Ki mannyer Zeova i protez ou?

 1. Akoz Zezi ti demann Zeova pour vey lo son bann disip?

SA DERNYEN lannwit ki Zezi ti pase lo later, i ti mazin bann difikilte ki son bann disip ti pou fer fas avek. Zezi ti telman kontan son bann disip ki i ti demann son Papa pour “vey lo zot akoz sa enn move.” (Zan 17:14, 15) Zezi ti konnen ki byento i ti pou retourn dan lesyel e ki Satan ti pou kontinyen lager avek tou bann ki anvi servi Zeova. Alor, pep Zeova ti pou bezwen proteksyon.

 2. Akoz nou asire ki Zeova pou reponn nou lapriyer?

² Zeova ti reponn lapriyer Zezi akoz I kontan Son Garson. Si nou fer nou mye pour fer plezir Zeova, i pou kontan nou e i pou reponn nou lapriyer ler nou demann li led ek proteksyon. Zeova i en Papa ki kontan son bann zanfan. Alor i pou kontinyen pran swen avek zot. Si i pa fer sa, i pou gat son repitasyon.

 3. Akoz nou bezwen proteksyon Zeova ozordi?

³ Ozordi, nou bezwen proteksyon Zeova plis ki zanmen oparavan. Satan in ganny pouse dan lesyel e i annan “en gran lakoler.” (Rev. 12:12) I’n fer serten dimoun krwar ki ler zot persekit nou, “zot pe servi Bondye.” (Zan 16:2) Lezot ki pa krwar dan Bondye, i persekit nou akoz nou diferan avek dimoun dan sa lemonn. Malgre nenport ki rezon ki dimoun i persekit nou, nou pa per. Akoz? Parski Parol Bondye i dir: “Senyer i fidel e i pou fortifye e protez zot kont sa enn move.” (2 Tesa. 3:3) Ki mannyer Zeova i protez nou? Annou vwar de fason ki i fer sa.

 4. Dapre Efezyen 6:13-17, ki Zeova in donn nou pour protez nou?

⁴ Zeova in donn nou bann lekipman batay ki kapab protez nou kont latak Satan. (Lir Efezyen 6:13-17.) Sa bann lekipman i for e i kapab protez nou! Me pour li protez nou, nou bezwen fer sir ki nou met tou nou lekipman batay lo nou e pa tir li. Aprezan, annou vwar ki sak sa bann lekipman i reprezante.

 5. Ki sa sang laverite i reprezante e akoz nou bezwen met li?

⁵ Sa sang laverite i reprezant bann laverite ki dan Parol Bondye, Labib. Akoz nou bezwen met sa sang? Parski Satan i “papa mansonz.” (Zan 8:44) Satan in koz manti pour plizyer milye lannen e in “anbet dimoun lo later antye”! (Rev. 12:9) Me bann laverite ki dan Labib i kapab protez nou e anpes nou ganny anbete. Alor, ki mannyer nou kapab met sa sang laverite? Nou fer sa ler nou aprann laverite konsernan Zeova, ler nou ador li “an armoni avek lespri sen ek laverite” e ler nou konport nou onnetman dan tou keksoz.​—Zan 4:24; Efe. 4:25; Ebr. 13:18.

 6. Ki sa proteksyon pour nou pwatrin i reprezante e akoz nou bezwen met li?

⁶ Sa proteksyon pour nou pwatrin i reprezant bann standar drwat Zeova. Me akoz nou bezwen met ladrwatir konman en proteksyon pour nou pwatrin? Zis parey en proteksyon pour pwatrin i protez leker en solda, sa proteksyon pour nou pwatrin i protez nou leker, setadir sa dimoun ki nou ete anndan, pour ki bann move keksoz dan sa lemonn pa enfliyans nou. (Prov. 4:23) Zeova i ekspekte ki nou kontan e servi li avek tou nou leker. (Mat. 22:36, 37) Me Satan i esey anpes nou servi Zeova avek tou nou leker. I esey fer nou kontan bann keksoz dan lemonn ki Zeova pa kontan. (Zak 4:4; 1 Zan 2:15, 16) Si sa pa marse, i persekit nou, pour esey fer nou fer en keksoz ki pa fer plezir Zeova.

 7. Ki mannyer nou met ladrwatir konman en proteksyon pour nou pwatrin?

⁷ Nou met ladrwatir konman en proteksyon pour nou pwatrin ler nou aksepte e viv dapre bann standar Zeova konsernan sa ki byen ek sa ki mal. (Ps. 97:10) Serten dimoun i krwar ki bann standar Zeova i priv nou. Me si nou aret aplik bann prensip Bondye, nou pou parey en solda ki tir son proteksyon lo son pwatrin pandan en batay parski i krwar ki sa proteksyon i tro lour. Sa pou vreman bet! Me pour bann dimoun ki kontan Zeova, son bann komannman “pa en fardo.” O kontrer i kapab sov zot lavi.​—1 Zan 5:3.

 8. Ki savedir met soulye dan nou lipye pour ki nou pare pour anons sa bon nouvel lape?

⁸ Zapot Pol ti ankouraz nou pour met soulye dan nou lipye pour ki nou pare pour anons sa bon nouvel lape. Sa i vedir ki nou devret toultan pare pour anons sa bon nouvel konsernan Rwayonm Bondye. Ler nou koz avek lezot lo sa mesaz ki dan Labib, sa i fer nou lafwa vin pli for. Nou vreman kontan pour vwar pep Zeova partou lo later pe servi tou loportinite ki zot gannyen pour anons sa bon nouvel. Par egzanp, zot anons sa bon nouvel kazankaz oubyen dan bann teritwar biznes. Zot fer li ler zot dan travay oubyen kot lekol, ler zot dan laboutik, ler zot vizit zot fanmir ki pa Temwen Zeova oubyen ler zot koz avek dimoun ki zot konnen. Zot osi anons sa bon nouvel menm ler zot pa kapab kit zot lakour. Si nou les lafreyer anpes nou anons sa bon nouvel, nou pou parey en solda ki tir son soulye pandan batay. Sa solda pou fasilman kapab ganny dimal dan son lipye. I pou pli difisil pour li protez son lekor ler i ganny atake e i pa pou kapab swiv lord son komandan.

 9. Akoz nou bezwen nou gran boukliye lafwa?

⁹ Sa gran boukliye lafwa i reprezant lafwa ki nou annan dan Zeova. Nou annan lafwa ki Zeova pou akonpli tou son bann promes. Nou lafwa pou ed nou “tenny tou bann dart alimen sorti kot sa enn move.” Akoz nou bezwen sa gran boukliye? Parski i protez nou pour nou pa ganny anbete par lansennyman bann aposta e pour nou pa dekouraze ler dimoun i boufonn nou akoz sa ki nou krwar ladan. Si nou ti napa lafwa, nou ti pou napa sa lafors pour obei Zeova ler lezot i met presyon lo nou pour dezobei li. Sak fwa nou refize fer en keksoz ki Zeova pa kontan, ki swa dan travay oubyen kot lekol, sa i montre ki nou pe servi nou boukliye. (1 Pyer 3:15) Sak fwa nou pa aksepte en travay ki pey byen parski i pou anpes nou donn nou meyer dan servis Zeova, sa i montre ki nou pe servi nou boukliye. (Ebr. 13:5, 6) Sak fwa nou kontinyen servi Zeova malgre lopozisyon, nou boukliye lafwa pe protez nou.​—1 Tesa. 2:2.

10. Ki sa kask delivrans i reprezante e akoz nou bezwen met li?

¹⁰ Sa kask delivrans i reprezant sa lespwar ki Zeova in donn nou. Nou annan lespwar ki Zeova pou rekonpans tou bann ki fer son lavolonte e ki menm si nou mor, Zeova pou resisit nou. (1 Tesa. 5:8; 1 Tim. 4:10; Tit 1:1, 2) Zis parey en kask i protez latet en solda, nou lespwar i protez nou lespri. Ki mannyer sa? Nou lespwar i ed nou reste konsantre lo bann promes Zeova e i ed nou pour pa tro trakase konsernan nou bann problenm. Me ki mannyer nou met sa kask? Nou fer sa ler nou fer sir ki nou annan menm fason panse avek Bondye. Par egzanp, nou pa met konfyans dan larises ki tanporer me nou met nou konfyans dan Bondye.​—Ps. 26:2; 104:34, NWT; 1 Tim. 6:17.

11. Ki sa lepe lespri sen i reprezante e akoz nou bezwen servi li?

¹¹ Sa lepe lespri sen i reprezant Parol Bondye, Labib. Sa lepe i pwisan parski i kapab ed dimoun vwar bann mansonz e i liber zot avek bann fo lansennyman ek move labitid. (2 Kor. 10:4, 5; 2 Tim. 3:16, 17; Ebr. 4:12) Nou aprann pour servi sa lepe ler nou fer letid personnel e atraver bann formasyon ki nou gannyen avek lorganizasyon Bondye. (2 Tim. 2:15) Apard ki bann lekipman batay, Zeova i donn nou en lot proteksyon ki vreman pwisan. Ki sa proteksyon?

12. Ki lezot keksoz ki nou bezwen e akoz?

¹² En solda eksperyanse i konnen ki i pa kapab ranport laviktwar kont en gran larme li tousel. I bezwen led lezot solda. Pareyman, nou pa kapab ranport laviktwar kont Satan ek bann ki swiv li, nou tousel. Nou bezwen led nou bann frer ek ser. Zeova in donn nou sa led ki nou bezwen e sa i “lasosyasyon tou bann frer” ki partou dan lemonn.​—1 Pyer 2:17.

13. Dapre Ebre 10:24, 25, ki byenfe nou gannyen ler nou asiste renyon?

¹³ En fason ki nou ganny sa led ki nou bezwen, i ler nou asiste renyon. (Lir Ebre 10:24, 25.) Parfwa, nou tou nou dekouraze. Ler sa i arive, nou kapab ganny lankourazman atraver nou bann renyon. Nou ganny ankouraze atraver bann komanter senser ki nou bann frer ek ser i fer. Bann diskour baze lo Labib ek bann demonstrasyon, i motiv nou pour kontinyen servi Zeova. Nou osi ganny lankourazman atraver bann konversasyon ki nou fer avan e apre renyon. (1 Tesa. 5:14) Osi, nou renyon i donn nou sa loportinite pour ed lezot e sa i fer nou zwaye. (Akt 20:35; Rom. 1:11, 12) Bann renyon i ed nou dan lezot fason. Dan renyon, nou aprann ki mannyer pour vin bann pli bon proklanmater ek ansenyan. Par egzanp, nou aprann ki mannyer pour pli byen servi bann piblikasyon ki form parti bann Zouti predikasyon. Alor, prepar byen avan renyon e ekout byen pandan renyon. Apre, aplik bann formasyon ki ou’n gannyen. Ler ou fer sa, ou pou vin “en bon solda Kris Zezi.”​—2 Tim. 2:3.

14. Ki lezot led nou annan?

¹⁴ Nou osi ganny led avek plizyer milyon lanz pwisan. Mazin sa ki zis en lanz i kapab fer! (Iza. 37:36) Aprezan, mazin sa ki en larme lanz i kapab fer. I napa en zonm oubyen demon ki kapab ranport laviktwar kont sa larme pwisan Zeova. Osi, Zeova i Tou Pwisan. Alor ler i avek nou, nou pou toultan pli for ki bann ki opoz nou, nenport ki kantite zot i annan. (Ziz 6:16) Gard tou sa bann keksoz antet ler en koleg travay, en kanmarad lekol oubyen en manm fanmir ki pa Temwen Zeova i dir ouswa fer en keksoz ki fer ou dekouraze. Rapel ki ou pa tousel. Ou pe swiv gidans Zeova e i pou ed ou.

15. Dapre Izai 54:15, 17, akoz personn pa kapab anpes pep Bondye anons sa bon nouvel?

¹⁵ Sa lemonn ki ganny kontrole par Satan i annan plizyer rezon pour ay nou. Nou pa pran kote dan politik e nou pa partisip dan lager. Nou proklanm non Bondye. Nou anonse ki zis Rwayonm Bondye ki kapab anmenn lape lo later e nou obei bann standar drwat Bondye. Nou montre dimoun ki sa enn ki pe kontrol sa lemonn i move, i en manter e en mertriye. (Zan 8:44) Nou anonse ki lemonn Satan pou ganny detrir byento. Me Satan ek bann ki swiv li, pa pou zanmen kapab aret sa travay predikasyon. O kontrer, nou pou kontinyen loue Zeova dan nenport ki fason nou kapab. Menm si Satan i pwisan, i pa’n kapab anpes sa mesaz Rwayonm ariv kot bann dimoun partou dan lemonn. Sa in posib, zis akoz Zeova i protez nou.​—Lir Izai 54:15, 17, NWT.b

16. Ki mannyer Zeova pou sov son pep pandan gran ladetres?

¹⁶ Ki pou arive byento? Pandan gran ladetres, Zeova pou sov nou dan de fason ekstraordiner. Premyerman, i pou sov son bann serviter fidel ler i fer bann lerwa lo later detri Gran Babilonn, ki reprezant tou fo larelizyon. (Rev. 17:16-18; 18:2, 4) Apre, i pou sov son pep ler i detri larestan lemonn Satan pandan Armagedon.​—Rev. 7:9, 10; 16:14, 16.

17. Ki byenfe nou gannyen si nou reste pros avek Zeova?

¹⁷ Ler nou reste pros avek Zeova, Satan pa pou kapab fer nou soufer pour touzour. O kontrer, Satan ki pou ganny detrir pour touzour. (Rom. 16:20) Alor, met tou ou lekipman batay lo ou e pa tir li! Pa esey lager kont Satan ek son lemonn ou tousel. Ed ou bann frer ek ser e swiv gidans Zeova. Si ou fer sa, ou kapab asire ki ou Papa ki dan lesyel, ki kontan ou pou donn ou lafors ki ou bezwen e i pou protez ou.​—Iza. 41:10.