Asir en lavenir dirab pour ou fanmiy

 1. Ki ti plan Zeova konsernan lafanmiy?

KAN Zeova ti ini Adan ek Ev dan maryaz, Adan ti eksprim son lazwa par resit poenm pli ansyen ki’n rikorde an Ebre. (Zenez 2:22, 23) Me Kreater ti annan lezot keksoz antet ki zis fer plezir son bann zanfan imen. I ti oule ki bann koup marye ek bann fanmiy i fer son lavolonte. I ti dir avek sa premye koup: “Fer zanfan e miltipliye, ranpli later e domin li. Annan kontrol lo bann pwason dan lanmer ek bann kreatir ki anvole dan lesyel ek tou kreatir vivan ki pe marse lo later.” (Zenez 1:28) Vreman, sa ti en travay merveye ki zot ti’n gannyen pour fer! Zis mazin sa boner ki Adan ek Ev osi byen ki zot desandans ti pou’n gannyen si zot ti’n fer lavolonte Zeova par obeir li totalman!

2, 3. Konman bann fanmiy i kapab trouv sa pli gran boner ozordi?

² Ozordi, osi, bann fanmiy i pli zwaye ler zot travay ansanm pour fer lavolonte Bondye. Zapot Pol ti ekrir: “[Latasman avek Bondye, NW] i annan en gran valer dan tou sans, parski i posed promes lavi dan letan prezan, ek dan lavenir.” (1 Timote 4:8) En fanmiy ki atase avek Zeova e ki swiv son gidans ki ganny trouve dan Labib, pou trouv lazwa “dan letan prezan.” (Psonm 1:1-3; 119:105; 2 Timote 3:16) Menm si zis en manm fanmiy ki aplik bann prensip Labib, sitiasyon pou pli meyer ki si personn pa ti pe fer li.

³ Sa liv in diskit bokou prensip Labib ki kontribye pour fer en fanmiy ere. Petet, ou’n remarke ki serten sa bann prensip i aparet plizyer fwa dan sa liv. Akoz? Parski zot en bann laverite pwisan ki itil pour tou dimoun dan diferan laspe lavi fanmiy. En fanmiy ki esey aplik bann prensip Labib, i kapab vwar ki latasman avek Bondye i vreman “posed promes lavi dan letan prezan.” Annou revwar kat parmi sa bann prensip enportan.

 4. Akoz kontrol lo nou prop lekor i esansyel dan lavi maryaz?

⁴ Lerwa Salomon ti dir: “En zonm ki napa kontrol lo son lespri, i parey en lavil san miray ki’n ganny detri.” (Proverb 25:28; 29:11) ‘Kontrol nou lespri,’ oubyen annan kontrol lo nou prop lekor, i esansyel pour bann ki anvi annan en lavi maryaz ere. Si nou les bann santiman destriktif, tel parey lakoler oubyen dezir imoral domin nou, sa pou anmenn bann ditor ki pou pran en kantite lannen pour repare, e menm i kapab pa ganny repare ditou.

 5. Ki mannyer en imen enparfe i kapab annan kontrol lo son prop lekor, e ki byenfe sa i anmennen?

⁵ Byensir, napa okenn desandans Adan ki kapab annan kontrol total lo son lekor enparfe. (Romen 7:21, 22) Kantmenm sa, kontrol lo nou prop lekor i en fri lespri. (Galat 5:22, 23) Alor, lespri Bondye pou ed nou devlop kontrol lo nou prop lekor si nou priy pour sa kalite, si nou aplik konsey apropriye ki ganny trouve dan Labib, e osi si nou asosye avek bann ki demontre sa kalite e evit bann ki pa demontre li. (Psonm 119:100, 101, 130; Proverb 13:20; 1 Pyer 4:7) En tel fason fer, pou ed nou ‘elwanny nou avek bann pratik imoral,’ menm ler nou ganny tante. (1 Korentyen 6:18) Nou pou kapab rezet vyolans e evit oubyen sirmont problenm bwar. Nou pou osi kapab reazir dan en fason kalm ler nou ganny provoke e ler nou rankontre bann sitiasyon difisil. Fotespere ki nou tou, enkli zanfan, i aprann devlop sa laspe enportan fri lespri.​—Psonm 119:1, 2.

 6. (a) Ki laranzman konsernan lotorite ki Bondye in etablir? (b) Ki en zonm i devret rapel si i anvi demontre son lotorite dan en fason ki pou fer son fanmiy ere?

⁶ En lot prensip enportan se rekonnet prensip lotorite. Zapot Pol ti dekrir sa bon laranzman ler i ti dir: “Mon oule ki zot konpran ki Kris i sef tou zonm, ki en mari i sef son madanm e Bondye i sef Kris.” (1 Korentyen 11:3) Sa i vedir ki en zonm i diriz fanmiy, son madanm i siport li fidelman, e zanfan i obeir zot paran. (Efezyen 5:22-25, 28-33; 6:1-4) Remarke ki lotorite i anmenn boner zis ler i ganny egzerse dan en bon fason. Bann mari ki annan latasman avek Bondye, i konnen ki lotorite pa vedir domin en dimoun. Zot imit Zezi, zot Sef. Menm si Zezi ti pou vin “pli gran sef lo tou keksoz,” i pa ti “vin pour ganny servi, me pour servi.” (Efezyen 1:22; Matye 20:28) Pareyman, en zonm Kretyen pa demontre son lotorite dan en fason ki pou benefisye son lekor, me dan en fason ki pou pran zentere son madanm ek zanfan.​—1 Korentyen 13:4, 5.

 7. Ki prensip Labib ki pou ed en madanm ranpli son rol ki Bondye in donnen dan fanmiy?

⁷ Rol en madanm ki annan latasman avek Bondye se pa pour fer konpetisyon oubyen rod fason pour domin son mari. I kontan pour siport son mari e pour korpere avek li. Parfwa Labib i koz lo madanm konman “propriyete” son mari, e sa i fer kler ki son mari i son sef. (Zenez 20:3) Kan i marye, i vin anba “lalwa” son mari. (Romen 7:2) Anmenmtan, Labib i apel li en “led ki adapte avek li.” (Zenez 2:20) En madanm i fourni bann kalite ek abilite ki son mari i manke, e i donn son mari sipor ki i bezwen. (Proverb 31:10-31) Labib i osi dir ki en madanm i en “partner,” en dimoun ki travay kot-a-kot avek son mari. (Malaki 2:14) Sa bann prensip Labib i ed en mari ek en madanm pour apresye pozisyon kanmarad e pour tret kanmarad avek respe ek dinite apropriye.

8, 9. Eksplik detrwa prensip ki pou ed tou manm fanmiy pour amelyor fason ki zot kominike.

⁸ Dan sa liv, souvan lanfaz in ganny mete lo lenportans kominikasyon. Akoz? Parski keksoz i mars byen ler dimoun i koze e vreman ekout kanmarad. Plizyer fwa, i’n fer resorti ki kominikasyon i en lesanz ant de dimoun. Disip Zak ti eksprim sa dan sa fason: “Tou dimoun i devre pare pou ekoute, me pran letan avan koze.”​—Zak 1:19.

⁹ I osi enportan pour vey lafason ki nou koze. Bann parol san reflesir, parol ki senm lemozite oubyen ki kritik severman pa ede pour fer en bon kominikasyon. (Proverb 15:1; 21:9; 29:11, 20) Menm ler sa ki nou dir i byen, si i ganny eksprimen dan en fason kriyel, orgeye, oubyen sever, i tre probab ki i pou fer plis ditor ki dibyen. Nou fason koze i bezwen touzour agreab, ‘sezonnen avek disel.’ (Kolosyen 4:6) Nou parol i devret parey “ponm lor dan bann skilptir an larzan.” (Proverb 25:11) Bann fanmiy ki aprann byen kominike in pran en gran pa ver boner.

10. Ki kalite lanmour ki tre enportan dan en lavi maryaz?

¹⁰ Sa mo “lanmour” in aparet plizyer fwa dan sa liv. Eski ou rapel sa kalite lanmour ki’n ganny mansyonnen pli souvan? I vre ki lanmour romantik (Grek, eʹros) i zwe en rol enportan dan maryaz. Deplis, dan bann maryaz ki reisi, lafeksyon ek lanmitye profon (Grek, phi·liʹa) i grandi ant en mari ek son madanm. Me sa ki pli enportan i sa lanmour ki ganny reprezante par sa mo Grek, a·gaʹpe. Sa i sa lanmour ki nou devlope pour Zeova, Zezi, e pour nou prosen. (Matye 22:37-39) I sa lanmour ki Zeova i annan pour limanite. (Zan 3:16) Pa i vreman merveye ki nou osi nou kapab montre sa menm lanmour pour nou msye ouswa nou madanm ek zanfan!​—1 Zan 4:19.

11. Ki mannyer lanmour i anmenn byenfe dan en lavi maryaz?

¹¹ Dan lavi maryaz, sa lanmour siperyer i vreman “soud tou keksoz parfetman ansanm dan larmoni.” (Kolosyen 3:14) I fer en zonm ek en fanm vin pros ansanm e fer zot anvi fer sa ki byen pour kanmarad e pour zot zanfan. Ler lafanmiy i rankontre en sitiasyon difisil, lanmour i ed zot fer fas avek sa sitiasyon dan linite. Anmezir ki en koup i antre dan laz, lanmour i ed zot pour siport e kontinyen apresye kanmarad. “Lanmour pa rod son prop lentere; . . . i pardonn tou, i krwar tou, i esper tou, i siport tou. Lanmour i reste pour touzour.”​—1 Korentyen 13:4-8.

12. Akoz ler en koup i kontan Bondye, sa i fortifye zot maryaz?

¹² Linyon maryaz i vin for sirtou kan i’n ganny sele pa zis avek lanmour ki sa de dimoun i annan pour kanmarad, me prensipalman avek lanmour pour Zeova. (Eklezyast 4:9-12) Akoz? Zapot Zan ti ekrir: “La lanmour Bondye: ki nou obei son konmannman.” (1 Zan 5:3) Alor, en koup i devret form zot zanfan pour annan latasman avek Bondye pa zis akoz zot kontan zot zanfan en kantite, me akoz sa i komannman Zeova. (Deterononm 6:6, 7) Zot devret evit imoralite pa zis akoz zot kontan kanmarad me sirtou akoz zot kontan Zeova, ki “pou ziz bann ki anmenn en lavi dezordonnen e adilter.” (Ebre 13:4) Menm si enn ant le de i koz bann problenm grav dan en maryaz, lanmour pour Zeova pou pous sa lot pour kontinyen swiv bann prensip Labib. Alors, bann fanmiy kot lanmour pour kanmarad in vin pli solid gras a lanmour pour Zeova i ere!

13. Konman ki annan en determinasyon pour fer lavolonte Bondye, i ed bann dimoun gard zot lizye lo bann keksoz ki pli enportan?

¹³ Lavi en Kretyen i santre lo fer lavolonte Bondye. (Psonm 143:10) Sanmenm ki latasman avek Bondye i vreman vedir. Fer lavolonte Bondye i ed bann fanmiy pour gard zot lizye lo bann keksoz ki pli enportan. (Filipyen 1:9, 10) Par egzanp, Zezi ti averti: “Mon’n vin met en garson kont son papa, en fiy kont son manman; en belfiy kont son belmer; Ou lennmi pou trouv parmi manm ou prop fanmir.” (Matye 10:35, 36) Sa lavertisman ki Zezi ti donnen i vre, akoz bokou son bann disip in ganny persekite par zot prop fanmiy. Sa i en sitiasyon vreman tris e fer mal! Kantmenm sa, nou relasyon avek nou fanmiy pa devret vin pli enportan ki nou lanmour pour Zeova e pour Zezi Kri. (Matye 10:37-39) Si en dimoun i persevere kantmenm i ganny lopozisyon avek son fanmiy, sa bann ki pe opoz li i kapab sanze ler zot vwar bann bon lefe ki latasman avek Bondye i anmennen. (1 Korentyen 7:12-16; 1 Pyer 3:1, 2) Menm si zot pa sanz zot latitid, nou pa pou benefisye dan okenn fason si nou aret servi Bondye akoz lopozisyon.

14. Konman ki en dezir pour fer lavolonte Bondye i ed paran pour azir dan pli bon lentere zot zanfan?

¹⁴ Fer lavolonte Bondye pou ed paran pour fer bann bon desizyon. Par egzanp, dan serten kominote, bann paran i tant pour vwar zanfan konman en lenvestisman, e zot kont lo zot zanfan pour pran swen avek zot dan zot vye zour. Kantmenm i byen e apropriye pour bann zanfan ki’n grandi pran swen avek zot paran aze, en panse koumsa pa devret fer paran enfliyans zot zanfan pour viv en lavi zis pour ganny keksoz materyel. I pa pou fer dibyen bann zanfan si paran i elve zot pour kontan keksoz materyel plis ki keksoz spirityel.​—1 Timote 6:9.

15. Ki mannyer Enis, manman Timote, ti en bon legzanp konman en dimoun ki ti fer lavolonte Bondye?

¹⁵ Enis, manman Timote, ki ti zanmi Pol i en bon legzanp dan sa domenn. (2 Timote 1:5) Menm si i ti’n marye avek en dimoun ki pa ti Kretyen, Enis, ansanm avek Lois, granmanman Timote, ti reisi fer Timote devlop en latasman avek Bondye. (2 Timote 3:14, 15) Ler Timote ti’n ase gran, Enis ti les li kit lakour e antreprann travay predikasyon Rwayonm konman konpanyon misyonner Pol. (Akt 16:1-5) Pa i ti kontan pour vwar son garson vin en misyonner remarkab! Sa latasman ki Timote ti annan avek Bondye letan i ti’n vin adilt ti reflekte sa formasyon ki i ti’n gannyen ler i ti ankor pli zenn. Sirman, Enis ti zwaye kan i ti tann bann rapor lo minister ki Timote ti pe fer avek fidelite, menm si kekfwa i ti mank li kot lakour.​—Filipyen 2:19, 20.

16. Konman en zanfan, ki lentere senser Zezi ti montre, me ki ti son lobzektif prensipal?

¹⁶ Zezi ti ganny elve dan en fanmiy ki ti servi Bondye, e kan i ti vin en adilt i ti montre lentere senser ki normalman en zanfan i annan pour son manman. (Lik 2:51, 52; Zan 19:26) Sepandan, Zezi ti pli konsernen avek akonpli lavolonte Bondye, e pour li sa ti enplik ouver semen pour bann imen rezwir lavi eternel. I ti fer sa, letan i ti ofer son lavi imen parfe pour liber limanite dan pese.​—Mark 10:45; Zan 5:28, 29.

17. Ki lespwar glorye fidelite Zezi in donn bann ki fer lavolonte Bondye?

¹⁷ Apre lanmor Zezi, Zeova ti resisit li pour viv dan lesyel e donn li en gran lotorite. Finalman, i ti etablir li konman Lerwa dan Rwayonm seles. (Matye 28:18; Romen 14:9; Revelasyon 11:15) Sakrifis Zezi in fer posib pour serten imen ganny swazir pour renny avek li dan sa Rwayonm. Son sakrifis ti osi ouver semen pour larestan dimoun senser rezwir lavi parfe lo en later ki pou vin en paradi. (Revelasyon 5:9, 10; 14:1, 4; 21:3-5; 22:1-4) Enn parmi sa bann pli gran privilez ki nou annan ozordi, se pour anons sa bon nouvel glorye avek nou vwazen.​—Matye 24:14.

18. Ki rapel ek lankourazman bann fanmiy ek sak dimoun i gannyen?

¹⁸ Parey zapot Pol ti montre, viv avek latasman pour Bondye i permet nou erit bann benediksyon dan sa lavi ki pe vini “dan lavenir.” Sirman, sa i pli bon fason pour trouv boner! Rapel ki “lemonn pou disparet ek tou son bann dezir; me sa ki fer lavolonte Bondye i reste eternelman.” (1 Zan 2:17) Alor, ki swa ou en zanfan oubyen en paran, en mari ouswa en madanm, en dimoun tousel ki annan zanfan oubyen napa zanfan, fer zefor pour fer lavolonte Bondye. Menm ler ou anba presyon oubyen ou pe rankontre bokou difikilte, pa zanmen oubliye ki ou pe servi en Bondye vivan. Alors, fotespere ou bann aksyon i fer Zeova kontan. (Proverb 27:11) Fotespere osi ki ou kondwit i anmenn ou boner konmela menm ek lavi eternel alavenir dan sa nouvo lemonn!