Si nou vir ankor dan liv Zak, nou pou trouv sa bann mo lankourazman: “Eski i annan ki malad [spirityelman] parmi zot? I devre apel bann ansyen dan legliz, e zot a priy pour li e zot a vers delwil lo li o non Senyer. Lapriyer avek lafwa i a sov sa malad, e Senyer i a donn li lasante; e si i’n komet okenn pese i a ganny pardonnen.”—Zak 5:14, 15.

La ankor, bann ansyen dan kongregasyon i ganny demande pour pran swen avek bezwen troupo. Dan ki fason? Pa zis pour ekout bann konfesyon. O kontrer, vi ki sa dimoun ki’n fer pese i malad dan en sans spirityel, bann ansyen i bezwen fer en keksoz pour “sov sa malad.” Zak i mansyonn de keksoz ki zot kapab fer.

Apre, i annan “lapriyer avek lafwa.” Menm si lapriyer bann ansyen pa pou anpes Bondye azir avek lazistis, sa bann lapriyer i enportan pour Bondye, akoz i vreman anvi pardonn nou nou pese lo baz sakrifis Zezi. (1 Zan 2:2) Bondye i pare pour ed nenport peser ki’n senserman repantir e ki pe pratik bann “keksoz ki montre vreman ki [i’n] repanti.”—Akt 26:20.