Konman pour reste separe avek sa lemonn

 1. Ki Zezi ti met lanfaz lo la pandan sa dernyen lannwit ki i ti pase lo later konman en imen?

PANDAN sa dernyen lannwit ki i ti pase lo later konman en imen, Zezi ti vreman enkyet pour lavenir son bann disip. I ti pe priy pour zot kan i ti dir son Papa: “Mon pa demann ou pour tir zot dan lemonn, me mon demann ou, pour prezerv zot kont sa enn ki apel Malen. Zot pa fer parti lemonn parey mwan mon pa fer parti lemonn.” (Zan 17:15, 16) Dan sa lapriyer senser ki i ti fer, Zezi ti montre ki i ti kontan son bann disip en kantite e osi i ti met lanfaz lo lenportans sa parol ki i ti dir pli boner sa zour swar. Savedir ler i ti dir ki “zot pa fer parti lemonn.” (Zan 15:19) I kler ki i ti vreman enportan pour Zezi ki son bann disip ti reste separe avek sa lemonn!

 2. Ki savedir sa mo “lemonn” ki Zezi ti mansyonnen?

² Sa mo “lemonn” ki Zezi ti servi la, pe refer avek dimoun ki lwen avek Bondye, ki les Satan diriz zot lavi e ki ganny dominen par sa leta lespri ki sorti kot li, parey vin vantar e egois. (Zan 14:30; Efezyen 2:2; 1 Zan 5:19) Anfet “sa ki oule fer zanmi avek [sa] lemonn i vin lennmi Bondye.” (Zak 4:4) Me ki mannyer i posib pour sa bann ki oule reste dan lanmour Bondye viv dan lemonn e an menm tan pa fer parti lemonn? Nou pou egzamin senk fason: nou fer sa kan nou reste fidel avek Rwayonm Bondye dan lanmen Kris e kan nou pa pran kote dan politik, par rezet sa leta lespri ki lemonn i annan, par annan en lenz ek laparans ki respektab, par viv en lavi senp e par met tou bann lekipman batay ki Bondye i donnen.

 3. (a) Konman Zezi ti konsider politik ler i ti lo later? (b) Akoz nou kapab dir ki bann Kretyen swazir i bann lanbasader? (Enkli not anba lo paz.)

³ Olye mel dan politik kan i ti lo later, Zezi ti konsantre lo sa travay pour pres lo Rwayonm Bondye, sa gouvernman ki ti pou egziste dan lesyel kot i ti pou vin Lerwa. (Danyel 7:13, 14; Lik 4:43; 17:20, 21) Se pour sa rezon ler i ti devan gouverner Romen Pons Pilat, Zezi ti kapab dir: “Mon Rwayonm pa sorti lo sa later.” (Zan 18:36) Son bann disip fidel i imit son legzanp kan zot fidel avek Kris ek son Rwayonm e ler zot fer dimoun dan lemonn antye konn sa Rwayonm. (Matye 24:14) Zapot Pol ti ekrir: “Nou’n vin bann lanbasader Kris, . . . O non Kris, nou sipliy zot, les zot ganny rekonsilye avek Bondye.”a​—2 Korentyen 5:20.

 4. Ki mannyer tou bann vre Kretyen in demontre zot fidelite avek Rwayonm Bondye? (Vwar sa bwat “Bann premye Kretyen pa ti pran kote.”)

⁴ Vi ki bann lanbasader pe reprezant en lot gouvernman oubyen pei, zot napa nanryen pour fer avek okenn fonksyon ki deroule dan sa pei kot zot ete, zot pa pran okenn kote. Parkont, zot promot lentere sa gouvernman ki zot pe reprezante. Sa i osi leka pour bann Kretyen swazir lo later, ki “bann sitwayen lesyel.” (Filipyen 3:20) Anfet, gras a zot devouman pour pres lo sa Rwayonm depi 1914 ki zot in kapab ed plizyer milyon ‘lezot mouton’ Kris pour “rekonsilye avek Bondye.” (Zan 10:16; Matye 25:31-40) Sa bann ‘lezot mouton’ i konman bann reprezantan Kris e zot donn sipor bann Kretyen swazir ki ankor lo later. Konman en sel troupo ini ansanm ki pe fer dimoun konn sa Rwayonm dan lanmen Mesi, tou le de group i fer sir ki zot napa nanryen pour fer dan bann zafer politik sa lemonn.​—Izai 2:2-4.

 5. Ki mannyer kongregasyon ozordi i diferan konpare avek letan bann Izraelit e ki mannyer nou demontre ki nou diferan?

⁵ Bann vre Kretyen pa mel dan politik zis akoz zot anvi reste fidel avek Kris. Kontrerman avek pep Izrael dan letan lontan ki Bondye ti’n donn zot en pei, nou ozordi nou form parti en lasosyasyon frer ek ser ki ganny trouve dan lemonn antye. (Matye 28:19; 1 Pyer 2:9) Alors, si nou ti pran kote avek bann parti politik dan nou pei, nou ti pou kapab ezite pour pres sa mesaz lo Rwayonm avek tou dimoun e sa ti pou vreman senm divizyon parmi nou. (1 Korentyen 1:10) Deplis, dan letan lager, nou ti pou lager avek nou prop frer ek ser ki Labib i demann nou pour kontan. (Zan 13:34, 35; 1 Zan 3:10-12) Alors, Zezi ti annan rezon ler i ti dir son bann disip met zot lepe dan son plas. I ti menm dir zot kontan zot lennmi.​—Matye 5:44; 26:52; vwar sa bwat: “Eski mon pe pran okenn kote?”

 6. Ki lefe ou dedikasyon avek Bondye i annan lo ou relasyon avek gouvernman?

⁶ Konman bann vre Kretyen nou’n dedye nou lavi avek Bondye, me pa avek okenn imen, ni lorganizasyon imen oubyen nasyon. 1 Korentyen 6:19, 20 i dir: “Zot pa pour zot menm; parski zot in ganny aste pour en pri.” Anfet, an menm tan ki zot donn “Sezar” setadir gouvernman sa ki i merite, tel parey respe, pey taks ek soumisyon ki Bondye i demande, bann disip Zezi i donn “Bondye sa ki pour Bondye.” (Mark 12:17; Romen 13:1-7) Sa i enkli zot ladorasyon, tou zot lanmour e kan zot toultan obeir li. Si i neseser, zot pare pour mor pour Bondye.​—Lik 4:8; 10:27; Akt 5:29; Romen 14:8.

7, 8. Kwa sa leta “Lespri dapre lemonn” e konman i “travay” dan en dimoun?

⁷ En lot fason ki bann vre Kretyen i montre ki zot separe avek sa lemonn i kan zot rezet son move leta lespri. Zapot Pol ti ekrir: “Nou, nou pa’n ganny Lespri dapre lemonn, me nou’n ganny Lespri ki sorti kot Bondye.” (1 Korentyen 2:12) Remarke ki i ti dir bann Efezyen: “Zot ti pe viv dapre mannyer sa lemonn, an swivan sef pisans dan lespas [oubyen “ler,” NW], sa menm lespri ki aprezan pe travay dan bann zanfan dezobeisans.”​—Efezyen 2:2, 3.

⁸ Sa ler oubyen leta lespri dan sa lemonn i envizib. I en lafors ki pous dimoun pour dezobeir Bondye e ki eksit bann “dezir natir imen; dezir atraver . . . lizye.” (1 Zan 2:16; 1 Timote 6:9, 10) Leta lespri sa lemonn i ‘pwisan’ akoz i zwe avek dezir ki imen enparfe i annan, i trik oubyen anbet dimoun, i toultan la e i partou kote zis parey sa ler ki nou respire. Deplis, i “travay” dan en dimoun kan ptitapti i fer li devlop bann tre ki Bondye pa kontan. Parey fer li vin sitan anbisye, egois, vantar, voras, deside li menm kwa ki byen e mal e rebel kont lotorite.b Andotmo, sa leta lespri dapre lemonn i gradyelman fer en dimoun devlop bann tre dan son leker, ki Dyab i annan.​—Zan 8:44; Akt 13:10; 1 Zan 3:8, 10.

 9. Dan ki fason sa leta lespri lemonn i kapab penetre dan nou lespri ek leker?

⁹ Eski sa leta lespri dapre lemonn i kapab konmans bourzonnen dan ou lespri ek leker? Sa i posib, si ou ou les li, par egzanp si ou pa reste vizilan. (Proverb 4:23) Souvan ou konmans devlop li san ki ou realize, petet kan ou frekant bann dimoun ki paret bann bon dimoun, me ki an realite napa en sou lanmour pour Zeova. (Proverb 13:20; 1 Korentyen 15:33) Nou osi kapab respir sa move leta lespri kan nou lir bann liv ek magazin ki pa apropriye, get pornografi, al lo bann sit Internet pibliye par bann aposta, kan nou angaz dan bann aktivite pour detann nou ki pa korek pour Kretyen e kan nou fer bann sport kot konpetisyon i vreman entans. Anfet, atraver nenport ki dimoun oubyen keksoz ki reflekte lafason ki Satan oubyen son sistenm i panse.

10. Ki mannyer nou kapab rezet sa leta lespri lemonn?

¹⁰ Ki mannyer nou kapab rezet sa leta lespri lemonn ki byen rize e reste dan lanmour Bondye? Sel fason pour fer sa i kan nou profit o maksimonm bann provizyon spirityel ki Zeova in donn nou e kan nou pa aret priye pour ganny lespri sen. Zeova i bokou pli for ki Dyab oubyen son move lemonn ki anba son kontrol. (1 Zan 4:4) Alors, pa i enportan ki nou toultan apros Zeova dan lapriyer!

11. Ki mannyer sa leta lespri lemonn in enfliyans lafason ki dimoun i sanze?

¹¹ En fason ki lezot pou vwar ki kalite leta lespri en dimoun i annan, se par lafason ki i sanze, son laparans ek lapropte. Dan bokou pei, lafason ki dimoun i sanze in telman degrade ki en zournalis pour televizyon ti dir ki byento nou pou nepli kapab fer diferans ant lekel ki prostitye oubyen non. En zournal ti dir ki menm bann fiy ki pa ankor adolesan in ganny enfliyanse par lafason ki bokou dimoun i sanze, “preski tou zot lekor i deor, zot napa respe pour zot lekor.” En lot tandans ki dimoun i annan se pour sanz dan en fason devergonde e sa i reflekte sa leta lespri pour rebele e bann ki abiy dan sa fason i perdi zot dinite ek respe pour zot lekor.

12, 13. Ki prensip ki devret gid nou dan lafason nou sanze e nou laparans?

¹² Konman bann serviter Zeova, nou ti pou kontan annan en bon laparans, savedir sanz dan en fason respektab, met en lenz ki prop e byen drese, ki pa pou sok lezot e ki apropriye pour sa lokazyon. Toultan nou laparans i devret montre ki nou sanz dan en fason “respektab, . . . konvenab e senp” ansanm avek “bann bon aksyon” ki apropriye pour bann zonm ek fanm ki dir zot “relizye.” Byensir, nou pa anvi tro atir latansyon lo nou menm, me nou anvi “reste dan lanmour Bondye.” (1 Timote 2:9, 10; Zid 21) Wi, nou anvi ki nou pli zoli labote i en “labote enteryer, dan leker . . . , ki annan en gran valer devan Bondye.”​—1 Pyer 3:3, 4.

¹³ Pa bliye, ki mannyer nou sanze e nou laparans i kapab annan en lefe lo lafason ki lezot i vwar vre ladorasyon. Sa mo Grek ki’n ganny tradwir konman “respektab” kan i ganny servi an rapor avek sa ki byen ek mal, i donn nide respe, lakrent e pran an konsiderasyon santiman oubyen lopinyon lezot. Alors, nou devret pare pour les tonbe nou prop drwa pour ki nou demontre respe pour konsyans lezot. Pli enportan, nou anvi anmenn loner pour Zeova ek son pep e pour prezant nou lekor konman bann minis Bondye, ki “fer tou pour laglwar Bondye.”​—1 Korentyen 4:9; 10:31; 2 Korentyen 6:3, 4; 7:1.

14. Ki kestyon nou devret demann nou lekor an rapor avek nou laparans ek lapropte personnel?

¹⁴ Nou fason sanze, nou laparans ek lapropte i bokou pli enportan kan nou pe al dan predikasyon oubyen kan nou asiste renyon. Demann ou lekor: ‘Eski mon laparans ek lapropte personnel i atir tro bokou latansyon lo mwan? Eski lezot i anbarase akoz mwan? Eski pour mwan, mon drwa pour fer sa ki mon anvi dan sa domenn i pli enportan ki resevwar serten responsabilite dan kongregasyon?’​—Psonm 68:6; Filipyen 4:5; 1 Pyer 5:6.

15. Akoz nou pa vwar en lalis bann lareg konsernan lenz, makiyaz oubyen laparans ek nivo lapropte dan Parol Bondye?

¹⁵ Dan Labib ou pa pou trouv en lalis bann lareg konsernan lenz, laparans ek nivo lapropte ki akseptab. Zeova in anvi donn nou sa liberte pour nou swazir e pour servi nou abilite pour reflesir. I anvi ki nou vin bann dimoun matir ki kapab reflesir lo bann prensip dan Labib e “ki par leksperyans [nou] konn fer diferans ant sa ki byen ek sa ki mal.” (Ebre 5:14) Pli enportan, i anvi ki nou fer tou keksoz avek lanmour, lanmour pour Bondye e pour nou prosen. (Mark 12:30, 31) Kan nou pran tou sa ki’n ganny mansyonnen anler an konsiderasyon, nou pou kapab fer en kantite swa ler nou pe fer bann desizyon konsernan nou lenz ek laparans. Nou vwar ki sa i vre ler nou get tou bann dimoun parmi pep Zeova ler zot rasanble ansanm partou lo later dan lazwa, nou kapab vwar sa varyete kouler lenz ki zot mete.

16. Ki mannyer sa lespri lemonn i konpletman diferan avek sa ki Zezi ti ansennyen e ki kestyon nou devret demann nou lekor?

¹⁶ Sa leta lespri dapre lemonn i anbet dimoun e i pous plizyer milyon dimoun pour tay deryer larzan ek keksoz materyel an krwayan ki zot pou ere. Me Zezi ti dir: “Lavi en zonm pa depann lo larises ki i posede.” (Lik 12:15) Zezi pa ti ankouraz dimoun pour evit bann aktivite ki anmenn serten plezir oubyen priv zot lekor dan en fason ekstrenm. Me i ti montre ki selman sa bann ki “konsyan zot bezwen spirityel” e ki toultan annan en ‘bon lizye’ savedir en lizye ki get en sel keksoz, andotmo ki konsantre lo keksoz spirityel, ki pou kapab ganny lavi ek vre lazwa. (Matye 5:3, NW; 6:22, 23) Demann ou lekor: ‘Eski mon vreman krwar sa ki Zezi ti ansennyen oubyen mon pe ganny enfliyanse par “papa tou mansonz”? (Zan 8:44) Ki mon parol, lobzektif, sa ki vin premye dan mon lavi e lafason ki mon viv, i montre lo sa kalite dimoun ki mon ete?’​—Lik 6:45; 21:34-36; 2 Zan 6.

17. Nonm serten byenfe ki bann ki reste konsantre lo keksoz spirityel i gannyen?

¹⁷ Zezi ti dir: “Me lasazes Bondye i ganny rekonnet par son bann aksyon.” (Matye 11:19) Annou egzamin serten byenfe ki sa bann ki toultan reste konsantre lo keksoz spirityel i gannyen. Zot ganny sa vre satisfaksyon dan sa travay Rwayonm. (Matye 11:29, 30) Zot napa bann traka an plis ki fodre e zot arive evit bann keksoz ki ti pou donn zot latet fermal e fer zot soufer emosyonnelman. (1 Timote 6:9, 10) Vi ki zot kontant zot avek keksoz ki neseser dan lavi, zot kapab pas plis letan avek zot fanmir ek zot bann frer ek ser Kretyen. E sa i fer ki aswar zot kapab dormi byen. (Eklezyast 5:12) Zot ganny pli gran lazwa kan zot pare pour donnen e zot fer sa dan nenport fason ki zot kapab. (Akt 20:35) Zot “ris avek lesperans” e oprofon dan zot zot santi zot anpe e dan lazwa. (Romen 15:13; Matye 6:31, 32) Sa bann benediksyon pa kapab ganny aste pour okenn pri!

18. Ki mannyer Labib i dekrir nou lennmi, son metod ek lafason ki nou bezwen lager?

¹⁸ Sa bann ki reste dan lanmour Bondye i osi ganny proteze kont Satan dan en fason spirityel, li ki anvi fer bann Kretyen perdi zot lazwa ek lavi eternel. (1 Pyer 5:8) Zapot Pol ti dir: “Nou pa pe lit kont dimoun, me kont bann pouvwar move lespri dan ler, bann lotorite, ek pouvwar dan lemonn teneb dan sa letan ki nou pe viv ladan.” (Efezyen 6:12) Sa mo Grek ki’n ganny tradwir “lit” kont dimoun, i fer nou konpran ki nou pa pe lager avek en lennmi ki lwen avek nou, parey si ou pe kasyet ou lennmi dan en souteren, me plito nou pe lager fas a fas. Deplis, sa mo “lotorite” ek “pouvwar” i fer nou konpran ki sa bann latak sorti kot bann demon i byen organize e i ganny fer ekspre.

19. Dekrir sa lekipman spirityel ki Kretyen i mete?

¹⁹ Menm si nou annan en kantite pwen feb ek limit, nou kapab ranport laviktwar dan sa batay. Konman? Sa i kan nou met tou nou “lekipman proteksyon ki Bondye” i donnen. (Efezyen 6:13) Efezyen 6:14-18 i dekrir sa lekipman proteksyon. I dir: “Tenir zot tou letan pare: pran laverite konman en sang otour zot leren; pran ladrwatir konman en proteksyon lo zot pwatrin; met lentere pour anons levanzil konman en soulye dan zot lipye. Touzour pran lafwa konman en proteksyon ki en boukliye i donnen. Avek sa zot a kapab tenny dife tou bann dart alimen ki Dyab i anvoye. Pran osi konman kas lo zot latet delivrans [oubyen lespwar] ki Bondye i donnen, e pran Laparol Bondye konman en lepe ki Lespri i donnen. Fer tousala dan lapriyer an sipliyan Bondye pour son led. Priye dan tou sirkonstans, e les zot ganny gide par Lespri.”

20. Ki mannyer nou sitiasyon i diferan avek en vre solda?

²⁰ Vi ki sa lekipman i sorti kot Bondye, i pou protez nou san okenn fot, selman si nou nou met li toultan. Bann vre solda, parfwa zot kapab pa lager pour en bon pe letan, me nou Kretyen nou pe fer en lager ki vedir lavi oubyen lanmor ki pa pou zanmen arete ziska ki Zeova i detrir sa lemonn Satan e met tou sa bann move lanz dan labim. (Revelasyon 12:17; 20:1-3) Alors pa bes lebra si ou pe lit kont ou bann febles oubyen move dezir, akoz nou tou nou bezwen ‘tret nou lekor dir’ pour nou kapab reste fidel avek Zeova. (1 Korentyen 9:27) Anfet, se kan nou pa pe lager ki nou devret enkyet!

21. Ki sa sel fason ki nou kapab ganny laviktwar dan nou lager spirityel?

²¹ Deplis, avek nou prop lafors nou pa pou kapab ranport laviktwar dan sa batay. Anfet, zapot Pol i rapel nou lenportans pour priye ‘dan tou sirkonstans, e les nou ganny gide par Lespri.’ An menm tan, nou devret ekout Zeova par etidye son Parol e asosye avek nou “kanmarad dan konba” dan tou lokazyon ki nou gannyen, akoz pa zis nou tousel ki pe lager! (Filemon 2; Ebre 10:24, 25) Bann ki fidel dan tou sa bann laspe, pa pou zis ranport laviktwar, me zot pou nobou vreman defann zot lafwa kan i ganny teste.

22, 23. (a) Akoz toultan nou devret pare pour defann nou lafwa e ki kestyon nou devret demann nou lekor? (b) Ki nou pou diskite dan lartik swivan?

²² Zezi ti dir: “Parski, zot pa fer parti lemonn, . . . sanmenm rezon akoz ki i ay zot.” (Zan 15:19) Alors, bann vre Kretyen i bezwen touzour pare pour defann zot lafwa e pour fer sa avek respe ek ladouser. (1 Pyer 3:15) Demann ou lekor: ‘Eski mon konpran akoz parfwa bann Temwen Zeova i pran en desizyon ki diferan avek sa ki lamazorite dimoun i panse? Kan mon pe pran en desizyon difisil ki diferan avek pwennvi lamazorite, eski mon san poursan konvenki ki sa ki Labib ek lesklav fidel i dir i vre? (Matye 24:45; Zan 17:17) E kan in ariv ler pour mwan fer sa ki byen devan Zeova, an plis ki zis pare pour montre ki mon diferan, eski mon fyer ki mon diferan?’​—Psonm 34:2; Matye 10:32, 33.

²³ Me souvan, menm si nou ti a kontan reste separe avek sa lemonn nou kapab ganny teste dan plizyer fason ki nou pa pe ekspekte. Par egzanp, parey nou’n deza dir avan, Dyab i esey atrakte bann serviter Zeova dan lemonn par mwayen bann divertisman ki lemonn i organize. Ki mannyer nou kapab swazir bann bon divertisman ki pou redonn nou lafors e fer nou annan en konsyans kler? Nou pou diskit sa dan sapit swivan.