Reziste Satan e i ava sov lwen!

“Soumet zot avek Bondye, me reziste kont Dyab e i ava sov lwen avek zot.” —ZAK 4:7.

1, 2. (a) Dapre Izai sapit 14, ki move latitid Dyab i annan? (b) Ki kestyon nou pou diskite?

DYAB i sa enn ki pli arogan. I annan en parol ki’n ganny rikorde par profet Izai, ki reflekte son larogans. Plis ki san tan avan ki Babilonn ti vin sa pli gran pouvwar mondyal, pep Zeova ti dir sa parol avek “lerwa Babilonn”: “Ou’n dir dan ou leker, ‘Mon pou mont dan lesyel. Mon pou met mon tronn parlao bann zetwal Bondye [bann lerwa sorti dan desandans David]. . . . Mon pou fer mwan vin parey sa enn Tre O.’” (Izai 14:3, 4, 12-15; Nonm 24:17) Sa larogans ki “lerwa Babilonn” ti demontre i sa menm latitid ki Satan, ‘bondye sa syek’ i annan. (2 Korentyen 4:4) Me sa larogans ki Satan i annan pou finalman anmenn maler, zis parey sa larogans dan lakour rwayal Babilonn ti anmenn laont lo zot.

² Osi lontan ki Dyab i egziste, i kapab ki nou konsernen avek bann kestyon parey: Eski nou devret per Satan? Akoz i fer lezot dimoun persekit bann vre Kretyen? Ki mannyer nou kapab anpes li ganny nou?

Eski nou devret per Dyab?

3, 4. Akoz bann Kretyen swazir ek bann ki pou viv lo later pa per Dyab?

³ Zezi Kri ti dir en parol ki vreman ankouraz bann Kretyen swazir ozordi. I ti dir: “Pa per pour sa ki ou pou soufer. Gete, dyab pou anvoy byento serten antre zot dan prizon, pour teste zot, e zot pou bezwen soufer pandan dis zour. Reste fidel ziska lanmor, e mon a donn ou kouronn lavi.” (Revelasyon 2:10) Bann Kretyen swazir ek bann ki annan lespwar pour viv lo later, pa per Dyab. Sa i pa vin atraver zot prop kouraz. Me i akoz zot annan lakrent pour Bondye e zot ‘kasyet anba lonbraz son lezel.’—Psonm 34:9; 36:7.

⁴ Menm si zot ti soufer, bann premye disip Zezi Kri ti reste fidel ziska lanmor san okenn lafreyer. Zot pa ti per Satan, akoz zot ti konnen ki Zeova pa pou zanmen abandonn sa bann ki reste fidel avek Li. Pareyman ozordi, kan bann Kretyen swazir ek lezot mouton i ganny persekite en kantite, zot determinen pour reste fidel avek Bondye. Me kantmenm sa, zapot Pol ti fer resorti ki Dyab i kapab okazyonn lanmor. Eski sa pa i devret fer nou per?

 5. Ki nou aprann dan Ebre 2:14, 15?

⁵ Pol ti dir ki Zezi ti pran lekor imen, “pour ki par son lanmor, i detri sa enn ki annan pouvwar donn lanmor, setadir dyab, e delivre bann ki, akoz zot lafreyer lanmor ti viv konman lesklav pandan tou zot lavi.” (Ebre 2:14, 15) Konman “sa enn ki annan pouvwar donn lanmor,” Satan ti kapab kontrol Zida Iskaryot, epi i ti servi bann sef Zwif ek bann Romen pour touy Zezi. (Lik 22:3; Zan 13:26, 27) Me par sakrifye son lekor, Zezi ti delivre bann imen enparfe anba kontrol Satan, e i’n fer li posib pour nou ganny lavi eternel.—Zan 3:16.

6, 7. Ziska ki degre Satan i kapab okazyonn lanmor?

⁶ Ziska ki degre Satan i kapab okazyonn lanmor? Depi ki i’n konmans son karyer dan mesanste, son bann mansonz ek gidans in okazyonn lanmor plizyer dimoun. Sa i akoz Adan ti fer pese, apre i ti transmet pese ek lanmor avek larestan imen apre li. (Romen 5:12) Deplis, son bann serviter lo later in persekit bann adorater Zeova, parfwa menm touy zot, zis parey zot ti fer avek Zezi.

⁷ Me nou pa devret krwar ki Satan i kapab okazyonn lanmor nenport ki, ki i oule touye. Bondye i protez Son bann serviter, e i pa pou zanmen les Satan elimin konpletman son bann adorater lo later. (Romen 14:8) I vre ki Zeova i les son pep ganny persekite e les Dyab touy serten parmi zot. Kantmenm sa, Labib i ofer en lespwar merveye pour tou bann ki dan “liv souvenir” Bondye. Sa i rezireksyon, e Dyab pa kapab anpes sa arive!—Malaki 3:16; Zan 5:28, 29; Akt 24:15.

Akoz Satan i persekit nou?

 8. Akoz Dyab i persekit bann serviter Bondye?

⁸ Si nou en serviter fidel Zeova, i annan en rezon akoz Dyab i persekit nou. I anvi ki nou abandonn nou lafwa. Nou annan en relasyon presye avek nou Papa dan lesyel, me Satan li, i anvi detri sa relasyon. Sa pa devret sirprann nou. Akoz depi dan zarden Edenn, Zeova ti dir ki pou annan en laenn ant sa “fanm” ek sa “serpan,” ant desandans sa fanm ek desandans sa serpan. (Zenez 3:14, 15) Labib i dir ki Dyab i sa “serpan lantikite,” son letan i kourt, e i vreman ankoler. (Revelasyon 12:9, 12) Anmezir ki sa laenn i kontinyen ant sa de “desandans,” bann ki pe servi Zeova fidelman i ekspekte ganny persekite. (2 Timote 3:12) Alor, eski ou vreman konpran akoz Satan i persekit nou?

9, 10. Ki kestyon Satan in souleve, e ki mannyer i relye avek lafason ki imen i viv?

⁹ Dyab in soulev bann kestyon lo lafason ki liniver pe ganny dirize. An rapor avek sa, i’n osi kestyonn fidelite bann imen anver zot Kreater. Satan ti persekit Zob, ki ti en zonm drwat. Akoz i ti fer sa? I ti anvi fer Zob vin enfidel. Menm son madanm ek son trwa swadizan zanmi ti pe ganny servi par Satan, pandan sa moman. Parey liv Zob i montre, Dyab ti teste Bondye. I ti dir ki personn pa pou reste fidel avek Bondye si i ganny sa sans pour fer zot pas dan difikilte. Me kantmenm sa, Zob ti reste fidel, i ti prouve ki Satan i en manter. (Zob 1:8–2:9; 16:2; 27:5; 31:6) Ozordi Dyab i persekit bann Temwen Zeova, avek bi pour esey kas zot fidelite e pour montre ki sa ki i ti dir i vre.

¹⁰ Ler nou konnen ki Dyab pe persekit nou akoz i vreman anvi kas nou fidelite avek Bondye, sa i kapab ed nou pour pran kouraz e vin for. (Deterononm 31:6) Nou Bondye i Sef liniver, i pou ed nou pour nou kapab reste fidel. Annou kontinyen rezwir leker Zeova par gard nou fidelite, e ler nou fer sa, nou pe fourni Zeova en larepons pour donn sa enn ki pe akiz nou.—Proverb 27:11.

‘Anpes nou tonm dan Lemal’

11. Dan Matye 6:13, ki Zezi ti demann nou pour fer?

¹¹ I pa en pti zafer pour kapab reste fidel, nou bezwen seryezman priy Zeova. Bann parol dan sa model lapriyer i vreman kapab ed nou. En bout ki Zezi ti dir dan sa lapriyer i: “Pa permet ki nou ganny tante, me anpes nou tonm dan le mal.” (Matye 6:13) Kan nou priy Zeova pour pa permet nou ganny tante, nou pe demann li pour pa les nou tonm dan tantasyon. Zeova pa pou les nou tonm dan tantasyon, akoz Labib i donn nou sa lasirans: “Bondye i fidel dan son promes, e i pa pou permet ki nou ganny tante plis ki nou kapab siporte, me avek tantasyon i osi donn mwayen pour sorti pour ki ou kapab siporte.”—1 Korentyen 10:13.

12. Akoz nou priye pour nou ganny ‘delivre kont sa enn mesan’?

¹² Zis apre ki Zezi ti’n mansyonn tantasyon dan son model lapriyer, dan en fason apropriye i ti dir: “Anpes nou tonm dan le mal.” Serten Labib i dir: “Delivre nou kont lemal” (King James Version, Revised Standard Version), “Protez nou kont lemal.” (Contemporary English Version) Dan Labib sa lekspresyon “delivre nou kont,” i plizoumwen ganny servi kan pe refer avek dimoun, e dan Levanzil Matye sa lekspresyon i ganny asosye avek “Dyab.” Pour sa rezon, Traduction du monde nouveau i dir: “Delivre nou kont sa enn mesan,” setadir Dyab. (Matye 4:3, 11) Alors, i enportan pour priye ki nou ganny delivre kont “sa enn mesan.” Satan i esey fer nou fer sa ki mal devan Bondye. (1 Tesalonisyen 3:5) Kan nou priye pour ganny ‘delivre kont sa enn mesan,’ nou pe demann nou Papa dan lesyel pour gid e ed nou, pour ki Dyab pa ganny nou.

Pa les Dyab ganny ou

13, 14. Akoz bann Korentyen ti pou bezwen sanz zot fason azir anver en zonm ki ti’n repantir?

¹³ Kan Pol ti ankouraz bann Kretyen dan kongregasyon Korent pour pardonn lezot, i ti ekrir: “Sa ki zot pardonnen, mwan osi mon pardonnen! Sa ki mon’n pardonnen, si mon’n fer li se akoz zot, devan Kris, pour ki nou pa les nou ganny anbete par Satan, parski nou konn byen son bann lentansyon.” (2 Korentyen 2:10, 11) Dyab i kapab ganny nou dan diferan fason. Me akoz Pol ti dir sa parol ki nou’n fek lir?

¹⁴ Pol ti koriz bann Korentyen akoz zot ti’n toler en zonm imoral dan kongregasyon. Satan ti’n bezwen kontan, akoz kan zot ti aksepte ‘menm limoralite seksyel ki egziste parmi bann payen,’ sa ti anmenn laont lo kongregasyon. Finalman, sa enn ki ti pe pratik sa ki mal ti ganny tire dan kongregasyon. (1 Korentyen 5:1-5, 11-13) Me plitar sa zonm ti repantir. Si bann Korentyen pa ti pardonn e aksepte sa zonm ankor dan kongregasyon, Dyab ti pou’n ganny zot dan en lot fason. Ki mannyer? Akoz zot ti pou dir e napa mizerikord zis parey Satan. Sirtou bann ansyen ti pou bezwen rann kont Zeova, sa Bondye mizerikord, si zot pa ti pardonn sa zonm ki’n repantir, ki’n “tro ganny akable e tonm dan dezespwar.” (2 Korentyen 2:7; Zak 2:13; 3:1) Definitivman, napa okenn vre Kretyen ki ti pou kontan imit Satan, par vin en dimoun kriyel, dir, e san mizerikord.

Lekipman Batay Bondye i protez nou

15. Avek ki nou pe lager e ki nou bezwen pour ganny laviktwar?

¹⁵ Si nou anvi ganny delivre kont Dyab, nou bezwen lager kont son lenfliyans ek lenfliyans son bann demon. Pour nou kapab ganny laviktwar lo zot, menm si zot vreman for, nou bezwen met lo nou “tou bann lekipman batay ki Bondye i donnen.” (Efezyen 6:11-18) En bout sa lekipman i ladrwatir ki parey en ‘proteksyon lo pwatrin.’ (Efezyen 6:14) Sail ki ti en lerwa Izrael, ti dezobei Bondye e an rezilta i ti soufer akoz i ti nepli annan lespri sen. (1 Samyel 15:22, 23) Me si nou fer sa ki drwat e met lo nou tou sa lekipman batay, Bondye pou donn nou son lespri sen e i pou protez nou kont Satan ek son bann demon.—Proverb 18:10.

16. Ki mannyer nou kapab kontinyen ganny proteze kont Dyab ek son bann demon?

¹⁶ Pour kapab kontinyen ganny proteze kont Dyab ek son bann demon, en keksoz ki nou bezwen fer, se lir e etidye Parol Bondye regilyerman, e byen servi bann piblikasyon ki lesklav fidel e pridan i fourni. (Lik 12:42) Kan nou fer sa, nou pe ranpli nou lespri avek keksoz spirityel, e nou pe aplik konsey ki Pol ti donnen: “Mon bann frer, mon konsey zot, atas zot avek tou sa ki vre, tou sa ki onorab, sa ki zis, sa ki pir, sa ki bon, sa ki agreab, sa ki ekselan, tou sa ki merit felisitasyon; mazin tou sa bann keksoz.”—Filipyen 4:8.

17. Kwa ki pou ed nou pour byen pres sa bon nouvel?

¹⁷ Zeova i donn nou privilez pour ‘anons levanzil konman en soulye dan nou lipye.’ (Efezyen 6:15) Kan nou partisip regilyerman dan renyon, nou ganny formen pour anons sa bon nouvel Rwayonm. Pa nou vreman kontan ler nou ed lezot pour aprann laverite lo Bondye e fer zot sorti dan fernwanr! (Zan 8:32) ‘Laparol Bondye ki konman en lepe ki Lespri i donnen,’ i tre esansyel pour protez nou kont bann fo lansennyman ek ‘bann fo rezonnman.’ (Efezyen 6:17; 2 Korentyen 10:4, 5) Kan nou byen servi Labib, sa i ed nou pour ansenny laverite e i protez nou pour ki nou pa ganny anbete avek bann trik Satan.

18. Ki mannyer nou kapab “reziste kont bann riz Dyab”?

¹⁸ Ler Pol ti konmans koz lo nou lekipman spirityel i ti dir: “Rod ou lafors dan linyon avek Senyer e dan son gran pisans. Met lo zot tou bann lekipman batay ki Bondye i donnen, pour ki zot a kapab reziste kont tou bann riz Dyab.” (Efezyen 6:10, 11) Sa mo Grek ki’n ganny tradwir “reziste” i refer avek en solda ki reste dan son pozisyon. Nou reste ferm dan nou lager, kantmenm Satan i servi tou sort kalite taktik pour esey detrir nou linite, deform nou lansennyman e kas nou fidelite avek Bondye. Me ziska prezan tou son bann zefor pa’n abouti dan nanryen, e i pa pou zanmen atenn son lobzektif!a

Reziste kont Dyab e i ava sov lwen

19. Nonm en fason ki nou kapab opoz Dyab?

¹⁹ Nou kapab ranport laviktwar dan nou lager kont Dyab ek son bann demon ki anba son dominasyon. Nou pa bezwen tranble avek lafreyer akoz Satan, parski en disip ki apel Zak ti ekrir: “Soumet zot avek Bondye, me reziste kont Dyab e i ava sov lwen avek zot.” (Zak 4:7) En fason ki nou kapab opoz Satan ek bann demon ki dan son kote, i par evite tou sa ki annan pour fer avek grigri oubyen mazik. Labib i montre klerman ki bann serviter Zeova pa devret esey enterpret bann siny, ki zot pa devret get oroskop, devinen, e al kot bonnonm dibwa. Si nou aktif dan bann aktivite Kretyen e nou for spirityelman, nou pa bezwen per ki en dimoun pou zet en sor lo nou.—Nonm 23:23; Deterononm 18:10-12; Izai 47:12-15; Akt 19:18-20.

20. Ki mannyer nou kapab reziste kont Dyab?

²⁰ Nou “reziste kont Dyab” par reste atase avek bann standar ek laverite dan Labib, e nou determinen pour pa tonm dan son latrap. Vi ki Satan i bondye sa lemonn, alors sa lemonn i fer tou sa ki Satan i kontan. (2 Korentyen 4:4) Me nou, nou rezet sa bann move tre ki annan dan lemonn. Bann tre parey larogans, vorasite, limoralite, vyolans e tay deryer keksoz materyel. Kan i ti pe esey tant Zezi dan dezer, nou konnen ki Dyab ti sov lwen ler Zezi ti servi Lekritir pour reziste son lesey. (Matye 4:4, 7, 10, 11) Si nou pa les nanryen kas nou fidelite avek Zeova e nou depan lo Li atraver lapriyer, Satan pou ‘sov lwen avek nou’ akoz i pou vwar ki i enposib pour kas nou fidelite. (Efezyen 6:18) Avek sipor sorti kot Zeova ek son garson byenneme, napa personn ki pou kapab fer nou dimal pour touzour, ni menm Dyab pa pou kapab!—Psonm 91:9-11.

[Not anba lo paz]

Ki ou pou reponn?

• Eski nou devret per Dyab?

• Akoz Satan i fer bann vre Kretyen ganny persekite?

• Akoz nou priye pour ganny delivre kont “sa enn mesan”?

• Ki mannyer nou kapab ranport laviktwar dan nou lager?

[Portre lo paz 8]

Bann premye disip Kris ti reste fidel ziska lanmor san okenn lafreyer

[Portre lo paz 9]

Dyab pa kapab anpes sa bann ki dan memwar Bondye ganny resisite

[Portre lo paz 10]

Eski ou priye pour ganny delivre kont “sa enn mesan”?

[Portre lo paz 11]

Eski ou pe met lo ou “tou bann lekipman batay ki Bondye i donnen”?