Edik ou zanfan depi lanfans

1, 2. Avek ki bann paran i devret rod led pour elve zot zanfan?

APEPRE 3,000 an pase, en papa rekonesan ti eksprim son santiman: “Bann garson i en leritaz sorti kot Zeova.” (Psonm 127:3) Vreman, lazwa pour vin en paran i en rekonpans presye sorti kot Bondye, en rekonpans ki disponib pour laplipar dimoun ki’n marye. Toutfwa, i pa pran bokou letan pour bann ki annan zanfan realize ki menm si zanfan i anmenn lazwa, i osi anmenn bann responsabilite.

² Sirtou ozordi, elve zanfan i en travay difisil. Kantmenm sa, bokou in fer li avek sikse, e sa ekriven Labib ti eksplike konman, an dizan: “Amwen Zeova li menm i konstri sa lakaz, i pa vo lapenn ki son konstrikter i travay dir lo la.” (Psonm 127:1) Pli ou swiv bann lenstriksyon Zeova, pli ou pou vin en pli bon paran. Labib i dir: “Met ou konfyans dan Zeova avek tou ou leker e pa apiy lo ou prop lentelizans.” (Proverb 3:5) Depi ki ou konmans elve ou zanfan ziska ki i kit ou lakour, eski ou pare pour ekout konsey Zeova?

 3. Ki responsabilite bann papa i annan konsernan elve zanfan?

³ Dan bokou lakour partou dan lemonn, bann zonm i panse ki elve zanfan i en travay ki konsern plis bann madanm. I vre, Parol Bondye i montre ki i plis responsabilite en papa pour anmenn manze kot lakour. Toutfwa, i osi montre ki en papa i annan bann responsabilite dan lakour. Labib i dir: “Prepar ou travay an deor, e prepar li pour ou menm dan plantasyon. Apre ou devret osi batir ou lakour.” (Proverb 24:27) Dapre pwennvi Bondye, i responsabilite papa ek manman pour elve zot zanfan.​—Proverb 1:8, 9.

 4. Akoz nou pa devret konsider bann garson pli siperyer ki bann fiy?

⁴ Konman ou konsider ou zanfan? Bann rapor ki sorti dan bann pei Lazi i dir ki “souvannfwa bann paran pa kontan ler zot ganny en pti fiy.” Dan Lanmerik Latin, i ankor egziste sa tandans pour pa kontan bann pti fiy, menm parmi “bann fanmiy pli byen edike.” Me an realite, bann pti fiy pa bann zanfan enferyer. Zakob, en papa ki ti renonmen dan letan ansyen, ti dekrir tou son zanfan, enkli son bann fiy ki i ti annan, konman “bann zanfan ki Bondye in akord [mwan].” (Zenez 33:1-5; 37:35) Pareyman, Zezi ti beni tou “bann zanfan” (fiy ek garson) ki ti ganny anmennen kot li. (Matye 19:13-15) Nou kapab asire ki sa ti reflekte pwennvi Zeova.​—Deterononm 16:14.

 5. Ki en koup i devret pran an konsiderasyon kan zot pe deside ki kantite zanfan zot pou fer?

⁵ Kot ou reste, eski i en koutim pour en madanm fer en kantite zanfan? Kantite zanfan ki en koup marye i annan i zot desizyon personnel. Ki pou arive si paran napa sa mwayen pour donn manze, lenz, ek ledikasyon plizyer zanfan? Definitivman, sa koup i devret konsider sa, kan zot pe deside ki kantite zanfan zot pou fer. Serten koup ki pa kapab sonny tou zot zanfan i donn lezot manm zot fanmiy sa responsabilite pour elve serten zot bann zanfan. Eski sa i en bon keksoz pour fer? Pa vreman. I pa soulaz sa bann paran avek zot lobligasyon anver zot zanfan. Labib i dir: “Si en dimoun i pa port swen son prop parante sirtou bann ki viv dan son lakaz, i’n abandonn lafwa.” (1 Timote 5:8) Bann koup responsab i esey kalkile ki kantite dimoun ‘ki pou viv dan zot lakaz’ afen ki zot kapab pran ‘swen zot prop parante.’ Pour kapab fer sa, eski zot kapab kontrol kantite zanfan ki zot fer? Sa osi i en desizyon personnel. Si bann koup marye i deside pran sa desizyon, se zot osi ki swazir ki kalite metod kontraseptif zot pou servi. “Sakenn i devre anmenn son prop fardo.” (Galat 6:5). Toutfwa, bann metod kontraseptif ki enplik okenn form lavortman i kont bann prensip Labib. Zeova i “sours lavi.” (Psonm 36:9) Alors, detri en lavi apre ki i’n konmanse dan vant son manman, pou montre en gran mank respe pour Zeova e i ekivalan avek en mert.​—Egzod 21:22, 23; Psonm 139:16; Zeremi 1:5.

 6. Kan ki en zanfan i devret konmans ganny edike?

⁶ Proverb 22:6 i dir: “Edik en garson dapre semen ki i devret marse.” Edik bann zanfan i en lot gro responsabilite pour bann paran. Me kan ki en paran i devret konmans edik son zanfan? Byen boner. Zapot Pol ti mansyonnen ki Timote ti’n ganny edike “depi lanfans.” (2 Timote 3:15) Sa mo Grek ki’n ganny servi la i kapab refer avek en pti baba tann oubyen menm ler i ankor dan vant son manman. (Lik 1:41, 44; Akt 7:18-20) Alors, Timote ti ganny edike depi ki i ti ankor tre zenn e sa i byen. Lanfans i sa moman ideal pour konmans edik en zanfan. Menm en pti baba tann i anvi konn keksoz.

 7. (a) Akoz i enportan ki tou le de paran i devlop en relasyon pros avek en pti baba? (b) Ki relasyon ki ti egziste ant Zeova ek son sel Garson?

⁷ En manman i dir: “Kan mon ti vwar mon pti baba pour premye fwa, mon ti tonm anmoure avek li.” Sa i leka avek laplipar manman. Sa latasman merveye ki egziste ant en manman ek en pti baba i grandi anmezir ki zot pas letan ansanm apre nesans. Donn tete i fer sa latasman vin pli for. (Vwar 1 Tesalonisyen 2:7.) I tre enportan ki en manman i kares e koz avek son pti baba akoz sa i ede pour konble bezwen emosyonnel sa baba. (Vwar Izai 66:12.) Me ki sa papa i devret fer? Li osi i devret devlop en relasyon pros avek son nouvo ne. Zeova i en legzanp dan sa domenn. Dan liv Proverb, nou aprann konsernan kalite relasyon ki Zeova i annan avek son sel Garson, kot i dir: “Zeova in fer mwan depi okonmansman menm . . . Mon ti vin sa enn ki i ti sirtou atase avek zour apre zour.” (Proverb 8:22, 30; Zan 1:14) Pareyman, en bon papa i devlop en relasyon pros avek son zanfan dek konman i ne. En papa i dir: “Demontre en kantite lafeksyon. Zanmen en zanfan in deza mor akoz i’n ganny pran dan lebra e ganny anbrase.”

 8. Depi byen boner, ki mannyer paran i kapab devlop lespri zot pti baba?

⁸ Me bann pti baba i bezwen plis ki sa. Dek konman zot ne, zot laservel i pare pour resevwar e gard lenformasyon. Paran i sa sours prensipal pour fourni lenformasyon sa zanfan. Pran langaz konman en legzanp. Bann serser i dir ki kapasite en zanfan pour aprann koze e ekrir i “kapab relye etrwatman avek lafason ki son paran i azir anver li byen boner dan son lavi.” Depi ki ou zanfan i ankor pti baba ou kapab koze e lir avek li. Byento i pou anvi kopye ou, e pa bokou letan apre ou pou bezwen montre li lir. Petet, i pou kapab lir avan i al lekol. Sa pou sirtou itil si ou viv dan en pei kot napa bokou ansennyan e bann laklas i tro plen.

 9. Ki lobzektif pli enportan ki bann paran i bezwen rapel?

⁹ Preokipasyon prensipal bann paran Kretyen se pour okip bezwen spirityel zot zanfan. (Vwar Deterononm 8:3.) Avek ki lobzektif? Se pour ed zot zanfan devlop en personnalite parey pour Kris, an realite pour “vin en dimoun konpletman nouvo.” (Efezyen 4:24) Pour zot kapab fer sa, zot bezwen servi bann bon materyo ek metod konstriksyon.

10. Ki bann kalite ki zanfan i bezwen devlope?

¹⁰ Kalite en konstriksyon i depan bokou lo kalite materyo ki’n ganny servi pour fer sa konstriksyon. Zapot Pol ti dir ki pli bon materyo konstriksyon pour bann personnalite Kretyen i ‘lor, larzan, avek pyer presye.’ (1 Korentyen 3:10-12) Zot reprezant bann kalite tel parey lafwa, lasazes, bon zizman, fidelite, respe, ek profon lapresyasyon pour Zeova ek son bann lalwa. (Psonm 19:7-11; Proverb 2:1-6; 3:13, 14) Ki mannyer paran i kapab ed zot zanfan depi tre zenn pour devlop sa bann kalite? Par swiv en metod ki ti ganny donnen byen lontan.

11. Ki mannyer bann paran Izraelit ti ed zot zanfan pour devlop en personnalite ki fer plezir Bondye?

¹¹ En pe letan avan ki nasyon Izrael ti antre dan Later Promiz, Zeova ti dir bann paran Izraelit: “Sa bann parol ki mon pe demann ou pour obzerve ozordi, i bezwen dan ou leker; Ou bezwen fer zot antre dan ou garson e koz lo la ler ou pe asize dan ou lakaz e ler ou pe marse lo semen e ler ou pe alonze e ler ou leve.” (Deterononm 6:6, 7) Wi, paran i bezwen vin legzanp, zanmi. I bezwen kominik byen e vin en ansennyan zot zanfan.

12. Akoz i neseser ki bann paran i demontre en bon legzanp?

¹² Vin en legzanp. Premyerman, Zeova ti dir: “Sa bann parol . . . i bezwen dan ou leker.” Apre, i ti azoute: “Ou bezwen fer zot antre dan ou garson.” Alors bann kalite ki fer plezir Bondye i devret premyerman dan leker sa paran. Sa paran i devret kontan e viv an akor avek laverite. Se apre sa ki i kapab tous leker son zanfan. (Proverb 20:7) Akoz? Parski bann zanfan i ganny enfliyanse plis avek sa ki zot vwar olye avek sa ki zot tande.​—Lik 6:40; 1 Korentyen 11:1.

13. An rapor avek donn latansyon zot zanfan, konman bann paran Kretyen i kapab imit legzanp Zezi?

¹³ Vin en zanmi. Zeova ti dir bann paran an Izrael: ‘Koz avek ou zanfan ler ou pe asize dan ou lakaz e ler ou pe marse lo semen.’ Kantmenm zot tre okipe, bann paran i devret pas letan avek zot zanfan. I ti evidan ki Zezi ti vwar li neseser pour pas en pe letan avek bann zanfan. Pandan bann dernyen zour son minister, “dimoun ti pe anmenn bann pti zanfan kot Zezi pour ki i tous zot.” Ki mannyer Zezi ti reazir? “I ti pran bann zanfan dan son lebra, enpoz lanmen lo zot e beni zot.” (Mark 10:13, 16) Zis mazinen. Letan pour Zezi ganny met amor ti pe apros byen vit. Kantmenm sa, i ti donn letan ek latansyon sa bann zanfan. Pa sa i en bon leson pour nou!

14. Akoz i itil pour bann paran pas letan avek zot zanfan?

¹⁴ Kominik byen. Si ou pas letan avek ou zanfan, sa pou ed ou kominik avek li. Pli ou kominike, pli ou pou rekonnet konman son personnalite pe devlope. Me pa oubliye, kominike i enplik plis ki zis koze. En manman an Brezil ti dir: “Mon ti bezwen devlop abilite pour ekoute, sirtou pour ekout avek mon leker.” Son pasyans ti raport fri kan son garson ti konmans partaz son bann santiman avek li.

15. Ki paran i bezwen gard antet konsernan moman detant?

¹⁵ Bann zanfan i bezwen “en letan pour riye . . . e en letan pour sotaye,” setadir en letan detant. (Eklezyast 3:1, 4; Zekarya 8:5) Ler bann paran ek zanfan i rezwir bann moman detant ansanm, sa i anmenn bokou byenfe. I tre malere ki dan bokou lakour, moman detant i vedir get televizyon. Kantmenm serten progranm televizyon i kapab anmizan, bokou i detri bon valer moral. Deplis, get televizyon i tant pour anpes kominikasyon dan en fanmiy. Alors, akoz ou pa fer bann keksoz avek ou zanfan pour detann zot? Sante, zwe bann zwe, pas letan avek bann zanmi, vizit bann landrwa enteresan. Bann tel aktivite i ankouraz kominikasyon.

16. Ki bann paran i devret ansenny zot zanfan lo Zeova, e ki mannyer zot devret fer li?

¹⁶ Vin en ansennyan. Zeova ti dir: “Ou bezwen fer antre [sa bann parol] dan ou garson.” Lezot verse dan sa sapit i montre ou ki pour ansennyen e ki mannyer pour ansenny zot. Premyerman, “ou devret kontan Zeova ou Bondye avek tou ou leker, avek tou ou lanm, e avek tou ou lafors.” (Deterononm 6:5) Apre sa, “sa bann parol . . . ou bezwen fer antre” dan ou zanfan. Enstri ou zanfan avek lentansyon pour ed li devlop vre lanmour pour Zeova ek son bann lalwa. (Vwar Ebre 8:10.) “Fer antre” laverite dan en zanfan i enplik ansennyen par repete. Annefe, Zeova i dir ou ki ou devret koz lo li regilyerman avek ou zanfan. Parski sa i pli bon fason pour ed ou zanfan devlop en personnalite ki fer li plezir. Sa i enkli fer en letid lo Labib regilye avek zot.

17. Ki bann paran i bezwen devlope dan zot zanfan? Akoz?

¹⁷ Laplipar paran i konnen ki fer antre lenformasyon dan leker en zanfan i pa fasil. Zapot Pyer ti enplor bann konpanyon Kretyen: “Parey bann zanfan nouvo-ne, form en dezir pour dile pir parol Bondye.” (1 Pyer 2:2, NW) Sa lekspresyon “form en dezir” i sizere ki bokou dimoun pa natirelman annan sa lanvi pour pran nouritir spirityel. Alor bann paran i devret rod fason pour devlop sa dezir dan zot zanfan.

18. Ki serten metod lansennyman Zezi ki bann paran i ganny ankouraze pour imite?

¹⁸ Zezi ti tous leker bann ki ti ekout li par servi bann legzanp. (Mark 13:34; Lik 10:29-37) Sa metod lansennyman i sirtou efikas avek bann zanfan. Servi bann zistwar enteresan e vivan, parey sa bann dan Mon Liv Zistwar Labiba pour ansenny bann prensip Labib. Enplik bann zanfan. Les zot servi zot prop limazinasyon pour desin e akt bann levennman dan Labib. Zezi ti osi servi bann kestyon. (Matye 17:24-27) Imit son metod pandan ou letid lo Labib an fanmiy. Olye senpleman mansyonn en lalwa Bondye, demann bann kestyon parey, Akoz Zeova in donn nou sa lalwa? Ki pou arive si nou obeir sa lalwa? Ki pou arive si nou pa obeir sa lalwa? Bann tel kestyon i ed en zanfan pour rezonnen e vwar ki bann lalwa Bondye i itil e bon.​—Deterononm 10:13.

19. Si bann paran i swiv prensip Labib an rapor avek zot zanfan, ki byenfe sa bann zanfan pou gannyen?

¹⁹ Par vin en legzanp, en zanmi, en dimoun ki kominik byen, e en ansennyan, ou kapab ed ou zanfan byen boner dan son lavi pour batir en relasyon personnel avek Zeova. Sa relasyon pou ankouraz ou zanfan pour trouv lazwa konman en Kretyen. I pou fer tou sa ki i kapab pour gard son lafwa menm ler i rankontre lenfliyans ek tantasyon. Toultan ed li pour apresye sa relasyon presye.​—Proverb 27:11.

20. Kisisa disiplin, e ki mannyer i devret ganny donnen?

²⁰ Disiplin i en formasyon ki koriz lespri ek leker. Bann zanfan i bezwen li toultan. Pol ti konsey bann papa pour kontinyen “elve zot [zanfan] dan en ledikasyon ek lenstriksyon Senyer.” (Efezyen 6:4) Zis parey Zeova i fer, bann paran i devret disiplin zot zanfan avek lanmour. (Ebre 12:4-11) Disiplin ki baze lo lanmour i kapab ganny donnen par rezonn avek sa zanfan. Se pour sa ki nou ganny demande pour “ekout disiplin.” (Proverb 8:33) Ki mannyer zanfan i devret ganny disiplinen?

21. Ki prensip bann paran i devret gard antet ler zot pe disiplin zot zanfan?

²¹ Serten paran i panse ki disiplin zot zanfan i senpleman enplik koz avek zot dan en ton menasan, reprimann zot, oubyen menm ensilte zot. Me lo sa menm size, Pol ti donn sa lavertisman: “Zot, bann papa, pa eksit lakoler zot zanfan.” (Efezyen 6:4) Tou Kretyen i ganny ankouraze pour ‘byen avek tou dimoun . . . ansenny avek douser bann ki opoz zot.’ (2 Timote 2:24, 25) Kantmenm zot rekonnet ki parler zot bezwen ferm, bann paran Kretyen i esey gard sa parol antet ler zot pe disiplin zot zanfan. Me parfwa, rezonn avek zot i pa sifi, e serten kalite pinisyon i kapab neseser.​—Proverb 22:15.

22. Si en zanfan i bezwen ganny pini, ki i devret ganny ede pour konpran?

²² Diferan zanfan i bezwen diferan kalite disiplin. Serten pa “ganny korize zis avek parol.” Pour zot, en pti pinisyon pour zot dezobeisans detanzaot i kapab sov zot lavi. (Proverb 17:10; 23:13, 14; 29:19) Parkont, en zanfan i devret konpran akoz i pe ganny pini. “Baton ek reprimann, se sanmenm ki donn lasazes.” (Proverb 29:15; Zob 6:24) Deplis, pinisyon i annan limit. Zeova ti dir avek son pep: “Fodre ki mon koriz ou dan en degre apropriye.” (Zeremi 46:28b) Labib pa aprouv fwet en zanfan avek lakoler oubyen bat li severman, ziska ki bles e fer dimal sa zanfan.​—Proverb 16:32.

23. Ki en zanfan i devret kapab rekonnet ler son paran i pini li?

²³ Kan Zeova ti averti son pep ki i pou disiplin zot, i ti premyerman dir: “Pa bezwen per . . . parski mon avek ou.” (Zeremi 46:28a) Pareyman, disiplin ki paran i donnen, dan nenport ki fason apropriye, pa devret zanmen fer en zanfan santi li ganny rezete. (Kolosyen 3:21) Plito, sa zanfan i devret konpran ki i’n ganny disiplinen akoz sa paran i ‘avek li,’ dan son kote.

24, 25. Kont ki vilen menas ki bann zanfan i bezwen ganny proteze denozour?

²⁴ Bokou adilt i vwar zot lanfans konman en peryod letan ki ti gou. Zot rapel ki zot ti santi zot an sekirite. Zot ti annan konfyans ki zot paran ti pou pran swen avek zot dan nenport kwa ki ti kapab arive. Bann paran i anvi ki zot zanfan i annan menm santiman. Me dan sa lemonn degradan ki nou pe viv ladan, i pli difisil pour protez bann zanfan ki avan.

²⁵ Abiz bann zanfan seksyelman i en vilen menas ki’n ogmante dan sa bann dernyen lannen. An Malezi, rapor lo labi bann zanfan in ogmant kat fwa plis dan en peryod dis an. An Lalmanny anviron 300,000 zanfan i ganny abize seksyelman sak lannen, tandis ki dan en pei Sid Lanmerik, dapre en letid, en total 9,000,000 in ganny estimen! Malerezman, lamazorite sa bann zanfan i ganny abize kot zot, par bann dimoun ki zot konnen e annan konfyans ladan. Me bann zanfan i devret vwar zot paran konman zot meyer proteksyon. Ki mannyer bann paran i kapab protez zot?

26. Nonm serten fason ki bann zanfan i kapab ganny proteze. Konman konnesans i kapab protez en zanfan?

²⁶ Leksperyans i montre ki bann dimoun ki abiz bann zanfan i target sirtou bann ki pa konn preski nanryen lo sèks. Alor, en fason pour protez sa zanfan se par edik li, menm ler i ankor tre zenn. Konnesans i kapab protez li kont “move semen, kont sa zonm ki koz bann keksoz visye.” (Proverb 2:10-12) Ki konnesans? Konnesans lo prensip Labib, sa ki byen ek sa ki mal moralman. Fer zot konnen osi ki serten adilt i fer bann keksoz mal e alor kan en dimoun i demann zot pour fer bann keksoz ki pa apropriye, zot pa devret obeir. (Vwar Danyel 1:4, 8; 3:16-18.) Pa dir li sa bann keksoz zis pour en serten letan. Pour laplipar manrmay, en keksoz i bezwen ganny repete plizyer fwa avan ki zot rapel li byen. Anmezir ki zanfan i grandi, en papa pou respekte lekor son fiy, e en manman osi i devret fer parey anver son garson. Sa pou fer en zanfan konpran kwa ki byen. Byensir, en pli bon proteksyon kont labi i lafason ki ou konman paran ou vey ou zanfan.

27, 28. Lekel ki pli gran Sours led ler bann paran i fer fas avek difikilte pour elve en zanfan?

²⁷ Vreman, pour edik en zanfan depi lanfans i pa en keksoz fasil, me bann paran Kretyen pa fer fas avek sa difikilte zot tousel. Dan letan bann Ziz, kan en zonm ki ti apel Manoa ti aprann ki i pe al vin en papa, i ti demann Zeova son gidans pour li elve son zanfan. Zeova ti reponn son lapriyer.​—Ziz 13:8, 12, 24.

²⁸ Pareyman ozordi, anmezir ki bann paran Kretyen i elve zot zanfan, zot osi zot kapab koz avek Zeova dan lapriyer. Vin en bon paran i en travay dir, me i annan bann gran rekonpans. En koup Kretyen an Awai i dir: “Ou annan 12 an pour edik ou zanfan avan ki i vin adolesan, ki en peryod letan kritik. Me si ou’n travay dir pour aplik prensip Labib, sa i vin en letan pour rekolte lazwa ek lape ler zot deside pour zot servi Zeova avek tou zot leker.” (Proverb 23:15, 16) Ler ou zanfan i fer sa desizyon, ou osi ou pou santi ou pouse pour dir: “Bann garson [ek bann fiy] i en leritaz sorti kot Zeova.”