oubyen pa akseptab, nou zis bezwen swiv bann prensip Labib ki permet nou swazir bann lenz ki nou kontan mete. Aprezan, annou egzamin serten prensip Labib ki pou ed nou “disern lavolonte Bondye: Sa ki byen, sa ki fer li plezir, sa ki parfe” ler nou pe deside ki lenz nou pou mete.​—Romen 12:1, 2.

5, 6. Ki lefe nou fason sanze i devret annan lo lezot?

⁵ Zapot Pol ti ganny enspire pour mansyonn sa prensip enportan ki trouve dan 2 Korentyen 6:4. (Lir.) Dimoun pou ziz nou e annan en lopinyon lo nou dapre lafason ki nou sanze. (1 Samyel 16:7) Vi ki nou bann serviter Bondye, nou bezwen evite met bann lenz zis akoz nou santi nou pli alez dan sa lenz oubyen zis akoz nou kontan zot. Ler nou aplik bann prensip Labib, nou pou kapab evite met lenz ki kole lo nou, ki montre serten parti lekor oubyen ki seksi. Savedir, nou pa pou met bann lenz ki montre oubyen met lanfaz lo nou parti prive. Personn pa devret santi enkonfortab oubyen get lo kote ler zot vwar nou fason sanze.

⁶ Ler nou byen sanze, prop, byen pennyen, byen raze e nou lenz ek laparans i respektab, bann dimoun i kapab annan plis respe pour nou konman bann serviter Souvren Senyer Zeova. Sa pou osi kapab fer bann dimoun enterese pour konn sa Bondye ki nou adore, devlop plis respe pour nou lorganizasyon e pare pour ekout sa mesaz ki sov lavi.

7, 8. Kan nou devret espesyalman met bann lenz ki apropriye?

⁷ Nou annan sa devwar devan nou Bondye sen, devan nou bann frer ek ser Kretyen ek bann dimoun dan nou teritwar pour abiy dan sa fason ki anmenn loner lo Zeova e lo sa mesaz ki nou anonse. (Romen 13:8-10) I espesyalman enportan pour abiy byen ler nou al renyon e dan predikasyon. Konman bann dimoun ki ador Bondye, nou devret sanz dan en fason ki apropriye. (1 Timote 2:10) Byensir, bann lenz ki apropriye pour en lokazyon i pa neseserman apropriye pour en lot. Alor, nenport ki landrwa nou reste, konman Temwen Zeova, nou devret evite ofans lezot par nou fason sanze.

⁸ Lir 1 Korentyen 10:31. Ler nou al bann lasanble, nou labiyman i devret apropriye e respektab. Nou pa devret imit fason sanze sa lemonn. Sa i devret leka menm ler nou pe vin lasanble, ler pe retourn kot nou e ler nou pe antre sorti dan lotel kot nou pe reste. Sanmenm nou lenz pa devret tro casual oubyen devergonde. Koumsa, nou pou kapab fyer ki nou ganny idantifye konman en Temwen Zeova e nou pou toultan pare pour rann en temwannyaz nenport ki ler.

9, 10. Akoz Filipyen 2:4 i devret annan en lefe lo nou fason sanze?

⁹ Lir Filipyen 2:4. Akoz nou devret reflesir lo lefe ki nou fason sanze i annan lo nou bann frer ek ser? En rezon i ki pep Bondye i fer bokou zefor pour swiv sa konsey: “Alor, met anmor bann dezir materyel ki dan zot: Limoralite seksyel, lenpirte, pasyon, move dezir, lavaris.” (Kolosyen 3:2, 5) Serten nou bann frer ek ser in aret viv en lavi imoral, me zot ankor pe lite kont bann move dezir. Si nou pa fer atansyon, nou fason sanze i kapab fer li pli difisil pour zot swiv konsey ki dan Labib e lite kont sa bann move dezir. (1 Korentyen 6:9, 10) Alor, nou pa ti pou anvi fer zot lalit pli difisil, non?

¹⁰ Ler nou avek bann frer ek ser, nou santi nou an sekirite akoz nou separe avek bann ki promot limoralite. Nou fason sanze i devret fer li pli fasil pour gard sa lanvironnman prop ki egziste parmi nou bann frer ek ser, ki swa nou dan renyon ouswa dan lezot landrwa. Alor, menm si nou annan drwa pour swazir sa ki nou anvi mete, nou osi annan sa responsabilite pour met bann lenz ki fer li pli fasil pour lezot gard zot panse, parol ek kondwit prop dan lizye Bondye. (1 Pyer 1:15, 16) Vre lanmour “pa fer nanryen ki fer onte. Lanmour pa rod son prop lentere.”​—1 Korentyen 13:4, 5.

11, 12. Ki mannyer Eklezyast 3:1, 17 i ed nou pour rezonnab?

¹¹ Ler bann serviter Bondye i deside kwa ki zot pou mete, zot konnen ki “i annan en letan pour tou keksoz.” (Eklezyast 3:1, 17) Vi ki i annan diferan klima, sezon, fason viv ek sirkonstans, sa i fer ki nou met diferan kalite lenz, me bann standar Zeova i reste toultan parey.​—Malaki 3:6.

¹² Ler i fer so, i pli difisil pour fer sir ki nou fason sanze i rezonnab e respektab. Nou bann frer ek ser i apresye ler nou pa met lenz ki sitan kole oubyen las lo nou ki zot kapab vwar serten parti nou lekor. (Zob 31:1) Ler nou lo lans e kot basen naze, nou kostim de ben i bezwen respektab. (Proverb 11:2, 20) Menm si bann dimoun lemonn i servi bann kostim de ben ki montre preski tou parti zot lekor, nou devret fer sir ki sa ki nou mete i anmenn loner lo nou Bondye sen, Zeova.

13. Akoz sa konsey dan 1 Korentyen 10:32, 33 i devret annan en lefe lo nou fason sanze?

¹³ I annan en lot prensip enportan ki kapab ed nou ler nou pe swazir lenz. Nou bezwen fer atansyon ki nou pa ofans konsyans lezot. (Lir 1 Korentyen 10:32, 33.) I nou responsabilite pour pa met lenz ki kapab ofans nou bann frer ek ser e bann ki pa servi Zeova. Zapot Pol ti ekri: “Kris pa ti fer sa ki fer li plezir.” (Romen 15:2, 3) Parey Zezi, fer lavolonte Bondye e ed lezot i devret pli enportan ki nou bann swa personnel. Alor, nou pa pou swazir bann fason sanze ki nou kontan si zot anpes lezot ekout nou mesaz.

14. Ki mannyer paran i kapab antrenn zot zanfan pour glorifye Bondye par zot fason sanze?

¹⁴ Bann paran Kretyen i annan sa responsabilite pour ansenny zot zanfan bann prensip Labib. Sa i enkli fer sir ki zot ek zot zanfan i fer plezir Zeova par sanz dan en fason respektab. (Proverb 22:6; 27:11) Ki mannyer paran i kapab antrenn zot zanfan pour annan respe pour nou Bondye sen ek son bann standar? Bann paran i devret en bon legzanp pour zot zanfan. Zot devret zantiman montre zot zanfan kote zot kapab ganny bann lenz apropriye. Bann zenn pa devret swazir en resanz zis akoz zot kontan li, me i pli enportan ki zot swazir en lenz ki anmenn loner lo Zeova, sa Bondye ki zot pe reprezante.

15. Kwa ki kapab ed nou fer bann swa ki saz?

¹⁵ Labib i donn en gidans pratik ki kapab ed nou fer bann swa ki saz e ki anmenn loner lo Bondye. Toudmenm, sa ki nou mete i reflekte nou gou personnel. Bann fason sanze ek lenz ki nou mwayen i permet nou aste, i kapab diferan avek sa ki pour lezot, me nou lenz i devret toultan annord, prop, respektab, apropriye pour sak lokazyon e akseptab dan nou pei.

16. Akoz i vo lapenn fer zefor pour rod bann lenz ki respektab?

¹⁶ I pa toultan fasil pour trouv lenz ki respektab e apropriye. Preski tou laboutik i vann zis bann lanmod lenz popiler. Alor, i demann bokou zefor pour trouv oubyen swazir bann zip, rob, kor, palto ek kannson ki pa tro sere e ki respektab. Me nou bann frer ek ser pou remarke e apresye zefor ki nou fer pour met bann zoli lenz ki apropriye. Alor, i vo lapenn fer sa bann sakrifis akoz nou pou ganny sa satisfaksyon ki nou’n anmenn laglwar lo nou Papa lanmour ki dan lesyel.

17. Kwa ki pou ed nou deside si nou pou kit labarb oubyen non?

¹⁷ Eski i apropriye pour bann frer kit labarb? Lalwa Moiz ti ordonn bann zonm pour kit labarb. Par kont, bann Kretyen pa anba Lalwa Moiz e zot pa oblize swiv sa Lalwa. (Levitik 19:27; 21:5; Galat 3:24, 25) I kapab ki dan serten kiltir, en labarb ki annord i en keksoz ki akseptab e respektab ki pa pou anpes dimoun ekout nou mesaz. Anfet, i annan bann frer nonmen ki kit labarb. Kantmenm sa, serten frer i kapab deside pour pa kit labarb. (1 Korentyen 8:9, 13; 10:32) Dan lezot kiltir oubyen pei, i pa akseptab pour bann minis Kretyen kit labarb. Anfet, kit labarb i kapab anpes en frer anmenn laglwar lo Bondye e ki i reste “san okenn repros.”​—1 Timote 3:2, 7; Romen 15:1-3.

18, 19. Ki mannyer Mika 6:8 i ed nou?

¹⁸ Pa nou apresye bokou ki Zeova pa donn nou en gran lalis lo ki lenz ki akseptab oubyen ki pa akseptab. O kontrer , i’n donn nou sa liberte pour fer bann desizyon personnel ki rezonnab baze lo bann prensip Labib. Alor, menm ler nou pe fer bann desizyon konsernan nou fason sanze, nou kapab demontre ki nou anvi reste modes anmezir ki nou servi Bondye.​—Mika 6:8.

¹⁹ Dan en fason modes nou rekonnet ki Zeova i pir, sen e ki son bann standar i sa pli bon gidans pour nou. Si nou anvi vin en dimoun ki modes e annan limilite, nou pou aplik son bann standar dan nou lavi. Si nou modes nou pou osi respekte santiman ek lopinyon lezot.

20. Ki lefe nou fason sanze ek laparans i devret annan lo lezot?

²⁰ Nou fason sanze i devret montre klerman ki nou bann serviter Zeova. Bann standar Zeova i o e nou kontan pour swiv zot. An zeneral, nou bann frer ek ser i merite ganny felisite pour zot laparans ek bon kondwit. Zot atir bann dimoun senser pour ekout sa mesaz ki sov lavi ki dan Labib e ki anmenn laglwar ek lazwa pour Zeova. Ler nou fer bann desizyon ki saz lo ki kalite lenz nou pou mete, nou pou kontinyen anmenn laglwar lo sa Enn ki abiye avek “mazeste ek loner.”​—Psonm 104:1, 2.