Eski Bondye i ekspekte nou konfes nou pese?

I ankor touzour en pratik relizye e en form ladorasyon dan bokou legliz pour en dimoun konfes son pese avek en pret ouswa minis relizye. Me dan sa lemonn lesefer kot tou keksoz i ganny tolere, eski i fer sans oubyen menm neseser pour konfes nou pese?

SANTIMAN bann dimoun lo sa size i varye. Par egzanp, dan en lartik dan zournal National Post Kanada i koz lo en dimoun ki admet ki kantmenm i difisil pour dir avek en dimoun en keksoz mal ki ou’n fer, “ou santi ou leze letan ou fer en dimoun konnen e sa dimoun i fer lapriyer avek ou e dir ou sa ki ou bezwen fer.” En liv ki annan pour tit Bless me Father for I Have Sinned (Beni mwan mon per, mon’n fer pese) i sit parol en zonm ki ti dir: “Konfesyon i enn parmi bann krwayans ki vreman annan en move lefe lo bann krwayan. I fer bann dimoun annan sa labitid pour enkyet tro bokou.” Ki Labib i annan pour dir lo sa size?

Sa ki Labib i dir

Dan Lalwa ki Bondye ti donn avek nasyon Izrael, nou trouv bann lenstriksyon spesifik lo sa ki ti merit ganny fer kan en dimoun ti fer pese. Par egzanp, kan en dimoun ti fer pese kont son prosen oubyen kas enn bann lalwa Bondye, i ti merit konfes avek en pret ki ti’n ganny apwente sorti dan tribi Levi. An retour, sa pret ti pou kouver son pese par ofer Bondye en sakrifis pour pardonn son pese.—Levitik 5:1-6.

Detrwa syek plitar, ki mannyer Lerwa David ti reakte ler Natann ti reprimann li pour son pese? I ti deswit admet: “Mon’n fer pese kont Zeova.” (2 Samyel 12:13) I ti osi sipliy Bondye dan lapriyer pour demontre faver anver li. Avek ki rezilta? Plitar David ti ekrir: “Finalman mon ti konfes mon pese avek ou, e mon fot, mon pa ti kasyet. Mon ti dir: ‘Mon pou konfes mon lofans avek Zeova.’ Ou menm, ou’n pardonn mon bann pese.”—Psonm 32:5; 51:1-4.

Dan premye syek Nou Lepok, Bondye ti ankor ekspekte bann Kretyen konfes zot pese. Zak, demi frer Zezi ki ti annan bann responsabilite dan kongregasyon Zerizalenm, ti donn sa lankourazman bann frer ek ser Kretyen: “Konfes zot pese avek kanmarad, priy pour kanmarad, pour ki zot a geri.” (Zak 5:16) Alor, kwa ki bann Kretyen i bezwen konfese e avek lekel?

Kwa ki merit ganny konfese?

Konman bann imen enparfe, tou le zour nou annan sa tandans pour fer bann keksoz san reflesir oubyen mal servi nou lalang. An rezilta, sa i fer nou fer pese kont kanmarad. (Romen 3:23) Eski sa i vedir ki nou merit konfes tou sa bann pti lofans avek en minis relizye.

Menm si tou pese i mal devan lizye Bondye, avek konpasyon i pran an konsiderasyon nou bann fot akoz nou lenperfeksyon. En psalmis ti fer sa remark: “Si ou ti vey bann fot, O Ya, O Zeova, lekel ki ti pou kapab debout devan ou? Akoz vre pardon i sorti kot ou, pour ki nou kapab annan lakrent pour ou.” (Psonm 130:3, 4) Alor, ki nou merit fer kan nou fer pese kont lezot, petet san fer ekspre? Rapel ki sa model lapriyer ki Zezi ti ansenny son bann disip pour fer, i enkli sa demann: “Pardonn nou nou pese, parski nou menm nou pardonn bann ki’n fer nou ditor.” (Lik 11:4) Wi, si nou apros Bondye e demann li pour pardonn nou lo non Zezi, i pou fer li.—Zan 14:13, 14.

Remarke ki Zezi ti dir ki pour nou ganny pardonnen, nou osi nou bezwen pardonn bann “ki’n fer nou ditor.” Zapot Pol ti rapel son bann frer ek ser krwayan: “Vin bon, ranpli avek lafeksyon pour kanmarad; e pardonn kanmarad, parey Bondye in pardonn zot dan Kris.” (Efezyen 4:32) Kan nou pardonn lezot zot fot, nou pou annan bon rezon pour ekspekte Bondye pardonn nou sa ki pour nou.

Me, eski nou merit ekspekte Bondye pardonn nou bann pese grav, par egzanp abiz lalkol, vole, koz manti, limoralite seksyel eksetera? Okenn dimoun ki fer sa bann pese pe kas lalwa Bondye e alor pe fer pese kont Bondye. Ki nou merit fer dan sa ka?

Avek lekel nou merit konfes nou pese?

Bondye pa’n donn okenn zonm lotorite pour pardonn pese ki’n ganny fer kont li. Zis li ki kapab pardonnen. Labib i dir nou klerman: “Si nou konfes nou pese, Bondye ki fidel e zis, pou pardonn nou pese e pirifye nou avek tou sa ki mal.” (1 Zan 1:9) Par kont, avek lekel nou merit konfes sa bann kalite pese?

Vi ki se Bondye selman ki kapab pardonn nou, nou merit konfes nou pese avek li. Se sanmenm sa ki David ti fer, parey nou’n remarke. Me lo ki baz ki nou pou ganny pardonnen? Labib i dir nou: “Alor sanz zot lavi e revin ver Bondye pour ki i a pardonn zot zot pese. Alor Senyer i ava donn zot letan pour renouvle zot lafors spirityel.” (Akt 3:19, 20) Wi, i pa depan selman lo rekonnet ki nou’n fer en pese e konfes sa pese pour nou ganny pardonnen, me nou bezwen pare pour aret fer sa move aksyon. Souvan i difisil pour fer sa pa, me nou kapab ganny led.

Ou rapel parol disip Zak ki nou ti refer avek pli boner: “Konfes zot pese avek kanmarad, priy pour kanmarad, pour ki zot a geri.” I ti osi azoute: “Lapriyer senser en zonm zis i annan en gran pisans.” (Zak 5:16) Sa “zonm zis” ki ganny mansyonnen dan verse 14 i kapab en “ansyen” dan kongregasyon. Dan kongregasyon Kretyen i annan bann “ansyen” oubyen zonm ki matir spirityelman ki’n ganny apwente pour ed bann ki anvi ganny pardonnen avek Bondye. Sa bann “ansyen” pa kapab pardonn pese okenn dimoun, akoz napa okenn zonm ki annan lotorite pour pardonn pese ki en dimoun in fer kont Bondye.a Par kont, zot kalifye spirityelman pour reprimann e redres en dimoun ki’n fer en pese grav, par ed li pour konpran gravite son pese e akoz i bezwen repantir.—Galat 6:1.

Akoz nou bezwen konfes nou pese?

Ki swa sa pese i grav oubyen non, sa dimoun ki’n komet li in gat son relasyon avek son prosen e avek Bondye. An rezilta sa, son konsyans ki son Kreater in donn li i ganny trouble. (Romen 2:14, 15) Ki sa dimoun i kapab fer?

Si nou vir ankor dan liv Zak, nou pou trouv sa bann mo lankourazman: “Eski i annan ki malad [spirityelman] parmi zot? I devre apel bann ansyen dan legliz, e zot a priy pour li e zot a vers delwil lo li o non Senyer. Lapriyer avek lafwa i a sov sa malad, e Senyer i a donn li lasante; e si i’n komet okenn pese i a ganny pardonnen.”—Zak 5:14, 15.

La ankor, bann ansyen dan kongregasyon i ganny demande pour pran swen avek bezwen troupo. Dan ki fason? Pa zis pour ekout bann konfesyon. O kontrer, vi ki sa dimoun ki’n fer pese i malad dan en sans spirityel, bann ansyen i bezwen fer en keksoz pour “sov sa malad.” Zak i mansyonn de keksoz ki zot kapab fer.

Premyerman, i mansyonn “vers delwil.” Sa pe refer avek pouvwar ki Parol Bondye i annan pour geri en dimoun ki malad spirityelman. Zapot Pol ti eksplike ki “Parol Bondye i vivan e i annan pisans . . . I arive desifre tou dezir ek sekre leker imen,” i tous lespri ek leker en dimoun o profon. (Ebre 4:12) Par servi byen Labib, bann ansyen i kapab ed sa dimoun ki malad spirityelman pour vwar kwa ki pe koz sa problenm e pran bann pa apropriye pour met keksoz drwat devan Bondye.

Apre, i annan “lapriyer avek lafwa.” Menm si lapriyer bann ansyen pa pou anpes Bondye azir avek lazistis, sa bann lapriyer i enportan pour Bondye, akoz i vreman anvi pardonn nou nou pese lo baz sakrifis Zezi. (1 Zan 2:2) Bondye i pare pour ed nenport peser ki’n senserman repantir e ki pe pratik bann “keksoz ki montre vreman ki [i’n] repanti.”—Akt 26:20.

Rezon pli enportan pour en dimoun konfes en pese ki i’n fer, swa kont en dimoun oubyen kont Bondye, se pour li kapab annan en bon relasyon avek Bondye. Zezi Kri ti dir ki premyerman nou bezwen fer lape avek nou prosen avan, pour nou kapab ador Bondye avek en bon konsyans. (Matye 5:23, 24) Proverb 28:13 i dir: “Sa enn ki pe kasyet son bann lofans pa pou reisi, me sa enn ki pe konfese e pe kit zot pou ganny demontre mizerikord.” Kan nou abes nou devan lizye Zeova e demann pardon, nou pou ganny son faver e i pou met nou anler.—1 Pyer 5:6.

[Not anba paz]

[Pwen adisyonnel lo paz 30]

Si nou apros Bondye e demann li pardon lo non Zezi, i pou pardonn nou e i pa pou gard nou bann fot an tet

[Portre lo paz 31]

Rezon pli enportan pour en dimoun konfes son pese, se pour li kapab annan en bon relasyon avek Bondye