Prezantasyon ki motive

BANN ansyen dan kongregasyon i devret kapab “motive par lansennyman ki saliter.” (Tit 1:9, NW) Parler sa i bezwen ganny fer ler pe fer fas avek bann sitiasyon tre difisil. I enportan pour donn konsey ki an armoni avek gidans Labib. Alor, bann ansyen i devret port latansyon lo sa konsey: “Kontinyen fer zefor . . . pour motive.” (1 Tim. 4:13, NW) Kantmenm sa sapit in ganny prepare prensipalman pour bann ansyen oubyen pour bann ki pe aspir pour sa privilez, i annan letan kot paran i devret motiv zot zanfan oubyen sa bann ki pe kondwir bann letid Labib i bezwen motiv zot etidyan Labib. Dan bann tel ka, zot kapab aplik sa bann konsey.

Kan ki ler pour motive. Pour determinen kan ki neseser pour motive, i bon pour egzamin bann sitiasyon ki ganny rikorde dan Labib kot ti annan sa nesesite pour motiv lezot. Zapot Pyer ti motiv bann ansyen pour port latansyon lo zot responsabilite konman bann berze troupo Bondye. (1 Pyer 5:1, 2) Pol ti konsey Tit pour motiv bann zenn zan pour “byen kontrol zot lekor.” (Tit 2:6) Pol ti ankouraz bann konpanyon Kretyen pour “met zot byen dakor ansanm” e pour evit bann ki rod pour fer divizyon parmi bann frer. (1 Kor. 1:10; Rom. 16:17; Fili. 4:2) Kantmenm Pol ti felisit bann manm dan kongregasyon an Tesalonik pour bann bon keksoz ki zot ti pe fer, i ti motiv zot pour aplik lenstriksyon ki zot ti’n resevwar plis ankor. (1 Tesa. 4:1, 10) Pyer ti sipliy bann konpanyon Kretyen pour “gard zot kont bann dezir natir imen.” (1 Pyer 2:11) Zid ti motiv son bann frer pour “lite enn fwa pour tou, pour lafwa” akoz lenfliyans bann dimoun mesan ki ti viv en lavi imoral. (Zid 3, 4) Bann Kretyen an zeneral ti ganny ankouraze pour motiv kanmarad pour ki personn pa ganny tronpe par pouvwar tronper pese. (Ebr. 3:13) Pyer ti motiv bann Zwif ki pa ti ankor met lafwa dan Kris pour: “aksepte delivrans e separ zot avek sa zenerasyon pouri.”—Akt 2:40.

Ki bann kalite ki neseser pour ou kapab motiv lezot dan bann tel sitiasyon? Konman ki sa enn ki pe motive i kapab fer son lapel paret enportan me san vin dominer oubyen brit?

“O Non Lanmour.” Si nou pa motiv lezot “o non lanmour,” zot kapab santi ki nou parol i paret sever. (Filem. 9) I vre, ler aksyon imedya i neseser, prezantasyon sa orater i devret fer vwar ki sa sitiasyon i irzan. Koz avek en lavwa tro fen e dou i kapab paret ki ou pe fer lekskiz pour zot latitid. Anmenmtan, sa lapel i devret ganny fer avek senserite ek konpasyon. En lapel ki ranpli avek lanmour pou tre probab motiv sa lodyans. Ler i ti pe koz pour li menm e pour son bann konpanyon, Pol ti dir bann Tesalonisyen: “Zot konnen ki nou ti ansenny zot, ankouraz zot konman en papa avek son bann zanfan.” (1 Tesa. 2:11) Sa bann sirveyan Kretyen ti motiv bann frer avek lanmour. Eksprim lenkyetid ki ou vreman santi pour sa bann ki ekout ou.

Servi en bon zizman ler ou koze. Pa ofans sa bann ki ou pe esey motive pour azir. Anmenmtan, pa ezite pour dir ou lodyans “tou konsey Bondye.” (Akt 20:27, NW) Sa bann ki annan leker senser pa pou ofanse oubyen kontan ou mwens parski ou’n zantiman ankouraz zot pour fer sa ki byen.—Pson. 141:5.

Souvan, i fer plis dibyen pour felisit lezot senserman e dan en fason spesifik avan ki ou motiv zot. Mazin bann bon keksoz ki ou bann frer ek ser pe fer—bann keksoz ki Zeova i sirman byen apresye: lafwa manifeste dan zot travay, lanmour ki pous zot pour fer zefor entans, e zot landirans ler zot fer fas avek bann sitiasyon ki vin en leprev pour zot. (1 Tesa. 1:2-8; 2 Tesa. 1:3-5) Sa pou ed ou bann frer ek ser santi ki zot ganny apresye e ki lezot i konpran zot, e sa pou fer zot pare pour aksepte sa lapel ki swiv apre.

“Avek bokou pasyans.” Ou bezwen motiv avek “pasyans.” (2 Tim. 4:2) Ki sa i enplike? Pasyans i enkli andir bann ditor oubyen provokasyon. En dimoun ki annan pasyans i mentenir sa lespwar ki sa bann ki ekout li pou aplik sa ki i dir. Ler ou motiv avek sa leta lespri sa pou anpes sa bann ki ekout ou mazinen ki ou pe pans an mal lo zot. Sa konfyans ki ou demontre ki ou bann frer ek ser i anvi fer zot mye pour servi Zeova, sa pou donn zot ankor plis lanvi pour fer sa ki byen.—Ebr. 6:9.

‘Par ansenny sa ki saliter.’ Konman en ansyen i kapab “motiv par lansennyman ki saliter”? Par “reste ferm dan sa mesaz sir.” (Tit 1:9) Olye ki ou eksprim ou lopinyon personnel, fer Parol Bondye lafors ou lapel. Les Labib ed ou konnen kwa ki neseser pour dir. Mansyonn bann benefis pour aplik sa ki Labib i dir lo sa topik ki ou pe trete. Mazin byen bann konsekans—ki kapab arive konmela ouswa plitar—pour pa konform avek Parol Bondye, e servi zot pour konvenk ou lodyans lo sa nesesite pour pran aksyon apropriye.

Fer sir ki ou klerman eksplik ou lodyans sa ki zot devret fer e konman zot devret fer li. Fer kler ki ou rezonnman i solidman baze lo Labib. Si sa verse i permet serten liberte dan okenn desizyon pour fer, rezim ziska ki distans sa liberte i ale. Apre, dan ou konklizyon, fer en lapel final ki pou fortifye determinasyon sa bann ki ekoute pour met an pratik.

“Koz avek bokou lasirans.” Pour motiv lezot dan en fason efikas, en dimoun i devret “koz avek bokou lasirans lo lafwa.” (1 Tim. 3:13) Kwa ki permet en dimoun pour koz avek lasirans? Lefe ki son bon ‘legzanp an kondwit’ i armoniz avek sa ki i pe motiv son bann frer pour fer. (Tit 2:6, 7; 1 Pyer 5:3) Kot sa i leka, sa bann ki pe ganny ankouraze pour met an pratik pou realize ki sa enn ki pe motiv zot pa pe ekspekte zot fer sa ki li menm pa pe fer. Zot pou vwar ki zot kapab imit son lafwa zis parey li pe esey imit Kris.—1 Kor. 11:1; Fili. 3:17.

Ler sa ki nou dir pour motiv lezot i baze lo Parol Bondye e i ganny prezante avek lanmour sa i kapab akonpli bokou dibyen. Sa bann ki ganny konfye avek responsabilite pour motiv lezot zot devret fer tou zot zefor pour fer li byen.—Rom. 12:8.