Sapit Wit

‘Lit kont bann move Lespri’

 1. Akoz aktivite bann move lespri i enteres nou an partikilye?

BOKOU dimoun i ridikiliz sa lide ki i annan bann move lespri. Me sa pa en dyok. Ki swa dimoun i krwar oubyen non, bann move lespri i vreman egziste, e zot esey met presyon lo tou dimoun. Bann adorater Zeova pa ganny eparnyen. Annefe, zot bann premye target. Zapot Pol i met nou an gard kont sa fe, an dizan: “Nou pa pe lit kont dimoun, me kont bann pouvwar move lespri dan ler, bann lotorite, ek pouvwar dan lemonn teneb dan sa letan ki nou pe viv ladan.” (Efezyen 6:12) Denozour sa presyon ki bann move lespri i met lo nou i pli for ki zanmen oparavan akoz Satan in ganny retire dan lesyel e i tre ankoler, akoz i konnen ki son letan i kourt.—Revelasyon 12:12.

 2. Konman i posib pour nou ranport lalit kont bann lespri pwisan?

² Eski i posib pour ranport en lalit kont lafors bann lespri pwisan? Wi, me selman si nou depan antyerman lo Zeova. Nou devret ekout li e obeir son Parol. An fezan sa, nou kapab evit sa bann move konsekans swa fizikman, moralman, oubyen emosyonnelman, ki bann ki anba kontrol Satan i eksperyanse.—Zak 4:7.

Bann Sef Lemonn dan Lesyel

 3. Lekel ki Satan i opoze britalman, e konman?

³ Zeova i donn nou en deskripsyon frapan lo sitiasyon lemonn parey li i vwar dan son pozisyon dan lesyel. I ti fer zapot Zan vwar en vizyon dan ki Satan ti ganny reprezante konman en “dragon rouz konman dife.” I ti’n pare pour devor, si posib, Rwayonm Mesyanik Bondye zis konman i ti ne dan lesyel an 1914. Vi ki i pa’n kapab fer sa, Satan in lans en gran kantite lopozisyon brital kont bann reprezantan sa Rwayonm ki lo later. (Revelasyon 12:3, 4, 13, 17) Ki mannyer Satan pou anmenn sa lager? Atraver son bann reprezantan imen.

 4. Lekel ki sours pwisans bann gouvernman imen, e ki mannyer nou konn sa?

⁴ Apre Zan ti ganny montre en bebet sovaz avek set latet ek dis korn, en bebet ki annan lotorite “lo tou tribi, tou pep, tou lalang ek tou nasyon.” Sa bebet i reprezant tou sistenm politik lo later antye. Zan ti ganny enformen ki sa “dragon [Satan Dyab] ti donn li tou son pisans, son tronn ek en gran pouvwar.” (Revelasyon 13:1, 2, 7) Sirman, Satan i sours pwisans ek lotorite bann gouvernman imen. Alor, parey zapot Pol ti ekri, vre ‘sef lemonn’ i bann “move lespri dan ler,” ki kontrol bann gouvernman imen. Tou sa ki ador Zeova i bezwen byen konpran ki tousala i vedir.—Lik 4:5, 6.

 5. Ozordi bann sef lemonn pe ganny rasanble pour ki levennman?

⁵ Kantmenm bokou bann sef politik i pretann ki zot relizye, napa enn sa bann nasyon ki soumet avek dominasyon Zeova oubyen avek son Lerwa ki i’n apwente, Zezi Kri. Zot tou zot lite dan en fason agresif pour gard zot prop pouvwar. Ozordi, parey sa resi dan Revelasyon i montre, “bann lespri demon” pe rasanble bann sef lemonn pour “konbat kan sa gran zour Bondye Toupisan pou arive” dan sa landrwa ki apel Armagedon.—Revelasyon 16:13, 14, 16; 19:17-19.

 6. Akoz nou bezwen fer atansyon pour ki nou pa ganny antrennen pour donn sipor sa sistenm Satanik?

⁶ Toulezour, lavi bann dimoun i ganny afekte par bann konfli politik, sosyal, ekonomik, e relizye ki briz lafanmiy imen. Dan sa bann konfli, i komen pour dimoun pran kote—swa verbalman oubyen dan lezot fason—avek sa nasyon, tribi, langaz, oubyen ran sosyal ki zot form parti. Menm kan dimoun pa direkteman enplike dan serten konfli, zot souvannfwa trouv zot pe siport en kote plis ki en lot. Me nenport ki dimoun ouswa group ki zot pe siporte, lekel ki zot pe vreman siporte an realite? Labib i dir klerman: “Lemonn antye i dan pouvwar dyab.” (1 Zan 5:19) Alor, konman en dimoun i kapab evite ganny tronpe avek lezot imen? Selman par donn tou son sipor Rwayonm Bondye e pa siport ditou oubyen pa pran okenn kote dan bann konfli lemonn.—Zan 17:15, 16.

Bann Riz sa enn Mesan

 7. Konman ki Satan in demontre abilite dan lafason ki i servi fo relizyon?

⁷ Dan tou peryod listwar imen, Satan in servi persekisyon verbal e fizik pour detourn bann endividi kont vre ladorasyon. I’n osi servi bann mwayen ki pli difisil pour remarke—bann aksyon ek taktik rize. Avek abilite, i’n reisi gard en gran parti limanite dan linyorans an servan fo relizyon, pour fer zot krwar ki zot pe servi Bondye. Vi ki zot mank konnesans egzakt lo Bondye ek lanmour pour laverite, zot kapab ganny atrakte par bann servis relizye ki mistik e ki zwe lo zot santiman oubyen ganny enpresyonnen par bann mirak. (2 Tesalonisyen 2:9, 10) Me nou ganny averti ki menm parmi bann ki ti deza dan vre ladorasyon, “serten dimoun pou abandonn[en] . . . , pour atas zot avek bann lespri tronper, e swiv bann lansennyman demon.” (1 Timote 4:1) Konman sa i kapab arive?

 8. Konman ki Satan i kapab antrenn nou dan fo relizyon menm si nou pe ador Zeova?

⁸ Dan en fason rize, Satan i profit lo nou bann febles. Eski nou ankor per sa ki lezot pou dir lo nou? Si wi, nou kapab les presyon nou fanmiy oubyen nou vwazen fer nou partisip dan bann keksoz ki sorti dan fo relizyon. Eski nou orgeye? Si wi, nou kapab ofanse kan nou ganny konseye oubyen kan lezot pa aksepte nou bann lide ki nou met devan. (Proverb 15:10; 29:25; 1 Timote 6:3, 4) Olye aziste nou pwenn-vi pour konform avek legzanp Kris, nou kapab tant pour ekout sa bann ki ‘dir nou sa ki nou zorey i oule tande’ an dizan ki zis lir Labib e viv en bon lavi i ase. (2 Timote 4:3) Pour Satan, i pa enportan si nou asosye avek en group relizye oubyen senpleman reste dan nou prop relizyon, osi lontan ki nou pa ador Zeova fason ki li i demande atraver son Parol ek son lorganizasyon.

 9. Konman ki avek riz Satan i servi sèks pour akonpli son bi?

⁹ Satan i servi riz pour tant bann dimoun pour satisfer zot bann dezir natirel dan bann move fason. I’n fer sa avek sa dezir pour annan relasyon seksyel. An rezetan moralite Labib, bokou dimoun dan sa monn i konsider bann relasyon seksyel ant de dimoun ki pa ankor marye konman en plezir ki toutafe akseptab oubyen en fason pour prouve ki zot in vin adilt. E konsernan bann ki’n marye? Bokou i komet adilter. E menm kan napa enfidelite dan zot maryaz, bokou zot i rod en divors oubyen separasyon afen ki zot kapab al viv avek en lot dimoun. Bi par deryer lapros Satan, ki difisil pour remarke, se pour enfliyans dimoun pour viv pour plezir la konmela, fer zot inyor bann konsekans pa zis lo zot menm ek lezot me spesyalman lo zot relasyon avek Zeova ek son Garson.—1 Korentyen 6:9, 10; Galat 6:7, 8.

10. Ki mwayen Satan i servi pour esey gat nou latitid anver imoralite ek vyolans?

¹⁰ Rekreasyon i en lot dezir natirel. Kan i bon, i kapab benefisye nou fizikman, mantalman, e emosyonnelman. Me ki mannyer nou reazir kan avek riz Satan i servi serten moman detann pour esey elwanny nou avek panse Bondye? Par egzanp, nou konnen ki Zeova i ay imoralite seksyel ek vyolans. Kan bann film, bann progranm televizyon, oubyen pyes teat i kontyen sa bann keksoz, eski nou asize e kontinyen regarde? Gard antet, osi, ki Satan pou fer sir ki sa bann keksoz i vin pli pir anmezir ki son destriksyon i aprose, vi ki “bann move dimoun ek bann anbeter, zot pou fer touzour plis progre dan sa ki mal, zot pou anbet lezot e zot osi zot pou ganny anbete.” (2 Timote 3:13) Alor nou bezwen kontinyen reste alert kont bann plan Satan.—Zenez 6:13; Psonm 11:5; Romen 1:24-32.

11. Dan ki fason menm en dimoun ki konn laverite konsernan spiritizm i kapab ganny antrennen si i pa vizilan?

¹¹ Nou osi konnen ki Zeova i deteste bann ki angaz dan okenn form spiritizm—devinen, grigri, kominikasyon avek bann mor. (Deterononm 18:10-12) An gardan sa antet, nou pa pou pans pour konsilte bann bonnonm dibwa, e sirman nou pa pou resevwar zot dan nou lakour pour pratik zot bann lar dyabolik. Me eski nou pou ekout zot si zot aparet lo nou lekran televizyon oubyen lo Internet? Kantmenm nou pa pou zanmen aksepte tretman avek en bonnonm dibwa, eski nou pou senm disel dan kat kwen lakaz, an pansan ki sa i kapab protez nou kont move sor? Vi ki nou konnen ki Labib i kondann zet en sor lo lezot, eski nou pou les en ipnotizer pran kontrol nou lespri?—Galat 5:19-21.

12. (a) Konman ki lanmizik i ganny servi pour fer nou mazin bann lide ki nou konnen i mal? (b) Konman ki resanz en dimoun, son kwafir, oubyen son mannyer koze i kapab endik ladmirasyon pour sa bann ki Zeova i dezaprouv zot fason viv? (c) Kwa ki neseser lo nou kote pour evite vin viktim bann riz Satan?

¹² Labib i dir ki nenport kalite form fornikasyon ek lenpirte pa devret (avek okenn motif enpir) menm ganny mansyonnen parmi nou. (Efezyen 5:3-5) Me si par egzanp, sa bann size i ganny akonpannyen avek en lanmizik ki annan en tre zoli melodi, en ritm ki atir latansyon, oubyen en ler eksitan? Eski nou pou konmans repet bann parol sa bann sanson ki glorifye sèks an deor maryaz, litilizasyon drog pour plezir, ek lezot aksyon ki ganny konsidere konman en pese? Oubyen, kantmenm nou konnen ki nou pa devret imit fason viv bann dimoun ki fer sa bann keksoz, eski nou annan sa tandans pour idantifye nou avek zot par imit zot fason sanze, zot kwafir, oubyen zot fason koze? Pa Satan i vreman malen pour servi diferan metod pour atir bann imen pour adopte son fason panse koronpi! (2 Korentyen 4:3, 4) Pour evite vin viktim son bann riz tronper, nou devret evite les nou ganny trennen avek sa monn. Nou bezwen gard antet lekel ki “bann sef lemonn teneb” e seryezman lit kont zot lenfliyans.—1 Pyer 5:8.

Ekipe pour sorti Venker

13. Ki mannyer i posib pour okenn ant nou, avek nou lenperfeksyon, ranport laviktwar lo sa monn ki Satan i dominen?

¹³ Avan son lanmor, Zezi ti dir avek son bann zapot: “Pran kouraz, mon’n ranport laviktwar lo lemonn.” (Zan 16:33) Zot osi zot ti kapab sorti venker. Apepre 60 an plitar, zapot Zan ti ekri: “Lekel ki ganny laviktwar lo lemonn? Sa ki krwar [“annan lafwa,” NW] ki Zezi i Garson Bondye.” (1 Zan 5:5) En tel lafwa i ganny demontre par nou lobeisans anver bann komannman Zezi e par depan lo Parol Bondye, parey Zezi ti fer. Kwa ki neseser ankor? Ki nou osi reste pros avek kongregasyon dan ki Zezi i Sef. Kan nou komet en pese, nou devret senserman repantir e rod pardon Bondye lo baz sakrifis Zezi. Dan sa fason, kantmenm nou bann lenperfeksyon ek fot, nou osi nou kapab sorti venker.—Psonm 130:3, 4.

14. Lir Efezyen 6:13-17, e servi bann kestyon ek bann verse ki’n ganny donnen dan sa paragraf konman en baz pour diskit bann benefis sak parti sa lekipman spirityel.

¹⁴ Pour reisi, nou bezwen met ‘lekipman proteksyon ki Bondye in donn nou,’ san negliz okenn bout. Silvouple ouver ou Labib dan Efezyen 6:13-17, e lir deskripsyon sa lekipman. Apre, par reponn sa bann kestyon swivan, reflesir lo konman ou kapab benefisye avek proteksyon sak parti sa lekipman.

“Laverite konman en sang otour zot leren”

Menm si nou kapab konn laverite, konman ki letid regilye, meditasyon lo laverite Biblik, ek lasistans renyon i kapab protez nou? (1 Korentyen 10:12, 13; 2 Korentyen 13:5; Filipyen 4:8, 9)

“Ladrwatir konman en proteksyon lo zot pwatrin”

Standar ladrwatir lekel ki nou pe koz la? (Revelasyon 15:3)

Demontre konman ki spirityalite en dimoun i kapab ganny afekte ler i pa swiv bann standar drwat Zeova. (Deterononm 7:3, 4; 1 Samyel 15:22, 23)

“Anons levanzil konman en soulye dan zot lipye”

Konman nou ganny proteze si nou lipye i toultan anmenn nou pour al koz avek bann dimoun konsernan bann dispozisyon ki Bondye in pran pour lape? (Psonm 73:2, 3; Romen 10:15; 1 Timote 5:13)

‘Gran boukliye lafwa’

Si nou annan lafwa ki annan en fondman solid, konman nou pou azir si serten i esey fer nou doute oubyen per? (2 Lerwa 6:15-17; 2 Timote 1:12)

‘Kas delivrans’

Konman lesperans pour delivrans i ed en dimoun pour evite tonm dan pyez par tro konsernen avek bann byen materyel? (1 Timote 6:7-10, 19)

‘Lepe Lespri’

Lo kwa nou devret toultan apiye kan nou pe lager kont bann latak lo nou spirityalite ouswa spirityalite lezot? (Psonm 119:98; Proverb 3:5, 6; Matye 4:3, 4)

Ki lezot keksoz ki esansyel pour reisi dan lager spirityel? Ki kantite fwa i bezwen ganny servi? Pour ki sennla? (Efezyen 6:18, 19)

15. Konman nou kapab pran sa responsabilite dan sa lager spirityel?

¹⁵ Konman solda Kris, nou form parti en gran larme ki pe angaz dan lager spirityel. Si nou reste vizilan e byen servi sa lekipman proteksyon ki Bondye in donnen, nou pa pou vin viktim dan sa lager. Okontrer, nou pou vin en led fortifyan pour nou bann konpanyon ki servi Bondye. Nou pou pare e anvi pran sa responsabilite, pour propaz sa bon nouvel lo Rwayonm Mesyanik Bondye, sa gouvernman seles ki Satan i opoze severman.

Revizyon

• Akoz bann adorater Zeova pa siport oubyen pa pran okenn kote dan bann konfli lemonn?

• Ki serten riz ki Satan i servi pour detri spirityalite bann Kretyen?

• Konman sa lekipman spirityel ki Bondye in donnen i protez nou dan nou lager spirityel?

[Portre lo paz 76]

Bann nasyon pe ganny rasanble pour Armagedon