Touzour pare pour amelyore —Fer Progre

PTIT-A-PTI, ou bann fason panse, koze, ek latitid ki ti’n form parti ou personnalite ti konmans sanze, letan ou ti aprann konman pour aplik bann prensip Labib. Laplipar sa bann sanzman ti arive menm avan ki ou ti antre dan Lekol Minister Teokratik. I tre probab ki ozordi ou’n progrese ziska dedye ou lavi avek Zeova. Eski sa i vedir ki aprezan ou kapab arete fer progre? Pa ditou. Ou batenm i senpleman en konmansman.

Disip Timote ti pe deza servi konman en ansyen ler Pol ti dir li pour “pran byen a-ker” konsey ki i ti donn li ek sa privilez pour servis ki ti’n ganny konfye avek li—pour ‘met tou son zefor’ dan sa bann keksoz—ki ‘tou dimoun i a war son progre.’ (1 Tim. 4:12-15) Ki swa ou’n fek konmans swiv laverite oubyen annan bokou leksperyans dan fason ki Kretyen i viv, ou devret enterese pour fer progre.

Dan Efezyen 3:14-19, nou lir ki zapot Pol ti priye ki son bann konpanyon Kretyen pou “kapab konpran larzer, longer, oter e profonder” laverite. Pour atenn sa lobzektif, Zezi ti donn bann don an zonm pour ansennyen, redrese, e batir kongregasyon. Medit regilyerman lo Parol Bondye, ansanm avek gidans delapar bann ansennyan eksperyanse, i kapab ed nou pour “grandi” spirityelman.—Efe. 4:11-15.

Sa progre spirityel i enkli ki “lespri i konpletman sanze.” Sa i enplik etablir en mantalite ki for e ki an armoni avek sa ki pour Bondye ek Kris. E pour nou kapab “vin en dimoun konpletman nouvo,” nou bezwen konstaman ekspoz nou avek zot panse. (Efe. 4:23, 24) Ler ou etidye bann Levanzil, eski ou konsider sa bann resi lo lavi Kris konman en model pour ou swiv? Eski ou esey idantifye bann kalite spesifik ki Zezi ti demontre e apre fer en zefor serye pour imit sa bann kalite dan ou prop lavi?—1 Pyer 2:21.

Bann keksoz ki ou enkli dan ou konversasyon i kapab endike ki kantite progre ki ou’n fer dan sa domenn. Bann ki’n sanz zot personnalite e vin en nouvo dimoun pa angaz dan konversasyon ki dezonnet, lensilt, obsenn, oubyen negatif. Plito, zot parol i itil e “kapab ed lezot pour progrese dan zot lafwa e . . . pour fer dibyen sa ki ekoute.” (Efe. 4:25, 26, 29, 31; 5:3, 4; Zid 16) Sa ki zot dir e lafason ki zot koze swa an prive oubyen dan bann renyon kongregasyon i revele ki laverite pe transform zot lavi.

Si ou nepli “ganny trennen par laroul, e pouse partou par nenport divan lansennyman ki dimoun tronper i fannen,” sa osi i levidans progre. (Efe. 4:14) Par egzanp, konman ki ou reazir, ler lemonn i bonbard ou avek bokou nouvo lide, prensip, oubyen plizyer form divertisman? Eski ou ganny tante pour akord mwens letan anver bann lobligasyon spirityel afen pour pourswiv bann tel keksoz? Si ou fer sa, sa i kapab seryezman retard ou progre spirityel. Pa i bokou pli saz pour servi byen tou lokazyon pour bann aktivite spirityel!—Efe. 5:15, 16.

En lot keksoz ki kapab endik ou progre spirityel i lafason ki ou azir avek lezot dimoun. Eski ou’n aprann pour “ranpli avek lafeksyon . . . , pardonn” ou bann frer ek ser?—Efe. 4:32.

Ou progre pour fer keksoz dan fason ki Zeova i aprouve, i devret evidan swa dan kongregasyon e kot ou lakour. I devret osi evidan dan lekol, dan bann landrwa piblik, e dan ou landrwa travay. (Efe. 5:21–6:9) Si dan sa bann sirkonstans, ou pe demontre bann kalite divin plennman, alor ou progre pe vin evidan.

Zeova in konfye sakenn ant nou avek bann abilite ek talan. I ekspekte nou servi sa bann keksoz pour lentere lezot dan en serten fason ki atraver nou i kapab eksprim son labonte imerite. Konsernan sa zapot Pyer ti ekrir: “Sakenn antre zot, konman en bon ladministrater bann don ki Bondye in donn zot, itiliz sa bann don spesyal ki zot in resevwar pour fer dibyen lezot.” (1 Pyer 4:10) Konman ki ou pe desarz ou responsabilite?

Pyer ti kontinyen: “Sa ki prese, i devre prese transmet Parol Bondye.” (1 Pyer 4:11) Sa verse i met lanfaz lo responsabilite pour koz totalman an armoni avek Parol Bondye, afen ki Bondye i ganny glorifye. Lafason ki sa bann parol i ganny dir i devret osi glorifye Zeova. Sa formasyon ki Lekol Minister Teokratik i fourni i kapab ed ou pour servi ou don dan en tel fason ki ou glorifye Bondye anmenmtan ki ou ed lezot. Avek sa konman ou lobzektif, konman ki ou devret mezir ou progre dan lekol?

Olye ki mazin an term lakantite pwen ki ou’n kouver lo ou form konsey oubyen kalite ekspoze ki ou’n gannyen, reflesir lo konbyen ki sa formasyon in amelyor kalite ou sakrifis louanz. Lekol i prepar nou pour vin pli efektiv dan predikasyon. Alor demann ou lekor: ‘Eski mon vreman prepar sa ki mon pe al dir dan predikasyon? Eski mon’n aprann pour montre lentere personnel dan sa bann ki mon pres avek? Eski mon etablir en baz pour fer retourn vizit par kit en kestyon avek sa dimoun pour diskit lo la prosenn fwa? Si mon pe etidye Labib avek en dimoun, eski mon pe travay pour amelyor kalite mon lansennyman pour tous leker?’

Pa konsider progre senpleman an term privilez servis ki ou’n gannyen. Ou progre i evidan, non pa dan kalite privilez ki ou gannyen, me plito dan sa ki ou fer avek sa privilez. Si ou’n ganny en prezantasyon ki enplik ansenny lezot, demann ou lekor: ‘Eski mon’n vreman servi lar pour ansennyen? Eski mon’n prezant sa lenformasyon dan en tel fason ki’n fer en diferans dan lavi sa bann ki’n antann li?’

Sa lankourazman pour servi ou don i enkli pran linisyativ. Eski ou pran linisyativ pour travay avek lezot dan predikasyon? Eski ou rod bann loportinite pour ed bann manm ou kongregasyon ki nouvo, zenn, oubyen ki annan en dezabilite? Eski ou volonter pour netway Lasal Rwayonm oubyen pour ede dan diferan fason dan bann diferan lasanble? Eski ou kapab fer pionye asistan? Eski ou kapab servi konman en pionye ordiner oubyen ede dan kongregasyon kot i annan en pli gran bezwen? Si ou en frer, eski ou pe aspir pour satisfer bann kalifikasyon Biblik pour asistan ministeryel ek ansyen? Ou leta lespri volonter pour ofer lasistans e aksepte responsabilite i en siny progre.—Pson. 110:3.

Si ou santi ou limite akoz ou mank leksperyans dan fason viv Kretyen, pran kouraz. Parol Bondye i kapab fer “sa ki napa leksperyans saz.” (Pson. 19:7; 119:130; Prov. 1:1-4) Laplikasyon konsey Labib i permet nou benefisye avek lasazes parfe Zeova, ki annan pli gran valer ki okenn keksoz ki nou kapab aprann atraver zis leksperyans. Toudmenm, anmezir ki nou fer progre dan nou servis pour Zeova, nou ganny en leksperyans presye. Konman ki nou kapab servi nou leksperyans pli byen?

Ler en dimoun i pas dan diferan sirkonstans dan lavi, i kapab annan tandans pour rezonnen: ‘Mon’n deza fer fas avek sa sitiasyon avan. Mon konnen ki pour fer.’ Eski sa fason rezonnen i reflekte lasazes? Proverb 3:7 i averti: “Pa vin saz dan ou prop lizye.” Leksperyans i devret sertennman ed nou pour annan en pwenn-vi pli konplet lo bann fakter ki nou bezwen konsidere ler nou pe fer fas avek bann sitiasyon dan lavi. Me si nou pe progrese spirityelman, nou leksperyans i devret osi enfliyans nou lespri ek leker pour reflesir ki nou bezwen benediksyon Zeova pour kapab reisi. Alor, nou progre i evidan, ler nou volonterman tourn ver Zeova pour diriz nou lavi e non pa ler nou fer fas avek bann sitiasyon avek konfyans dan nou prop lekor. I ganny demontre par nou lasirans ki nanryen pa kapab arive san son permisyon e par mentenir en relasyon ranpli avek konfyans ek lafeksyon avek nou Papa seles.

Zapot Pol, kantmenm ki i ti en Kretyen swazir ki ti matir spirityelman, ti rekonnet ki i ti bezwen kontinyen “fer tou pour ganny sa ki par devan” pour atenn bi lavi. (Fili. 3:13-16) Eski ou partaz sa pwenn-vi?

Eski vreman ou’n progrese? Mezir ou progre dapre zistans ki ou’n arive devlop sa nouvo personnalite, ziska ki degre ki ou’n soumet avek souvrennte Zeova, e lo kantite zefor ki ou pe fer pour servi bann don ki ou annan pour onor Zeova. Anmezir ki ou benefisye atraver ledikasyon Lekol Minister Teokratik, bann kalite ki ganny fer resorti dan Parol Bondye i devret progresivman evidan dan ou mannyer koze e dan ou lansennyman. Pa oubliy sa bann laspe ou progre. Wi, pran plezir dan zot, e ou progre pou pli evidan.