Avans ver matirite, “gran zour Zeova i pros”

“Annou avanse pour ariv dan en matirite.”—EBR. 6:1.

1, 2. Kan ki bann Kretyen dan premye syek ki ti Zerizalenm ek Zide ti ganny loportinite pour “sov dan montanny”?

KAN Zezi ti lo later, son bann disip ti apros li e demann li: “Ki siny ki pou endik ou [“prezans ek konklizyon sa sistenm,” NW]”? Premye lakonplisman sa profesi ki Zezi ti prononse pour reponn zot kestyon ti ariv dan premye syek. Zezi ti koz lo en levennman ki pa’n zanmen arive oparavan ki ti pou averti zot ki lafen ti pros pour arive. Ler zot ti pou remark sa siny, “bann ki dan Zide, [ti pou bezwen] sov dan montanny.” (Mat. 24:1-3, 15-22) Eski bann disip Zezi ti pou rekonnet sa siny e swiv lenstriksyon Zezi?

² Lannen 61 N.L., apepre trant an pli tar, zapot Pol ti ekrir en mesaz ki fer reflesir e azir vitman, pour bann Kretyen Ebre ki ti pe viv Zerizalenm e dan zalantour. Zapot Pol ek son bann frer ek ser Kretyen pa ti konnen ki sa levennman ki ti pou mark konmansman en “gran ladetres” ti pou ariv dan ankor senk an. (Mat. 24:21, NW) An 66 N.L., Sestis Galis ti diriz larme Romen dan en latak ki ti pros pour reisi, kont Zerizalenm. Me apre sa, en sel kou i ti ale e tou bann ki ti an danze ti ganny sa loportinite pour sove pour al rod refiz.

3. Ki lankourazman zapot Pol ti donn bann Kretyen Ebre e akoz?

³ Sa bann Kretyen ti bezwen servi byen zot disernman ek konprenezon spirityel pour zot kapab rekonnet bann sanzman dan bann levennman e sove. Me serten ti “lapenn konpran.” Lo plan spirityel zot ti ankor bann pti baba ki ti bezwen “dile.” (Lir Ebre 5:11-13.) Menm serten parmi bann dimoun ki oparavan ti’n mars dan semen laverite pour plizyer lannen, ti pe viv dan en fason ki montre ki zot ti’n “tourn zot ledo avek Bondye vivan.” (Ebr. 3:12) Serten ti annan sa “labitid” pour mank bann renyon sa letan kot sa “Zour Senyer [ti] pe aprose.” (Ebr. 10:24, 25) Zapot Pol ti donn zot en lankourazman dan sa moman apropriye par dir ki la ki zot ti’n “les deryer [zot] sa lansennyman elemanter lo Kris, . . . avanse pour ariv dan en matirite.”—Ebr. 6:1.

4. Akoz i enportan pour reste eveye spirityelman e kwa ki pou ed nou fer sa?

⁴ Nou pe viv dan sa letan kot profesi Zezi pe trouv son dernyen lakonplisman. “Gran zour Zeova,” setadir sa zour kot Zeova pou detrir sistenm Satan an antye, “i pros.” (Tsef. 1:14) Plis ki zanmen oparavan nou devret reste eveye e vizilan spirityelman. (1 Pyer 5:8) Eski nou pe vreman fer sa? Si nou en Kretyen ki matir spirityelman, sa pou ed nou gard antet ki letan nou pe viv ladan.

Ki savedir vin matir spirityelman

5, 6. (a) Ki i enplike pour vin matir spirityelman? (b) Avans ver matirite i demann zefor dan ki laspe?

⁵ Zapot Pol pa ti zis ankouraz bann Kretyen Ebre dan premye syek pour avans ver matirite, i ti osi dir zot kwa ki enplike pour vin matir spirityelman. (Lir Ebre 5:14.) “Bann adilt” pa kontant zot zis avek “dile.” Zot pran “nouritir solid.” Alor, zot konn bann “lansennyman elemanter” ensi ki “plan Bondye pli sekre” oubyen pli profon lo laverite. (1 Kor. 2:10) Deplis, zot abilite pour fer ladiferans i ganny antrennen par leksperyans, zot aplik sa ki zot konnen e sa i ed zot pour disteng sa ki byen ek sa ki mal. Kan zot annan en desizyon pour fer, sa lantrennman i ed zot pour rekonnet ki prensip Labib ki enplike e konman pour aplik zot.

⁶ Zapot Pol ti ekrir: “Nou bezwen port en pli gran latansyon pour laverite ki nou’n tande, pour ki nou pa les nou ganny antrennen dan perdisyon.” (Ebr. 2:1) I kapab arive ki nou ganny antrennen dan perdisyon san ki nou realize. Pour nou pa eksperyans sa, nou pou bezwen port “en pli gran latansyon” ki labitid ler nou pe etidye bann laverite ki dan Labib. Alor, sakenn ant nou i bezwen demann son lekor: ‘Eski mon ankor pe egzamin zis bann keksoz elemanter? Eski mon pe zis senpleman fer li par routin, anler anler, san ki mon leker i antyerman enplike ladan? Ki mannyer mon kapab progrese spirityelman?’ Avans ver matirite i demann bokou zefor lo nou par dan omwen de laspe. Nou bezwen byen familye avek Parol Bondye e nou bezwen aprann lobeisans.

Familyariz ou avek Parol Bondye

7. Ki mannyer nou kapab benefisye ler nou vin pli familye avek Parol Bondye?

⁷ Zapot Pol ti ekrir: “En dimoun ki ankor pe nouri avek dile i ankor en zanfan, i napa leksperyans konsernan sa ki byen ek sa ki mal.” (Ebr. 5:13) Pour arive vin matir, nou bezwen familyariz nou avek parol Bondye, sa mesaz ki i annan pour nou. Vi ki sa mesaz i ganny trouve dan son Parol, Labib, nou bezwen etidye byen Lekritir ek bann piblikasyon sorti kot “lesklav fidel e pridan.” (Mat. 24:45-47, NW) Si nou etidye dan sa fason, nou pou nobou aprann ki mannyer Bondye i panse e i pou osi ed nou pour antrenn nou abilite pour fer ladiferans. Egzamin legzanp en ser ki apel Orchid.a I ti dir: “Sa rapel ki’n annan plis lefe lo mon lavi i sa enn konsernan lektir Labib regilye. I’n pran mwan apepre de-z-an pour fini lir Labib antye e i ti paret ki mon ti pe rankontre mon Kreater pour premye fwa. Mon’n aprann lo son fason azir, sa ki i kontan e sa ki i pa kontan, kapasite son pwisans ek profonder son lasazes. Lektir Labib sak zour in soutenir mwan pandan bann moman difisil dan mon lavi.”

8. Ki lefe Parol Bondye i kapab annan lo nou?

⁸ Kan nou lir Parol Bondye regilyerman sa i permet ki son mesaz i “annan pisans” lo nou. (Lir Ebre 4:12.) Sa kalite lektir i kapab moul sa dimoun ki nou ete anndan e fer nou vin pli atiran dan lizye Zeova. Eski personnelman ou pou bezwen met plis letan dekote pour lir Labib e medit lo sa ki i dir?

9, 10. Familyariz nou avek Parol Bondye i enplik kwa? Donn legzanp.

⁹ Vin familye avek Labib i enplik plis ki senpleman konn sa ki i dir. Bann dimoun dan letan zapot Pol ki ti resanble bann pti baba lo plan spirityel, pa ti neseserman pa familye totalman avek Parol enspire Bondye. Plito, zot pa ti pe aplik sa ki zot ti konnen e teste son valer pour vwar son benefis ki i anmennen dan zot lavi. Zot pa ti familyariz zot avek sa mesaz e les li gid zot pour ki zot kapab fer bann desizyon saz dan zot lavi.

¹⁰ Familyariz nou avek Parol Bondye i vedir, konn sa ki i dir e met sa konnesans an pratik. Leksperyans en ser Kretyen ki apel Kyle i montre ki mannyer sa i kapab ganny fer. Kyle ti’n dispit avek enn son koleg travay. Ki i ti fer pour rezourd sa problenm? I ti eksplike: “Sa verse ki ti deswit vin dan mon lespri ti Romen 12:18, ki dir: ‘Fer tou sa ki depann lo ou pour viv anpe avek tou dimoun.’ Alor mon ti fer laranzman pour zwenn sa koleg apre travay.” Sa rankont ti annan en gran sikse e sa koleg travay ti enpresyonnen lefet ki Kyle ti’n pran sa pa. Kyle ti dir: “Mon’n aprann ki ler nou aplik bann prensip Labib sa i sa pli bon keksoz pour fer.”

Aprann obeir

11. Kwa ki montre ki lobeisans dan bann moman difisil i kapab en defi?

¹¹ I kapab en defi pour aplik sa ki nou’n aprann dan Lekritir, sirtou kan sirkonstans i difisil. Par egzanp, pa tro bokou letan apre ki Zeova ti’n liber nasyon Izrael anba lesklavaz dan lanmen bann Ezipsyen, zot ti “konmans konplent avek Moiz” e kontinyen “teste Zeova.” Akoz? Parski zot ti napa delo pour bwar. (Egz. 17:1-4) Mwens ki de mwan apre ki zot ti’n fer en lalyans avek Bondye e dakor pour obeir “tou parol ki Zeova [ti’n] dir,” zot ti dezobeir son lalwa lo idolatri. (Egz. 24:3, 12-18; 32:1, 2, 7-9) Eski zot ti telman per lefet ki Moiz ti absan pour en pe letan ler i ti pe ganny bann lenstriksyon lo Montanny Oreb? Eski petet zot ti krwar ki bann Amalekit ti pou atak zot ankor e ki zot ti pou fay san Moiz, sa enn ki pli boner par son lanmen ki ti reste anler ti fer zot ganny laviktwar? (Egz. 17:8-16) Sa i posib, me nenport ki rezon zot ti annan, bann Izraelit ti “refize obei.” (Akt 7:39-41) Zapot Pol ti ankouraz bann Kretyen pour “fer tou zefor posib” pour evite ‘tonm dan menm dezobeisans’ parey bann Izraelit kan zot ti per pour antre dan Later Promiz.—Ebr. 4:3, 11.

12. Ki mannyer Zezi ti aprann lobeisans e ki byenfe i ti gannyen?

¹² Pour avanse ver matirite Kretyen nou bezwen fer bokou zefor pour obeir Zeova. Parey Zezi Kri in kit legzanp, nou souvan aprann lobeisans par soufrans ki nou pas atraver. (Lir Ebre 5:8, 9.) Avan vin lo later, Zezi ti obeir son Papa. Me fer lavolonte son Papa lo later ti enplik soufrans fizik e mantal. Atraver son lobeisans dan bann moman vreman difisil, Zezi ti kapab “ariv ziska perfeksyon” pour ganny sa nouvo pozisyon ki Bondye ti annan antet pour li e sa se pour vin Lerwa ek Gran Pret.

13. Kwa ki montre ki nou’n aprann lobeisans?

¹³ Me nou? Eski nou determinen pour obeir Zeova menm kan nou fer fas avek bann problenm enkyetan? (Lir 1 Pyer 1:6, 7.) Konsey Bondye i byen kler lo moralite, lonnekte, lafason nou koze, lektir ek letid personnel lo Lekritir, lasistans renyon ek partisipasyon dan travay predikasyon. (Zoz. 1:8; Mat. 28:19, 20; Efe. 4:25, 28, 29; 5:3-5; Ebr. 10:24, 25) Eski nou obeir Zeova dan sa bann laspe, menm kan nou rankontre bann difikilte? Nou lobeisans pou montre ki nou’n progrese ver matirite.

Byenfe kan nou matir spirityelman

14. Donn en legzanp pour montre ki avans ver matirite i kapab en proteksyon.

¹⁴ I vreman en proteksyon pour en Kretyen annan sa abilite pour fer ladiferans ki’n ganny byen antrennen pour li kapab disteng sa ki byen ek sa ki mal dan en lemonn ki’n “perdi tou pider.” (Efe. 4:19) Par egzanp, en frer ki apel James, ki regilyerman lir e apresye en kantite bann piblikasyon baze lo Lekritir, ti aksepte en louvraz kot tou son koleg travay ti bann madanm. James ti dir: “Menm si bokou parmi sa bann madanm ti montre klerman ki zot ti napa okenn valer moral, enn parmi sa bann anplwaye ti paret annan en bon latitid e i ti demontre lentere dan laverite ki dan Labib. Me kan nou ti tousel dan en lasanm prodiksyon, i ti konmans fer bann lapros seksyel anver mwan. Mon ti krwar i ti pe dyok, me mon ti vwar li vreman difisil pour fer li arete. Deswit mon ti rapel en leksperyans dan en Latour Veyer konsernan en frer ki ti ganny en provokasyon parey kot son travay. Sa lartik ti servi legzanp Zozef ek madanm Potifar.b Imedyatman mon ti pous sa fiy laba e i ti taye.” (Zen. 39:7-12) James ti kontan ki nanryen plis ki sa pa ti’n arive e ki i ti annan en konsyans kler.—1 Tim. 1:5.

15. Ki mannyer avans ver matirite i kapab fortifye nou leker senbolik?

¹⁵ En lot byenfe nou gannyen ler nou matir spirityelman, se ki nou fortifye nou leker senbolik e anpes nou “ganny antrennen par tou sort lansennyman drol.” (Lir Ebre 13:9.) Kan nou fer bokou zefor pour progrese spirityelman, nou lespri i reste konsantre lo “sa ki pli enportan.” (Fili. 1:9, 10, NW) Dan sa fason, nou lapresyasyon pour Bondye e pour tou sa ki i’n donn nou pour nou prop dibyen, pou agrandi. (Rom. 3:24) En Kretyen ki “pa fer konman zanfan dan [son] rezonnman” i devlop sa kalite lapresyasyon e i rezwir en relasyon pros avek Zeova.—1 Kor. 14:20.

16. Kwa ki ti ed en ser pour “reste ferm”?

¹⁶ En ser ki apel Louise ti admet ki en pe letan apre son batenm, sa ki ti pli enteres li ti sa lenpresyon ki i ti donn lezot. I ti dir: “Mon pa ti pe fer nanryen mal, me dan mon leker mon ti napa sa gran dezir pour servi Zeova. Mon ti realize ki mon ti devret fer serten sanzman si mon ti anvi santi ki mon ti pe donn tou sa ki mon kapab pour Zeova. Mon ti bezwen met tou mon leker dan son ladorasyon e sa ti pli gran sanzman ki mon ti bezwen fer.” Louise ti fer bokou zefor e sa ti ed li “reste ferm,” ki ti en keksoz esansyel kan i ti eksperyans en problenm lasante enkyetan. (Zak 5:8) Louise ti dir: “Mon’n lalit en kantite, me mon’n vin pros avek Zeova.”

‘Obeir avek tou nou leker’

17. Akoz lobeisans ti vreman enportan dan premye syek?

¹⁷ Konsey zapot Pol pour “avanse pour ariv dan en matirite” ti sov lavi bann Kretyen ki ti pe viv Zerizalenm ek Zide dan premye syek. Bann ki ti pran son konsey aker ti annan sa bon disernman spirityel ki ti neseser pour rekonnet sa siny ki Zezi ti’n donnen pour zot “sov dan montanny.” Kan zot ti vwar sa “dezolasyon abominab . . . debout dan landrwa Sen,” andotmo bann larme Romen ki ti’n anserkle e antre Zerizalenm, zot ti konnen ki la ti lemoman pour zot sove. (Mat. 24:15, 16) Dapre istoryen relizye, Eusebius, bann Kretyen ti kit lavil Zerizalenm avan i ti ganny detrir e zot ti al reste dan lavil Pela ki ti dan rezyon Gilead kot ti annan bokou montanny, pour obeir lavertisman profetik Zezi. Anfet, zot ti’n sov enn parmi bann pli gro dezas ki Zerizalenm ti’n sibir dan son listwar.

18, 19. (a) Akoz lobeisans i vreman enportan dan nou letan? (b) Ki nou pou egzaminen dan prosen lartik?

¹⁸ Lobeisans ki vin atraver matirite pou osi sov lavi kan nou pou fer fas avek lakonplisman final profesi Zezi ki ti dir ki i pou annan “en gran ladetres” ki zanmen in deza arive oparavan. (Mat. 24:21, NW) Eski nou pou pare pour obeir nenport lenstriksyon irzan nou kapab gannyen alavenir sorti kot “sa serviter fidel”? (Lik 12:42) Pa i vreman enportan ki nou aprann pour ‘obeir avek tou nou leker’!—Rom. 6:17.

¹⁹ Nou bezwen antrenn byen nou abilite pour fer ladiferans pour nou kapab vin bann Kretyen matir. Nou fer sa ler nou fer bokou zefor pour byen familyariz nou avek Parol Bondye e aprann obeir. Pour arive vin matir i en gran defi pour bann zenn. Sa lartik ki swiv pou montre konman pour sirmont sa bann defi avek sikse.

[Not anba lo paz]

Ki ou’n aprann?

• Ki si sa matirite spirityel e ki mannyer nou atenn li?

• Ler nou familyariz nou avek Parol Bondye ki rol sa i zwe pour ed nou avans ver matirite?

• Ki mannyer nou aprann lobeisans?

• Dan ki fason matirite i benefisye nou?

[Portre lo paz 15]

Aplik konsey Labib i ed nou pour tret nou problenm avek matirite

[Portre lo paz 16]

Swiv konsey Zezi ti sov lavi bann premye Kretyen