Pa bezwen ofans lespri sen Zeova

“Pa bezwen ofans Sent-Espri Bondye, limenm mark Bondye ki i’n plas lo nou konman son garanti.”—EFE. 4:30.

1. Ki Zeova in fer pour plizyer milyon dimoun e ki responsabilite zot annan?

ZEOVA in fer en keksoz spesyal pour bokou dimoun ki pe viv dan sa lemonn boulverse. I’n fer li posib pour zot kapab apros li atraver son sel Garson, Zezi Kri. (Zan 6:44) Ou enn sa bann dimoun si ou’n fer en dedikasyon avek Bondye e pe viv dapre sa dedikasyon. Konman en dimoun ki’n batiz o non lespri sen, ou annan sa responsabilite pour konport ou dan en fason ki an armoni avek lespri sen.—Mat. 28:19.

2. Ki kestyon ki nou pou egzaminen?

² Nou ki “senm sa ki fer plezir Lespri,” nou vin en dimoun konpletman nouvo. (Gal. 6:8; Efe. 4:17-24) Me zapot Pol i konsey e averti nou pour pa ofans lespri sen Bondye. (Lir Efezyen 4:25-32.) Nou pou aprezan egzamin pli byen konsey zapot Pol. Ki Pol ti oule dir letan i ti koz konsernan ofans lespri sen Bondye? Ki mannyer en dimoun ki’n dedye son lavi avek Zeova i kapab fer en keksoz koumsa? Ki mannyer nou kapab evite ofans lespri sen Zeova?

Sa ki Pol ti oule dir

3. Eksplike ki Efezyen 4:30 pe fer resorti.

³ Premyerman annou vwar sa ki Pol ti dir dan Efezyen 4:30. I ti ekrir: “Pa bezwen ofans Sent-Espri Bondye, limenm mark Bondye ki i’n plas lo nou konman son garanti pour sa zour ki i pou delivre nou konpletman.” Pol pa ti anvi son bann konpanyon Kretyen i met zot spirityalite an danze. Se atraver lespri sen Zeova ki zot in ganny sa mark lo zot “konman son garanti pour sa zour ki i pou delivre [zot] konpletman.” Lespri sen Bondye ti en mark e i ankor en mark oubyen sele, setadir, i “garanti” bann keksoz ki pou vini pour bann Kretyen swazir ki’n reste fidel. (2 Kor. 1:22) Sa mark i vedir ki zot in vin pour Bondye e ki zot pou viv dan lesyel. I pou annan 144,000 an tou ki pou ganny sele.—Rev. 7:2-4.

4. Akoz i enportan pour evite ofans lespri sen Bondye?

⁴ Si nou ofans lespri sen, sa i kapab premye letap ki fer en Kretyen pa ganny lafors aktif Bondye dan son lavi. Sa ki David ti dir apre ki i ti’n fer pese avek Batseba i donn levidans ki en dimoun i kapab pa ganny lespri sen Bondye. Apre ki i ti’n repantir, David ti sipliy Zeova an dizan: “Pa tir mwan devan ou figir; silvouple pa retir ou lespri sen lo mwan.” (Ps. 51:11) Zis bann Kretyen swazir ki “reste fidel ziska lanmor” ki pou ganny “kouronn lavi” e lavi imortel dan lesyel pour touzour. (Rev. 2:10; 1 Kor. 15:53) Bann Kretyen ki annan lespwar pour viv lo later i osi bezwen lespri sen si zot anvi reste fidel avek Bondye e ganny sa kado lavi ki baze lo lafwa ki nou annan dan sakrifis Kris. (Zan 3:36; Rom. 5:8; 6:23) Alor, nou tou nou bezwen veye pour pa ofans lespri sen Zeova.

Ki mannyer en Kretyen i kapab ofans lespri sen Bondye?

5, 6. Ki mannyer en Kretyen i kapab ofans lespri sen Zeova?

⁵ Konman bann Kretyen ki’n batize, nou kapab evite ofans lespri sen Bondye. Sa pou posib si nou kontinyen ‘les Lespri diriz nou lavi’ akoz sa pou anpes nou bann move dezir fer nou tonbe e nou pa pou demontre bann move tre. (Gal. 5:16, 25, 26) Me sa i kapab sanze. Nou kapab ofans lespri sen Bondye ziska en degre kot nou les nou ganny enfliyanse san ki nou remarke ki nou pe fer sa ki Parol Bondye i defann.

⁶ Si nou kontinyen pa swiv gidans ki lespri sen i donnen nou pou ofans lespri sen e Zeova, Sours sa lafors. Par egzamin Efezyen 4:25-32, nou pou vwar konman nou devret konport nou e sa pou ed nou pour pa ofans lespri sen Bondye.

Fason ki nou kapab evite ofans lespri sen Bondye

7, 8. Eksplike akoz nou bezwen koz laverite.

⁷ Nou bezwen koz laverite. Dapre Efezyen 4:25, Pol ti ekrir: “Pour sa rezon rezet mansonz! Sakenn i devre koz laverite avek son prosen akoz nou tou ansanm nou manm en sel lekor.” Vi ki nou tou “nou manm en sel lekor,” sirman nou pa devret trik oubyen fer par ekspre pour tronp nou bann frer ek ser Kretyen akoz sa pou konmsi nou pe koz manti avek zot. Nenport dimoun ki kontinyen fer sa bann keksoz, pou gat son relasyon avek Bondye.—Lir Proverb 3:32.a

⁸ Bann parol ek aksyon malonnet i kapab kas linite dan kongregasyon. Alor, nou devret vin parey profet Danyel ki ti diny konfyans e personn pa ti kapab vwar okenn koripsyon dan li. (Dan. 6:4) Nou devret gard antet sa konsey ki Pol ti donn bann Kretyen ki annan lespwar pour viv dan lesyel. I ti dir ki sak manm “lekor Kris” i form parti en sel lekor e zot bezwen reste dan linite avek bann ki vreman Kretyen swazir. (Efe. 4:11, 12) Si nou annan lespwar pour viv pour touzour dan Paradi lo later, nou osi nou merit koz laverite e sa pou kontribye anver sa linite ki annan parmi nou bann frer ek ser dan lemonn antye.

9. Akoz i enportan ki nou swiv sa konsey dan Efezyen 4:26, 27?

⁹ Nou bezwen opoz Dyab e pa donn li okenn loportinite pour li fer nou ditor spirityelman. (Zak 4:7) Lespri sen i ed nou pour reziste Satan. Par egzanp, nou kapab fer sa par kontrol nou lakoler. Pol ti ekrir: “Si zot pran lakoler fer atansyon pour zot pa tonm dan pese, e fer atansyon pa les zot lakoler dire ziska aswar. Pa les dyab pran lavantaz lo zot.” (Efe. 4:26, 27) Si nou arive ankoler pour en bon rezon nou kapab deswit fer lapriyer pour annan “en lespri kalm,” savedir, nou pou kapab demontre kontrol lo nou lekor dan plas azir dan en fason ki kapab ofans lespri sen Bondye. (Prov. 17:27) Alor, annou pa les nou lakoler dire pour en kantite letan e donn Satan loportinite pour fer nou fer en keksoz mal. (Ps. 37:8, 9) En fason ki nou kapab reziste Satan i kan rezourd bann dispit deswit akoz sa i an armoni avek konsey Zezi.—Mat. 5:23, 24; 18:15-17.

10, 11. Akoz nou pa merit vole oubyen fer okenn keksoz malonnet?

¹⁰ Nou pa merit les nou tonm dan okenn tantasyon pour vole oubyen pour vin malonnet. Konsernan vole, Pol ti ekrir: “Sa ki abitye vole fodre i aret vole e travay pour ganny son lavi dan en fason onnet e osi pour ganny dekwa pour ed bann pov.” (Efe. 4:28) Si en Kretyen ki’n batize i vol en keksoz, i pou “atak non Bondye” par anmenn repros lo Son non. (Prov. 30:7-9) Ni menm lapovrete pa devret vin en leskiz pour vole. Bann ki kontan Bondye ek zot prosen i realize ki napa okenn leskiz pour en dimoun vole.—Mark 12:28-31.

¹¹ Pol pa zis mansyonn sa ki nou pa merit fer; me i fer resorti sa ki nou merit fer osi. Si nou pe viv an armoni avek lespri sen e les li diriz nou, nou pou travay dir pour nou kapab pran swen avek nou fanmir e osi annan “dekwa pour ed bann pov.” (1 Tim. 5:8) Zezi ek son bann zapot ti met en pe larzan dekote pour ed bann dimoun pov, me Zida Iskaryot, sa enn ki ti trai Zezi, ti vol en pe sa larzan. (Zan 12:4-6) Definitivman i pa ti pe ganny gide par lespri sen. Me nou ki ganny gide par lespri sen Bondye, “nou oule fer sa ki byen dan tou sirkonstans,” zis parey Pol ti fer. (Ebr. 13:18) Alor, nou devret evite ofans lespri sen Zeova.

Lezot fason ki nou kapab evite ofans lespri sen Bondye

12, 13. (a) Dapre Efezyen 4:29, ki kalite parol nou merit evite dir? (b) Ki mannyer nou devret koze?

¹² Nou bezwen vey sa ki nou dir. Pol ti dir: “Pa les bann move parol sorti dan zot labous, me koz zis bann parol itil ki kapab ed lezot pour progrese dan zot lafwa e kan i neseser pour fer dibyen sa ki ekoute.” (Efe. 4:29) Ankor enn fwa, zapot Pol pa zis dir nou sa ki nou merit pa fer; me i osi dir nou sa ki nou merit fer. Anba gidans lespri sen Bondye, nou pou ganny pouse pour “koz zis bann parol ki itil ki kapab ed lezot progrese dan zot lafwa . . . pour fer dibyen sa ki ekoute.” An plis ki sa, nou pa merit “les bann move parol sorti dan [nou] labous.” Sa mo ki’n ganny tradwir “move” i orizinalman “pouri” dan langaz Grek. Sa mo “pouri” i ganny servi pour dekrir en fri, lavyann oubyen pwason ki’n gate. Nou merit ay bann parol ki Zeova i konsider move, zis parey ou annan en repinyans pour sa bann manze pouri.

¹³ Nou parol i merit respektab, zantiy e “touzour agreab.” (Kol. 3:8-10; 4:6) Dimoun i merit remarke ki nou diferan par nou fason koze. Alors, annou “ed lezot pour progrese” par sa ki nou dir. Annou annan sa menm santiman parey sa psalmis ki ti sante: “Les bann parol ki sorti dan mon labous ek meditasyon ki sorti dan mon leker vin en keksoz agreab pour ou, O Zeova mon Ros ek mon Liberater.”—Ps. 19:14.

14. Dapre Efezyen 4:30, 31, ki nou merit debaras nou avek?

¹⁴ Nou bezwen debaras nou avek bann move santiman, iritasyon, lensilt ek tou bann move keksoz. Apre ki i ti’n met nou an gard konsernan ofans lespri sen Bondye, Pol ti ekrir: “Debaras zot avek tou move santiman, tou iritasyon, tou lakoler. Fer disparet tou kriye ek lensilt. Evite annan okenn santiman mesanste.” (Efe. 4:30, 31) Konman bann imen enparfe, nou tou nou bezwen travay dir pour kontrol nou panse ek aksyon. Si nou pa kontrol nou bann ‘move santiman, iritasyon, ek lakoler,’ nou pou ofans lespri sen Bondye. Sa i leka letan nou mazin tou bann keksoz mal ki lezot dimoun in fer kont nou, nou gard rankin e refize pour rekonsilye avek en dimoun ki’n ofans nou. Si nou menm konmans inyor konsey Labib, nou kapab devlop bann tre ki kapab fer nou fer pese kont lespri sen e bann konsekans i kapab grav.

15. Si en dimoun in fer en keksoz mal kont nou, ki nou merit fer?

¹⁵ Nou bezwen zantiy, demontre konpasyon e pare pour pardonnen. Pol ti ekrir: “Vin bon, ranpli avek lafeksyon pour kanmarad; e pardonn kanmarad, parey Bondye in pardonn zot dan Kris.” (Efe. 4:32) Menm si nou’n ganny blese o profon par en dimoun ki’n fer en keksoz mal kont nou, annou pardonn li, parey Bondye i fer. (Lik 11:4) Meton en konpanyon Kretyen in dir en keksoz mal lo nou. Nou esey aranz sa sityasyon par apros li. I montre ki i vreman regret sa ki in fer e demann nou pour pardonn li. Nou pardonn li, me nou bezwen fer plis ki sa. Levitik 19:18 i dir: “Ou pa devret fer vanzans, ni gard rankin anver bann garson ou pep; e ou devret kontan ou prosen parey ou menm. Mwan Zeova.”

Nou bezwen vizilan

16. Donn en legzanp pour montre ki nou bezwen fer bann sanzman neseser pour pa ofans lespri Zeova.

¹⁶ Nou kapab ganny tante pour fer en keksoz ki pa fer plezir Bondye menm an prive. Par egzanp, petet en frer pe ekout en lanmizik ki pa akseptab pour en Kretyen. Avek letan, son konsyans i konmans trouble li akoz i’n inyor konsey Labib ki’n ganny mete dan bann piblikasyon ki “lesklav fidel e pridan” in fourni. (Mat. 24:45, NW) I fer lapriyer pour son problenm e petet mazin parol ki Pol ti dir dan Efezyen 4:30. I determinen pour pa fer okenn keksoz ki pou ofans lespri sen Bondye e deside pour pa zanmen ekout okenn lanmizik ki pa akseptab pour en Kretyen ankor. Zeova pou beni sa frer akoz sa kalite leta lespri ki i’n demontre. Alor, annou kontinyel veye ki nou pa ofans lespri sen Bondye.

17. Ki i kapab arive si nou pa vizilan e pa pe priye?

¹⁷ Si nou pa vizilan e nou pa pe priye, nou pou ofans lespri sen par fer bann aksyon ki enpir e mal. Vi ki lespri sen i travay an armoni avek fason ki nou Papa dan lesyel i panse e ziz en sityasyon, sa i fer ki nou kapab ofans oubyen sagrin lespri sen, me nou pa anvi ki en keksoz koumsa i arive. (Efe. 4:30) Bann profeser lalwa dan premye syek ti fer pese volonterman par dir ki sa lafors ki Zezi ti annan pour fer bann mirak ti sorti kot Satan. (Lir Mark 3:22-30.) Sa bann lennmi Zezi ti “blasfenm kont Sent-Espri,” e alor fer en pese ki pa kapab ganny pardonnen. Annou pa zanmen tonm dan en tel sityasyon!

18. Ki mannyer nou pou konnen ki nou pa’n fer en pese ki pa kapab ganny pardonnen?

¹⁸ Vi ki nou pa anvi fer pese ki pa kapab ganny pardonnen, nou bezwen mazin sa ki Pol ti dir konsernan ofans lespri sen Bondye. Me ki arive si nou’n fer en pese grav? Si nou’n repantir e nou’n ganny led avek bann ansyen, sa i montre nou ki Bondye in pardonn nou e nou pa’n fer pese kont lespri sen. Avek led Bondye, nou pou kapab evite ofans lespri sen Bondye dan okenn lezot fason osi.

19, 20. (a) Nonm serten keksoz ki nou merit evite. (b) Nou merit determinen pour fer kwa?

¹⁹ Par mwayen son lespri sen, Bondye i promot lanmour, lazwa ek linite parmi son pep. (Ps. 133:1-3) Alor, nou bezwen evite ofans lespri sen Bondye. Nou fer sa ler nou evite partisip dan bavardaz malfezan oubyen dir keksoz ki mank respe pour bann berze ki’n ganny apwente par lespri sen Bondye. (Akt 20:28; Zid 8) O kontrer, nou merit promot linite e annan respe anver tou dimoun dan kongregasyon. Sirman, konman pep Bondye nou pa merit form bann pti group antre nou. Pol ti ekrir: “Bann frer, mon demann zot par Zezi-Kris nou Senyer: ‘Met zot byen dakor ansanm e ki okenn divizyon pa egziste parmi zot. Reste byen ini ansanm dan en menm lespri e en menm lopinyon.’”—1 Kor. 1:10.

²⁰ Zeova i anvi e i annan sa abilite pour ed nou evite ofans son lespri sen. Annou kontinyen priye pour ganny lespri sen e reste determinen pour nou pa ofans li. Annou toultan “fer plezir Lespri,” e kontinyen rod son gidans la konmela e pour touzour.

[Not anba lo paz]

Ki ou pou reponn?

• Ki savedir ofans lespri sen Bondye?

• Ki mannyer en dimoun ki’n dedye son lavi avek Zeova i kapab ofans son lespri sen?

• Ki mannyer nou kapab evite ofans lespri sen Zeova?

[Portre lo paz 30]

Pa tarde pour fer lape

[Portre lo paz 31]

Ki fri lespri ki dekrir ou parol pli byen?