Reziste Lespri sa Lemonn ki pe sanze

“Nou pa’n ganny Lespri dapre lemonn, me nou’n ganny Lespri ki sorti kot Bondye.”—1 KORENTYEN 2:12.

 1. Dan ki fason Ev ti ganny anbete?

“SA SERPAN in anbet mwan.” (Zenez 3:13) Sa i sa ki Ev, sa premye madanm, ti dir pour sey eksplike akoz i ti’n rebel kont Zeova. Sa ki i ti dir ti vre, menm si sa pa ti en leskiz pour sa ki i ti fer. Plitar, zapot Pol ti ganny enspire pour ekrir: “[Ev] ki ti ganny tronpe.” (1 Timote 2:14) Satan ti fer li krwar ki dezobei Bondye par manz sa fri ki i ti’n defann zot manze ti pou benefisye li e fer li vin parey Bondye. I ti’n osi ganny anbete dan lesans ki i pa ti konn vre lidantite sa enn ki ti pe anbet li. I pa ti konn ditou si Satan ki ti pe servi sa serpan pour koz avek li.—Zenez 3:1-6.

 2. (a) Ki mannyer Satan i anbet dimoun ozordi? (b) Kisisa “Lespri dapre lemonn,” e ki kestyon nou pou egzaminen aprezan?

² Depi lepok Adan ek Ev, Satan in kontinyen anbet dimoun. Anfet, i pe “tronp lemonn antye.” (Revelasyon 12:9) Son bann taktik pa’n sanze. Kantmenm i nepli servi en serpan, i pe kontinyen kasyet son lidantite. Satan i servi divertisman, medya, ek lezot mwayen pour fer dimoun krwar ki zot pa ni bezwen gidans Bondye e zot pa ni pou benefisye avek Son gidans. Kanpanny ki Dyab pe fer pour anbet dimoun in kree en leta lespri rebel kont bann lalwa ek prensip Labib. Labib i apel sa leta lespri, “Lespri dapre lemonn.” (1 Korentyen 2:12) Sa leta lespri i annan en tre gran lenfliyans lo krwayans, latitid, ek konportman bann dimoun ki pa konn Bondye. Dan ki fason sa leta lespri i ganny demontre? Konman nou kapab anpes son lenfliyans kontamin nou? Annou vwar.

Prensip moral pe perdi son Valer

 3. Akoz “Lespri dapre lemonn” i pli evidan dan nou letan?

³ “Lespri dapre lemonn” in vin pli evidan dan nou letan. (2 Timote 3:1-5) Petet ou’n remarke ki bann prensip moral pe perdi zot valer. Labib i eksplike akoz sa i leka. Apre ki Rwayonm Bondye ti ganny etabli an 1914, en lager ti deklare dan lesyel. Satan ek son bann lanz demon ti ganny defet e zot ti ganny zete lo later. Akoz sa, Satan i vreman ankoler e i’n entansifye son kanpanny pour anbet otan dimoun partou lo later. (Revelasyon 12:1-9, 12, 17) I pe sey tou sa ki i kapab pour “fer egare si posib, menm bann ki Bondye in swazir.” (Matye 24:24) Vi ki nou pep Bondye, i pe target nou premye. I pe fer tou pour detrir nou spirityalite pour ki nou perdi faver Zeova ek nou lespwar pour viv pour touzour.

 4. Ki mannyer bann serviter Zeova i vwar Labib, e konman lemonn i vwar li?

⁴ Satan pe sey sali repitasyon Labib, sa liv presye ki ansenny nou konsernan nou Kreater ki kontan nou. Bann serviter Zeova i kontan e apresye Labib bokou. Nou konnen ki i Parol enspire Bondye, pa parol zonm. (1 Tesalonisyen 2:13; 2 Timote 3:16) Me lemonn Satan i anvi fer nou mazin tou lekontrer. Par egzanp, dan prefas en liv ki kritik Labib, i dir: “Napa nanryen ki ‘sen’ avek Labib. I pa ni ‘parol Bondye.’ I pa’n ganny ekrir par bann sen ki Bondye in enspire, me par bann pret ki ti pe rod pouvwar.” Bann ki krwar sa, i kapab fasilman vin viktim sa fo konsep ki zot lib pour ador Bondye nenport fason ki zot anvi oubyen pa ador li ditou.—Proverb 14:12.

 5. (a) Ki en ekriven ti dir konsernan bann larelizyon ki ganny asosye avek Labib? (b) Konman ki serten konsep lemonn i diferan avek sa ki Labib i dir? (Enkli bwat lo paz swivan.)

⁵ Bann latak direk e endirek lo Labib, ansanm avek lipokrizi bann larelizyon ki dir zot servi Labib, in anmenn bokou kritik lo larelizyon, enkli larelizyon ki ganny asosye avek Labib. Larelizyon pe ganny atake dan medya e avek bann dimoun byen edike. En ekriven ti fer sa remark: “Dimoun dan bann kiltir popiler i annan en pwennvi negatif lo bann larelizyon Zwif ek Kretyen. Pli bon keksoz ki ou kapab dir lo zot se ki zot paret atiran me zot nepli pratik. Pli move keksoz se ki zot an retar e zot anpes en dimoun devlope entelektyelman e zot bar progre dan domenn syantifik. Lontan dimoun ti mepriz zot me konmela zot sikannen e vin agresif anver zot.” Sa agresivite i souvan sorti kot bann dimoun ki pa krwar Bondye i egziste e ki pa kapab rezonn byen.—Romen 1:20-22.

 6. Ki pwennvi lemonn i annan lo bann aktivite seksyel ki Bondye i vwar mal?

⁶ I pa sirprenan alor ki dimoun pe elwanny zot plis ankor avek bann standar Bondye an sa ki konsern zot konportman. Par egzanp, Labib i dekrir omoseksyalite konman en keksoz “ki fer onte.” (Romen 1:26, 27) I osi dir ki bann ki annan relasyon seksyel san marye ek bann ki fer adilter pa pou erit Rwayonm Bondye. (1 Korentyen 6:9) Pourtan, dan bokou pei sa bann aktivite seksyel pa zis ganny aksepte, me zot osi ganny prezante konman en keksoz atiran dan bann liv, magazin, sanson, film, ek bann progranm televizyon. Sa ki koz kont sa bann pratik i ganny vwar konman bann dimoun ki mank tolerans, ki kontan ziz zot kanmarad, e ki an retar. Olye vwar standar Bondye konman en fason ki i eksprim son konsern ranpli avek lanmour, lemonn i vwar li konman en lobstak ki anpes en dimoun lib e akonpli serten keksoz dan lavi.—Proverb 17:15; Zid 4.

 7. Ki bann kestyon ki nou devret demann nou lekor?

⁷ Dan en lemonn ki pli ale pe vin pli agresif kont Bondye, i ti a byen si nou egzamin nou prop latitid ek prensip moral. Detanzaot, nou devret egzamin nou lekor onnetman e dan lapriyer pour fer sir ki nou pa pe elwannyen ptit-a-pti avek pwennvi ek standar Zeova. Par egzanp, nou kapab demann nou lekor: ‘Eski i annan serten topik diskisyon ki detrwa lannen pase mon ti evite partisip ladan, me ki konmela mon vwar li anmizan? Eski mon’n vin pli toleran anver bann pratik ki Bondye pa kontan? Eski mon tant pour pa pran bann keksoz spirityel osi serye ki mon ti pran dan lepase? Eski lafason ki mon viv i montre ki mon pe met lentere Rwayonm premye dan mon lavi?’ (Matye 6:33) Si nou reflesir lo sa bann keksoz, i pou ed nou reziste lespri lemonn.

“Pa les nou ganny antrennen”

 8. Ki mannyer en dimoun i kapab elwannyen avek Zeova?

⁸ Zapot Pol ti ekrir son bann konpanyon Kretyen: “Nou bezwen port en pli gran latansyon pour laverite ki nou’n tande, pour ki nou pa les nou ganny antrennen dan perdisyon.” (Ebre 2:1) En bato ki pe drive pa ariv kot son destinasyon. Si en kaptenn pa fer atansyon divan ek kouran, son bato i kapab fasilman ganny trennen, mank lasose e al rann lapel lo brizan. Pareyman, si nou pa montre nou atantif anver sa laverite ki dan Parol Bondye, nou kapab fasilman ganny antrennen lwen avek Zeova e al savire lo plan spirityel. Pa fodre ki nou rezet laverite konpletman pour nou arive fini koumsa. Anfet, pa bokou dimoun ki rezet Zeova en sel kou e par ekspre. Souvannfwa, zot arive enplike dan en keksoz ki anpes zot donn latansyon Parol Bondye. San ki zot neseserman remarke, zot ganny antrennen dan pese. Parey en kaptenn ki’n tonm dormi, sa bann dimoun pa leve dan zot sonmey avan ki i tro tar.

 9. Konman Zeova ti beni Salomon?

⁹ Konman en legzanp, annou vwar lavi Salomon. Zeova ti konfye li pour vin lerwa Izrael. Bondye ti les Salomon batir tanp e gid li pour ekrir serten parti dan Labib. Zeova ti koz avek li de fwa e i ti donn li larises, popilarite, ek lape pandan son renny. Deplis, Zeova ti donn Salomon en gran lasazes. Labib i dir: “Bondye ti kontinyen donn Salomon en kantite lasazes ek konprenezon e osi i ti konn en kantite keksoz, otan ki bann gren disab obor lanmer. Salomon ti annan en pli gran lasazes ki tou dimoun dan bann pei Les e son lasazes ti pli gran ki lasazes Lezip.” (1 Lerwa 4:21, 29, 30; 11:9) Byensir, nou tou nou ti pou ekspekte Salomon reste fidel avek Bondye. Me non. Salomon ti ganny antrennen dan bann fo ladorasyon. Ki mannyer sa ti arive?

10. Ki lenstriksyon Salomon pa ti obeir e ki ti son rezilta?

¹⁰ Salomon ti konn e konpran byen Lalwa Bondye. San dout, i ti pou annan en pli gran lentere dan bann lenstriksyon ki ti ganny ekrir pour bann ki vin lerwa Izrael. Enn sa bann lenstriksyon ti dir: “[En lerwa] pa devret osi annan en kantite madanm pour ki son leker pa elwannyen.” (Deterononm 17:14, 17) Malgre sa lenstriksyon byen kler, Salomon ti annan mil madanm. Bokou sa bann madanm ti ador bann fo bondye. Nou pa konnen akoz Salomon ti annan sitan en kantite madanm koumsa, e nou pa ni konnen ki mannyer i ti zistifye son lekor pour fer sa. Sa ki nou konnen se ki i ti dezobei lenstriksyon Bondye ki ti byen kler. Ki ti son rezilta? Sanmenm sa ki Zeova ti’n averti ti ariv avek li. Nou lir: “Ptit-a-pti bann madanm [Salomon] . . . ti’n elwanny son leker pour swiv lezot bondye.” (1 Lerwa 11:3, 4) “Ptit-a-pti”—me sirman—sa lasazes ki Salomon ti’n gannyen avek Bondye ti disparet. I ti elwannyen. Avek letan, dezir Salomon pour fer plezir son bann madanm payen ti ranplas son dezir pour obeir e fer plezir Bondye. Sa i vreman domaz, parski Salomon menm ki ti ekrir sa parol pli boner: “Vin saz, mon garson, e rezwir mon leker, pour ki mon a kapab reponn sa enn ki pe provok mwan”!—Proverb 27:11.

Lespri Lemonn i for

11. Konman sa ki nou les antre dan nou lespri i annan en lefe lo nou fason panse?

¹¹ Legzanp Salomon i montre nou ki i danzere pour krwar ki akoz nou konn laverite, bann lenfliyans lemonn pa pou annan okenn lefe lo nou fason panse. Zis parey manze fizik i annan en lefe lo nou lekor, sa ki nou nouri nou lespri avek i annan en lefe lo nou lespri. Sa ki nou nouri nou lespri avek i form nou fason panse ek nou latitid. Se pour sa ki bann lakonpanni i depans plizyer bilyon dolar tou le zan pour fer piblisite zot bann prodwi. Bann bon piblisite i servi byen bann mo ek portre ki pou zwe lo santiman ek dezir bann konsonmater. Bann piblisiter i osi konnen ki normalman vwar en piblisite enn oubyen de fwa pa fer dimoun taye e aste sa prodwi deswit. Me avek letan, apre ki sa piblisite in ganny pase plizyer fwa, souvan bann konsonmater i konmans annan en bon pwennvi lo la. Piblisite i vreman marse. Si non, personn pa ti pou envesti zot larzan ladan. I fer en tre gran lefe lo fason panse ek latitid dimoun an zeneral.

12. (a) Konman ki Satan i enfliyans fason panse bann dimoun? (b) Kwa ki montre ki bann Kretyen i kapab ganny enfliyanse zot osi?

¹² Satan i parey en piblisiter. I promot son bann fason panse dan en fason atiran. I konnen ki avek letan i pou konvenk dimoun pour pans parey li. Atraver bann divertisman ek lezot mwayen, Satan i anbet dimoun par fer zot krwar ki sa ki byen i mal e sa ki mal i byen. (Izai 5:20) Menm bann vre Kretyen in les zot ganny anbete par kanpanny ki Satan pe fer pour mal enform dimoun. Labib i averti: “Lespri i dir klerman ki dan dernyen tan, serten dimoun pou abandonn lafwa pour atas zot avek bann lespri tronper, e swiv bann lansennyman demon. Zot pou les zot ganny anbete par lipokrizi bann manter ki’n ganny marke avek en fer rouz dan zot konsyans.”—1 Timote 4:1, 2; Zeremi 6:15.

13. Kisisa move frekantasyon, e ki mannyer nou frekantasyon i afekte nou?

¹³ Napa personn ki pa kapab ganny afekte avek lespri lemonn. Sa divan ek kouran ki dan lemonn Satan i tre for. Alor, Labib i donn nou sa bon konsey: “Pa les zot ganny anbete: ‘Move frekantasyon i gat repitasyon.’ ” (1 Korentyen 15:33) Move frekantasyon i kapab enkli nenport keksoz oubyen nenport dimoun, menm dan kongregasyon, ki reflekte lespri lemonn. Si nou krwar ki move frekantasyon pa kapab fer nou nanryen, alors nou ti pou kapab osi konklir ki bon frekantasyon pa kapab ed nou. Me sa pa vre ditou! Labib i fer byen kler konsernan sa size: “Sa ki mars avek bann dimoun saz pou vin saz, me sa ki annan relasyon avek bann enbesil pou mal pase.”—Proverb 13:20.

14. Konman nou kapab reziste lespri lemonn?

¹⁴ Pour reziste lespri lemonn, nou bezwen frekant bann dimoun ki saz, bann ki servi Zeova. Nou bezwen ranpli nou lespri avek bann keksoz ki pou batir nou lafwa. Zapot Pol ti ekrir: “Atas zot avek tou sa ki vre, tou sa ki onorab, sa ki zis, sa ki pir, sa ki bon, sa ki agreab, sa ki ekselan, tou sa ki merit felisitasyon; mazin tou sa bann keksoz.” (Filipyen 4:8) Vi ki nou’n ganny kree avek sa abilite pour swazir ant sa ki byen ek sa ki mal, nou kapab swazir ki keksoz ki nou pou mazin lo la. Annou toultan swazir pour reflesir lo bann keksoz ki pou anmenn nou pli pros avek Zeova.

Lespri Bondye i pli for

15. Konman ki bann Kretyen dan ansyen Korent ti diferan avek lezot dimoun dan sa lavil?

¹⁵ Kontrerman avek bann ki ganny anbete avek lespri lemonn, bann vre Kretyen i ganny gide par lespri sen Bondye. Pol ti pe adres avek kongregasyon an Korent kan i ti ekrir: “Nou, nou pa’n ganny Lespri dapre lemonn, me nou’n ganny Lespri ki sorti kot Bondye, pour ki nou konpran tou bann don ki Bondye in donn nou.” (1 Korentyen 2:12) Ansyen Korent ti en lavil ki ti’n ganny enfeste par lespri lemonn. Laplipar son bann zabitan ti sitan dezord ki sa lekspresyon ‘viv parey en Korentyen’ ti vedir “annan en lavi imoral.” Satan ti’n avegle lespri sa bann dimoun. Se pour sa ki zot pa ti konpran preski nanryen konsernan sa vre Bondye. (2 Korentyen 4:4) Me par mwayen son lespri sen, Zeova ti ouver lizye serten Korentyen ki ti permet zot pour ganny konnesans lo laverite. Son lespri ti pous e gid zot fer bann sanzman remarkab dan zot lavi pour zot ganny son laprouvasyon ek benediksyon. (1 Korentyen 6:9-11) Kantmenm lespri lemonn ti for, lespri Zeova ti pli for.

16. Ki mannyer nou kapab resevwar e gard lespri Bondye?

¹⁶ I ankor touzour parey ozordi. Lespri sen Zeova i lafors pli for dan liniver. Avek gran ker, Zeova i pare pour donn li avek tou sa ki demann avek lafwa. (Lik 11:13) Me pour ganny lespri Bondye, nou pa zis bezwen reziste lespri lemonn. Nou bezwen osi regilyerman etidye e aplik Parol Bondye pour ki nou lespri, setadir nou fason panse, i vin an armoni avek sa ki pour li. Si nou fer sa, Zeova pou fortifye nou pour reziste okenn taktik ki Satan i servi pour detrir nou spirityalite.

17. Konman ki leksperyans Lot i kapab rekonfort nou?

¹⁷ Kantmenm bann Kretyen pa form parti lemonn, zot viv dan lemonn. (Zan 17:11, 16) Napa personn antre nou ki kapab evit lespri lemonn konpletman. Sa i akoz petet nou travay oubyen menm viv avek bann ki pa kontan Bondye ek son bann prensip. Eski nou santi parey Lot, ki ti “byen sagrinen,” menm soufer, akoz bann move keksoz ki bann dimoun ti fer an Sodonm kot i ti reste? (2 Pyer 2:7, 8) Si wi, nou kapab ganny rekonforte. Zeova ti protez e sov Lot. I kapab fer sa pour nou osi. Nou Papa lanmour i vwar e konn nou sitiasyon. I kapab ed nou e donn nou lafors ki nou bezwen pour gard nou spirityalite. (Psonm 33:18, 19) Si nou depan lo li, annan konfyans dan li, e apel li, i pou ed nou reziste lespri lemonn, kantmenm nou kapab dan sitiasyon pli difisil.—Izai 41:10.

18. Akoz nou devret seri nou relasyon avek Zeova?

¹⁸ Dan en lemonn ki’n elwannyen avek Bondye e ki’n ganny anbete avek Satan, nou pep Bondye nou’n ganny beni avek en konnesans lo laverite. Alors, nou resanti en lazwa ek lape ki lemonn napa. (Izai 57:20, 21; Galat 5:22) Nou vreman apresye nou lespwar merveye pour viv pour touzour dan Paradi, kot lespri sa lemonn ki pe mor pou nepli la. Alors, annou seri nou relasyon presye avek Bondye e annou pare pour koriz okenn tandans ki ti a kapab fer nou elwannyen spirityelman. Annou apros pli pre avek Zeova, e i pou ed nou pour reziste lespri lemonn.—Zak 4:7, 8.

Eski ou kapab eksplike?

• Konman ki Satan in anbet dimoun?

• Ki mannyer nou kapab evite elwannyen avek Zeova?

• Kwa ki montre ki lespri lemonn i for?

• Ki mannyer nou kapab ganny e gard lespri Bondye?

[Tablo lo paz 24]

LASAZES LEMONN KONT LASAZES BONDYE

I depan lo sak dimoun pour deside kwa ki laverite pour li.

“Parol [Bondye] i laverite.”—Zan 17:17.

Depan lo ou santiman pour konnen kwa ki byen e kwa ki mal.

“Leker i pli tret ki okenn keksoz e i tre move.”—Zeremi 17:9.

Fer sa ki ou anvi.

“I pa pour imen ki pe marse pour diriz son lepa.”—Zeremi 10:23.

Larises i lakle pour en lavi ere.

“Lanmour larzan i rasin tou lemal.”—1 Timote 6:10.

[Portre lo paz 23]

Salomon ti elwannyen avek vre ladorasyon e i ti tourn ver bann fo bondye