Ou kapab fer Zeova plezir par ou fason koze

Ler Zeova ti kree nou, i ti donn nou en zoli kado. Sa se abilite pour koze. Eski i enportan pour li ki mannyer nou servi sa kado? Definitivman! (Lir Zak 1:26.) Alor, ki mannyer nou kapab servi nou abilite pour koze dan en fason ki pou fer Zeova plezir?

1. Ki mannyer nou kapab servi sa kado ki Zeova in donn nou?

Labib i dir nou “kontinyen ankouraz kanmarad e batir kanmarad.” (1 Tesalonisyen 5:11) Eski ou mazin en dimoun ki bezwen lankourazman? Ki ou kapab fer pour fer li santi li pli byen? Dir li ki kantite enportan i ete pour ou. Petet ou kapab dir li ki ou apresye avek li. Ou kapab mazin en verse Labib ki ti pou ankouraz en dimoun ki ou konnen. I annan bokou verse ki ou kapab servi. Pa bliye osi ki lafason ki ou dir en keksoz i fer otan lefe ki sa parol ki ou’n dir. Alor, eseye pour toultan koz dan en fason ki zantiy e avek ladouser.​—Proverb 15:1.

2. Ki kalite parol nou devret evite?

Labib i dir: “Okenn parol pouri pa devret sorti dan zot labous.” (Lir Efezyen 4:29.) Savedir nou pa devret dir bann move parol oubyen fer bann remark kriyel e blesan avek lentansyon pour bles en dimoun. Osi, nou pa devret malparl lezot e koz manti lo zot.​—Lir Proverb 16:28.

3. Kwa ki pou ed nou koz dan en fason ki ankourazan pour lezot?

Laplipar ditan nou koz lo bann keksoz ki vreman dan nou leker oubyen sa ki fatig nou. (Lik 6:45) Alor nou devret esey devlop sa labitid pour konsantre lo bann keksoz ki pozitif, ki byen, pir, bon e ki merit felisitasyon. (Filipyen 4:8) Pour nou kapab konsantre lo sa bann keksoz, nou bezwen byen swazir nou bann divertisman ek zanmi. (Proverb 13:20) En lot keksoz ki kapab ede, i ler nou pran letan pour reflesir avan nou koze. Reflesir ki lefe ou parol i kapab annan lo lezot. Labib i dir: “Parol ki ganny dir san reflesir i parey bann kou lepe, me parol en dimoun saz i en gerizon.”​—Proverb 12:18.

AL PLI O PROFON

4. Annan kontrol lo sa ki ou dir

Nou tou parfwa nou dir bann keksoz ki nou regrete pli tar. (Zak 3:2) Lir Galat 5:22, 23 e apre reponn sa bann kestyon:

• Ki kalite ou kapab priye pour devlope, ki kapab ed ou annan kontrol lo sa ki ou dir? Ki mannyer sa bann kalite i kapab ed ou?

Lir 1 Korentyen 15:33 e apre reponn sa kestyon:

• Ki mannyer ou bann zanmi ek divertisman i kapab enfliyans lafason ki ou koze?

Lir Eklezyas 3:1, 7 e apre reponn sa kestyon:

• Akoz parfwa i pli byen pour reste trankil oubyen esper en pli bon moman pour koze?

5. Koz dan en fason pozitif lo lezot

VIDEO: Koz “sa ki bon pour ankouraz lezot” (4:07)

• Akoz sa frer dan sa video ti anvi arete koz dan sa fason ki i ti koze lo lezot?

• Ki i ti fer pour li sanze?

Lir Eklezyas 7:16 e apre reponn sa kestyon:

• Ki nou devret mazinen ler nou ganny tante pour malparl lezot?

Lir Eklezyas 7:21, 22 e apre reponn sa kestyon:

• Ki mannyer sa bann verse i kapab ed ou pour pa ankoler vitman ler en dimoun i malparl ou?

6. Koz dan en fason zantiy avek ou fanmir

VIDEO: Lanmour ek respe i fer bann fanmir ini (3:08)

• Kwa ki pou ed ou koz dan en fason zantiy avek ou fanmir?

Lir Efezyen 4:31, 32 e apre reponn sa kestyon:

• Ki kalite fason koze ki batir en fanmir?

Zeova ti dir ki mannyer i santi konsernan son Garson, Zezi. Lir Matye 17:5 e apre reponn sa kestyon:

• Ki mannyer ou kapab imit Zeova dan lafason ki ou koz avek ou fanmir?

REZIMEN

Nou parol i annan bokou lefe lo lezot. Nou bezwen byen reflesir lo sa ki nou dir, kan nou dir li e ki mannyer nou dir li.

Revizyon

• Ki mannyer ou kapab koz dan en fason ki pou ed lezot?

• Ki kalite parol ou bezwen evite?

• Kwa ki kapab ed nou pour toultan koz dan en fason zantiy e ankourazan?

FER PLIS RESERS

Kwa ki kapab ed nou pour koz dan en fason pozitif?

Koz parey en dimoun saz (8:04)

Vwar kwa ki kapab ed ou evite servi bann move parol.

“Is Cursing Really That Bad?” (Lartik lo jw.org)

Gete ki mannyer ou kapab rezet sa labitid pour malparl lezot.

Ki mannyer mon kapab aret donn nouvel dimoun? (2:36)

Dekouver ki mannyer Zeova ti ed en msye ki ti pe sey aret zoure.

“Mon ti konmans mazin seryezman lo bi mon lavi” (Latour Veyer Septanm–Oktob 2013)