Ed lezot pour viv en lavi ki Zeova i aprouve

“Nou’n touzour priy pour zot. Nou demann Bondye . . . pour ki zot ava kapab viv, en lavi ki Bondye i aprouve e ki fer li plezir dan tou sa ki zot fer. Koumsa par zot bon travay zot ava prodwi fri.”—KOLOSYEN 1:9, 10.

 1, 2. Kwa an partikilye ki kapab vin en sours lazwa ek satisfaksyon?

“NOU reste dan en karavann lo en laferm. An gardan nou lavi senp, nou annan plis letan pour partaz sa bon nouvel avek bann dimoun. Nou’n resevwar bokou benediksyon par sa privilez pour ed bokou dedye zot lavi avek Zeova.”—En koup marye dan minister aplentan an Sid Afrik.

² Eski ou pa dakor ki ed lezot i anmenn lazwa? Serten i sey regilyerman ed bann malad, bann ki napa, oubyen bann ki tousel e zot retir satisfaksyon kan zot fer sa. Bann vre Kretyen i asire ki partaz konnesans lo Zeova ek Zezi avek lezot i pli gran led ki zot kapab ofer. Selman sa, ki anmenn lezot pour aksepte ranson Zezi, pour devlop en bon relasyon avek Bondye, e ki answit met zot dan en pozisyon pour resevwar lavi eternel.—Akt 3:19-21; 13:48.

 3. Ki kalite led ki merit nou latansyon?

³ Toutfwa, ki ou panse lo ed bann ki pe deza servi Bondye, bann ki pe swiv sa “Semen”? (Akt 19:9) San dout, ou ankor annan gran lentere dan zot parey avan, me petet ou pa vwar konman ou kapab fer plis oubyen ofer ou led konstaman. Oubyen petet ki ou sitiasyon i paret limit ou pour ed zot, ensi ki satisfaksyon ki ou ti a kapab gannyen. (Akt 20:35) Konsernan tou le de laspe, nou kapab aprann bokou dan liv Kolosyen.

 4. (a) Ki sitiasyon Pol ti ladan kan i ti ekrir bann Kolosyen? (b) Konman Epafras ti enplike ladan?

⁴ Kan lapot Pol ti ekrir bann Kretyen an Kolos, i ti an Ronm, anprizonnen dan en lakaz, menm si i ti kapab resevwar viziter. Parey ou ti a ekspekte, Pol ti servi son liberte limite pour pres lo Rwayonm Bondye. (Akt 28:16-31) Bann konpanyon Kretyen ti kapab vizit Pol, petet parfwa serten ti menm ganny anprizonnen avek li. (Kolosyen 1:7, 8; 4:10) Enn parmi ti evanzelizater zele, Epafras, sorti dan lavil Kolos an Frizi, lo plato ki les Efez dan Lazi Miner (ki ozordi apel Latirki). Epafras ti kontribye pour form en kongregasyon an Kolos e i ti travay dir pour bann kongregasyon pros an Laodise ek Ierapolis. (Kolosyen 4:12, 13) Akoz Epafras ti vwayaze pour al vwar Pol an Ronm e ki nou kapab aprann par reaksyon Pol?

Led Efikas pour Bann Kolosyen

 5. Pour ki rezon Pol ti ekrir en tel let pour bann Kolosyen?

⁵ Epafras ti fer sa vwayaz difisil pour li koz avek Pol konsernan bann sitiasyon dan kongregasyon Kolos. I ti raport lo lafwa, lanmour, ek bann zefor ki sa bann Kretyen ti pe fer dan predikasyon. (Kolosyen 1:4-8) Sepandan, i ti’n bezwen osi eksprim son konsern lo serten lenfliyans negatif ki ti pe menas spirityalite bann Kolosyen. Pol ti reponn par en let enspire ki ti opoz serten lopinyon ki bann fo ansennyan ti pe propaze. I ti konsantre partikilyerman lo rol santral ki Zezi i devret zwe.a Eski son led ti limite selman lo lanfaz bann verite fondamantal Labib? Konman ki i ti kapab ed bann Kolosyen ankor, e ki leson nou kapab aprann konsernan ed lezot?

 6. Kwa ki Pol ti met lanfaz lo la dan son let pour bann Kolosyen?

⁶ Byen boner dan son let, Pol ti donn en apersi lo en kalite led ki nou ti a kapab inyore. Vi ki Pol ek Epafras ti lwen avek Kolos, sa ti en fason donn led ki ti efektif kan zistans i en baryer. Pol ti deklare: “Ler nou priy [not NW, “touzour pe priye” ] pour zot nou touzour remersi Bondye, Papa nou Senyer Zezi-Kri.” Wi, sa ti bann lapriyer spesifikman pour bann Kretyen an Kolos. Pol ti azoute: “Pour sa rezon, depi ki nou’n tann koz lo zot, nou’n touzour priy pour zot. Nou demann Bondye pour ranpli zot avek konnesans son lavolonte, avek lasazes ek konpreansyon ki son Lespri i donnen.”—Kolosyen 1:3, 9.

 7, 8. Ki size nou lapriyer personnel ek lapriyer kongregasyon i souvan enkli?

⁷ Nou konnen ki Zeova i sa “Enn ki ekout lapriyer,” alors nou kapab annan konfyans ki i vreman anvi ekout nou lapriyer ki nou’n ofer an armoni avek son lavolonte. (Psonm 65:2; 86:6; Proverb 15:8, 29; 1 Zan 5:14) Sepandan, kan nou priy pour lezot, konman nou lapriyer i ete?

⁸ Souvan nou kapab mazin e priy pour ‘nou bann frer dan lemonn antye.’ (1 Pyer 5:9) Oubyen nou kapab apros Zeova konsernan bann Kretyen ek lezot dan en rezyon ki’n ganny frape par en dezas oubyen trazedi. Kan bann Kretyen premye syek, ki ti pe abit dan lezot landrwa, ti antann konsernan lafamin an Zide, zot in bezwen fer en kantite lapriyer pour bann frer menm avan anvoy bann donasyon pour sekour zot. (Akt 11:27-30) Denozour, nou souvan antann bann lapriyer dan bann renyon pour tou bann frer ek ser dan lemonn oubyen en gran group frer ek ser, lapriyer kot bokou i bezwen konpran e kapab dir “Amenn.”—1 Korentyen 14:16.

Fer Lapriyer ki Presi

 9, 10. (a) Ki bann legzanp ki montre ki i apropriye pour priy spesifikman pour en endividi? (b) Konman ki Pol ti vin size lapriyer presi?

⁹ Ankor, Labib i fourni nou avek bann legzanp lapriyer ofer pour lezot, ki ti pli presi e personnel. Reflesir lo komanter Zezi rikorde dan Lik 22:31, 32. I ti antoure avek 11 zapot fidel. Zot tou zot ti bezwen led Bondye dan bann difikilte ki ti pou vini e Zezi ti priy pour zot. (Zan 17:9-14) Menm sa, Zezi ti port en latansyon spesyal pour Pyer e i ti fer siplikasyon presizeman pour sa disip. Lezot legzanp: Elisa ti priye ki Bondye i ed en zonm spesifik, son serviter. (2 Lerwa 6:15-17) Lapot Zan ti priye ki Gayis i port byen fizikman e spirityelman. (3 Zan 1, 2) E bann lezot lapriyer ti port latansyon lo bann group spesifik.—Zob 42:7, 8; Lik 6:28; Akt 7:60; 1 Timote 2:1, 2.

¹⁰ Let Pol i fer resorti lenportans lapriyer byen presi. I ti demande ki lapriyer i ganny fer pour li oubyen pour li ek son bann konpanyon. Nou lir dan Kolosyen 4:2, 3: “Persevere dan lapriyer; reste vizilan par lapriyer ki zot adres Bondye avek rekonesans. An menm-tan priy osi pour nou, pour ki Bondye i ouver en laport favorab pour nou pres son mesaz e anons mister Kris. Sanmenm sa rezon akoz mon dan prizon ozordi.” Reflesir, osi, lo sa bann lezot legzanp swivan: Romen 15:30; 1 Tesalonisyen 5:25; 2 Tesalonisyen 3:1; Ebre 13:18.

11. Kan i ti an Ronm, pour ki Epafras ti pe priye?

¹¹ I ti parey osi pour konpanyon Pol an Ronm. “Epafras, ki sorti kot zot, . . . i anvoy son salitasyon, i pe touzour lit pour zot dan son lapriyer.” (Kolosyen 4:12) Sa mo ki’n ganny tradwir “lite” i donn menm lide avek lalit en atlet dan bann ansyen zwe. Eski Epafras ti pe senpleman priy avek santiman pour lasosyasyon bann krwayan dan lemonn antye oubyen menm pour bann vre adorater partou dan Lazi Miner? Pol ti endike ki Epafras ti pe priy spesifikman pour bann an Kolos. Epafras ti konn zot sitiasyon. Nou pa konn zot tou par zot non, nou pa ni konn problenm ki zot ti pe fer fas avek, me annou imazin serten posibilite. Petet zenn Linis ti pe konbat kont lenfliyans bann filozofi popiler sa letan, e i kapab ki Rifis ti bezwen kouraz pour reziste latraksyon son bann ansyen pratik relizyon Zwif. Vi ki i ti annan en mari enkrwayan, eski Persid ti bezwen perseverans ek sazes pour elve son zanfan selon Senyer, e eski Asenkrit, ki ti pe soufer avek en maladi fatal, ti bezwen ankor plis rekonfor? Antouka, Epafras ti konn bann ki ti dan son kongregasyon, e i ti priy pour zot avek santiman parski li ek Pol zot ti tou le de anvi ki sa bann Kretyen devoue i viv en lavi ki Zeova i aprouve.

12. Konman nou ti a kapab vin pli presi dan nou lapriyer personnel?

¹² Eski ou vwar model pour nou swiv—en fason pour ed lezot? Parey nou’n vwar, etan donnen ki i annan plizyer dan lodyans, bann lapriyer piblik dan bann renyon Kretyen i souvan pli zeneral. Me nou bann lapriyer personnel e an fanmiy i kapab pli presi. Byen ki nou kapab demann Bondye pour gid e beni tou bann sirveyan oubyen bann ansyen, eski parfwa nou pa kapab presize? Par egzanp, akoz ou pa priy pour ou sirveyan rezyonal oubyen ou kondikter Letid Liv par mansyonn zot non? Filipyen 2:25-28 ek 1 Timote 5:23 i montre sa lentere personnel ki Pol ti annan pour lasante Timote ek Epafrodit. Eski nou kapab fer parey an montran en tel lentere dan bann ki nou konnen i malad par mansyonn zot non?

13. Ki bann kalite sitiasyon ki apropriye pour nou enkli dan nou bann lapriyer personnel?

¹³ I vre ki nou devret evite enterfer dan zafer personnel lezot, me i apropriye ki nou bann lapriyer i manifeste en vre lentere dan bann ki nou konnen e pran aker zot byennet. (1 Timote 5:13; 1 Pyer 4:15) Petet en frer in perdi son louvraz, e nou pa kapab donn li en lot. Toudmenm, nou kapab mansyonn son non e konsantre lo son difikilte dan nou bann lapriyer personnel. (Psonm 37:25; Proverb 10:3) Eski nou konn en ser selibater ki, apre plizyer lannen, pe kontinyen viv san en mari ek zanfan akoz i’n determinen pour marye “selon Senyer” ? (1 Korentyen 7:39) Dan ou lapriyer personnel, akoz ou pa demann Zeova pour beni li e ed li pour kontinyen reste fidel dan son servis? Konman en lot legzanp, de ansyen in kapab donn konsey en frer ki’n komet en fot. Akoz zot tou le de zot pa mansyonn li dan zot lapriyer personnel detanzaot?

14. Konman ki bann lapriyer presi i relye avek ed lezot?

¹⁴ I egziste plizyer posibilite ki ou kapab enkli dan ou lapriyer bann endividi ki ou konnen i bezwen led Zeova, son konsolasyon, son sazes ek lespri sen, oubyen son fri ki i prodwi. Pour rezon zistans oubyen lezot sirkonstans, ou kapab santi ou limite pour fourni led materyel oubyen direk. Me pa oubliye pour priy pour ou bann frer ek ser. Ou konnen ki zot anvi viv en lavi ki Zeova i aprouve, me zot vreman bezwen led pour fer sa avek persistans. Ou bann lapriyer i en lakle pour ed zot.—Psonm 18:2; 20:1, 2; 34:15; 46:1; 121:1-3.

Travay pour Fortifye Lezot

15. Akoz nou devret enterese avek parti final liv Kolosyen?

¹⁵ Bann lapriyer ardan e presi i pa sel mwayen pour ed lezot, byensir, sirtou bann ki pros e presye pour ou. Liv Kolosyen i fer sa kler. Plizyer spesyalis Labib ti krwar ki apre ki Pol ti’n detay serten lansennyman e donn bann konsey pratik, i ti azout senpleman bann salitasyon personnel. (Kolosyen 4:7-18) Okontrer, parey nou’n deza vwar parti final sa liv i kontyen konsey remarkab e i annan bokou pour aprann lo sa seksyon.

16, 17. Ki nou kapab dir lo sa bann frer ki’n ganny mansyonnen dan Kolosyen 4:10, 11?

¹⁶ Pol ti ekrir: “Aristark, ki dan prizon avek mwan, i anvoy zot son konpliman, ensi ki Mark, kouzen Barnabas. Zot in deza resevwar, rekonmandasyon pour byen resevwar Mark si i pas kot zot. Konpliman i osi sorti kot Zezi, ki osi apel Zistis. I annan zis sa trwa parmi bann Zwif konverti ki travay avek mwan pour Rwayonm Bondye; zot in en gran rekonfor [led fortifyan, NW ] pour mwan.”—Kolosyen 4:10, 11.

¹⁷ La, Pol ti idantifye serten frer ki ti merit en latansyon spesyal. I ti dir ki zot ti parmi bann sirkonsi ki sorti dan lorizin Zwif. Ti annan en kantite Zwif sirkonsi an Ronm, e serten ti aprezan Kretyen. Toudmenm, Pol ti mansyonnen ki sa bann ti vin ed li. I paret ki zot pa ti ezite pour asosye avek bann Kretyen ki pa ti sorti dan lorizin Zwif, e avek plezir zot ti travay ansanm avek Pol pour pres bann non-Zwif.—Romen 11:13; Galat 1:16; 2:11-14.

18. Konman ki Pol ti felisit serten ki ti avek li?

¹⁸ Remark byen parol Pol: “Zot in en [led fortifyan, NW ] pour mwan.” I ti servi en mo Grek ki aparet selman enn fwa dan Labib. Plizyer tradikter i tradwir li “rekonfor.” Sepandan, i annan en lot mo Grek (pa·ra·ka·le’o) ki pli souvan ganny tradwir “rekonfor.” Pol in servi sa mo rekonfor dan lezot landrwa sa menm let me pa dan Kolosyen 4:11.—Matye 5:4; Akt 4:36; 9:31; 2 Korentyen 1:4; Kolosyen 2:2; 4:8. [ Konpar dan Traduction du monde nouveau.]

19, 20. (a) Ki sinifikasyon sa lekspresyon ki Pol ti servi pour dekrir bann frer ki ti ed li an Ronm? (b) Ki bann fason sa bann frer ti’n kapab ed Pol?

¹⁹ Sa bann ki Pol ti nonmen in bezwen fer plis ki rekonfort li verbalman. Sa term Grek ki’n ganny tradwir “led fortifyan” dan Kolosyen 4:11, ti parfwa ganny servi dan bann mannyel medsin pour en latizann ki soulaz en douler. Nou lir dan New Life Version: “Pa zot in en led pour mwan!” Today’s English Version i servi sa fraz: “Zot in en gran led pour mwan.” Ki sa bann Kretyen, ki ti reste pros avek Pol, ti’n kapab fer pour ed li?

²⁰ Pol ti kapab ganny vizite, me ti annan en kantite keksoz ki i pa ti kapab fer, tel ki aste son bann bezwen debaz—manze ek lenz pour liver. Ki mannyer i ti pou ganny bann roulo pour letid oubyen aste bann provizyon pour ekrir? (2 Timote 4:13) Byensir, nou kapab imazin sa bann frer pe ed Pol avek son bann bezwen senp, tel konman aste sa bann keksoz debaz oubyen fer bann pti konmisyon pour li. Petet i ti anvi vwar konman en serten kongregasyon ti ete e batir sa kongregasyon. Vi ki i ti anprizonnen, i pa ti kapab fer li, alor petet sa bann frer ti fer sa bann vizit pour Pol, anmenn mesaz e retourn avek bann rapor. Konman sa ti fortifyan!

21, 22. (a) Akoz bann parol dan Kolosyen 4:11 i devret enteres nou? (b) Ki bann fason ki nou kapab aplik legzanp bann ki ti avek Pol?

²¹ Sa ki Pol ti ekrir konsernan “en led fortifyan” i donn nou en lide konman nou ti a kapab ed lezot. Zot kapab pe viv en lavi ki Bondye i aprouve kot i konsern son bann standar moral, asiste bann renyon Kretyen, e partisip dan travay predikasyon. Pour sa zot merite antann nou bann mo lapresyasyon. Me toudmenm, eski nou ti a kapab fer plis, vin bann “led fortifyan” parey bann ki ti avek Pol?

²² Si ou konn en ser ki’n, avek sazes, pran aker sa prensip dan 1 Korentyen 7:37 [NW ] me ki aprezan mank en fanmiy dan son kote, eski ou ti a kapab enkli li dan serten aktivite fanmiy, petet envit li pour pran en repa oubyen pour asiste bann pti rankont avek zanmi ek fanmiy? Ki ou mazinen lo envit li pour al lasanble oubyen vakans ansanm avek ou fanmiy? Oubyen demann li pour akonpanny ou dan en moman apropriye kan ou pe al fer ou kours magazen. Ou kapab fer parey avek bann ki’n perdi zot konzwen, oubyen bann ki nepli kapab kondwir en loto. Petet ou pou vwar ou ganny anrisir par zot leksperyans oubyen ou pou vwar li itil pour servi zot konnesans lo bann keksoz toulezour tel konman swazir bann fri bon kalite oubyen swazir lenz bann zanfan. (Levitik 19:32; Proverb 16:31) Natirelman, lefe ki sa pou annan se en bon lanmitye. Par konsekan, zot pou santi zot pli lib pour demann ou led si zot bezwen serten medsin farmasi, oubyen lezot keksoz parey. Bann frer ki ti avek Pol ti’n kapab donn bann led pratik e fortifyan, menm parey avek sa ki ou kapab ofer. Sa lepok ensi ki konmela, en benediksyon siplemanter ki sa i anmennen se ki i afermi sa lyen lanmour e fortifye nou determinasyon pour servi Zeova ansanm fidelman.

23. Ki ti a byen sakenn parmi nou i pran letan pour fer?

²³ Nou tou endividyelman nou kapab reflesir lo bann sitiasyon ki ganny mansyonnen dan sa lartik. Zot senpleman bann legzanp, me zot kapab fer nou mazin bann vre sitiasyon kot nou kapab fer plis pour vin “en led fortifyan” pour nou bann frer ek ser. Pwen ki nou oule fer resorti se pa pour imit latitid bann lorganizasyon imaniter. Sa pa ti lobzektif bann frer ki’n ganny mansyonnen dan Kolosyen 4:10, 11. Zot ti bann ‘konpanyon travay pour Rwayonm Bondye.’ Sa lefe fortifyan i relye direkteman avek sa. Fotespere ki i pou leka avek nou osi.

24. Ki rezon nou priy pour lezot e sey fortifye zot?

²⁴ Nou mansyonn lezot dan nou lapriyer personnel e fer zefor pour fortifye zot akoz sa rezon: Nou krwar ki nou bann frer ek ser i anvi “viv en lavi ki Bondye i aprouve.” (Kolosyen 1:10) Sa verite i relye avek en lot keksoz ki Pol ti mansyonnen ler i ti ekrir konsernan lapriyer Epafras osize bann Kolosyen, pour ki zot “konplet e avek en konviksyon ferm dan tou lavolonte Bondye.” (Kolosyen 4:12, NW ) Ki mannyer nou pou kapab personnelman arive fer sa? Annou vwar.

[Not anba lo paz]

Eski Ou’n Port Latansyon?

• Konman nou kapab ofer plis led atraver nou bann lapriyer personnel?

• Dan ki sans serten Kretyen ti bann ‘led fortifyan’ pour Pol?

• Dan ki bann diferan sitiasyon nou kapab vin bann ‘led fortifyan’?

• Ki nou lobzektif kan nou priy pour nou bann frer ek ser e sey fortifye zot?

[Portre lo paz 11]

Eski ou kapab enkli en lot Kretyen dan ou bann aktivite an fanmiy?

[Portre lo paz 11]

Avek lotorizasyon Green Chimney’s Farm