Lekel ki pe diriz pep Bondye ozordi?

1, 2. Ki bann zapot ti pe demande ler Zezi ti mont dan lesyel?

BANN zapot ti lo Montanny Pye Zoliv pe get zot met ek zanmi, Zezi, anmezir ki i ti mont dan lesyel e en nyaz ti kouver li. (Akt 1:9, 10) Pour apepre de-z-an, Zezi in ansenny zot, ankouraz zot e diriz zot, me aprezan i ti nepli la. Ki zot ti pou fer?

² Avan i ti al dan lesyel, Zezi ti dir son bann disip: “Zot pou vin mon bann temwen Zerizalenm, partou dan Zide ek Samari e ziska dan bann landrwa pli elwannyen lo later.” (Akt 1:8) Ki mannyer zot ti pou kapab fer sa travay? Zezi ti promet ki lespri sen Bondye ti pou ed zot. (Akt 1:5) Me lekel ki pou diriz zot e organiz sa travay predikasyon dan lemonn antye? Bann zapot ti konnen ki Zeova ti’n servi bann zonm pour gid Izrael dan lepase. Alor la aprezan zot ti pe demann zot lekor si Zeova ti pou swazir en nouvo sef.

 3. (a) Ki desizyon enportan bann zapot fidel ti fer ler Zezi ti al dan lesyel? (b) Ki kestyon nou pou reponn dan sa lartik?

³ Deswit apre ki Zezi ti mont dan lesyel, son bann disip ti verifye dan Lekritir, demann Bondye led dan lapriyer e swazir Matyas pour ranplas Zida Iskaryot konman sa douzyenm zapot. (Akt 1:15-26) Akoz sa ti en desizyon vreman enportan pour zot e pour Zeova? Parski bann disip ti realize ki i ti bezwen annan 12 zapot.a (Vwar not.) Zezi ti’n swazir bann zapot e form zot pour en rol enportan parmi pep Bondye. Ki sa rol e ki mannyer Zeova ek Zezi ti prepar zot pour sa? Ki laranzman ki i annan ozordi ki parey dan letan Zezi? Ki mannyer nou kapab ‘rapel sa bann ki pe dirize’ parmi nou, espesyalman “lesklav fidel e pridan”?​—Ebre 13:7; Matye 24:45.

 4. Ki rol bann zapot ek lezot ansyen Zerizalenm ti annan?

⁴ Bann zapot ti konmans diriz kongregasyon Kretyen Lapannkot lannen 33. Labib i dir ki: “Pyer ek sa onz zapot ti debout” e ansenny bann laverite ki kapab sov lavi avek en gran lafoul dimoun. (Akt 2:14, 15) Bokou dimoun dan sa lafoul ti vin Kretyen. Apre sa, sa bann nouvo Kretyen “ti kontinyen aprann avek bann zapot.” (Akt 2:42) Sa bann zapot ti responsab lafason ki larzan kongregasyon ti ganny servi. (Akt 4:34, 35) Zot ti osi ansenny pep Bondye e priy pour zot par dir: “Nou pou dedye nou letan pour priye e ansenny parol Bondye.” (Akt 6:4) An plis, zot ti anvoy bann Kretyen eksperyanse pour pres dan bann nouvo teritwar. (Akt 8:14, 15) Pli tar, lezot ansyen ki ti’n ganny swazir ti zwenn bann zapot pour ede dirize dan kongregasyon. Konman konsey direkter, zot ti diriz tou bann kongregasyon.​—Akt 15:2.

5, 6. (a) Ki mannyer lespri sen ti donn pouvwar konsey direkter? (Vwar portre o konmansman sa lartik.) (b) Ki mannyer bann lanz ti ed konsey direkter? (c) Ki mannyer Parol Bondye ti gid konsey direkter?

⁵ Dan premye syek, bann Kretyen ti konnen ki Zeova ti pe diriz konsey direkter atraver Zezi. Ki mannyer zot ti kapab asire ki sa ti vre? Premyerman, lespri sen ti donn konsey direkter pouvwar pour azir. (Zan 16:13) Tou bann Kretyen swazir ti ganny lespri sen, me lespri sen ti spesifikman donn pouvwar bann zapot ek bann ansyen Zerizalenm pour desarz zot rol konman bann sirveyan. Par, egzanp dan lannen 49, lespri sen ti gid konsey direkter pour fer en desizyon konsernan sirkonsizyon. Bann kongregasyon ti aksepte sa desizyon. Sa ti fer ki “lakantite disip ti ogmante zour apre zour.” (Akt 16:4, 5) Atraver sa let pour bann kongregasyon konsernan sirkonsizyon, nou kapab vwar ki konsey direkter ti annan lespri sen Bondye e ti demontre bann kalite parey lanmour ek lafwa.​—Akt 15:11, 25-29; Galat 5:22, 23.

⁶ Dezyenmman, bann lanz ti ed konsey direkter. Par egzanp, en lanz ti dir Korney rod zapot Pyer. Apre ki Pyer ti pres avek Korney ek son fanmir, zot ti ganny lespri sen menm si zot pa ti’n ganny sirkonsi. Alor Korney ti premye parmi bann ki pa ti sirkonsi dan lezot nasyon, pour vin Kretyen. Ler lezot zapot ek lezot frer ti tann sa, zot ti aksepte lavolonte Bondye e akey bann dimoun ki pa sirkonsi dan lezot nasyon, dan kongregasyon Kretyen. (Akt 11:13-18) Alor sa i montre ki bann lanz ti siport sa travay predikasyon ki konsey direkter ti pe dirize. (Akt 5:19, 20) Trwazyenmman, Parol Bondye ti gid konsey direkter. Sa bann zonm ti servi Lekritir pour ed zot fer bann desizyon enportan konsernan krwayans bann Kretyen e pour diriz kongregasyon.​—Akt 1:20-22; 15:15-20.

 7. Akoz nou kapab dir ki Zezi ki ti pe gid bann premye Kretyen?

⁷ Menm si konsey direkter ti annan lotorite dan kongregasyon, bann frer ek ser ti konpran ki Zezi Kri ti zot Sef. Ki mannyer nou konn sa? Zapot Pol ti dir ki Kris ki ti swazir “serten konman zapot.” I ti osi dir ki Kris ti “sef” kongregasyon. (Efezyen 4:11, 15) Dan plas donn zot larelizyon non en zapot, “bann disip ti ganny apele Kretyen atraver gidans Bondye.” (Akt 11:26) Pol ti konnen ki i ti enportan pour swiv bann lansennyman baze lo Labib ki sorti kot bann zapot ek lezot zonm ki ti pe dirize. Pol ti dir: “Me mon anvi zot konnen ki Kris i sef tou zonm.” Sa parol i aplik pour tou manm konsey direkter. Apre Pol ti azoute: “Bondye i sef Kris.” (1 Korentyen 11:2, 3) Pa i kler ki Zeova in swazir son Garson, Zezi Kri, pour diriz kongregasyon!

8, 9. Ki rol enportan Frer Russell ti annan?

⁸ Konmansman lannen 1870, Charles Taze Russell ek detrwa son bann zanmi ti konmans esey ador Bondye dapre Labib e ed lezot osi pour fer parey. Sa ti enkli ed bann dimoun ki koz lezot langaz. Alor Zion’s Watch Tower Tract Society ti ganny formen legalman an 1884 e Frer Russell ti vin prezidan.b (Vwar not.) I ti etidye byen Labib e i pa ti per pour dir lezot ki bann lansennyman dan legliz tel parey Trinite e nanm imortel pa baze lo Labib. I ti aprann ki retour Kris ti pou envizib e ki “letan fikse bann nasyon” ti pou fini an 1914. (Lik 21:24) Frer Russell ti servi son letan, lenerzi ek larzan pour ansenny lezot laverite. I kler ki Zeova ek Zezi ti servi Frer Russell pour dirize dan en letan enportan dan listwar.

⁹ Frer Russell pa ti oule ki dimoun i donn li okenn latansyon spesyal. An 1896, i ti ekri ki li ek lezot zonm responsab pa ti anvi okenn loner. Zot pa ti anvi okenn tit spesyal e zot pa ti oule ki okenn group i ganny apele par zot non. Pli tar i ti dir: “Sa i pa travay zonm.”

10. (a) Kan ki Zezi ti apwent “lesklav fidel e pridan”? (b) Eksplike ki mannyer Konsey Direkter ti diferan avek Watch Tower Society.

¹⁰ An 1919, trwa-z-an apre lanmor frer Russell, Zezi ti apwent “sa lesklav fidel e pridan.” Akoz i ti fer sa? Pour donn son bann disip “manze dan sa moman apropriye.” (Matye 24:45) Menm pandan sa bann premye lannen, en pti group frer swazir kot biro prensipal Temwen Zeova Brooklyn, New York, Leta-z-ini, ti donn nouritir spirityel bann disip Zezi. Sa lekspresyon konsey direkter ti konmans aparet dan nou bann piblikasyon apre 1940. Sa letan konsey direkter ti annan en lyen direk avek bann direkter Watch Tower Bible and Tract Society. Par kont, an 1971 i ti kler ki Konsey Direkter ti diferan avek Watch Tower Society ki ti responsab zis pour bann zafer legal. Depi sa letan, bann frer swazir ti kapab form parti Konsey Direkter san ki zot ti vin bann direkter dan Lasosyete. Tou resaman, bann frer responsab parmi “lezot mouton” i kapab vin direkter Watch Tower Society ek lezot departman ki pep Bondye i servi. Sa i fer ki Konsey Direkter i kapab konsantre lo donn bann lenstriksyon ek konsey sorti dan Labib. (Zan 10:16; Akt 6:4) Latour Veyer le 15 Zilyet 2013 ti eksplike ki “lesklav fidel e pridan” i en pti group frer swazir ki form parti Konsey Direkter.

11. Ki mannyer Konsey Direkter i fer bann desizyon?

¹¹ Konsey Direkter i fer bann desizyon enportan konman en group ler son bann manm i zwenn ansanm sak semenn. Sa i ed zot pour annan en bon kominikasyon e reste ini. (Proverb 20:18) Napa en manm Konsey Direkter ki pli enportan ki en lot, alor sak lannen sakenn son tour i diriz sa bann renyon. (1 Pyer 5:1) Sa i osi leka pour sa sis komite Konsey Direkter. Napa personn lo Konsey Direkter ki santi ki i sef son bann frer. Sakenn parmi zot i osi en serviter ki ganny manze spirityel avek lesklav fidel e zot swiv son gidans.

12. Ki bann kestyon nou pou reponn?

¹² Konsey Direkter pa parfe e i pa ganny enspire par Bondye. I kapab fer fot ler i eksplik Labib oubyen diriz lorganizasyon. Par egzanp, dan Watch Tower Publications Index i annan sa size, “Beliefs Clarified,” ki donn en lalis bann azisteman dan nou konprenezon lo Labib depi 1870. Zezi pa ti dir nou ki son lesklav fidel e pridan ti pou donn nou nouritir ki spirityel parfe. Alor ki mannyer nou kapab reponn kestyon Zezi “Lekel vreman sa lesklav fidel e pridan?” (Matye 24:45) Kwa ki montre ki Konsey Direkter i sa lesklav fidel? Annou vwar sa trwa menm keksoz ki ti ed konsey direkter dan letan bann zapot.

13. Ki mannyer lespri sen in ed Konsey Direkter?

¹³ Lespri sen ti ed Konsey Direkter. Lespri sen in ed Konsey Direkter pour konpran laverite dan Labib ki nou pa ti konpran avan. Par egzanp, annou vwar sa lalis bann krwayans anba sa size Beliefs Clarified ki nou’n fek koz lo la. Okenn imen pa ti pou kapab eksplik sa bann “keksoz profon konsernan Bondye” lo li menm. (Lir 1 Korentyen 2:10.) Konsey Direkter i santi parey zapot Pol ki ti ekri: “Nou osi koz lo sa bann keksoz, me pa avek bann parol ki nou’n aprann atraver lasazes imen, me avek bann parol ki nou’n aprann gras a lespri sen.” (1 Korentyen 2:13) Pour plizyer santenn lannen, in annan bann fo lansennyman e i ti napa en bon direksyon, toudmenm, akoz depi 1919 in annan en sitan gran amelyorasyon dan nou konprenezon lo Labib? Sel rezon i parski Bondye ti pe ede avek son lespri sen!

14. Dapre Revelasyon 14:6, 7, ki mannyer bann lanz i ed Konsey Direkter ek pep Bondye ozordi?

¹⁴ Bann lanz i ed Konsey Direkter. Konsey direkter i annan sa gro responsabilite pour diriz plis ki wit milyon proklanmater dan sa travay predikasyon ki pe ganny fer dan lemonn antye. Akoz sa travay in sitan reisi? En rezon i akoz bann lanz pe ede dan sa travay. (Lir Revelasyon 14:6, 7.) Dan bokou ka, bann lanz in diriz bann proklanmater kot en dimoun ki’n fek priye pour ganny led Bondye!c (Vwar not.) Sa travay predikasyon ek lansennyman i kontinyen agrandi menm kot i annan lopozisyon entans. Sa i osi posib gras a led bann lanz.

15. Ki mannyer Konsey Direkter i diferan avek bann dirizan legliz? Donn en legzanp.

¹⁵ Parol Bondye i gid Konsey Direkter. (Lir Zan 17:17.) Annou vwar sa ki ti arive an 1973. Latour Veyer le 1 Zen an Angle ti demande si “dimoun ki pa ti kapab aret fimen ti kapab batize.” Larepons ki ti baze lo bann prensip Labib ki sa Latour Veyer ti donnen ti, non! Sa Latour Veyer ti sit plizyer verse Labib pour eksplike akoz en dimoun ki pa aret fimen i devret ganny ekskli dan kongregasyon. (1 Korentyen 5:7; 2 Korentyen 7:1) I ti dir ki sa standar drwat pa sorti kot imen me “kot Bondye ki eksprim son lekor atraver son parol ki’n ganny ekrir.” Napa en lot lorganizasyon relizye ki volonterman pare pour depan antyerman lo Parol Bondye menm si ler zot pe fer sa i kapab vreman difisil pour serten son bann manm. En nouvo liv ki koz lo larelizyon Leta-z-ini i dir: “Bann dirizan legliz in regilyerman adapte zot lansennyman dapre krwayans ek lopinyon bann manm zot legliz ek bann ki dan lasosyete.” Par kont, Konsey Direkter pa ganny gide par sa ki laplipar dimoun i kontan. O kontrer, son bann manm i ganny gide par Parol Bondye, ki montre ki Zeova i sa enn ki pe gid son pep ozordi.

16. Nonm en fason ki nou kapab mazin Konsey Direkter?

¹⁶ Lir Ebre 13:7. Labib i dir “rapel sa bann ki pe diriz zot.” En fason ki nou kapab fer sa i par mansyonn Konsey Direkter dan nou lapriyer. (Efezyen 6:18) Zot annan bokou responsabilite ki enkli donn nou manze spirityel, diriz sa travay predikasyon dan lemonn antye e byen servi bann donasyon ki lorganizasyon i gannyen. Pa sa i montre ki nou vreman bezwen priy pour zot regilyerman!

17, 18. (a) Ki mannyer nou swiv gidans Konsey Direkter? (b) Ki mannyer nou predikasyon i siport Konsey Direkter ek Zezi?

¹⁷ Nou osi kapab rapel Konsey Direkter par swiv son bann lenstriksyon ek gidans. Konsey Direkter i diriz nou atraver nou bann piblikasyon, renyon ek lasanble. I osi apwent bann sirveyan rezyonal, ki apre apwent bann ansyen. Ler bann ansyen ek sirveyan rezyonal i swiv bann lenstriksyon ki Konsey Direkter i donnen, sa i montre ki zot osi zot pe rapel Konsey Direkter. An plis nou tou nou demontre respe pour nou Sef, Zezi ler nou obei sa bann zonm ki i pe servi ozordi.​—Ebre 13:17.

¹⁸ En lot fason ki nou kapab rapel Konsey Direkter i par donn nou meyer dan predikasyon. Ebre 13:7 i ankouraz bann Kretyen pour imit lafwa bann ki pe dirize. Konsey Direkter in demontre ki i annan bokou lafwa par prese e fer konnen sa bonn nouvel avek devouman. Eski nou pe siport sa bann frer dan sa travay vreman enportan? Si wi, nou pou kontan ler Zezi pou dir nou: “Ler zot ti fer sa pour enn ki pli pti parmi mon bann frer, se pour mwan ki zot ti fer li.”​—Matye 25:34-40.

19. Akoz ou determinen pour swiv nou sef Zezi?

¹⁹ Ler Zezi ti retourn dan lesyel i pa ti abandonn son bann disip. (Matye 28:20) I ti konnen ki lespri sen, bann lanz ek Parol Bondye ti ed li dirize ler i ti lo later. I’n donn lesklav fidel menm led ozordi. Konsey Direkter i kontinyen “swiv sa Pti Mouton,” Zezi “partou kot i ale.” (Revelasyon 14:4) Alor, ler nou swiv konsey sorti kot Konsey Direkter, nou pe swiv nou Sef Zezi. Byento, i pou gid nou ver lavi eternel. (Revelasyon 7:14-17) Napa okenn sef imen ki kapab promet sa!