Lavi maryaz

1, 2. Eski bann problenm ki arive dan lavi maryaz i vedir ki sa maryaz pa’n reisi? Eksplike.

MARYAZ i en kado sorti kot Zeova. I kapab fer en dimoun pli ere. Kantmenm sa, dan tou maryaz i annan problenm. I menm kapab paret ki problenm pa pou zanmen fini. Sa i kapab fer ki en msye ek en madanm pa santi zot pros avek kanmarad parey avan.

² Nou pa devret sirprann si detanzaot nou rankontre problenm dan nou lavi maryaz. Me, sa bann problenm pa vedir ki nou maryaz pa’n reisi. Menm bann koup ki ti annan bann problenm byen grav in reisi amelyor zot relasyon e fer zot maryaz pli for. Ki mannyer zot in fer sa?

3, 4. Parfwa, ki i kapab arive dan en maryaz?

³ Maryaz i fer de dimoun diferan viv ansanm. Sak dimoun i annan son keksoz ki i kontan oubyen pa kontan, son bann nide e fason fer keksoz. Sa msye ek sa madanm i sorti dan diferan fanmir, rezyon e menm diferan kiltir par ler. I demann letan ek zefor pour en koup konn e konpran kanmarad byen.

⁴ Avek letan, en msye ek en madanm i kapab sitan konsantre dan zot bann keksoz personnel ki finalman zot konmans elwannyen avek kanmarad. I konmsi sakenn pe viv pour li. Kwa ki kapab ed zot vin pli pros avek kanmarad?

 5. (a) Kwa ki kapab ed en Kretyen vin pli pros avek son konzwen? (b) Dapre Ebre 13:4, ki mannyer nou devret konsider maryaz?

⁵ Zeova i donn bann bon konsey ki kapab ed ou ek ou konzwen vin pli pros avek li e avek kanmarad. (Psonm 25:4; Izai 48:17, 18, NWT) Bondye i dir nou: “Maryaz i devret ganny onore par tou dimoun.” (Ebre 13:4) En keksoz ki ganny onore i normalman presye e annan valer. Ou protez sa keksoz e ou pa konsider li konman nanryen ditou. Se koumsa ki Zeova i anvi nou vwar maryaz.

 6. Ki Matye 19:4-6 i dir nou konsernan pwennvi Zeova lo maryaz?

⁶ Zeova ki ti marye sa premye koup imen. Son Garson, Zezi ti dir: “Zot pa’n lir ki sa enn ki ti kree zot o konmansman ti fer zot zonm ek fanm e ti dir: ‘Se pour sa rezon ki en zonm pou kit son papa ek son manman e i pou atase avek son madanm e zot de pou vin en sel,’ pour ki zot nepli de me en sel? Alor, sa ki Bondye in ini ansanm zonm pa devret separe.” (Matye 19:4-6) Depi o konmansman menm, Zeova ti anvi ki sa laranzman maryaz i dir pour touzour. I ti oule ki bann fanmir i vin pros avek kanmarad, ki zot ere e viv byen ansanm.

 7. Ki mannyer bann msye ek madanm i kapab fer zot maryaz vin pli for?

⁷ Par kont, bann koup marye ozordi i rankontre bokou plis problenm ek presyon ki dan lepase. Parfwa, sa bann presyon i sitan for, ki en koup i kapab krwar ki i enposib pour sov zot maryaz e alor zot anvi kite. Me ler nou konpran ki mannyer Zeova i konsider maryaz, sa i kapab ed nou.​—1 Zan 5:3.

8, 9. (a) Kan ki nou devret swiv konsey Zeova lo maryaz? (b) Ki mannyer nou montre ki nou maryaz i annan valer pour nou?

⁸ Bann konsey Zeova i toultan pour nou prop dibyen. Parey nou’n vwar, Bondye in donn nou sa konsey: “Maryaz i devret ganny onore par tou dimoun.” (Ebre 13:4; Eklezyast 5:4) Si nou swiv konsey Zeova menm ler i pa fasil, nou pou definitivman benefisye.​—1 Tesalonisyen 1:3; Ebre 6:10.

⁹ Vi ki nou maryaz i annan bokou valer pour nou, nou pa anvi fer oubyen dir okenn keksoz ki pou kapab kas li. Plito, nou anvi ki nou relasyon avek nou konzwen i vin pli for. Ki mannyer nou kapab fer sa?

10, 11. (a) Ki problenm serye ki egziste dan serten maryaz? (b) Akoz lafason ki nou koz avek nou msye oubyen madanm i enportan?

¹⁰ En dimoun i kapab bles santiman son konzwen dan diferan fason. Nou konnen ki bann Kretyen pa devret zanmen bat oubyen fer ditor zot konzwen fizikman. Me, nou kapab bles kanmarad par sa ki nou dir. Nou parol i kapab parey en zarm ki bles nou konzwen. En madanm ti dir: “I konmsi mon msye i bat mwan avek sa ki i dir. Petet lo mwan napa mark, me i toultan maltret mwan par dir, ‘Mon’n ganny ase ek ou!’ e ‘Ou en bon nanryen!’ Sa bann parol in kit bann sikatris lo mon leker.” En msye ti dir ki son madanm ti toultan abes li e donn li tou sort non. I dir: “Mon pa kapab repet devan dimoun sa ki i’n dir mwan. Sanmenm sa mon pa kapab koz avek li e mon reste kot travay ziska tar. Koumsa, mon santi mwan pli byen.” Konmela, dimoun i zoure, koz brit e dir bann gro betiz ki kapab vreman bles santiman en dimoun.

¹¹ Ler en msye ek en madanm i koz dan en fason brit, zot bles kanmarad emosyonnelman e sa i pa fasil geri. I kler ki Zeova pa anvi ki en msye ek madanm i tret kanmarad dan sa fason. Me i posib pour bles santiman ou konzwen san menm realize. Ou kapab krwar ki ou tret li dan en bon fason, me ki mannyer li i santi? Si ou’n dir en keksoz ki’n bles ou konzwen, eski ou pou pare pour sanz ou fason koze?​—Galat 5:15; lir Efezyen 4:31.

12. Ki mannyer en dimoun ki’n marye i kapab gat son relasyon avek Zeova?

¹² Lafason ki ou koz avek ou konzwen, ki swa an piblik oubyen an prive i vreman enportan pour Zeova. (Lir 1 Pyer 3:7.) Zak 1:26 i rapel nou: “Si en dimoun i panse ki i pe ador Bondye me i pa seryezman kontrol son labous, i pe anbet son lekor e son ladorasyon i initil.”

13. Ki lot fason en dimoun i kapab bles santiman son konzwen?

¹³ I annan lezot fason ki en koup i bezwen pran an konsiderasyon santiman kanmarad. Par egzanp, ki mannyer ou konzwen pou santi si ou konmans pas en kantite letan avek en lot dimoun? Menm si ou napa okenn move lentansyon, eski petet ou pou bles santiman ou konzwen si par egzanp, ou toultan pe ed oubyen travay dan predikasyon avek menm dimoun? En madanm Kretyen ti dir: “Ler mon vwar mon msye pe donn bokou letan ek latansyon en ser dan kongregasyon, sa i bles mwan. I fer mwan santi mwan enferyer.”

14. (a) Ki keksoz enportan nou aprann dan Zenez 2:24? (b) Ki nou merit demann nou lekor?

¹⁴ Konman Kretyen, nou annan responsabilite anver nou paran ek nou bann frer ek ser dan nou kongregasyon. Kantmenm sa, ler nou marye, nou bezwen desarz nou responsabilite premyerman anver nou msye oubyen madanm. Zeova ti dir ki en msye pou ‘atas li avek son madanm.’ (Zenez 2:24) Lafason ki nou konzwen i santi i devret vreman enportan pour nou. Demann ou lekor: ‘Eski mon donn mon konzwen letan, latansyon ek lafeksyon ki i bezwen e merite?’

15. Akoz bann Kretyen ki’n marye pa devret vin tro pros avek en dimoun ki pa zot msye oubyen madanm?

¹⁵ Si nou vin tro pros avek en dimoun ki pa nou msye oubyen nou madanm, sa pou afekte nou maryaz. Nou kapab vin tro pros avek sa dimoun e devlop bann santiman romantik pour li. (Matye 5:28) Sa bann santiman i kapab kontinyen devlope ziska ki finalman ou fer en keksoz ki pa pou onor maryaz.

16. Ki lord Labib i donnen lo maryaz?

¹⁶ Labib i dir: “Maryaz i devret ganny onore” e osi: “Zot pa devret sali lili maryaz, parski Bondye pou ziz bann dimoun ki komet imoralite seksyel ek adilter.” (Ebre 13:4) “Lili maryaz” pe refer avek relasyon seksyel ant en msye ek en madanm ki’n marye. (Proverb 5:18) Ki mannyer nou kapab montre respe pour sa relasyon e pa sali li?

17. (a) Ki mannyer serten dimoun ozordi i konsider adilter? (b) Ki pwennvi bann Kretyen lo adilter?

¹⁷ Serten dimoun pa krwar ki i mal pour tronp zot konzwen. Nou pa devret les latitid sa lemonn enfliyans nou. Zeova i fer li byen kler ki i deteste adilter ek imoralite seksyel. (Lir Romen 12:9; Ebre 10:31; 12:29) Si nou fer sèks avek en lot dimoun apard ki nou msye oubyen madanm, nou pou sali nou maryaz. Sa pou montre ki nou napa respe pour bann standar Zeova e nou pou gat nou relasyon avek li. Alor, nou devret fer atansyon ki nou pa ni menm annan bann panse imoral ki kapab fer nou komet adilter.​—Zob 31:1.

18. (a) Akoz adilter i parey ador bann fo bondye? (b) Ki pwennvi Zeova lo adilter?

¹⁸ Anba Lalwa Moiz, adilter ti ganny konsidere konman en pese grav parey ador bann fo bondye. Pinisyon pour tou le de pese ti lanmor. (Levitik 20:2, 10) Ki mannyer adilter ti parey ador bann fo bondye? Si en Izraelit ti ador bann fo bondye, i ti kas son promes pour reste fidel avek Zeova. Pareyman, si i ti komet adilter, i ti kas son promes pour reste fidel avek son konzwen. (Egzod 19:5, 6; Deterononm 5:9; lir Malaki 2:14.) I kler ki dan lepase, Zeova ti konsider adilter konman en pese vreman grav.

19. Kwa ki kapab ed nou pour reste determinen pour pa komet adilter?

¹⁹ Me eski keksoz i diferan ozordi? Menm si nou nepli anba Lalwa Moiz, Zeova pa’n sanz son pwennvi lo adilter. Zis parey nou pa pou zanmen ador en fo bondye ozordi, nou pa devret zanmen vin enfidel avek nou konzwen. (Psonm 51:1, 4; Kolosyen 3:5) Si nou tronp nou konzwen, nou pa pou onor nou maryaz ek nou Bondye, Zeova.​—Vwar Lezot lenformasyon nimero 26.

20. Ki en dimoun saz pou fer dan son lavi maryaz?

²⁰ Ki mannyer ou kapab fer ou maryaz pli for? Parol Bondye i dir: “Avek lasazes ki en lakaz i ganny konstrir; e avek [bon zizman] i vin solid.” (Proverb 24:3) Par egzanp, en lakaz i kapab vid e vilenn oubyen i kapab an sekirite, konfortab e byen zoli. I parey dan en maryaz. En dimoun saz pou fer sir ki son maryaz i stab, agreab e ki zot lavi konman en koup i gou.

21. Ki mannyer konnesans i kapab fer en maryaz pli for?

²¹ Labib i kontinyen koz lo sa lakaz, i dir: “Bann lasanm i ganny meble avek [konnesans], avek bann lobze presye e zoli.” (Proverb 24:4) Sa ki ou aprann dan Parol Bondye pou kapab sanz ou lavi maryaz pour le meyer. (Romen 12:2; Filipyen 1:9) Konman en koup, lir Labib ek nou piblikasyon ansanm e diskit lo konman zot kapab aplik sa ki zot pe aprann. Rod diferan fason pour demontre lanmour ek respe anver kanmarad. Mazin osi diferan keksoz ki zot kapab fer pour montre ki zot pe mazin e pran swen avek kanmarad. Demann Zeova pour ed ou devlop bann kalite ki pou fer ou maryaz pli for e ki pou fer ou konzwen pli kontan ou ankor.​—Proverb 15:16, 17; 1 Pyer 1:7.

22. Akoz nou devret kontan, respekte e onor nou konzwen?

²² Nou devret fer tou sa ki nou kapab pour kontan, respekte e onor nou msye oubyen madanm. Sa pou fer ki nou maryaz pou vin pli solid. Pli enportan ankor, nou pou fer Zeova kontan.​—Psonm 147:11; Romen 12:10.