Linite bann vre Kretyen i glorifye Bondye

“Fer tou pour prezerv linite ki Sent-Espri i donnen par lape ki ini zot ansanm avek kanmarad.”—EFE. 4:3.

1. Ki mannyer bann Kretyen Efezyen dan premye syek ti anmenn laglwar pour Bondye?

SA LINITE ki ti egziste dan kongregasyon Efez dan lepase ti glorifye Zeova, sa vre Bondye. Aparaman, dan sa landrwa byen prospere kot ti annan bokou komers, serten frer Kretyen ti propriyeter bann lesklav, tandis ki ti annan lezot ki ti pov oubyen lesklav. (Efe. 6:5, 9) Serten ti bann Zwif ki ti’n aprann laverite pandan sa trwa mwan ki zapot Pol ti pe koze dan zot sinagog. Lezot ti oparavan bann adorater Artemis e pratik bann aktivite mazik. (Akt 19:8, 19, 26) I kler ki sa vre larelizyon Kretyen ti pe rasanble en kantite dimoun ki ti konpletman diferan. Pol ti rekonnet ki Zeova ti pe ganny glorifye par sa linite ki ti egziste dan kongregasyon. Sa zapot ti ekrir: “Nou rann glwar Bondye [“atraver kongregasyon,” NW].”—Efe. 3:21.

2. Kwa ki ti menas linite bann Kretyen Efez?

² Me par kont, sa linite ki ti egziste dan kongregasyon Efez ti ganny menase. Pol ti averti bann ansyen an dizan: “Menm parmi zot pou annan dimoun ki pou leve pour ansenny bann mansonz pour fer bann krwayan swiv zot.” (Akt 20:30) An plis ki sa, serten frer pa ti ankor vreman kit deryer sa leta lespri ki kree divizyon ki Pol ti dir i “travay dan bann zanfan dezobeisans.”—Efe. 2:2; 4:22.

En let ki met lanfaz lo linite

3, 4. Ki mannyer let Pol pour bann Efezyen i met lanfaz lo linite?

³ Pol ti realize ki si bann Kretyen ti anvi kontinyen korpere ansanm dan larmoni, sakenn antre zot ti devret fer bokou zefor pour promot linite. Bondye ti enspir Pol pour ekrir en let pour bann Efezyen ki ti antyerman baze lo linite. Par egzanp, Pol ti ekrir konsernan plan Bondye pour ki “dan [Zezi], i reini ansanm tou keksoz.” (Efe. 1:10) I ti osi konpar bann Kretyen avek bann diferan ros ki ganny servi pour konstrir en batiman. “Limenm ki tenir ansanm sa batiman antye e permet li grandi pour form en Tanp sen ini avek Senyer.” (Efe. 2:20, 21) Deplis, Pol ti met lanfaz lo sa linite ki ti egziste ant bann Kretyen Zwif ek bann ki ti’n konverti dan larelizyon Zwif. I ti osi rapel sa bann frer ki zot tou zot annan menm lorizin. I ti refer avek Zeova konman sa “Papa ki dan lesyel, ki donn tou fanmir dan lesyel e lo later son vre non.”—Efe. 3:5, 6, 14, 15.

⁴ Anmezir nou egzamin Efezyen sapit 4, nou pou vwar akoz i demann bokou zefor pour reste ini, ki mannyer Zeova i ede pour inifye nou e ki latitid ki pou ed nou reste ini. Akoz ou pa lir sa sapit antye pour ki ou benefisye plis ankor avek sa letid?

Akoz i demann zefor pour vin en sel?

5. Akoz bann lanz i kapab servi Bondye dan linite e akoz i pa sitan fasil pour nou gard linite?

⁵ Pol ti sipliy son bann frer Efezyen pour “fer tou pour prezerv linite ki Sent-Espri i donnen par lape ki ini zot ansanm avek kanmarad.” (Efe. 4:3) Pour konpran akoz i demann bokou zefor dan sa domenn, egzamin legzanp bann lanz Bondye. Napa en keksoz vivan lo later ki egzakteman parey avek en lot, alor, i fer sans pour konklir ki bann lanz ki Zeova in kree i inik zot osi. (Dan. 7:10) Pourtan, zot kapab servi Zeova dan linite akoz zot tou zot ekout li e fer son lavolonte. (Lir Psonm 103:20, 21.a) Bann lanz i annan diferan zoli kalite, bann Kretyen osi me an plis ki sa zot annan diferan defo. Sa i kapab fer li pli difisil pour reste ini.

6. Ki latitid ki pou ed nou korpere avek sa bann ki zot defo i diferan avek sa ki pour nou?

⁶ Kan bann dimoun enparfe i esey korpere ansanm, i fasil pour zot rankontre serten difikilte. Par egzanp, ki pou arive si en frer dous ki souvan ariv an retar i servi Zeova ansanm avek en frer ki touzour aler me ki fasilman perdi son tanperaman? Zot tou le de zot kapab santi ki zot kanmarad i mank en keksoz dan son kondwit, me zot kapab oubliye ki zot tou le de zot kondwit pa apropriye. Ki mannyer sa de frer konpletman diferan i kapab servi Zeova ansanm dan larmoni? Remarke ki mannyer Pol i kapab ed zot sanz zot latitid par sa parol ki i dir answit. Apre sa, reflesir lo ki mannyer nou kapab promot linite par devlop sa bann kalite. Pol ti ekrir: “Mon sipliy zot pour anmenn en lavi ki dapre sa ki Bondye i oule zot viv. . . . Zot bezwen montre limilite, ladouser ek pasyans; avek lanmour siport kanmarad, fer tou pour prezerv linite ki Sent-Espri i donnen par lape ki ini zot ansanm avek kanmarad.”—Efe. 4:1-3.

7. Akoz i vreman enportan pour fer bokou zefor pour ini avek lezot Kretyen enparfe?

⁷ I vreman enportan pour aprann viv ansanm avek lezot imen enparfe akoz i annan zis en sel lekor senbolik ki reprezant bann vre adorater. “I annan en sel lekor ek en sel Lespri parey ki i annan en sel lesperans kot Bondye in apel zot. I annan en sel Senyer, en sel lafwa, en sel batenm; i annan en sel Bondye e Papa tou dimoun.” (Efe. 4:4-6) Lespri sen Zeova ek son bann benediksyon i zis lo en sel lorganizasyon ki Zeova pe servi. Menm si en dimoun dan kongregasyon i ofans nou, kote nou pou ale? Napa ankor landrwa kot nou tann bann parol lavi eternel!—Zan 6:68.

Bann ansyen i promot linite

8. Ki Kris i servi pour fortifye nou kont bann latak ki kapab diviz nou?

⁸ Pol ti servi legzanp sa ki bann solda ti abitye fer dan letan lontan pour eksplik sa lekspresyon “bann zonm konman kado” ki Zezi ti dir pou ed kongregasyon pour reste ini. En solda ki ti’n ranport laviktwar ti kapab anmenn en prizonnyen etranze kot li pour ki i ed son madanm avek louvraz lakour. (Ps. 68:1, 12, 18) Pareyman, laviktwar ki Zezi in gannyen lo lemonn in fer li ganny bokou lesklav ki volonter. (Lir Efezyen 4:7, 8.b) Ki mannyer i servi sa bann prizonnyen senbolik? “Se limenm li ki’n etabli serten konman zapot, serten konman profet, serten konman levanzelis, serten konman paster, ou serten konman ansennyan, pour prepar bann sen pour akonpli travay konstriksyon lekor Kris. Alor par sa fason nou a kapab ansanm ariv dan linite nou lafwa.”—Efe. 4:11-13.

9. (a) Ki mannyer ‘bann zonm ki’n ganny donnen konman kado’ i ed nou gard nou linite? (b) Akoz tou manm dan kongregasyon i devret kontribye anver linite?

⁹ Konman bann berze ranpli avek lanmour, sa bann zonm ki’n ganny donnen “konman kado” avek kongregasyon i ede pour gard nou linite. Par egzanp, si en ansyen dan kongregasyon i remarke ki de frer pe “pran lakoler avek kanmarad,” i kapab fer bokou pour gard linite dan kongregasyon par konsey zot an prive, “redres [zot] avek en lespri ladouser.” (Gal. 5:26–6:1) Konman bann ansenyan, sa ‘bann zonm ki’n ganny donnen konman kado’ i ed nou pour batir en lafwa for ki baze lo sa ki Labib i ansennyen. Dan sa fason, zot promot linite e ed nou progrese pour vin matir spirityelman. Pol ti ekrir ki sa i leka pour ki nou “nepli parey bann zanfan ki ganny trennen par laroul, e pouse partou par nenport divan lansennyman ki dimoun tronper i fannen, bann ki antrenn dimoun dan lerer par tou sort riz ki zot envante.” (Efe. 4:13, 14) Sak Kretyen i devret kontribye pour ki linite i egziste parmi nou, zis parey sak manm nou lekor i fortifye lezot parti nou lekor par fourni zot sa ki zot bezwen.—Lir Efezyen 4:15, 16.

Devlop bann nouvo latitid

10. Dan ki fason kondwit imoral i kapab andomaz nou linite?

¹⁰ Eski ou’n remarke ki sapit kat dan let Pol pour bann Efezyen i montre ki konman bann Kretyen matir, demontre lanmour i vreman enportan pour ki nou reste touzour ini? Apre sa, i montre ki lanmour i enplike. En keksoz enportan se ki si nou fer tou keksoz avek lanmour, nou pa pou pratik bann aksyon seksyel imoral ouswa annan okenn kondwit deregle. Pol ti konsey son bann frer pour ‘aret swiv mannyer viv bann payen.’ Sa bann dimoun ti’n “perdi tou pider” e “abandonn zot lekor dan tou sort vis.” (Efe. 4:17-19) Sa move lemonn ki nou pe viv ladan i en menas pour nou linite. Dimoun i fer dyok lo bann pratik seksyel imoral, zot sant lo la, get li pour detann zot lekor e pratik li ki swa an sekre ou an piblik. Wi, menm rod latraksyon avek en lot dimoun, setadir azir dan en fason konmsi ou atire avek en lot dimoun zis pour seks san annan okenn lentansyon pour marye avek li, i kapab fer ou elwannyen avek Zeova ek kongregasyon. Akoz? I fasil pour en dimoun komet limoralite seksyel si i annan en kondwit koumsa. Deplis, rod latraksyon en dimoun lot seks i kapab fer en dimoun ki’n marye komet adilter, e sa i kapab separ bann zanfan avek zot paran e bann konzwen inosan avek zot msye ouswa madanm marye. Sa i kree divizyon, pa i vre? I pa drol alor ki Pol ti ekrir: “Pa sa, ki zot in aprann lo size Kris.”—Efe. 4:20, 21.

11. Ki sanzman Labib i ankouraz bann Kretyen pour fer?

¹¹ Pol ti met lanfaz lo lenportans pour rezet bann move fason panse e devlop bann kalite ki permet nou viv dan larmoni avek lezot. I ti dir: “Zot devre alor debaras zot avek zot vye natir, ki ti zot fason viv lontan, sa vye natir ki anmenn larin par son bann tronpri. Fodre ki zot leker ek zot lespri i konpletman sanze; e zot devre sanze e vin en dimoun konpletman nouvo, kree dan resanblans Bondye e ki dimoun i war ki zot viv dan en fason zis e sen dapre laverite.” (Efe. 4:22-24) Dan ki fason en nouvo leta lespri i kapab ed nou konpletman sanze? Si nou medit avek lapresyasyon sa ki nou aprann dan Parol Bondye e atraver bon legzanp bann Kretyen matir, avek bokou zefor nou pou kapab vin en dimoun konpletman nouvo “kree dan resanblans Bondye.”

Devlop nouvo fason koze

12. Dan ki fason koz laverite i promot linite e akoz i difisil pour serten koz laverite?

¹² I vreman enportan pour koz laverite avek nou fanmir ek manm kongregasyon. Bann parol ki fran, ouver e zantiy i kapab fer bann dimoun annan en relasyon tre pros. (Zan 15:15) Me si en dimoun i koz manti avek son frer? Kan son frer i dekouver, sa konfyans ki i ti annan dan li pou diminyen. Ou kapab konpran akoz Pol ti ekrir: “Sakenn devre koz laverite avek son prosen akoz nou tou ansanm nou manm en sel lekor.” (Efe. 4:25) En dimoun ki petet depi ler i ti ankor ptipti i ti abitye koz manti i kapab vwar li difisil pour konmans koz laverite. Me Zeova pou apresye zefor ki i fer pour sanze e i pou ed li.

13. Ki mannyer nou kapab aret servi bann parol blesant?

¹³ Zeova i ansenny nou konman pour annan respe e gard linite dan kongregasyon e dan fanmir. I’n etablir bann lareg strik lo lafason ki nou devret koze. “Pa les bann move parol sorti dan zot labous. . . . Debaras zot avek tou move santiman, tou iritasyon, tou lakoler. Fer disparet tou kriye ek lensilt. Evite annan okenn santiman mesanste.” (Efe. 4:29, 31) En fason pour evit bann parol ki ofans lezot i kan nou devlop en bon latitid ki demontre respe anver lezot. Par egzanp, en zonm ki abiz son madanm verbalman i devret fer bokou zefor pour sanz son latitid anver son madanm, sirtou anmezir i aprann konsernan lafason ki Zeova i onor bann madanm. Bondye i menm donn loportinite serten madanm vin bann Kretyen swazir ki pou dirize konman bann lerwa ansanm avek Kris. (Gal. 3:28; 1 Pyer 3:7) Pareyman, en madanm ki abitye kriy avek son msye i devret ganny pouse pour sanze anmezir i aprann lafason ki Zezi ti konport li kan i ti pe ganny provoke.—1 Pyer 2:21-23.

14. Akoz i danzere pour tir nou lakoler?

¹⁴ Ler en dimoun pa kontrol son lakoler, lanmenm ler ki i pou servi bann parol blesant. Sa osi i kapab separ bann dimoun ki pros avek kanmarad. Lakoler i parey en dife. I fasil pour li al an deor kontrol e koz en dezas. (Prov. 29:22) Menm ler en dimoun i annan rezon pour ankoler, i devret fer atansyon ki i byen kontrol son lakoler pour pa gat sa bon relasyon ki i annan avek lezot. Bann Kretyen i devret fer bokou zefor pour pardonn kanmarad, zot pa devret gard rankin e relev en keksoz ki’n fini pase. (Ps. 37:8; 103:8, 9; Prov. 17:9) Pol ti konsey bann Efezyen: “Si zot pran lakoler fer atansyon pour zot pa tonm dan pese, e fer atansyon pa les zot lakoler dire ziska aswar. Pa les dyab pran lavantaz lo zot.” (Efe. 4:26, 27) Si en dimoun pa kontrol son lakoler, i pou donn Dyab loportinite pour senm divizyon e menm kree konfli dan kongregasyon.

15. Ki lefe i kapab annan si nou pran sa ki pa pour nou?

¹⁵ Respe pour propriyete lezot i kontribye pour ki i annan linite dan kongregasyon. Nou lir: “Sa ki abitye vole fodre i aret vole.” (Efe. 4:28) Pep Zeova i annan konfyans dan kanmarad. Si i ti arive ki en Kretyen i abiz sa konfyans par pran sa ki pa pour li, i ti pou andomaz sa linite.

Lanmour pour Bondye i ini nou ansanm

16. Dan ki fason nou kapab servi parol ankourazan pour fortifye nou linite?

¹⁶ Sa linite dan kongregasyon Kretyen i posib akoz nou tou nou kontan Bondye e sa i pous nou pour tret lezot avek lanmour. Lapresyasyon pou labonte Zeova i pous nou pour fer bokou zefor pour aplik sa konsey: “Koz zis bann parol itil ki kapab ed lezot pour progrese dan zot lafwa e kan i neseser pour fer dibyen sa ki ekoute. . . . Vin bon, ranpli avek lafeksyon pour kanmarad; e pardonn kanmarad, parey Bondye in pardonn zot dan Kris.” (Efe. 4:29, 32) Nou enparfe, me Zeova i pardonn nou. Eski pa nou osi nou devret pardonn lezot kan zot ofans nou akoz zot lenperfeksyon?

17. Akoz nou devret fer bokou zefor pour promot linite?

¹⁷ Sa linite ki egziste parmi pep Bondye i ­glorifye Zeova. Son lespri sen i pous nou pour promot linite dan diferan fason. Sirman nou pa ti pou kontan azir lekontrer avek gidans lespri sen. Pol ti ekrir: “Pa bezwen ofans Sent-Espri Bondye.” (Efe. 4:30) Linite i konman en trezor ki devret ganny proteze. Tou sa ki santi sa linite i zwaye e zot osi rann glwar Zeova. “Fer tou zot zefor pour fer tou parey [Bondye]. Les zot lavi ganny kontrole par lanmour.”—Efe. 5:1, 2.

[Not anba lo paz]

Ki ou pou reponn?

• Ki latitid ki promot linite parmi bann Kretyen?

• Ki mannyer nou kondwit i promot linite dan kongregasyon?

• Dan ki fason nou parol i ed nou pour korpere avek lezot?

[Portre lo paz 20]

Bann dimoun ki konpletman diferan i ini ansanm

[Portre lo paz 23]

Eski ou konpran akoz i danzere pour rod latraksyon avek en dimoun lot seks?