Byento en Lafen avek Problenm Limanite!

“LED imaniter pou napa gran lenportans si i pa form parti en plan detaye e si i napa sipor politik ki annan pour bi adres bann lakoz par deryer bann konfli. Leksperyans in souvan montre ki led imaniter lo li menm pa kapab rezourd bann problenm ki sirtou ganny koze par politik.”—The State of the World’s Refugees 2000.

Menm si i annan plis led imaniter, bann problenm limanite pe kontinyen ogmante. Eski i annan en posibilite ki politik i ava kapab anmenn en solisyon dirab? Antouka posibilite, i pti gin. Me kote nou kapab trouv en solisyon? Dan detrwa verse Labib enteresan okonmansman son let pour bann Kretyen an Efez, zapot Pol i eksplike konman Bondye pou met en lafen avek tou problenm limanite. I menm endike lekel sa mwayen ki Bondye pou servi pour fer sa—en mwayen ki pou adres lakoz par deryer tou problenm ki pe afekte nou ozordi. Akoz ou pa egzamin sa ki Pol i annan pour dir? Sa bann verse i trouve dan Efezyen 1:3-10.

‘Reini ansanm tou Keksoz dan Kris’

Sa zapot i apel plan Bondye “en ladministrasyon [oubyen en group ki organiz bann keksoz] dan en letan fikse.” Ki sa i vedir? I vedir ki Bondye in fikse en letan kot i pou azir dan en serten fason “pour ki dan li [Zezi] i reini ansanm tou keksoz ki dan lesyel ek bann keksoz lo later.” (Efezyen 1:10, NW ) Wi, Bondye in met an mars en laranzman pour anmenn tou keksoz dan lesyel e lo later an armoni, anba son dominasyon. I enteresan pour fer resorti remark ki spesyalis Labib J. H. Thayer i fer lo sa term ki’n ganny tradwir ‘pour reini ansanm ankor.’ I dir: “Reini ansanm ankor . . . tou keksoz ek kreatir (ki ziska prezan i divize akoz pese) dan en sel lasosyasyon avek Kris.”

Sa i endik sa nesesite pour Bondye fer sa, vi ki linite ti ganny kase okonmansman. Byen boner dan listwar imen, nou premye paran, Adan ek Ev, ti swiv Satan Dyab dan rebelyon kont Bondye. Zot ti anvi endepandan pour ganny drwa deside pour zot menm kwa ki byen e kwa ki mal. (Zenez 3:1-5) An akor avek lazistis divin, zot ti ganny retire dan fanmiy Bondye e perdi zot lanmitye avek li. Zot ti plonz limanite dan lenperfeksyon avek tou sa bann konsekans terib ki nou pe eksperyanse ozordi.—Romen 5:12.

Mesanste pa pou dir pour touzour

Serten i kapab demande: ‘Akoz Bondye ti les zot fer sa?’ ‘Akoz i pa ti senpleman servi son gran pwisans e enplimant son lavolonte, koumsa i ti ava anpes tou sa douler ek soufrans ki nou pe eksperyanse ozordi?’ Petet i fasil pour pans koumsa. Me si Bondye ti’n servi son gran pwisans dan sa fason, ki sa ti pou prouve? Eski ou admir oubyen dakor avek en dimoun ki zis kraz tou lopozisyon dek ki i vwar en premye siny dezakor, senpleman akoz i annan sa pouvwar pour fer li? Sertennman non.

An realite sa bann rebel pa ti konteste pouvwar tou pwisan ki Bondye i annan. Zot ti pli partikilyerman konteste son drwa pour dirize e met an kestyon son fason dirize. Pour kapab rezourd sa zafer enn fwa pour tou, Zeova in les son bann kreasyon diriz zot prop lavi libreman pour en serten kantite letan. (Eklezyast 3:1; Lik 21:24) Kan sa letan i ariv son lafen, Zeova pou entervenir pour reegzers kontrol total lo later. Sa moman, i pou tre kler ki son fason dirize i sa sel fason ki garanti lape dirab, boner, ek prosperite pour bann zabitan later. Apre, tou sa ki fer soufer zot kanmarad dan lemonn pou ganny retire pour touzour.—Psonm 72:12-14; Danyel 2:44.

“Avan Fondasyon Lemonn”

Zeova ti’n plàn pour fer tousala depi byen lontan. Pol i mansyonn “avan fondasyon lemonn.” (Efezyen 1:4, NW ) Sa pa ti avan later oubyen avan Adan ek Ev ti ganny kree. Sa letan lemonn ti “tre bon,” e rebelyon pa ti ankor konmanse. (Zenez 1:31) Ki “lemonn” zapot Pol ti pe koz lo la alor? Se bann desandans Adan ek Ev—sa ras imen enparfe ki fer pese e ki annan lespwar pour ganny libere. Avan ki okenn zanfan ti ne, Zeova ti deza konnen konman i ti pou tret sa bann keksoz pour ofer soulazman pour bann desandans Adan ki kapab ganny libere.—Romen 8:20.

Byensir, sa pa endike ki Souvren liniver i bezwen tret bann sitiasyon parey imen i fer. Ler zot realize ki en ka irzan i kapab arive, imen i fer diferan plan detaye pour kapab tret sa sitiasyon. Tandis ki Bondye Tou Pwisan i senpleman etablir son plan e akonpli li. Toutfwa, Pol i eksplike konman Zeova ti deside rezourd sa bann sitiasyon afen pour anmenn soulazman permanan pour limanite. Ki kalite solisyon Zeova ti annan antet?

Lekel ki pou anmenn Soulazman?

Pol i eksplike ki bann disip Kris ki’n ganny swazir par lespri sen i annan en rol spesyal pour retir move lefe pese ki nou’n erite avek Adan. Zapot Pol i dir ki ‘dan Kris, Bondye ti swazir nou’ pour dirize avek Zezi dan son Rwayonm dan lesyel. Pol i eksplike ki “Bondye ti’n deside davans pour fer nou vin son bann garson atraver Zezi-Kri.” (Efezyen 1:4, 5, nou ki’n met an italik.) Byensir, Zeova pa ti swazir, oubyen deside davans pour apwent sak endividi parmi zot. Me, i ti deside davans pour swazir en group dimoun fidel e devoue ki ansanm avek Kris pou retir domaz ki Satan Dyab, ensi ki Adan ek Ev, in anmennen lo limanite.—Lik 12:32; Ebre 2:14-18.

Sa pa i en keksoz merveye! Ler Satan ti met odefi souvrennte Bondye okonmansman, i ti pe sizere ki kreasyon Bondye, imen, ti enparfe—ki kan zot rankontre difikilte oubyen ganny tante, zot tou zot pou rebel kont dominasyon Bondye. (Zob 1:7-12; 2:2-5) Apre, dan en fason enpresyonan, Zeova ti montre “son faver imerite glorye,” an demontran son konfyans dan son kreasyon ki lo later par adopte serten dan desandans Adan ki’n osi fer pese pour vin son bann zanfan spirityel. Sa bann ki form parti sa pti group pou ganny pran pour servi dan lesyel. Pour ki bi?—Efezyen 1:3-6, NW; Zan 14:2, 3; 1 Tesalonisyen 4:15-17; 1 Pyer 1:3, 4.

Zapot Pol i dir ki sa bann garson ki Bondye in adopte, i vin “zeritye ansanm avek Kris” dan son Rwayonm dan lesyel. (Romen 8:14-17) Konman bann lerwa ek pret, zot pou kontribye pour liber laras imen avek douler ek soufrans ki i pe eksperyanse konmela. (Revelasyon 5:10) I vre, “ziska aprezan tou lakreasyon Bondye pe soupire e soufer.” Toudmenm, byento, sa bann garson swazir Bondye pou swiv Zezi Kri an aksyon, e tou imen obeisan “pou ganny libere en zour avek pouvwar destrikter ki pe gard li dan lesklavaz, pour partisip dan laliberte ek laglwar bann zanfan Bondye.”—Romen 8:18-22.

“Libere par Ranson”

Tousala in posib atraver faver imerite pli enpresyonan e pli remarkab ki Bondye in eksprimen anver limanite ki kapab ganny libere—sakrifis ranson Zezi Kri. Pol i ekri: “Dan li, nou’n ganny delivrans par son disan, nou’n resevwar pardon nou pese, selon larises son lagras.” (Nou ki’n met an italik.)—Efezyen 1:7.

Zezi Kri i personnaz pli enportan dan lakonplisman plan Bondye. (Ebre 2:10) Son sakrifis ranson i donn sa baz legal pour Zeova adopte serten desandans Adan dan son fanmiy dan lesyel e pour soulaz limanite avek bann konsekans pese Adan, san perdi konfyans dan Son bann lalwa ek prensip. (Matye 20:28; 1 Timote 2:6) Zeova in fer bann keksoz dan en fason ki siport son ladrwatir e satisfer demann pour en lazistis parfe.—Romen 3:22-26.

“Sen Sekre” Bondye

Pour plizyer milye lannen, Bondye pa ti revel egzakteman konman i pou akonpli son plan konsernan later. Dan premye syek N.L., ‘i’n fer [bann Kretyen] konn sen sekre son lavolonte.’ (Efezyen 1:9, nou ki’n met an italik.) Pol ek son bann konpanyon Kretyen swazir ti konpran klerman sa rol merveye ki Zezi Kri ti’n gannyen dan lakonplisman plan Bondye. Zot ti osi konmans konpran zot rol spesyal konman zeritye ansanm avek Kris dan son Rwayonm ki dan lesyel. (Efezyen 3:5, 6, 8-11) Wi, sa Rwayonm [gouvernman] dan lanmen Zezi Kri ek bann ki pou renny avek li i sa mwayen ki Bondye pou servi pour anmenn lape dirab pa zis dan lesyel me osi lo later. (Matye 6:9, 10) Atraver li, Zeova pou reetablir later dan sa kondisyon ki i ti anvi later i ete okonmansman.—Izai 45:18; 65:21-23; Akt 3:21.

Son letan fikse pour pran aksyon pour debaras later avek tou kriyote ek lenzistis i pros pour arive. Me an realite Zeova ti konmans sa prosedir restorasyon zour Lapannkot lannen 33 N.L. Ki mannyer? Sa letan i ti konmans rasanble “bann keksoz ki dan lesyel,” sa bann ki pou diriz avek Kris dan lesyel. Sa ti enkli bann Kretyen an Efez. (Efezyen 2:4-7) Pli resaman, dan nou letan, Zeova in konmans rasanble bann keksoz “lo later.” (Efezyen 1:10, nou ki’n met an italik.) Par en kanpanny predikasyon ki pe ganny fer dan lemonn antye, i pe fer tou nasyon konn sa bon nouvel konsernan son Rwayonm [gouvernman] dan lanmen Zezi Kri. Sa bann ki aksepte sa bon nouvel pe deza ganny rasanble konmela menm dan en landrwa proteksyon ek gerizon spirityel. (Zan 10:16) Byento, zot pou konpletman lib avek tou lenzistis ek soufrans lo en later byen netwaye ki pou vin en paradi.—2 Pyer 3:13; Revelasyon 11:18.

“Bokou progre remarkab” in ganny fer dan bann zefor imaniter pour ed bann dimoun ki’n pas dan bokou soufrans ek douler. (The State of the World’s Children 2000) Me sa progre pli remarkab, pou letan Zezi Kri ek lezot ki pou renny avek li dan rwayonm lesyel pou byento entervenir. Zot pou konpletman rezourd tou lakoz konfli ek tou lezot mesanste ki antour nou. Zot pou met en lafen avek tou problenm limanite.—Revelasyon 21:1-4.

[Portre lo paz 4]

Bann led imaniter pa’n rezourd bann problenm limanite

[Portre lo paz 6]

Sakrifis ranson Kris in donn limanite soulazman avek pese ki zot in erite avek Adan

[Portre lo paz 7]

I posib pour trouv proteksyon ek gerizon spirityel ozordi

[Portre lo paz 7]

Byento, atraver Rwayonm Mesyanik, pou annan soulazman konplet avek bann problenm