“Mon pou sekwe tou bann nasyon”

1-2. Ki kalite sekwe ki profet Agay ti dir pou arive dan nou letan?

AN 2015, i ti annan en tranblemandter Nepal e serten dimoun ki ti sirviv i dir: “Dan lespas detrwa minit, bann laboutik ek bann vye batiman ti konmans grennen.” “Tou dimoun ti pe panik . . . En kantite dimoun ti pe dir ki sa tranblemandter in dire pour de minit. Pour mwan, i konmsi in al pour en kantite letan.” Si en keksoz koumsa, ki fer per ti arive avek ou, ou pa ti pou zanmen oubliye.

² Me ozordi, i annan en lot kalite sekwe ki pe arive. Zeova pe sekwe tou bann nasyon lo later e i’n fer sa pour plizyer lannen. Profet Agay ti predir konsernan sa ki Zeova pe fer. I ti dir: “La sa ki Zeova Sef larme i dir, ‘Ankor enn fwa, dan en pti moman, mon pou sekwe lesyel ek later, lanmer ek later ferm.’”​—Aga. 2:6, NWT.

 3. Ki mannyer sa sekwe ki Agay ti koz lo la i diferan avek en tranblemandter?

³ Sa sekwe ki Agay ti koz lo la pa parey en tranblemandter ki anmenn en kantite destriksyon. O konter sa sekwe ki Agay ti koz lo la i fer bann bon keksoz arive. Zeova ti dir: “Mon pou sekwe tou bann nasyon e bann keksoz presye sorti dan tou nasyon pou vin dan sa lakaz e mon pou ranpli sa lakaz avek laglwar.” (Aga. 2:7, NWT) Ki sa profesi ti vedir pour bann ki ti viv dan letan Agay? Ki i vedir pour nou ozordi? Dan sa lartik, nou pou vwar larepons sa bann kestyon e nou pou osi vwar ki mannyer nou kapab partisip dan sa travay pour sekwe bann nasyon ozordi.

 4. Akoz Zeova ti anvoy profet Agay kot son pep?

⁴ Zeova ti donn profet Agay en travay enportan pour li fer. Annou vwar ki i ti arive avan sa. An 537 avan Kris, en group Zwif ti retourn Zerizalenm sorti Babilonn. I tre probab ki Agay ti ansanm avek zot. Pa bokou letan apre ki zot ti ariv Zerizalenm, sa bann adorater fidel Zeova ti konmans konstri lakaz Zeova oubyen tanp. (Ezra 3:8, 10) Me pa bokou letan apre, en problenm ti leve. Bann dimoun ki ti reste dan zanmirant, ti konmans opoz zot. Sa ti fer zot dekouraze e zot ti aret konstri tanp. (Ezra 4:4; Aga. 1:1, 2, NWT) Alor an 520 avan Kris, Zeova ti dir Agay ankouraz zot e motiv zot pour fini konstri tanp.b​—Ezra 6:14, 15.

 5. Akoz mesaz ki Agay ti anonse ti ankouraz pep Bondye?

⁵ Sa mesaz ki Agay ti pou anonse ti pou ranforsi lafwa bann Zwif dan Zeova. Avek kouraz, sa profet ti dir bann Zwif ki ti dekouraze: “La sa ki Zeova i dir, ‘Zot tou ki reste dan sa pei, pran kouraz e travay.’ ‘La sa ki Zeova Sef larme i dir, “Parski mon avek zot.”’” (Aga. 2:4, NWT) Sa lekspresyon “Zeova Sef larme” ti’n bezwen ankouraz bann Zwif. Zeova i annan lotorite lo en gran larme lanz. Alor bann Zwif ti bezwen annan konfyans dan Zeova si zot ti anvi fini konstri tanp.

 6. Dapre Agay, ki ti pou arive apre ki Zeova ti pou’n sekwe bann nasyon?

⁶ Zeova ti anvoy Agay dir bann Zwif ki i ti pou sekwe tou bann nasyon. Sa mesaz ti ankouraz bann Zwif ki ti’n dekouraze e ki ti’n aret konstri tanp. I ti osi montre ki Zeova ti pou sekwe Lanpir Pers, ki ti pouvwar mondyal sa letan. Ki ti pou arive ler Zeova ti pou sekwe Lanpir Pers? Premyerman, pep Bondye ti pou fini konstri tanp. Apre, ler tanp ti pou’n fini ganny konstrir, bann dimoun ki pa ti Zwif ti pou zwenn avek bann Izraelit pour ador Zeova laba. Sa mesaz ti vreman ankourazan pour pep Bondye!​—Zek. 8:9, NWT.

 7. Ki sa travay sekwe ki nou pe partisip ladan ozordi? Eksplike.

⁷ Ki profesi Agay i vedir pour nou ozordi? Ankor enn fwa, Zeova pe sekwe tou bann nasyon e safwasi nou pe ede fer sa travay. Mazin sa: An 1914, Zeova ti fer Zezi Kri vin Lerwa dan son Rwayonm dan lesyel. (Ps. 2:6) Ler sa Rwayonm ti konmans dirize, sa ti en move nouvel pour bann dirizan imen. Sa ti vedir ki “letan fikse bann nasyon in fini.” Andotmo, sa letan kot i ti napa en dirizan ki reprezant Zeova ti’n fini. (Lik 21:24) I pour sa rezon ki pep Zeova in dir avek tou dimoun ki Rwayonm Bondye i sa sel lespwar pour limanite. Zot ti konmans fer sa espesyalman apartir 1919. Sa travay pour anons “sa bon nouvel Rwayonm” in sekwe lemonn antye.​—Mat. 24:14.

 8. Dapre Psonm 2:1-3, ki mannyer laplipar nasyon in reazir anver sa mesaz?

⁸ Ki mannyer dimoun in reazir anver sa mesaz? Laplipar dimoun in rezet sa mesaz. (Lir Psonm 2:1-3, NWT.) Bann nasyon in azite. Zot refize aksepte sa Enn ki Zeova in apwente konman dirizan. Zot pa krwar ki sa mesaz Rwayonm ki nou pe anonse i en “bon nouvel.” Anfet, serten gouvernman in menm enterdi sa travay predikasyon! Menm si en kantite dirizan sa bann nasyon i dir ki zot servi Bondye, zot pa anvi perdi sa lotorite ki zot annan. Alor parey bann dirizan dan letan Zezi ti fer, bann dirizan ozordi i opoz sa Enn ki Zeova in swazir par atak son bann disip fidel.​—Akt 4:25-28.

 9. Ki mannyer Zeova pe ed bann nasyon ki pa aksepte sa mesaz Rwayonm?

⁹ Ki mannyer Zeova i reazir anver bann nasyon ki rezet sa mesaz Rwayonm? Psonm 2:10-12 (NWT) i dir: “Aprezan, zot bann lerwa, servi bon zizman, zot bann ziz lo later, les zot ganny korize. Servi Zeova avek gran respe e tranble avek lazwa. Onor son garson, si non Bondye pou ankoler e zot pou ganny detrir. Parski son lakoler i mont fasilman. Ere bann ki pran refiz dan Li.” Zeova i bon e i donn zot en serten kantite letan pour fer sa bon desizyon. Zot ankor kapab sanze e aksepte Rwayonm Zeova. Me napa bokou letan ki reste. Nou pe viv dan “bann dernyen zour” sa move lemonn. (2 Tim. 3:1; Iza. 61:2) I pli irzan la konmela pour dimoun konn laverite e swazir pour servi Zeova.

10. Dapre Agay 2:7-9, ki mannyer serten dimoun ti pou reazir?

¹⁰ Serten dimoun i reazir byen anver sa sekwe ki Agay ti predir. Agay i dir ki sa sekwe ti pou fer ki “bann keksoz presye [bann dimoun senser] sorti dan tou nasyon pou vin” ador Zeova.c (Lir Agay 2:7-9, NWT.) Profet Izai ek Mika osi ti predir ki sa ti pou arive “dan bann dernyen zour.”​—Iza. 2:2-4, NWT; Mik. 4:1, 2, NWT.

11. Ki en frer ti fer ler i ti tann sa mesaz Rwayonm pour premye fwa?

¹¹ Annou vwar sa ki en frer ki apel Ken ti fer ler i ti tann sa bon nouvel Rwayonm. Ken i servi kot Biro prensipal Temwen Zeova e i ankor rapel premye fwa ki i ti tann sa mesaz Rwayonm apepre 40 an pase. Ken i dir: “Premye fwa ki mon ti tann laverite ki dan Parol Bondye, mon ti kontan pour aprann ki nou pe viv dan bann dernyen zour sa move lemonn. Mon ti konpran ki pour mwan ganny laprouvasyon Zeova e pour viv pour touzour, mon ti pou bezwen fer sir ki mon pa form parti sa lemonn ki tanporer e pran kote avek Zeova. Mon ti priy Zeova e mon ti fer sanmenm. Mon ti aret form parti sa lemonn e mon ti aksepte proteksyon ki Rwayonm Bondye i donnen, ki pa kapab ganny tire.”

12. Ki mannyer tanp spirityel Zeova in ranpli avek laglwar pandan sa bann dernyen zour?

¹² I kler ki Zeova pe beni son pep. Pandan sa bann dernyen zour, en kantite dimoun in konmans ador Zeova. An 1914, i ti napa bokou nou. Ozordi, i annan plis ki 8 milyon dimoun ki pe ador Zeova e ankor plizyer milyon pe zwenn avek nou sak lannen pour selebre Memoryal lanmor Zezi. Sa i fer ki lakour tanp spirityel Zeova, ki laranzman pour ladorasyon pir, in ranpli avek “bann keksoz presye sorti dan tou nasyon.” Non Zeova in osi ganny glorifye par bann sanzman ki bann ki annan leker senser in fer anmezir zot devlop sa nouvo personnalite.​—Efe. 4:22-24.

13. Ki lezot profesi ki logmantasyon parmi pep Zeova pe akonpli? (Vwar portre lo kouvertir.)

¹³ Sa logmantasyon parmi pep Zeova in akonpli lezot profesi parey sa enn dan Izai sapit 60. Izai 60:22 (NWT) i dir: “Sa enn ki pti pou vin en milye e sa enn ptipti en nasyon for. Mwan menm Zeova, mon pou akseler li dan son letan.” Vi ki bokou plis dimoun pe konmans ador Zeova, en keksoz merveye pe arive. Bann “keksoz presye,” setadir bann dimoun, i annan diferan abilite e zot osi annan sa dezir pour anons “sa bon nouvel Rwayonm.” Sa i fer ki pep Zeova i kapab servi zot abilite ki Izai i dekri konman “dile bann nasyon.” (Iza. 60:5, 16, NWT) Avek led sa bann zonm ek madanm presye, sa travay predikasyon pe ganny fer dan 240 pei e bann piblikasyon pe ganny prodwir dan plis ki 1,000 langaz.

14. Ki desizyon dimoun i bezwen fer la konmela?

¹⁴ Dan sa letan lafen, bann nasyon pe ganny sekwe e sa pe fors dimoun pour fer en desizyon. Eski zot pou siport Rwayonm Bondye oubyen zot pou met konfyans dan bann gouvernman sa lemonn? Sa i en desizyon ki sak dimoun i bezwen fer. Menm si pep Zeova i obei bann lalwa dan sa pei kot zot reste, zot pa pran kote dan bann zafer politik sa lemonn. (Rom. 13:1-7) Zot konnen ki Rwayonm Bondye i sa sel vre solisyon pour bann problenm limanite. Sa Rwayonm pa form parti sa lemonn.​—Zan 18:36, 37.

15. Ki mannyer liv Revelasyon i montre ki fidelite pep Bondye pou ganny teste?

¹⁵ Liv Revelasyon i dir ki fidelite pep Bondye pou ganny teste dan bann dernyen zour. Nou pou kontinyen ganny en kantite lopozisyon ek persekisyon. Bann gouvernman sa lemonn pou esey fer nou siport zot e tou bann ki refize siport zot pou ganny persekite. (Rev. 13:12, 15) Zot pou “fors tou dimoun, pti konman gran, ris konman pov, bann ki lib ek bann lesklav pour ki zot ganny marke lo zot lanmen drwat oubyen lo zot fron.” (Rev. 13:16) Bann lesklav lontan ti ganny marke pour montre lekel zot met. Pareyman, dimoun ozordi pou ekspekte ki tou dimoun i montre lekel ki zot pe siporte. Zot pou anvi ki tou dimoun i montre par zot fason panse ek aksyon ki zot siport bann parti politik.

16. Akoz i enportan pour ranforsi nou fidelite anver Zeova la konmela?

¹⁶ Eski nou pou aksepte sa mark e siport bann gouvernman? Sa bann ki refize ganny marke pou fer fas avek bokou difikilte e zot pou an danze. Liv Revelasyon i dir: “Personn pa kapab aste oubyen vann si i napa sa mark.” (Rev. 13:17) Me pep Bondye i konnen ki Bondye pou fer avek sa bann ki annan sa mark. (Rev. 14:9, 10) Olye aksepte sa mark, i pou konmsi zot pou’n ekri lo zot lanmen, “Propriyete Zeova.” (Iza. 44:5, NWT) La i sa letan pour ranforsi nou fidelite anver Zeova. Si nou fer sa, Zeova pou kontan pour dir ki nou pour li.

17. Ki nou bezwen rapel konsernan pasyans Zeova?

¹⁷ Zeova in demontre bokou pasyans pandan sa bann dernyen zour. I pa anvi ki personn i ganny detrir. (2 Pyer 3:9) I’n donn tou dimoun letan pour repantir e pour swazir pour servi li. Me son pasyans i annan limit. Bann ki refize siport Rwayonm Bondye pou pas parey Faraon dan letan Moiz. Zeova ti dir Faraon: “Depi lontan mon ti pou’n kapab servi mon lafors e frap ou ek ou pep avek en maladi terib. Mon ti pou’n fini fer ou disparet lo later. Me pour sa rezon mon’n gard ou vivan: Pour montre ou mon pwisans e pour ki mon non i ganny anonse lo later antye.” (Egz. 9:15, 16, NWT) Tou nasyon pou bezwen konnen ki Zeova i sa sel vre Bondye. (Ezek. 38:23) Ki mannyer sa pou arive?

18. (a) Ki sa sekwe ki ganny dekrir dan Agay 2:6, 20-22? (b) Ki mannyer nou konnen ki parol Agay pou annan en lot lakonplisman dan lavenir?

¹⁸ Plizyer lannen apre ki Agay ti’n mor, zapot Pol ti dir bann Kretyen Ebre ki sa parol ki trouve dan Agay 2:6, 20-22 ti pou annan en lot lakonplisman a lavenir. (Lir.) Pol ti dir: “Aprezan i’n promet sa: ‘Pourtan ankor enn fwa mon pou sekwe pa zis later me lesyel osi.’ Sa lekspresyon ‘pourtan ankor enn fwa’ i montre ki bann keksoz ki ganny sekwe pou ganny retire, setadir bann keksoz ki Bondye pa’n kree, pour ki bann keksoz ki pa’n ganny sekwe i reste.” (Ebr. 12:26, 27) Sa sekwe i diferan avek sa sekwe ki ganny mansyonnen dan Agay 2:7. Sa sekwe i vedir ki bann ki refize pour aksepte drwa Zeova pour dirize, parey Faraon, zot pou ganny detrir pour touzour.

19. Kwa ki pa pou ganny sekwe e ki mannyer nou konn sa?

¹⁹ Kwa ki pa pou ganny sekwe oubyen retire? Pol i kontinyen par dir: “Vi ki nou konnen ki nou pou ganny en Rwayonm ki pa kapab ganny sekwe, annou kontinyen les Bondye demontre son labonte ekstraordiner anver nou pour ki nou kapab servi li dan en fason ki fer li plezir avek gran respe ek ladmirasyon.” (Ebr. 12:28) Apre ki sa dernyen sekwe in fini, zis Rwayonm Bondye ki pa pou’n ganny sekwe. I pou ankor la!​—Ps. 110:5, 6, NWT; Dan. 2:44, NWT.

20. Ki desizyon dimoun i bezwen fer e ki mannyer nou kapab ed zot?

²⁰ I napa letan pour perdi! Dimoun i bezwen swazir: Si zot swazir pour kontinyen siport sa lemonn, zot pou ganny detrir. Si zot swazir pour servi Zeova e fer bann sanzman neseser dan zot lavi pour fer son lavolonte, zot pou viv pour touzour. (Ebr. 12:25) Atraver nou travay predikasyon, nou kapab ed dimoun pour fer sa desizyon enportan. Annou ed plis dimoun ki presye, pour siport Rwayonm Bondye. Annou osi kontinyen rapel sa ki nou Senyer Zezi ti dir: “Sa bon nouvel Rwayonm pou ganny anonse partou lo later pour donn en temwannyaz avek tou nasyon e apre sa, lafen pou arive.”​—Mat. 24:14.