Annou rode konman pour ankouraz kanmarad

“Annou rode konman pous kanmarad pour annan lanmour e fer sa ki byen.”​—EBR. 10:24.

KI OU POU REPONN?

Ki savedir “rode konman pous kanmarad”?

Ki mannyer nou kapab “pous kanmarad pour annan lanmour e fer sa ki byen”?

Ki mannyer nou kapab ankouraz kanmarad?

1, 2. Kwa ki ti ed 230 Temwen Zeova pour sirviv en lamars a lafen Dezyenm Lager Mondyal?

KAN sistenm Nazi ti tonbe a lafen Dezyenm Lager Mondyal, en lord ti ganny donnen pour touy plizyer milye dimoun ki ti ankor dan bann kan konsantrasyon. Dapre sa plan, bann prizonnyen Sachsenhausen ti pou ganny evakye ziska kot por kot zot ti pou anbark dan bann bato e apre sa bann bato ti pou ganny koule dan kannal. Sa plan ti pli tar ganny apele the death marches.

² Sa tranntrwa mil parmi sa bann prizonnyen ki ti dan kan konsantrasyon Sachsenhausen ti pou bezwen mars 250 kilomet ziska Lübeck, en lavil Lalmanny kot i ti annan en por. Parmi sa group prizonnyen, i ti annan 230 Temwen Zeova sorti dan sis pei. Zot tou zot ti tou fay fay akoz mankman manze ek maladi. Ki mannyer nou bann frer ek ser ti reisi sirviv sa lamars? Enn parmi zot ti dir: “Nou ti kontinyelman ankouraz kanmarad pour kontinyen marse.” Zot ti osi ganny “sa pisans ki napa son parey” avek Bondye, e zot lanmour pour kanmarad ti ed zot sirviv sa martir.​—2 Kor. 4:7.

 3. Akoz nou bezwen ankouraz kanmarad?

³ Ozordi, nou pa pe fer sa kalite lamars, me nou pe fer fas avek en kantite difikilte. Apre ki Rwayonm Bondye ti ganny etablir an 1914, Satan ti ganny pouse dan lesyel e ganny anvoye dan zalantour later. I annan en “gran lakoler, akoz i konnen ki i reste li ankor zis en pti pe letan.” (Rev. 12:7-9, 12) Anmezir Armagedon i aprose, Satan pe servi bann leprev ek presyon pour afeblir nou spirityalite. An plis ki sa, i annan bann presyon dan lavi tou le zour. (Zob 14:1; Ekle. 2:23) Par ler, move lefe nou bann difikilte i kapab epwiz nou ziska en degre ki nenport lafors emosyonnel ouswa spirityel ki nou annan, i pa sifi pour ed nou fer fas avek dekourazman. Annou egzamin legzanp en frer ki pour plizyer lannen in ed en kantite dimoun spirityelman. Diran bann lannen ki’n pase, zot de son madanm ti ganny bann problenm lasante e sa ti fer li dekouraze. Parey sa frer, nou tou nou bezwen “sa pisans ki napa son parey” avek Zeova ensi ki lankourazman avek nou bann frer ek ser.

 4. Si nou anvi ankouraz lezot, ki konsey zapot Pol nou devret pran aker?

⁴ Si nou anvi vin en lankourazman pour lezot, nou devret pran aker sa konsey ki zapot Pol ti donn bann Kretyen Ebre. I ti dir: “Annou rode konman pous kanmarad pour annan lanmour e fer sa ki byen. Pa abandonn zot lasanble parey labitid serten parmi zot, me ankouraz kanmarad sirtou ki la sa Zour Senyer pe aprose.” (Ebr. 10:24, 25) Ki mannyer nou kapab aplik sa konsey dan sa zoli parol?

“RODE KONMAN POUS KANMARAD”

 5. Ki savedir “rode konman pous kanmarad” e ki zefor sa i enplike?

⁵ Sa lekspresyon ki’n ganny tradwir “rode konman pous kanmarad” i vedir “pran an konsiderasyon bezwen lezot e mazin zot.” Eski nou pe mazin bezwen lezot si nou zis dir zot en senp pti bonzour kot Lasal Rwayonm e koz avek zot zis lo bann size ki pa sitan enportan? Pa vreman. Sirman nou ti pou anvi ‘okip nou avek nou prop zafer,’ olye “endiskre” oubyen mel dan zafer nou kanmarad. (1 Tesa. 4:11; 1 Tim. 5:13) Kantmenm sa, si nou anvi ankouraz nou bann frer ek ser, nou vreman bezwen aprann konn zot, zot sityasyon, zot kalite, spirityalite, pwen for ek pwen feb. Zot devret kapab konsider nou konman en zanmi ouswa santi nou lanmour pour zot. Pour arive fer sa, i neseser ki nou pas letan avek zot, pa zis kan zot dan problenm e dekouraze, me dan lezot moman osi.​—Rom. 12:13.

 6. Kwa ki pou ed en ansyen “rode konman” pour pran swen avek troupo Bondye?

⁶ Bann ansyen dan kongregasyon i ganny ankouraze pour “pran byen swen troupo Bondye ki’n ganny konfye avek zot konman berze,” alor, zot devret fer li volonterman e avek devouman. (1 Pyer 5:1-3) Ki mannyer zot pou kapab fer sa, si zot pa konn bann mouton ki zot pe pran swen avek? (Lir Proverb 27:23.a) Si bann ansyen i pare pour ed bann frer ek ser e kontan pour pas letan avek zot, sa bann frer ek ser pou sirman pare pour demann zot led kan zot bezwen. Bann frer ek ser pou osi santi zot pouse pour eksprim zot santiman ek konsern, e sa pou permet bann ansyen “rode konman” pour ed sa bann mouton ki zot pe pran swen avek e donn zot sa led neseser.

 7. Ki mannyer nou devret konsider en “parol sovaz” ki sa bann ki dekouraze i dir?

⁷ Kan i ti pe adres kongregasyon Tesalonik, Pol ti dir: “Ed bann ki feb.” (Lir 1 Tesalonisyen 5:14.b) Dan en sans, “bann ki dan depresyon” ek bann ki dekouraze i feb. Proverb 24:10 i dir: “Eski ou’n montre ou dekouraze dan letan ladetres? Ou lafors pou ptigin.” En dimoun ki vreman dekouraze i kapab dir en “parol sovaz.” (Zob 6:2, 3) Me, kan nou pe “rode konman” pour ed zot, nou bezwen gard antet ki sa ki zot dir pa neseserman pe reflekte sa ki zot vreman santi. Rachelle i konpran sa tre byen akoz son manman ti tonm dan en gran depresyon. Rachelle i dir: “Souvan Manmi pou dir bann parol blesan. Laplipar sa bann moman, mon ti rapel mon lekor ki kalite dimoun Manmi i vreman ete. I santimantal, dous e zenere. Mon ti aprann ki dimoun ki dan depresyon i dir bokou keksoz ki zot pa ti pou anvi dir. Rann mal pour mal i sa keksoz pli pir ki en dimoun i kapab fer.” Proverb 19:11 i dir: “En zonm ki annan bon zizman pou tarde pour li ankoler, e i en zoli keksoz lo son par pour les pase lofans.”

 8. Anver lekel nou devret demontre nou lanmour e akoz?

⁸ Ki mannyer nou kapab “rode konman” pour ed en dimoun ki ankor santi li dekouraze akoz laont ouswa dezespwar pour en fot ki i’n fer dan lepase, menm si i’n pran bann pa pour koriz sa fot? An rapor avek en peser Korent ki ti repantir, Pol ti ekrir: “Zot devre plito pardonn li e ankouraz li pangar i ava tro ganny akable e tonm dan dezespwar. Mon konsey zot alor, montre li ki zot kontan li.” (2 Kor. 2:7, 8) Nou pa kapab zis prezimen ki en dimoun i konpran nou lanmour ek konsern pour li. I bezwen vwar li dan nou latitid ek aksyon.

“POUS KANMARAD POUR ANNAN LANMOUR E FER SA KI BYEN”

 9. Ki savedir “pous kanmarad pour annan lanmour e fer sa ki byen”?

⁹ Pol ti ekrir: “Annou rode konman pous kanmarad pour annan lanmour e fer sa ki byen.” Nou bezwen motiv nou bann frer ek ser pour demontre lanmour e fer bann bon travay. Ler en dife i pros pour tennyen, nou bezwen azout dibwa e evante. (2 Tim. 1:6, NW) Dan sa menm fason, avek lanmour, nou pous nou bann frer ek ser pour demontre lanmour pour Bondye ek nou prosen. Felisitasyon apropriye i vreman enportan pour ankouraz lezot pour fer sa ki byen.

10, 11. (a) Lekel parmi nou ki bezwen ganny felisite? (b) Donn legzanp pour montre ki mannyer felisitasyon i kapab ed ‘en dimoun ki’n fer en keksoz mal.’

¹⁰ Nou tou nou bezwen ganny felisite, ki swa nou dekouraze ouswa non. En ansyen ti ekrir: “Zanmen mon papa in deza dir ki mon’n fer en keksoz byen. Alor, mon’n grandi avek en mank konfyans dan mon lekor. . . . Menm si la mon annan 50 an, mon vreman apresye ki mon bann zanmi i dir mwan ki mon pe fer en bon travay konman en ansyen. . . . Mon prop leksperyans in montre mwan ki i vreman enportan pour ankouraz lezot e mon fer tou sa ki mon kapab pour felisit lezot.” Felisitasyon i kapab ankouraz tou dimoun, ki swa pionye, bann aze ek tou bann ki dekouraze.​—Rom. 12:10.

¹¹ Kan sa bann ki ‘posed Lespri Bondye i redres en dimoun’ ki’n fer en keksoz mal, en bon konsey ek felisitasyon apropriye i kapab motiv sa enn ki’n fer sa ki mal pour retourn lo sa bon semen pour fer sa ki byen. (Gal. 6:1) Sanmenm ki ti arive avek Miriam. I ekrir: “Mon ti pas dan en moman tromatizan dan mon lavi kan serten mon bann zanmi pros ti kit laverite, e an menm tan, mon papa ti pe soufer avek en lemorazi dan son laservel. Mon ti tonm dan en gran depresyon. Pour esey sirmont sa depresyon mon ti konmans frekant en zonm ki pa Temwen.” Sa ti fer li santi ki i pa ti merit lanmour Zeova e alor i ti mazinen pour kit laverite. Kan en ansyen ti fer li rapel son fidelite dan servis dan lepase, i ti emosyonnel. I ti donn sa bann ansyen loportinite pour reasir li lanmour Zeova. An retour, son lanmour ti ganny renouvle. I ti kite avek sa zonm e i ti kontinyen servi Zeova.

12. Kwa ki kapab ganny dir konsernan servi lanbarasman, kritik ouswa remark negatif pour motiv lezot?

¹² Anbaras en dimoun par konpar li avek lezot, kritik li akoz i pa pe swiv nou bann lareg ouswa fer li santi li koupab ki i pa kapab fer plis i kapab pous sa dimoun pour repran son bann aktivite spirityel, me sa i kapab zis tanporer. De lot kote, felisit en konpanyon Kretyen e esey fer li rapel son lanmour pour Bondye i kapab annan en lefe pli pozitif e dirab.​—Lir Filipyen 2:1-4.

“ANKOURAZ KANMARAD”

13. Ankouraz lezot i enplik kwa? (Vwar portre lo paz 18.)

¹³ Nou bezwen “ankouraz kanmarad sirtou ki la sa Zour Senyer pe aprose.” Ankouraz kanmarad i enplik motiv zot pour kontinyen progrese dan servis Bondye. Zis parey pous kanmarad pour annan lanmour e fer sa ki byen i kapab ganny konpare avek ler en dimoun i vant en dife ki pros pour tennyen, ankouraz lezot i parey avek met petrol dan dife pour permet li kontinyen brile ouswa ogmant son lentansite. Ankouraz lezot i vedir fortifye e rekonfort sa ki dekouraze. Kan nou annan loportinite pour ankouraz en dimoun dekouraze, nou devret koz dan en fason kalm e zantiy. (Prov. 12:18) Deplis, annou “pare pou ekoute” e “pran letan avan koze.” (Zak 1:19) Si nou ekoute e met nou dan soulye sa dimoun, nou pou pli kapab konpran sa ki pe dekouraz li e dir li en keksoz ki kapab ed li pour fer fas avek sa bann sityasyon.

14. Ki led en frer dekouraze ti gannyen?

¹⁴ Gete ki mannyer en ansyen ki annan konpasyon ti kapab ed en frer ki ti’n inaktif pour plizyer lannen. Anmezir sa ansyen ti ekout li atantivman, i ti kler pour sa ansyen ki sa frer ti ankor kontan Zeova en kantite. I ti pe etidye byen sak nimero Latour Veyer e i ti pe fer zefor pour asiste renyon regilyerman. Me, konportman serten dan kongregasyon ti’n dezapwent li e fer li dekouraze. Sa ansyen ti ekout li avek pasyans san ziz li e i ti eksprim son konsern pour sa frer ek son fanmir. Ptitapti sa frer ti konmans realize ki i ti pe les move leksperyans lepase anpes li servi sa Bondye ki i kontan. Sa ansyen ti envit sa frer pour pres ansanm avek li. Avek led sa ansyen, sa frer ti rekonmans prese e avek letan i ti kalifye pour li servi konman en ansyen ankor.

15. Ki nou aprann avek Zeova konsernan ankouraz bann ki dan depresyon?

¹⁵ En dimoun dekouraze pa pou deswit santi li pli mye ouswa reazir anver sa led ki nou ofer li. Petet i pou neseser ki nou kontinyen siport li. Pol ti dir: “Pa kit bann ki feb, pran pasyans avek tou dimoun.” (1 Tesa. 5:14, An American Translation) Olye taye pour abandonn enn ki feb, annou “pa kit” zot e kontinyen donn zot nou sipor. Dan lepase, Zeova ti annan pasyans avek son bann serviter ki par ler ti dekouraze. Par egzanp, Bondye ti pasyan avek Eliya, i ti pran an konsiderasyon son santiman. Zeova ti donn sa profet sa ki ti neseser pour li akonplir son servis. (1 Rwa. 19:1-18) Lefet ki David ti repantir senserman, Zeova ti pardonn li. (Ps. 51:7, 17) Bondye ti osi ed sa ekriven Psonm 73, ki ti pros pour aret servi Li. (Ps. 73:13, 16, 17) Zeova i pasyan e zantiy, sirtou kan nou deprimen ouswa dekouraze. (Egz. 34:6) “Tou le bomaten, i annan en nouvo fason demontre son mizerikord” e son mizerikord “pa pou zanmen fini.” (Lam. 3:22, 23) Zeova i ekspekte nou swiv son legzanp e tret bann ki dan depresyon avek ladouser.

ANKOURAZ KANMARAD POUR RESTE LO SEMEN LAVI

16, 17. Anmezir lafen sa move lemonn i aprose, nou devret reste determinen pour fer kwa e akoz?

¹⁶ Parmi sa 33,000 prizonnyen ki ti kit kan konsantrasyon Sachsenhausen, plizyer milye ti mor. Par kont, tou le 230 Temwen Zeova ki ti kit sa kan ti sirviv sa martir. Lankourazman ek sipor zot ti gannyen avek kanmarad ti zwe en gran rol pour zot sirviv sa gran lamars.

¹⁷ Ozordi, nou lo sa ‘semen ki anmenn dan lavi.’ (Mat. 7:14) Byento tou adorater Zeova pou mars dan linite e antre dan nouvo lemonn kot pou annan ladrwatir. (2 Pyer 3:13) Annou reste determinen pour ed kanmarad pour mars lo sa semen ki anmenn ver lavi eternel.

[Not anba lo paz]

[Portre lo paz 18]

[Portre lo paz 20]

Partisip dan predikasyon avek lezot

[Portre lo paz 20]

Pous kanmarad pour annan lanmour e fer sa ki byen

[Portre lo paz 21]

Apresye bon frekantasyon

[Portre lo paz 22]

Avek pasyans, ekout sa dimoun ki bezwen lankourazman (Vwar paragraf 14, 15)