SAPIT 15

Batir en Fanmiy Ki Onor Bondye

 1-3. Akoz serten pa kapab rezourd bann problenm ki komen dan maryaz ek lavi fanmiy, me akoz Labib i kapab ede?

SIPOZE ou deside konstri ou prop lakaz. Ou aste later. Avek lantouzyasm, ou vwar ou nouvo lakaz dan ou lespri. Me si ou pa posed okenn zouti ek leksperyans pour konstri? Ou bann zefor pou anven!

² Ler zot angaz dan maryaz, plizyer koup i anvizaz en fanmiy ere, pourtan zot pa posed okenn zouti ni menm leksperyans ki bezwen pour batir enn. Zis apre sa zour ki zot in marye bann konportman negatif i devlope. Lager ek dispit i vin en routin. Ler zanfan i ne, sa nouvo papa ek manman i trouv zot san okenn leksperyans menm parey ki ler zot ti marye.

³ Erezman, Labib i kapab ede. Son bann prensip i konparab avek bann zouti ki pou permet ou batir en fanmiy ere. (Proverb 24:3) Annou vwar konman.

BANN ZOUTI POUR BATIR EN MARYAZ ERE

 4. Akoz nou ekspekte bann problenm dan maryaz, e ki bann direktiv ki Labib i fourni?

⁴ Menm si de konzwen i paret konpatib, zot diferan lo laspe emosyonnel, lo leksperyans lavi zanfan, e lo lorizin zot fanmiy. Se pour sa rezon ki nou ekspekte serten problenm apre maryaz. Me konman nou kapab rezourd sa? Bon, kan bann konstrikter i konstri en lakaz, zot konsilte en plan. Sa i bann gid pour swiv. Labib i fourni bann direktiv Bondye pour batir en fanmiy ere. Annou egzamin serten.

 5. Konman Labib i met lanfaz lo lenportans fidelite dan maryaz?

⁵ Fidelite. Zezi ti dir: “Sa ki Bondye in ini ansanm zonm pa devre separe.”a (Matye 19:6) Lapot Pol ti ekrir: “Ki maryaz i ganny onore par tou dimoun, e ki bann ki’n marye i reste fidel avek kanmarad. Bondye pou ziz bann ki anmenn en lavi dezordonnen e adilter.” (Ebre 13:4) Bann dimoun ki marye i bezwen santi ki i en lobligasyon anver Zeova pour zot reste fidel anver zot konzwen.—Zenez 39:7-9.

 6. Konman fidelite i ede pour prezerv en maryaz?

⁶ Fidelite i akord dinite ek sekirite dan maryaz. Bann konzwen fidel i rekonnet sa, nenport kwa ki pou arive zot pou soutenir kanmarad. (Eklezyast 4:9-12) Konman i diferan avek bann ki abandonn zot maryaz omoman ki zot rankontre en senp pti problenm! Bann tel endividi zot vitman konklir ki zot pa’n ‘swazir sa dimoun apropriye,’ ki zot ‘nepli annan lanmour,’ ki en nouvo konzwen i solisyon. Me sa pa donn okenn ant sa de konzwen loportinite pour zot progrese. Okontrer, sa bann ki enfidel pou kapab anmenn bann menm problenm kot bann nouvo konzwen. Kan en dimoun i annan en bon lakaz, i apersevwar ki twa i koule, sirman i pou esey repare. I pa pou senpleman abandonn sa enn pour en lot lakaz. Pareyman, sanz konzwen pa en fason pour rezoud problenm, ki lakoz bann difikilte dan maryaz. Kan bann problenm i arive, pa esey kas maryaz, me travay vreman dir pour prezerv li. Sa kalite fidelite pou tret sa linyon konman en keksoz ki merit ganny proteze, mentenir e prezerve avek swen.

 7. Akoz kominikasyon i souvan difisil pour dimoun ki’n marye, me konman sa prensip pour vin en ‘nouvo dimoun’ i kapab ede?

⁷ Kominikasyon. “Bann plan pa reisi kot napa kominikasyon konfidansyel,” en proverb Labib i dir. (Proverb 15:22) Toutfwa, pour serten koup kominikasyon i difisil. Akoz sa i leka? Parske dimoun i annan diferan fason kominike. Sa i en fakter ki souvan lakoz mank konprenezon ek fristrasyon. Fason ki en dimoun in ganny elve i zwe en rol. Par egzanp, serten in grandi dan en latmosfer kot paran i souvan pe dispit. Prezan konman bann adilt marye, zot pa konnen konman pour koz avek zot konzwen dan en fason zantiy avek lanmour. Toutfwa, ou lakour pa bezwen vin ‘en lakaz ranpli avek dispit.’ (Proverb 17:1) Labib i plito met lanfaz lo “vin en dimoun konpletman nouvo,” e i pa toler malis, kriye, ek bann gro betiz.—Efezyen 4:22-24, 31.

 8. Kwa ki kapab ede ler ou an dezakor avek ou konzwen?

⁸ Ki ou kapab fer ler i annan bann dezakor? Si ou konmans flanbe avek lakoler, i pou fer dibyen si ou swiv konsey Proverb 17:14: “Avan ki dispit i eklate, pran ou konze.” Wi, ou kapab anvoy sa diskisyon pour plitar, ler tou le de ou ek ou konzwen i kalm. (Eklezyast 3:1, 7) Dan nenport sitiasyon, fer tou ou posib pour “pare pou ekoute, me pran letan avan koze, avan pran lakoler.” (Zak 1:19) Ou lobzektif se pour remedye sitiasyon, me pa pour ganny sa largiman. (Zenez 13:8, 9) Swazir bann parol ek fason koze ki pou kalme ou ek ou konzwen. (Proverb 12:18; 15:1, 4; 29:11) E sirtou, pa reste an dezakor me avek limilite, ansanm rod led an kominik avek Bondye dan lapriyer.—Efezyen 4:26, 27; 6:18.

 9. Akoz nou kapab dir ki kominikasyon i konmans dan leker?

⁹ En proverb Labib i dir: “Leker en saz i fer son labous demontre disernman, avek son lalev i azout konviksyon.” (Proverb 16:23) Vreman, donk, lakle pour en kominikasyon reisi i dan leker, pa dan labous. Ki ou latitid anver ou konzwen? Labib i ankouraz bann Kretyen pour annan “menm santiman.” (1 Pyer 3:8) Eski ou kapab fer sa letan ou konzwen pe eksperyans bann moman lenkyetid? Si i leka, i pou ed ou konnen konman pour reponn.—Izai 50:4.

10, 11. Konman en mari i kapab aplik konsey dan 1 Pyer 3:7?

¹⁰ Loner ek Respe. Bann mari Kretyen i ganny demande pour demer avek zot madanm “an-akor avek konnesans, donn zot loner konman en resipyan pli feb.” (1 Pyer 3:7) Onor en madanm i enkli rekonnet son valer. En mari ki demer avek son madanm “an-akor avek konnesans” i annan gran konsiderasyon pour son santiman, son bann pwen for, lentelizans, ek dinite. I pou osi anvi aprann konman Zeova i konsider bann madanm e oule ki zot ganny trete.

¹¹ Sipoze ou annan en resipyan dan ou lakaz ki tre itil e spesyalman delika. Eski ou pa pou tret li avek prekosyon? E byen, Pyer ti servi sa term “resipyan pli feb” dan sa menm sans, e sa i bezwen pous en mari Kretyen pour manifeste en tandres partikilye pour son madanm byenneme.

12. Konman en madanm i kapab montre ki i annan en profon respe pour son mari?

¹² Me ki konsey Labib i donn en madanm? Pol ti ekrir: “Fodre . . . ki sak madanm i respekte son mari.” (Efezyen 5:33) Zis parey en madanm i bezwen santi ki i ganny onore e vreman kontan par son mari, en mari i bezwen santi ki i ganny respekte par son madanm. En madanm respektab pa pou rakont bann fot son mari, menm si i en Kretyen ou pa. I pa pou anlev li son dinite par kritik li e abes li menm an prive ou an piblik.—1 Timote 3:11; 5:13.

13. Konman eskprim bann pwenn-vi dan en fason pezib?

¹³ Sa pa vedir ki en madanm pa kapab eksprim son bann lopinyon. Si en keksoz i deranz li, avek respe i kapab koze. (Zenez 21:9-12) Revel en lide avek son mari i kapab ganny konpare avek en boul ki i pe anvoy avek li. I kapab lans li dousman ki son mari i a kapab gobe, oubyen i kapab anvoy for ki kapab bles li. Konman i pli meyer kan tou le de konzwen i evit bann lakizasyon blesant me, plito, koz dan en bon fason e zantiy!—Matye 7:12; Kolosyen 4:6; 1 Pyer 3:3, 4.

14. Ki ou devret fer si ou konzwen i demontre pti gin lentere pour aplik bann prensip Labib dan maryaz?

¹⁴ Parey nou’n vwar, bann prensip Labib i kapab ed ou pour batir en maryaz ere. Me si ou konzwen i demontre pti gin lentere konsernan sa ki Labib i annan pour dir? Bokou i kapab ganny akonplir toultan si lo ou par ou aplik konnesans Bondye. Pyer ti ekrir: “Demenm, zot bann madanm, soumet sakenn avek son msye, pour ki, par zot kondwit, si serten parmi zot msye pa obei parol Bondye, zot a kapab kanmenm aksepte lafwa san laparol. Sa bann zonm i a war ki zot kondwi zot dan en fason drwat e avek respe.” (1 Pyer 3:1, 2) Byensir, menm prensip i aplik pour en msye ki son madanm i endiferan anver Labib. Nenport kwa ki ou konzwen i deside fer, les bann prensip Labib fer ou vin en bon konzwen. Konnesans Bondye i osi kapab fer ou vin en meyer paran.

ELEV ZANFAN AN AKOR AVEK KONNESANS BONDYE

15. Konman bann lerer dan fason ki paran i edike i parfwa ganny transmet, me konman sa labitid i kapab sanze?

¹⁵ Menm si ou posed en lansar oubyen en marto sa pa fer ou en sarpantye kalifye. Pareyman, senpleman annan zanfan pa fer ou en paran kalifye. Menm si zot konsyan ou pa, bann paran i souvan-d-fwa elve zot zanfan dan fason ki zot, zot in ganny elve. Par konsekans, bann lerer dan metod edike i parfwa ganny transmet zenerasyon apre zenerasyon. En ansyen proverb Ebre i deklare: “Bann papa i sa bann ki manz rezen ver, me se ledan bann garson ki grense.” Toutfwa, Labib i montre ki en dimoun pa bezwen swiv model son paran. I kapab swazir en lot semen, enn gide par bann prensip Zeova.—Ezekyel 18:2, 14, 17.

16. Akoz i enportan pour pran swen ou fanmiy, e ki sa i enkli?

¹⁶ Zeova i ekspekte bann paran Kretyen pour donn zot zanfan bann gidans apropriye e pran swen avek zot. Pol ti ekrir: “Si en dimoun i pa port swen son prop parante sirtou bann ki viv dan son lakaz, i’n abandonn lafwa e i pir ki en non-krwayan.” (1 Timote 5:8) Bann parol for! Akonpli ou rol pour port swen, ki enkli pran ka avek ou bann zanfan fizikman, spirityelman e emosyonnelman i en privilez ek responsabilite pour tou dimoun ki atase avek Bondye. Labib i fourni bann prensip ki kapab ed paran pour batir en lanvironnman ere pour zot zanfan. Annou egzamin serten.

17. Kwa ki neseser pour ki ou zanfan i annan lalwa Bondye dan zot leker?

¹⁷ Donn en bon legzanp. Bann paran Izraelit ti ganny komande: “Ou bezwen enkilke [bann parol Bondye] dan ou garson e koz lo la ler ou pe asize dan ou lakaz e ler ou pe marse lo semen e ler ou pe alonze e ler ou leve.” Bann paran ti bezwen ansenny zot zanfan bann prensip Bondye. Me sa konmann ti ganny entrodwir par sa deklarasyon: “Sa bann parol ki mon pe konmann ou ozordi i bezwen dan ou leker.” (Deterononm 6:6, 7) Wi, bann paran pa kapab donn sa ki zot napa. Lalwa Bondye i bezwen premyerman enskri dan ou leker si ou anvi ki i ganny ekrir dan leker ou zanfan osi.—Proverb 20:7; vwar Lik 6:40.

18. An sa ki konsern eksprim lanmour, konman Zeova in les en legzanp remarkab pour bann paran?

¹⁸ Donn lasirans ou lanmour. Kan Zezi ti batize, Zeova ti deklare: “Oumenm mon Garson byenneme, mon’n met dan ou tou mon lazwa.” (Lik 3:22) Zeova ti rekonnet son garson, i ti libreman eksprim son aprouvasyon pour li e donn lasirans Son lanmour. Plitar Zezi ti dir avek son Papa: “Ou’n kontan mwan avan ki lemonn ti ganny kree.” (Zan 17:24) Konman bann paran ki atase avek Bondye, montre ou lanmour pour ou zanfan an parol e par aksyon—e fer li souvan. Touzour mazinen ki “lanmour i konstri.”—1 Korentyen 8:1.

19, 20. Kwa ki i enplike dan en disiplin apropriye pour bann zanfan, e konman paran i kapab benefisye atraver legzanp Zeova?

¹⁹ Disiplin. Labib i met lanfaz lo lenportans pour disiplin ganny administre avek lanmour. (Proverb 1:8) Bann paran ki evite pran zot responsabilite pour gid zot zanfan ozordi, pou sertennman rankontre bann konsekans ki pou bles zot leker demen. Toutfwa, bann paran i osi ganny averti kont en lot ekstrenm. “Bann paran,” Pol ti ekrir, “pa bezwen provok zot zanfan, sa i kapab dekouraz zot.” (Kolosyen 3:21) Bann paran i bezwen evite koriz zot zanfan tro severman oubyen kontinyelman refer lo zot pwen feb e kritik zot bann zefor.

²⁰ Zeova, nou Papa seles in etabli legzanp konman pour administre disiplin. Son koreksyon pa zanmen ekstrenm. “Mon pou disiplin ou dan en degre apropriye,” Bondye ti dir son pep. (Zeremi 46:28) Bann paran i bezwen imit Zeova dan sa domenn. Disiplin ki depas bann limit rezonnab oubyen ki al pli lwen ki korize e ansennyen, i sirman provokan.

21. Konman bann paran i kapab determinen si zot disiplin i efektif?

²¹ Konman bann paran i kapab determinen si zot disiplin i efektif? Zot kapab demann zot lekor, ‘Ki mon disiplin i akonpli?’ I bezwen ansennyen. Ou zanfan i devret konpran akoz disiplin pe ganny administre. Bann paran i osi bezwen konsernen avek konsekans zot koreksyon. I vre, ki preski tou zanfan okonmansman pou irite par disiplin. (Ebre 12:11) Me disiplin pa devret zanmen fer en zanfan santi li per oubyen abandonnen, menm kit li avek sa lenpresyon ki i natirelman mesant. Avan koriz son pep, Zeova ti dir: “Pa per, . . . akoz mon avek ou.” (Zeremi 46:28) Wi, koreksyon i bezwen ganny administre dan en tel fason ki ou zanfan i santi ki ou avek li konman bann paran ki kontan e soutyen li.

DEVLOP “LAR POUR DIRIZE”

22, 23. Konman ou kapab devlop lar pour dirize ki esansyel pour batir en fanmiy ere?

²² Nou kapab apresye ki Zeova in fourni zouti ki nou bezwen pour batir en fanmiy ere. Me senpleman posed bann zouti i pa sifizan. Nou bezwen aprann servi zot korekteman. Par egzanp, en konstrikter i kapab devlop bann move labitid dan fason ki i servi son bann zouti. I kapab pe konpletman met serten dan en move lizaz. Dan sa bann sirkonstans, son bann metod i annan gran posibilite prodwir en travay enferyer. Pareyman, ou kapab okouran serten labitid malsen ki pe antre dan ou fanmiy. Serten in kapab ganny byen etabli e difisil pour sanze. Toutfwa, swiv sa konsey Labib: “En dimoun saz pou ekoute e pran plis lenstriksyon, e en zonm entelizan i sa enn ki devlop lar pour dirize.”—Proverb 1:5.

²³ An prenan kontinyelman konnesans Bondye, sa pou ed ou devlop lar pour dirize. Konpran vitman bann prensip Labib ki aplikab pour lavi fanmiy, e fer bann sanzman neseser. Obzerv bann Kretyen mir ki’n etablir bann bon legzanp konman bann koup ek bann paran. Koz avek zot. Apre tou, fer konnen ou konsern avek Zeova dan lapriyer. (Psonm 55:22; Filipyen 4:6, 7) I kapab ed ou pour rezwir en lavi fanmiy ere ki onor li.

[Not anba lo paz]

TESTE OU KONNESANS

Konman fidelite, kominikasyon, loner ek respe i kontribye ver en maryaz ere?

Dan ki fason ki bann paran i kapab asir zot zanfan zot lanmour?

Ki bann fakter ki enplike dan disiplin ki apropriye?

[Portre lo paz 147]