Konman pour gard en leta lespri sakrifis

“Si en dimoun i oule vin avek mwan, fodre ki i aret mazin zis limenm.”​—MAT. 16:24.

KI MANNYER OU POU REPONN?

Ki mannyer nou kapab servi Labib pour vwar si nou annan bann pti tandans egois?

Ki leson nou aprann atraver move legzanp Lerwa Sail?

Ki mannyer Pyer ti montre ki nou kapab sirmont bann tandans egois?

 1. Ki mannyer Zezi in kit en legzanp parfe lo ki mannyer pour demontre en leta lespri sakrifis?

LER Zezi ti lo later, i ti kit en legzanp parfe lo ki mannyer pour demontre en leta lespri sakrifis. I ti met lavolonte Bondye avan son prop dezir ek konfor. (Zan 5:30) Par reste fidel ziska son lanmor lo en poto martir, i ti montre ki son leta lespri sakrifis ti parfe.​—Fili. 2:8.

 2. Ki mannyer nou kapab demontre en leta lespri sakrifis e akoz nou devret fer li?

² Konman disip Zezi, nou osi nou bezwen demontre sa menm leta lespri sakrifis. Ki savedir annan en leta lespri sakrifis? I senpleman vedir ki en dimoun i pare pour met lentere lezot avan sa ki pour li. Dan en sans, i tou lekontrer avek legoizm. (Lir Matye 16:24.) En leta lespri ki pa egois i kapab ed nou pour met nou santiman ek lentere personnel apre sa ki pour lezot. (Fili. 2:3, 4) Annefe, Zezi ti ansennyen ki en leta lespri ki pa egois i sa keksoz pli enportan dan nou ladorasyon. Ki mannyer sa? Lanmour Kretyen, ki fer nou annan en leta lespri sakrifis, i sa mark ki idantifye bann vre disip Zezi. (Zan 13:34, 35) Zis mazin sa bann benediksyon ki nou gannyen akoz nou form parti sa lasosyasyon bann frer ek ser dan lemonn antye ki demontre sa leta lespri sakrifis!

 3. Kwa ki kapab fer nou perdi nou leta lespri sakrifis?

³ Kantmenm sa, nou fer fas avek en lennmi ki kapab fer nou perdi nou leta lespri sakrifis ptitapti san ki nou realize. Sa lennmi i legoizm. Rapel ki mannyer Adan ek Ev ti demontre legoizm. Ev ti fer pese akoz son dezir egois pour vin parey Bondye. Adan ti osi annan sa dezir egois pour fer plezir son madanm. (Zen. 3:5, 6) Apre ki i ti’n fer Adan ek Ev aret servi Bondye, Dyab ti kontinyen enfliyans bann dimoun pour vin egois. I ti servi menm lapros kan i ti tant Zezi. (Mat. 4:1-9) Dan nou letan, Satan in reisi anbet e fer laplipar dimoun demontre legoizm dan plizyer fason. Alor, annou fer byen atansyon, akoz nou osi nou kapab ganny enfliyanse par sa leta lespri egois.​—Efe. 2:2.

 4. (a) Eski nou kapab elimin sa bann tandans egois? Eksplike. (b) Ki bann kestyon nou pou egzaminen?

⁴ Legoizm i kapab ganny konpare avek larouy ki vin lo feray. Si en lobze an feray i ganny ekspoze avek delo ek ler sa i kapab fer li konmans rouye. Sa ki pli danzere se ler ou inyor sa larouy e les li devlope ziska ki i andomaz striktir sa lobze e i kase. Pareyman, menm si ozordi nou pa kapab elimin nou lenperfeksyon ek nou tandans egois, nou bezwen kontinyen lite kont sa bann tandans. (1 Kor. 9:26, 27) Ki mannyer nou kapab rekonnet sa tandans egois dan nou? Ki mannyer nou kapab fer plis zefor pour kontinyen devlop nou leta lespri sakrifis?

SERVI LABIB POUR VWAR SI NOU EGOIS

 5. (a) Ki mannyer Labib i parey en laglas? (Vwar portre lo paz 7.) (b) Ki nou bezwen evite fer ler nou pe gete si nou egois?

⁵ Zis parey nou kapab servi en laglas pour vwar nou lekor fizik, nou kapab servi Labib pour analiz sa ki nou ete anndan e koriz nenport defo ki nou trouve. (Lir Zak 1:22-25.) Me, en laglas pou ed nou amelyor nou laparans si selman nou servi li byen. Par egzanp, si nou zis get dan laglas vitman nou kapab pa remark en pti defo me ki kapab grav. Si nou pa debout drwat devan en laglas, nou kapab vwar en lot dimoun. Pareyman, si nou servi Labib pour gete si nou annan en leta lespri egois, nou pou bezwen fer plis ki zis lir li vitman vitman oubyen servi li pour vwar defo en lot dimoun.

 6. Ki mannyer nou “persevere” dan lalwa parfe?

⁶ Par egzanp, ou kapab lir Labib regilyerman oubyen tou le zour, me kantmenm sa, nou kapab pa vwar en pti tandans egois ki pe devlope dan nou. Ki mannyer sa i posib? Egzamin legzanp Zak konsernan laglas, problenm pa ti akoz sa zonm pa ti get li byen dan laglas, parski Zak ti ekrir ki sa zonm ti ‘byen war li.’ Dan sa verse, Zak ti servi en mo Grek ki vedir get o profon oubyen pran letan pour egzamin en keksoz. Alor dan sa ka, ki ti problenm sa zonm? Zak ti kontinyen par dir: “I ale e oubliy deswit konman i ti ete.” Wi, i ti vire, i ti ale e i pa ti fer nanryen lo sa ki i ti’n vwar. O kontrer, en zonm ki reisi pa zis “egzamin byen lalwa parfe” me i osi “persevere.” Olye abandonn lalwa parfe Bondye, i persevere e kontinyen swiv sa ki Parol Bondye i ansennyen. Zezi ti pe fer resorti menm pwen kan i ti dir: “Si zot kontinyen swiv mon lansennyman, zot a vin vreman mon disip.”​—Zan 8:31.

 7. Ki mannyer nou kapab servi Labib pour vwar si nou annan bann pti tandans egois?

⁷ Alor, pour reisi konbat kont bann pti tandans egois, ou bezwen premyerman lir Parol Bondye e medit lo sa ki ou lir. Sa pou ed ou vwar ki pwen ou devret travay lo la. Me ou bezwen fer plis ki sa. Fer resers pli o profon. Apre ki ou’n konpran en resi Labib, demann ou lekor sa bann kestyon swivan: ‘Ki mannyer mon ti pou’n reazir dan sa sityasyon? Eski mon ti pou’n vreman reazir byen?’ Pli enportan ankor, apre ki ou’n reflesir lo sa ki ou’n lir, fer zefor pour aplik li dan ou lavi. (Mat. 7:24, 25) Annou vwar ki mannyer nou kapab servi sa resi lo Lerwa Sail ek zapot Pyer pour ed nou kontinyen demontre nou leta lespri sakrifis.

TIR LESON ATRAVER MOVE LEGZANP SAIL

 8. Ki bann kalite Sail ti annan o konmansman son renny e ki mannyer i ti demontre sa bann kalite?

⁸ Legzanp Sail, Lerwa Izrael, i en lavertisman pour nou lo ki mannyer legoizm i kapab gradyelman detri nou leta lespri sakrifis. O konmansman son renny, Sail ti en lerwa ki ti modes e i ti annan limilite. (1 Sam. 9:21) I ti refize pini bann Izraelit ki ti’n koz kont son rwayote, menm si i ti annan drwa pour defann pozisyon ki Bondye ti’n donn li. (1 Sam. 10:27) Lerwa Sail ti aksepte gidans lespri sen Bondye par gid bann Izraelit pour ranport laviktwar dan en batay kont bann Amonit. Apre sa, i ti montre ki i ti annan limilite par donn laglwar Zeova pour sa laviktwar.​—1 Sam. 11:6, 11-13.

 9. Ki mannyer Sail ti arive devlop en fason panse egois?

⁹ Pli tar, Sail ti les bann panse egois ek lorgey devlope parey larouy. Kan i ti defet bann Amalekit, i ti met son prop dezir avan lobeisans anver Zeova. Par son vorasite, Sail ti gard en pe sa bann keksoz ki Zeova ti’n demann li pour detrir. Akoz son larogans, Sail ti fer en moniman pour son lekor setadir rod laglwar pour li menm. (1 Sam. 15:3, 9, 12) Kan profet Samyel ti dir li ki Zeova pa ti kontan, Sail ti esey zistifye son lekor par met lanfaz lo sa bout dan lord Zeova ki i ti’n obeir e blanm lezot pour son fot. (1 Sam. 15:16-21) An plis ki sa, lorgey ti fer Sail vwar son repitasyon devan bann imen pli enportan ki fer plezir Zeova. (1 Sam. 15:30) Ki mannyer nou kapab servi sa resi lo Sail konman en laglas ki pou ed nou kontinyen demontre en leta lespri sakrifis?

10, 11. (a) Ki legzanp Sail i ansenny nou lo kontinyen demontre en leta lespri sakrifis? (b) Ki mannyer nou kapab evite swiv move legzanp Sail?

¹⁰ Premyerman, leksperyans Sail i montre ki nou pa devret vin tro konfidan dan nou menm e mazinen ki si nou ti annan en leta lespri sakrifis o konmansman sa i vedir ki nou pou otomatikman kontinyen demontre sa kalite. (1 Tim. 4:10) Gard antet ki Sail ti byen fer e i ti ganny laprouvasyon Bondye pour en pe letan, me i pa ti reisi rezet sa tandans egois ki i ti konmans devlope. Finalman, Zeova ti rezet Sail akoz i ti’n dezobeir.

¹¹ Dezyenmman, nou bezwen veye ki nou pa konsantre zis lo nou bann pwen for e inyor bann laspe ki nou bezwen travay lo la. Sa i pou konmsi nou’n servi en laglas pour admir nou nouvo lenz e pa remarke ki i annan en pti salte lo nou figir. Menm si nou pa vin orgeye oubyen arogan parey Sail, nou vreman bezwen travay dir pour evit nenport ki tandans ki kapab fer nou fer sa ki mal parey li. Kontrerman avek Sail, si nou ganny konseye, fodre pa ki nou esey zistifye nou bann aksyon, par dir ki sa ki nou’n fer i pa sitan grav oubyen blanm lezot. Alor, dan plas azir parey Sail, i pli bon pour ekout e aksepte konsey.​—Lir Psonm 141:5.a

12. Ki mannyer en leta lespri sakrifis i kapab ed nou si nou arive komet en pese grav?

¹² Me, si ou arive fer en pese grav? Sail ti anvi prezerv son repitasyon e sa ti anpes li geri spirityelman. O kontrer, en leta lespri sakrifis i kapab ed nou pour pa anbarase e rod led ki nou bezwen. (Prov. 28:13; Zak 5:14-16) Par egzanp, en frer ti konmans get pornografi a laz 12 an e i ti kontinyen fer sa an sekre pour plis ki di-z-an. I rakonte: “I ti difisil pour admet avek mon madanm ek bann ansyen sa ki mon ti pe fer. Me la, mon bezwen admet ki en gro lour i ganny tire lo mon zepol. Serten mon bann zanmi ti dezapwente kan mon ti ganny tire konman asistan ministeryel. Par kont, mon konnen ki Zeova i pli apresye mon servis la aprezan, konpare avek letan mon ti pe get pornografi e pour mwan se son pwennvi ki pli enportan.”

PYER TI SIRMONT LEGOIZM

13, 14. Ki mannyer Pyer ti demontre bann tandans egois?

¹³ Zapot Pyer ti demontre en leta lespri sakrifis kan i ti pe ganny formen par Zezi. (Lik 5:3-11) Me, i ti bezwen lager avek son bann tandans egois. Par egzanp, i ti ankoler ler zapot Zak ek Zan ti pe fer plan pour ganny bann pozisyon pli enportan akote Zezi dan Rwayonm Bondye. Petet Pyer ti krwar ki li ki ti devret asiz akote Zezi, parski Zezi ti’n dir ki i ti pou annan en rol spesyal. (Mat. 16:18, 19) An tou ka, Zezi ti averti Zak, Zan ek Pyer e osi larestan bann zapot kont sa dezir egois pour “konmann” zot frer.​—Mark 10:35-45.

¹⁴ Menm si Zezi ti esey koriz son fason panse, Pyer ti bezwen kontinyen lite pour fer bann azisteman lo lafason i ti konsider son lekor. Kan Zezi ti dir son bann zapot ki zot ti pou abandonn li, Pyer ti esey met son lekor anler par dir ki zis li ki ti pou reste fidel avek Zezi. (Mat. 26:31-33) I pa ti devret annan en sitan gran konfyans dan son lekor akoz sa menm swar i pa ti reisi demontre en leta lespri sakrifis. Pour protez son prop lekor, Pyer ti renye Zezi trwa fwa.​—Mat. 26:69-75.

15. Akoz legzanp Pyer i ankourazan?

¹⁵ Malgre ki Pyer ti bezwen lalit avek son bann febles, son legzanp i ankourazan pour nou. Par son zefor ek led lespri sen Bondye, Pyer ti kapab sirmont son bann move tandans e demontre kontrol lo son prop lekor e annan en leta lespri sakrifis. (Gal. 5:22, 23) I ti andir bann leprev ki ti pli sever ki sa bann leprev ki ti fer li tonbe. I ti demontre limilite par lafason ki i ti reazir ler Pol ti reprimann li an piblik. (Gal. 2:11-14) Apre ki i ti’n ganny reprimande, Pyer pa ti gard rankin oubyen santi ki Pol ti’n gat son repitasyon. Pyer ti menm dir ki i ti annan lanmour pour Pol. (2 Pyer 3:15) Legzanp Pyer i kapab ed nou pour devlop en leta lespri sakrifis.

16. Ki mannyer nou kapab demontre en leta lespri sakrifis dan bann sityasyon difisil?

¹⁶ Reflesir lo konman ou reazir ler ou dan bann sityasyon difisil. Kan Pyer ek bann zapot ti ganny anprizonnen e apre ganny fwete akoz zot ti pe prese, zot ti kontan “ki zot ti’n ganny konsidere diny pour ganny maltrete, ” konman disip Zezi. (Akt 5:41) Ou osi ou kapab vwar persekisyon konman en loportinite pour imit Pyer e swiv legzanp Zezi par demontre en leta lespri sakrifis. (Lir 1 Pyer 2:20, 21.) Sa latitid i menm kapab ed ou pour aksepte disiplin apropriye ki bann ansyen i donn ou. Dan plas ofanse, swiv legzanp Pyer.​—Ekle. 7:9.

17, 18. (a) Ki nou kapab demann nou lekor konsernan bann lobzektif spirityel? (b) Ki nou kapab fer si nou santi ki nou en pe egois dan nou leker?

¹⁷ Konsernan annan bann lobzektif spirityel, ou kapab benefisye par imit legzanp Pyer. Ou kapab pourswiv bann lobzektif spirityel dan en fason ki montre ki ou annan en leta lespri sakrifis. Me, fer atansyon ki sa lanvi pour atenn ou lobzektif pa fer ou vin en dimoun ki pe rod pozisyon. Alor, demann ou lekor, ‘Eski mon dezir pour ogmant mon servis pour Zeova i akoz mon anvi ganny rekonnet oubyen annan plis lotorite, parey i ti leka avek Zak ek Zan?’

¹⁸ Si ou’n vwar ki ou en pe egois dan ou leker, demann Zeova led pour sanz ou fason panse ek ou bann santiman e konsantre lo rann li glwar dan plas ou lekor. (Ps. 86:11) Ou osi kapab pourswiv bann lobzektif ki pa pou fer ou ganny rekonnet konman en dimoun enportan. Par egzanp, ou kapab devlop serten laspe fri lespri ki petet i en defi pour ou. Si ou en dimoun ki prepar byen ou bann ekspoze me ki napa en gran lentere dan netwayaz lasal Rwayonm, ou kapab fer li ou lobzektif pour aplik sa konsey ki trouve dan Romen 12:16.​—Lir.

19. Ki nou kapab fer pour nou pa dekouraze par sa ki nou vwar dan parol Bondye ki parey en laglas?

¹⁹ Kan nou egzamin nou byen atraver Labib ki parey en laglas e nou vwar ki nou annan serten defo oubyen legoizm, nou pa devret dekouraze. Si zanmen sa i arive avek ou, reflesir lo sa zonm ki ti ganny beni dan legzanp Zak. Zak pa ti met lanfaz lo vites ki sa zonm ti regle son problenm oubyen ki i ti kapab koriz tou son bann defo, plito Zak ti dir ki sa zonm ti ‘persevere dan lalwa parfe.’ (Zak 1:25) I pa ti oubliy sa ki i ti’n vwar dan laglas e i ti kontinyen fer zefor pour amelyore. Wi, annan en lopinyon pozitif lo ou lekor e en pwennvi balanse lo ou bann lenperfeksyon. (Lir Eklezyast 7:20.b) Kontinyen egzamin byen lalwa parfe e travay dir pour kontinyen demontre ou leta lespri sakrifis. Zeova i pare pour ed ou parey in ed bokou ou bann frer ek ser ki osi enparfe me kantmenm sa zot kapab annan e zot annan faver ek benediksyon Bondye.

[Not anba lo paz]

[Portre lo paz 10]

Apre ki i ti’n ganny reprimande ki mannyer Pyer ti reazir? Eski nou ti pou fer parey? (Vwar paragraf 15)