• Lafason ki kongregasyon i organize
    Viv ere pour touzour!—En letid Labib enteraktif

    • Zeova i en Bondye ki annord. (1 Korentyen 14:33) Alor nou ekspekte ki son pep i byen organize. Ki mannyer kongregasyon Kretyen i ganny organize? Ki nou kapab fer pour ki kongregasyon i mars byen?

      1. Lekel sef kongregasyon?

      “Kris i sef kongregasyon.” (Efezyen 5:23) I dan lesyel me i pe diriz aktivite Temwen Zeova partou dan lemonn. Zezi in osi apwent “lesklav fidel e pridan.” I en pti group Kretyen matir ki osi ganny apele Konsey Direkter. (Lir Matye 24:45-47.) Konsey Direkter i donn lenstriksyon tou bann kongregasyon partou dan lemonn, zis parey bann zapot ek ansyen Zerizalenm ti fer dan premye syek. (Akt 15:2) Me sa bann zonm pa sef nou lorganizasyon. Zot depan lo Zeova ek son Parol pour gid zot e zot soumet anba lotorite Zezi.

      2. Ki rol bann ansyen?

      Bann ansyen i bann zonm matir ki servi Labib pour ansennyen dan kongregasyon. Zot osi pran swen avek pep Zeova par ed zot e ankouraz zot. Zot pa ganny peye pour fer sa travay. Plito, zot servi “volonterman devan Bondye. . . . [Zot] fer li avek devouman, pa akoz zot rod zot prop lavantaz.” (1 Pyer 5:1, 2) Bann serviter kongregasyon i ed bann ansyen e avek letan, zot menm, zot kapab kalifye pour vin bann ansyen.

      Konsey Direkter i apwent serten ansyen pour vin sirveyan rezyonal. Sa bann sirveyan i vizit diferan kongregasyon pour donn gidans ek lankourazman. Zot servi Labib pour deside si zot pou apwent en frer konman ansyen oubyen serviter kongregasyon.​—1 Timote 3:1-10, 12; Tit 1:5-9.

      3. Ki responsabilite sak Temwen i annan?

      Nou tou dan kongregasyon nou “loue non Zeova” par partisip dan bann renyon e osi par prese otan ki nou sirkonstans i permet nou.​—Lir Psonm 148:12, 13.

      AL PLI O PROFON

      Aprann ki kalite sef Zezi i ete, ki mannyer bann ansyen i esey imit son legzanp e ki mannyer nou, nou kapab korpere avek Zezi ek bann ansyen.

      4. Zezi i en sef ki annan lanmour

      Zezi i donn nou en zoli lenvitasyon. Lir Matye 11:28-30 e apre reponn sa kestyon:

      • Ki kalite sef Zezi i ete e ki mannyer i oule nou santi?

      Ki mannyer bann ansyen i swiv legzanp Zezi? Zwe sa VIDEO.

      VIDEO: Bann ansyen i ede apre en tranblemandter Nepal (4:56)

      Labib i montre klerman ki mannyer bann ansyen i devret fer zot travay.

      Lir Izai 32:2 ek 1 Pyer 5:1-3 e apre reponn sa bann kestyon:

      • Ki mannyer ou santi ler ou vwar ki bann ansyen pe ankouraz lezot parey Zezi?

      • Ki lezot fason bann ansyen i swiv legzanp Zezi?

      5. Bann ansyen i ansenny par zot legzanp

      Ki mannyer Zezi i anvi ki bann ansyen i vwar zot responsabilite? Zwe sa VIDEO.

      VIDEO: Bann ansyen ki montre legzanp! (7:39)

      Zezi in etabli en standar pour bann ansyen dan kongregasyon. Lir Matye 23:8-12 e apre reponn sa kestyon:

      • Eski ou’n remark en diferans ant sa standar ki bann ansyen i devret swiv dan Labib ek sa standar ki bann pret dan lezot larelizyon i swiv?

      A. Diferan portre: En ansyen ki annan en bon routin spirityel. 1. I priye avan i etidye Labib. 2. I ansenny Labib avek son pti fiy avek led son madanm. B. Sa menm ansyen, son madanm ek son fiy, pe vizit en ser malad ki lo lili lopital. Sa ser i dan zot kongregasyon. C. Sa menm ansyen pe prese kot lakaz en msye. D. Diferan portre: Sa menm ansyen. 1. I fer en diskour dan en renyon. 2. I pas mop kot Lasal Rwayonm.

      1. Bann ansyen i fer zefor pour reste for spirityelman e zot ed zot fanmir pour fer parey

      2. Bann ansyen i pran swen avek tou dimoun dan kongregasyon

      3. Bann ansyen i prese regilyerman

      4. Bann ansyen i ansennyen. Zot osi ede dan netwayaz ek lezot louvraz ki annan

      6. Nou kapab korpere avek bann ansyen

      Labib i donn nou en rezon enportan pour nou korpere avek bann ansyen. Lir Ebre 13:17 e apre reponn sa bann kestyon:

      • Labib i ankouraz nou pour obei e soumet avek bann ki pe diriz nou. Eski ou krwar sa i rezonnab? Akoz?

      Lir Lik 16:10 e apre reponn sa kestyon:

      • Akoz i enportan pour korpere avek bann ansyen, menm dan bann laspe ki pa paret tro enportan?

      SERTEN DIMOUN I DIR: “Pa neseser pour zwenn avek okenn larelizyon.”

      • Ki byenfe en dimoun i gannyen ler i ador Bondye ansanm avek en kongregasyon?

      REZIMEN

      Zezi i sef kongregasyon. Nou kontan pour korpere avek bann ansyen ki servi anba lotorite Zezi akoz zot ankouraz nou e ansenny nou par zot legzanp.

      Revizyon

      • Lekel sef kongregasyon?

      • Ki led bann ansyen i donn kongregasyon?

      • Ki responsabilite sak adorater Zeova i annan?

      Lobzektif

      FER PLIS RESERS

      Vwar levidans konman Konsey Direkter ek lezot ansyen i pran lentere bann Kretyen aker.

      Ed bann frer kot nou travay i enterdi (4:22)

      Aprann lo sa ki bann sirveyan rezyonal i fer.

      Lavi en sirveyan rezyonal dan lakanpanny (4:51)

      Konn plis lo rol ki bann madanm i annan dan kongregasyon.

      “Do Jehovah’s Witnesses Have Women Ministers?” (Latour Veyer 1 Septanm 2012 an Angle)

      Aprann plis lo ki mannyer bann ansyen i travay dir pour ankouraz lezot Kretyen.

      “Bann ansyen ki ‘travay ansanm avek nou pour nou lazwa’” (Latour Veyer 15 Zanvye 2013)

  • Ki mannyer ou fanmir i kapab ere?—Parti 1
    Viv ere pour touzour!—En letid Labib enteraktif

    • 1. Ki konsey Labib i donn bann msye?

      Zeova in apwent bann msye konman sef lafanmir. (Lir Efezyen 5:23.) I ekspekte en msye pour fer bann desizyon ki pou benefisye lafanmir antye. Labib i donn sa konsey bann msye: “Kontinyen kontan zot madanm.” (Efezyen 5:25) Ki sa i vedir? En msye ki kontan son madanm i tret li dan en fason zantiy an piblik e osi dan lakour. I protez li kont danze e i fer son mye pour pran swen avek son bezwen fizik e emosyonnel. (1 Timote 5:8) Pli enportan ankor, i ed son madanm pour pran swen avek son bezwen spirityel. (Matye 4:4) Par egzanp, i kapab priye e lir Labib ansanm avek son madanm. Ler en msye i demontre lanmour dan lafason ki i pran swen avek son madanm, i gard en bon lanmitye avek Zeova.​—Lir 1 Pyer 3:7.