Eski Zezi in vreman mor pour mwan?

DAN Labib nou kapab lir lo ki mannyer plizyer zonm fidel ti santi. Sa bann zonm “ti annan bann santiman parey nou menm.” (Zak 5:17) Alor, nou kapab fasilman konpran ki Pol ti pe esey dir dan Romen 7:21-24: “Ler mon ti a kontan fer sa ki byen, sa tandans pour fer sa ki mal i dan mwan. . . . Pov mwan!” Ler nou bezwen lager kont nou prop lenperfeksyon, i ankourazan pour konnen ki en zonm fidel parey Pol ti osi santi parey nou.

Me Pol ti osi koz lo lezot santiman ki i ti annan. Dan Galat 2:20, i ti dir: “Garson Bondye [i] kontan mwan e [i’n] donn son lavi pour mwan.” Pol ti asire ki sa ti vre! Eski ou osi ou santi parey? Kekfwa pa toultan.

Si nou ankor santi nou mal pour bann fot ki nou’n fer dan lepase, kekfwa nou pa pou krwar ki Zeova i kontan nou e ki i’n pardonn nou. Alor i kapab vreman difisil pour vwar ranson konman en kado ki’n ganny donnen avek nou personnelman. Eski Zezi i vreman anvi ki nou vwar ranson konman en kado? Si wi, kwa ki kapab ed nou pour konpran ki ranson i en kado? Annou vwar larepons sa de kestyon.

Zezi i anvi ki nou vwar son sakrifis konman en kado ki’n ganny donnen avek nou personnelman. Ki mannyer nou kapab konnen ki sa i vre? Imazin sa ki ganny dekrir dan Lik 23:39-43. En zonm in ganny kloute lo poto martir o bor Zezi. I admet ki i’n fer en keksoz mal. I bezwen ki i’n fer en gro krim parski zis bann kriminel ki’n fer en keksoz grav ki ganny met a mor dan sa fason kriyel. Sa zonm i vreman enkyet e i sipliy Zezi: “Mazin mwan ler ou vin Lerwa.”

Ki Zezi ti fer? Zis mazinen ki kantite douler Zezi i ladan ler i vire e get sa kriminel. Menm si i pe soufer, i fer en pti sourir e rekonfort sa zonm. I dir: “Laverite mon dir ou ozordi, ou pou avek mwan dan Paradi.” Zezi ti’n kapab fer sa zonm rapel ki “Garson zonm ti vini . . . pour servi e donn son lavi konman en ranson pour liber bokou dimoun.” (Mat. 20:28) Me olye fer sa, Zezi ti aplik sa sakrifis pour sa zonm personnelman. I ti fer parey en zanmi e servi bann term parey “ou” ek “mwan.” I ti osi dir sa zonm ki i ti pou viv dan en paradi lo later.

I kler ki Zezi ti anvi ki sa zonm i konpran ki son sakrifis ti pou osi benefisye li personnelman. Si Zezi ti anvi ki en kriminel ki pa ti’n ni menm ganny sa loportinite pour servi Bondye i vwar son sakrifis konman en kado personnel, konbyen plis ankor i anvi ki en Kretyen ki’n batize e pe servi Bondye i vwar ranson dan sa fason? Alor, kwa ki kapab ed nou pour vreman krwar ki sakrifis Zezi pou benefisye nou personnelman malgre okenn pese ki nou’n fer dan lepase?

Vi ki Zezi ti’n donn Pol sa responsabilite pour anons sa bon nouvel, sa ti ed Pol pour konpran ki Zezi ti’n mor pour li. Ki mannyer sa? I ti eksplike: “Mon rekonesan anver Kris Zezi nou Senyer ki’n donn mwan lafors pour akonpli son minister akoz i’n konsider mwan fidel, menm si avan mon ti koz an mal lo Bondye, persekit lezot e mon ti arogan.” (1 Tim. 1:12-14) Sa travay ki Pol ti’n ganny konfye ti fer li asire ki Zezi ti kontan li, annan konpasyon pour li e annan konfyans dan li. Zezi in osi donn sakenn ant nou sa responsabilite pour anons sa bon nouvel. (Mat. 28:19, 20) Eski nou responsabilite pour anons sa bon nouvel i osi kapab ed nou pour konpran ki Zezi ti mor pour nou?

Albert, ki fek ganny reentegre konman en Temwen Zeova apre ki i ti’n ganny ekskli dan kongregasyon pour preski 34 an, i eksplike: “Mon pese i touzour devan mwan. Me ler mon dan predikasyon, mon santi ki Zezi in personnelman donn mwan mon minister, zis parey zapot Pol. Sa i ed mwan pour pli ere e pour pli pozitif lo mon lekor, mon lavi ek mon lavenir.”​—Ps. 51:3.

Avan ki Allan ti aprann laverite, i ti fer bokou krim e i ti vreman vyolan. I admet: “Mon ankor mazin tou sa ditor ki mon’n fer bann dimoun. Parfwa sa i fer mwan vreman dekouraze. Me mon remersye Zeova ki’n permet en dimoun parey mwan pour partaz sa bon nouvel avek lezot. Ler mon vwar dimoun aksepte sa bon nouvel, sa i fer mwan rapel ki kantite Zeova i bon e ki kantite i kontan nou. Mon santi ki Zeova i servi mwan pour ed bann ki’n osi fer bann move keksoz.”

Ler nou dan predikasyon, nou pe fer en keksoz ki bon e sa i ed nou pour annan bann bon panse. Predikasyon i ed nou pour annan konfyans ki Zezi i kontan nou, annan konpasyon pour nou e konfyans dan nou.

Otan ki lemonn Satan i ankor egziste, i kapab arive ki nou leker i kontinyen fer nou santi nou tris pour tou sa ki nou’n fer dan lepase. Kwa ki pou ed nou lager kont sa bann santiman?

Jean, i en ser ki souvandfwa santi li koupab akoz i ti viv de kalite lavi ler i ti ankor zenn. I dir: “Mon kontan ki ‘Bondye i pli gran ki nou leker.’” (1 Zan 3:19, 20) Zis parey Jean, nou osi nou kapab ganny rekonforte parski nou konnen ki Zeova ek Zezi i konpran ki nou bann imen enparfe ki fer pese. Gard antet ki zot in donn ranson konman en kado pour bann ki’n repantir pour zot pese e non pa pour bann imen parfe.​—1 Tim. 1:15.

Ler nou priye, medit lo lafason ki Zezi ti tret bann imen enparfe e fer nou mye pour akonpli sa minister ki Zezi in donn nou, sa i ed nou pour vin pli konvenki ki ranson in ganny donnen pour nou personnelman. Koumsa, nou pou kapab santi parey Pol e dir: Zezi in “kontan mwan e donn son lavi pour mwan.”