Ou kapab sirmont bann problenm ki afekte en fanmiy

 1. Ki bann problenm ki egziste dan serten fanmiy ki lezot pa fasil remarke?

SA VYE loto ti’n fek ganny lave e byen netwaye. Dimoun ki vwar sa loto, ti vwar li klate e preski nef. Me anba sa lapentir, larouy ti pe manz lakok sa loto. I menm parey avek serten fanmiy. Menm si laparans i donn lenpresyon ki tou keksoz i byen, sourir lo figir pe kasyet lafreyer ek soufrans. Dan lakour kot lezot pa vwar, i annan keksoz ki pe detri lape sa fanmiy. De keksoz ki kapab annan sa lefe se problenm bwar ek vyolans.

 2. (a) Ki pwennvi Labib konsernan servi labwason alkolik? (b) Kisisa problenm bwar?

² Labib pa defann bwar avek moderasyon, me i defann bwar pour sou. (Proverb 23:20, 21; 1 Korentyen 6:9, 10; 1 Timote 5:23; Tit 2:2, 3) Parkont, problenm bwar i plis ki senpleman sou. Problenm bwar i ler en dimoun pa kapab viv san lakol e i bwar san okenn kontrol. Bann adilt i kapab annan sa problenm. Malerezman, bann zenn osi i kapab ganny afekte avek sa problenm.

3, 4. Dekrir lefe ki problenm bwar i fer lo msye ouswa madanm en alkolik e lo son bann zanfan.

³ Depi byen lontan, Labib in endike ki abiz lalkol i kapab deranz lape dan en fanmiy. (Deterononm 21:18-21) Fanmiy antye i ganny afekte par bann move lefe problenm bwar. Petet sa madanm i bezwen depans tou son zefor pour fer son mari aret bwar tro bokou oubyen pour siport son latitid ki sanz zour an zour.a I esey kasyet e zet bann boutey bwar, kasyet son larzan, e enplor li pour sanze pour lanmour son fanmiy, pour lavi, menm pour Bondye. Me i kontinyen bwar. Anmezir ki i vwar ki i pa pe reisi ed son mari pour bwar avek kontrol, sa madanm i santi li fristre e nepli kapab. I kapab konmans ganny lafreyer, devlop lakoler, santi li koupab, nerve, enkyet, e santi en mank respe pour son lekor ki pou annan en move lefe lo li.

⁴ Bann zanfan osi i ganny afekte ler zot manman oubyen papa i annan problenm bwar. Serten i ganny maltrete. Lezot i ganny abize seksyelman. Zot menm kapab blanm zot lekor akoz zot papa oubyen manman i en alkolik. Vi ki zot pa kapab fye lo konportman zot paran alkolik, tre souvan sa i fer zot pa kapab met konfyans dan lezot dimoun. Etan donnen ki zot pa kapab koz fransman konsernan sa ki pe arive kot lakour, sa bann zanfan i kapab esey kasyet zot santiman, ki souvannfwa afekte zot en kantite fizikman. (Proverb 17:22) Sa bann zanfan i perdi konfyans ek respe pour zot lekor, ki kontinyen afekte zot menm plitar ler zot vin bann adilt.

 5. Ki nou kapab fer pour kontrol bann lefe ki problenm bwar i anmennen, e akoz sa i difisil?

⁵ Menm si bokou spesyalis i dir ki problenm bwar pa kapab ganny geri, laplipar i dakor ki en serten nivo amelyorasyon i posib gras a en progranm labstinans total. (Vwar Matye 5:29.) Sepandan, pour fer en alkolik aksepte led i pli fasil dir ki fer, vi ki normalman i refize aksepte ki i annan en problenm. Me ler bann manm fanmiy i pran bann pa neseser pour limit lefe ki sa problenm bwar i fer lo zot, sa alkolik i kapab konmans realize ki i annan en problenm. En dokter ki annan leksperyans pour ed bann alkolik ek zot fanmiy ti dir: “Mon panse ki keksoz pli enportan se ki sa fanmiy i viv zot lavi dan en pli bon fason posib. Avek letan, sa alkolik pou realize ki i annan en gran diferans ant li ek leres manm son fanmiy.”

 6. Ki pli bon sours konsey pour bann fanmiy kot i annan en alkolik?

⁶ Si i annan en alkolik dan ou fanmiy, konsey enspire dan Labib i kapab ed ou pour viv en pli bon lavi posib. (Izai 48:17; 2 Timote 3:16, 17) Konsider serten prensip ki’n ed bann fanmiy pour reisi sirmont lefe problenm bwar.

 7. Si en manm fanmiy i en alkolik, lekel ki responsab?

⁷ Aret met tou blanm lo ou. Labib i dir: “Sakenn i devre anmenn son prop fardo,” e “sakenn antre nou pou bezwen rann kont devan Bondye pour son prop lekor.” (Galat 6:5; Romen 14:12) Sa alkolik i kapab esey sizere ki bann manm fanmiy ki responsab. Par egzanp, i kapab dir: “Si ou ti tret mwan pli byen, mon pa ti pou bwar.” Si lezot i montre ki zot dakor avek li, zot pe ankouraz li pour kontinyen bwar. De lot kote, menm si i kapab ki nou ganny viktimize par bann sirkonstans oubyen avek lezot dimoun, nou tou, enkli bann alkolik, nou responsab pour tou sa ki nou fer.​—Vwar Filipyen 2:12.

 8. Nonm serten fason kot en alkolik i kapab ganny ede pour fer fas avek bann konsekans son problenm.

⁸ Pa santi ki ou devret toultan protez sa alkolik kont bann konsekans son labitid bwar. En proverb Labib konsernan en zonm ki ankoler i kapab egalman aplik pour sa alkolik: “Si ou delivre li, ou pou kontinyen fer li ankor e ankor.” (Proverb 19:19) Les sa alkolik soufer konsekans son labitid bwar. Les li netway bann dezord ki i’n fer oubyen les li telefonn son anplwayer son lannmen apre ki i’n bwar.

9, 10. Akoz fanmiy bann alkolik i devret aksepte led, e led lekel ki zot devret rode partikilyerman?

⁹ Aksepte led avek lezot. Proverb 17:17 i dir: “En vre konpanyon i kontan ou toultan, e i en frer ki’n ne pour letan ladetres.” Ler i annan en alkolik dan ou fanmiy, i annan ladetres. Ou bezwen led. Pa ezite pour depan lo ‘bann vre konpanyon’ pour sipor. (Proverb 18:24) Ler ou koz avek lezot ki konpran sa problenm oubyen ki’n fer fas avek en menm sitiasyon, ou kapab ganny bann sizesyon pratik konsernan ki pour fer e ki pa pour fer. Me fodre ou balanse. Koz avek bann ki ou annan konfyans ladan, bann ki pou protez ou “konversasyon konfidansyel.”​—Proverb 11:13.

¹⁰ Aprann met konfyans dan bann ansyen. Bann ansyen dan kongregasyon Kretyen i kapab en gran sours led. Sa bann zonm matir i konn byen Parol Bondye e zot eksperyanse dan laplikasyon son bann prensip. Zot kapab vin “parey en landrwa kasyet kont divan e en labri kont tanpet lapli, parey delo ki pe koule dan en later sek, parey lonbraz en gro ros dan en later epize.” (Izai 32:2) Bann ansyen pa zis protez kongregasyon kont bann move lenfliyans me zot osi konsol, soulaz, e pran en lentere personnel dan sak dimoun ki annan problenm. Profit byen zot led.

11, 12. Lekel ki fourni pli gran led pour bann fanmiy ki annan en alkolik, e konman ki sa sipor i ganny donnen?

¹¹ Pli enportan ki tou, rod lafors avek Zeova. Labib i donn nou sa lasirans rekonfortan: “Zeova i pre avek sa bann ki annan leker brize; e i sov bann ki zot lespri i fatige.” (Psonm 34:18) Si ou santi ki ou annan leker brize oubyen ou lespri i fatige akoz presyon pour viv avek en manm fanmiy alkolik, konnen ki “Zeova i pre” avek ou. I konpran ki kantite difisil sitiasyon ou fanmiy i ete.​—1 Pyer 5:6, 7.

¹² Krwar sa ki Zeova i dir dan son Parol i kapab ed ou pour fer fas avek lenkyetid. (Psonm 130:3, 4; Matye 6:25-34; 1 Zan 3:19, 20) Etidye Parol Bondye e viv dapre son prensip i permet ou pour resevwar led lespri sen Bondye, ki kapab donn ou sa “pisans ki napa son parey” pour viv en zour apre lot.​—2 Korentyen 4:7.b

13. Ki sa dezyenm problenm ki afekte bokou fanmiy?

¹³ Labi lalkol i kapab anmenn en lot problenm ki afekte bokou fanmiy. Sa se vyolans domestik.

14. Kan vyolans domestik ti konmanse, e ki sitiasyon denozour?

¹⁴ Premye akt vyolan dan listwar imen ti en vyolans domestik ant de frer, Kaen ek Abel. (Zenez 4:8) Depi sa, limanite in ganny anvair avek tou sort kalite vyolans domestik. I annan bann mari ki bat zot madanm, bann madanm ki atak zot mari, bann paran ki britalman bat zot bann zanfan, e bann adilt ki maltret zot paran aze.

15. Ki mannyer bann manm fanmiy i ganny afekte emosyonnelman par vyolans domestik?

¹⁵ Problenm ki ganny koze par vyolans domestik i plis ki zis bann sikatris fizik. En madanm ki ti ganny bate, ti dir: “Ou bezwen lager avek bann santiman koupab ek laont. Ler lizour i fer, ou zis anvi reste lo lili, e swete ki i ti zis en move rev.” Bann zanfan ki vwar oubyen eksperyans vyolans domestik i kapab zot menm vin vyolan ler zot grandi e annan zot prop fanmiy.

16, 17. Kisisa latak verbal, e konman ki bann manm fanmiy i ganny afekte par sa?

¹⁶ Vyolans domestik pa zis labi fizik. Souvan i enplik latak verbal. Proverb 12:18 i dir: “I annan ki koz san reflesir konmsi bann kou lepe.” Sa “bann kou” i kapab enkli servi bann non ofansif pour apel en dimoun, kriy avek li, repros li kontinyelman, ensilte li pour abes li, e menas li fizikman. Latak verbal i koz bann blesir emosyonnel ki envizib e souvan lezot pa remarke.

¹⁷ Sa ki pli tris ankor se ler en zanfan i ganny afekte par bann parol ki abes zot e ganny reprose konstaman konsernan son bann abilite, lentelizans, oubyen son valer konman en imen. Bann tel labi verbal i kapab fer en zanfan perdi konfyans dan son lekor. I vre, tou zanfan i bezwen disiplin. Me Labib i donn bann papa sa lenstriksyon: “Pa bezwen provok zot zanfan, sa i kapab dekouraz zot.”​—Kolosyen 3:21.

18. Kote vyolans domestik i konmanse, e dapre Labib, konman nou kapab aret li?

¹⁸ Vyolans domestik i konmans dan lespri ek leker; lafason ki nou azir i konmans avek sa ki nou panse. (Zak 1:14, 15) Pour aret sa vyolans, sa abizer i bezwen transform son fason panse. (Romen 12:2) Eski sa i posib? Wi. Parol Bondye i annan sa pouvwar pour sanz dimoun. I menm kapab derasin bann move pwennvi ki’n byen anrasinen. (2 Korentyen 10:4; Ebre 4:12) Konnesans egzakt dan Labib i kapab ede fer en dimoun sanz konpletman, ki ou kapab dir ki i’n pran en nouvo personnalite.​—Efezyen 4:22-24; Kolosyen 3:8-10.

19. Ki mannyer en Kretyen i devret konsider e tret son msye ouswa son madanm?

¹⁹ Ou pwennvi lo ou msye ouswa ou madanm. Parol Bondye i dir: “Bann zonm devre alor, kontan zot madanm parey zot kontan zot prop lekor. Sa ki kontan son madanm, i kontan son prop lekor.” (Efezyen 5:28) Labib i osi dir ki en mari i devret “rekonnet ki bann madanm i annan en natir pli feb.” (1 Pyer 3:7) Bann madanm i ganny konseye “pour kontan zot mari” e pour “respekte” zot. (Tit 2:4; Efezyen 5:33) Nenport mari ki annan respe pour Bondye pa kapab senserman dir ki i vreman onor son madanm, si i abiz li fizikman oubyen verbalman. Okenn madanm ki kriy avek son mari, gognard li, oubyen pe kontinyelman reprimann li, pa kapab dir ki i vreman kontan e respekte li.

20. Devan lekel ki bann paran i responsab pour zot zanfan, e akoz bann paran pa devret ekspekte zot zanfan fer sa ki zot pa kapab?

²⁰ Pwennvi apropriye lo zanfan. Bann zanfan i merit ganny lanmour ek latansyon zot paran. Parol Bondye i apel bann zanfan “en leritaz sorti kot Zeova” ek “en rekonpans.” (Psonm 127:3) Bann paran i responsab devan Zeova pour pran swen avek sa leritaz. Labib i koz lo “bann mannyer en zanfan” e lo konman zanfan i kapab azir san reflesir. (1 Korentyen 13:11; Proverb 22:15) Bann paran pa devret sirprann si zot vwar zot zanfan azir san reflesir. Bann zenn i pa bann adilt. Bann paran pa devret demann plis ki sa ki apropriye pour laz sa zanfan, son sitiasyon fanmiy, ek son abilite.​—Vwar Zenez 33:12-14.

21. Dapre Bondye, dan ki fason bann paran aze i merit ganny konsidere e ganny trete?

²¹ Ou pwennvi lo bann paran aze. Levitik 19:32 i dir: “Devan bann seve blan ou devret leve, e ou merit montre konsiderasyon pour en vye dimoun.” Alor, lalwa Bondye i ankouraz respe ek en gran lestim pour bann aze. Sa i kapab pa fasil ler en paran aze i paret bezwen tou ou letan oubyen i malad e petet pa deplas oubyen rezonn vitman. Toudmenm, bann zanfan i ganny rapele pour kontinyen “ranpli zot devwar anver zot paran.” (1 Timote 5:4) Savedir zot bezwen tret zot paran aze avek dinite ek respe, petet menm ed zot finansyerman. Maltret bann paran aze fizikman ouswa dan lezot fason i tou lekontrer avek sa ki Labib i dir nou fer.

22. Ki kalite ki enportan pour sirmont vyolans domestik, e konman ki i kapab ganny demontre?

²² Devlop kontrol lo ou prop lekor. Proverb 29:11 i dir ki en dimoun bet napa kontrol lo son lespri, me sa enn ki saz i kontrol li. Ki mannyer ou kapab kontrol ou tanperaman? Olye ki ou kontinyen reste ankoler, azir vitman pour rezourd bann difikilte ki leve. (Efezyen 4:26, 27) Kit sa landrwa si ou santi ki ou pe perdi kontrol. Priy Bondye pour ki son lespri sen i ed ou devlop kontrol lo ou prop lekor. (Galat 5:22, 23) Al marse oubyen fer serten legzersis fizik i kapab ed ou pour kontrol ou santiman. (Proverb 17:14, 27) Eseye pour “pa ankoler vitman.”​—Proverb 14:29.

23. Ki kapab arive si en dimoun dan kongregasyon Kretyen i kontinyelman pran lakoler vyolan, petet menm abiz son fanmiy fizikman, e i pa oule sanze?

²³ Labib i plas “laenn, diskord, . . . lakoler” parmi bann keksoz ki Bondye pa aksepte e i dir ki “bann ki pratik sa bann keksoz koumsa pa pou erit Rwayonm Bondye.” (Galat 5:19-21) Alor, nenport dimoun ki dir i en Kretyen me ki kontinyelman pran lakoler vyolan e pa oule sanze, petet i menm abiz son madanm oubyen zanfan fizikman, i kapab ganny ekskli dan kongregasyon Kretyen. (Vwar 2 Zan 9, 10.) Dan sa fason, kongregasyon i ganny garde prop kont bann dimoun vyolan.​—1 Korentyen 5:6, 7; Galat 5:9.

24. (a) Ki bann msye ouswa madanm ki ganny bate i kapab deside pour fer? (b) Ki mannyer bann zanmi ek ansyen i kapab siport sa dimoun, me ki zot pa devret fer?

²⁴ Me ki en Kretyen i kapab fer si i pe ganny bate avek son msye ouswa madanm ki pa montre okenn siny pour sanze? Serten in swazir pour reste avek sa msye ouswa sa madanm vyolan pour en rezon ou en lot. Lezot in swazir pour ale, akoz zot santi ki zot lasante fizik, mantal, spirityel, petet menm zot lavi i an danze. Sa ki en viktim vyolans domestik i swazir pour fer dan sa bann sirkonstans i en desizyon personnel devan Zeova. (1 Korentyen 7:10, 11) Bann zanmi, fanmiy, oubyen ansyen ki annan bon lentansyon i kapab anvi ofer led ek konsey. Me zot pa devret met presyon lo en viktim pour pran en aksyon partikilye. Sa i son desizyon personnel.​—Romen 14:4; Galat 6:5.

25. Ki ti plan Zeova pour lafanmiy?

²⁵ Kan Zeova ti ini Adan ek Ev dan maryaz, i pa ti zanmen dan son plan ki bann fanmiy i ganny afekte avek bann problenm parey bwar ek vyolans. (Efezyen 3:14, 15) Sa laranzman fanmiy ti sipoze vin en landrwa kot lanmour ek lape ti pou fleri e bezwen mantal, emosyonnel, e spirityel sak manm fanmiy ti pou ganny satisfe. Me kan imen ti konmans fer pese, lavi fanmiy ti deteryore vitman.​—Vwar Eklezyast 8:9.

26. Ki lavenir ki pe esper bann ki esey viv an armoni avek sa ki Zeova i demande?

²⁶ Erezman, Zeova pa’n abandonn son plan pour lafanmiy. I’n promet pour met an plas en nouvo lemonn anpe kot dimoun “pou vreman viv an sekirite, san ki personn i fer zot tranble.” (Ezekyel 34:28) Sa letan, problenm bwar, vyolans domestik, ek tou lezot problenm ki afekte bann fanmiy ozordi pou vin bann keksoz lepase. Bann dimoun pou sourir, non pa pour kasyet lafreyer ek soufrans, me parski zot pou “vreman rezwir dan labondans lape.”​—Psonm 37:11.