Servi Kris, sa Lerwa avek fidelite

“I ti ganny dominasyon ek dinite ek rwayonm, pour ki bann pep, kominote nasyonal ek bann langaz, zot tou zot devret servi li.”—DANYEL 7:14.

1, 2. Ki mannyer nou konnen ki Kris pa ti ganny tou pouvwar dan Rwayonm Bondye lannen 33 N.L.?

LEKEL sa dirizan ki kapab mor pour son bann sitwayen e apre resisite pour dirize konman lerwa? Lekel sa lerwa ki kapab viv lo later e fer son bann sitwayen annan konfyans dan li, reste fidel avek li, epi al dan lesyel pour dirize? Napa personn ki kapab fer sa ek lezot keksoz ankor, apard ki Zezi Kri. (Lik 1:32, 33) Zour Lapannkot lannen 33 N.L., apre ki i ti’n resisite e mont dan lesyel, Bondye ‘ti etabli li konman pli gran sef lo tou keksoz kongregasyon.’ (Efezyen 1:20-22; Akt 2:32-36) Apartir sa moman Kris ti konmans dirize, me pa dan en fason konplet. Premyerman, i ti pe diriz bann kretyen swazir ki form parti Izrael spirityel, oubyen “Izrael Bondye.”—Galat 6:16; Kolosyen 1:13.

² Preski 30 an apre Lapannkot lannen 33 N.L., zapot Pol ti konfirmen ki Kris pa ti ankor ganny tou pouvwar dan Rwayonm Bondye, me i ti “dan kote drwat Bondye . . . pe espere ki Bondye i fer son bann lennmi vin son marspye.” (Ebre 10:12, 13) Ver lafen premye syek N.L., dan son vye zour, zapot Zan ti ganny en vizyon kot i ti vwar Zeova, Souvren Liniver, pe kouronn Zezi konman Lerwa dan sa nouvo Rwayonm dan lesyel. (Revelasyon 11:15; 12:1-5) Dan nou letan ozordi, nou kapab revwar sa levidans solid ki prouve ki Kris ti konmans dirize konman Lerwa dan lesyel an 1914.a

 3. (a) Ki nouvo keksoz ki ti ganny azoute dan sa bon nouvel Rwayonm an 1914? (b) Ki kestyon nou kapab demann nou lekor?

³ Wi, depi 1914 en nouvo keksoz eksitan ti ganny azoute dan sa bon nouvel Rwayonm. Sa i ki Kris pe dirize konman Lerwa dan Rwayonm Bondye, menm si i “omilye [son] bann lennmi.” (Psonm 110:1, 2; Matye 24:14; Revelasyon 12:7-12) Lefe ki son bann sitwayen fidel partou lo later i rekonnet son lotorite, avek devouman zot pe fer en travay edikasyonnel ki pa’n zanmen ganny fer lo sa nivo dan listwar imen. (Danyel 7:13, 14; Matye 28:18) Bann Kretyen swazir, ki bann ‘garson sa Rwayonm,’ zot konman “bann lanbasader Kris.” Zot pe fidelman ganny sipor en gran lafoul, ‘lezot mouton’ Kris, ki bann reprezantan Rwayonm Bondye. (Matye 13:38; 2 Korentyen 5:20; Zan 10:16) Kantmenm sa, nou tou personnelman, nou bezwen egzamin nou lekor pour vwar si nou vreman rekonnet lotorite Kris. Eski nou vreman fidel avek li ki nou pa pou les nanryen kas sa fidelite? Ki mannyer nou kapab fidel avek en Lerwa ki pe dirize dan lesyel? Me premyerman, annou egzamin bann rezon akoz nou bezwen reste fidel avek Kris.

Kris en Lerwa ki ou anvi fidel avek

 4. Ki Zezi ti fer ler i ti lo later?

⁴ Vi ki nou apresye sa ki Kris in fer ek son bann kalite ekstraordiner, sa i pous nou pour anvi reste fidel avek li. (1 Pyer 1:8) Kan i ti lo later, konman sa Lerwa ki’n ganny swazir, i ti donn nou en avangou ki i pou fer ler Bondye i donn li lord pour diriz later antye. I ti donn manze bann ki lafen, geri bann malad, aveg, andikape, sourd e koz pa. I ti menm resisit dimoun mor. (Matye 15:30, 31; Lik 7:11-16; Zan 6:5-13) Kan nou byen konn lafason ki Zezi ti viv lo later, nou pou kapab rekonnet bann kalite ki i pou servi ler i dirize alavenir. Enn son kalite pli remarkab i sa lanmour ki’n fer li met lentere lezot avan sa ki pour li. (Mark 1:40-45) An rapor avek sa, Napoléon Bonaparte ti dir: “Aleksann, Sezar, Charlemagne, ek mwan menm, nou’n kapab kree bann lanpir, me ki nou’n servi pour kapab akonpli sa? Nou’n servi lafors. Zis Zezi Kri ki’n servi lanmour pour batir son rwayonm, e ozordi plizyer milyon zonm i pare pou mor pour li.”

 5. Akoz personnalite Zezi ti atir lezot?

⁵ Bann ki ti dekouraze akoz presyon ek fardo, ti ganny soulaze par lansennyman Zezi ek son zoli personnalite. Zot ti ganny sa soulazman akoz Zezi ti dous e annan limilite. (Matye 11:28-30) Bann zanfan ti santi zot alez avek li. Bann zonm ki ti annan disernman ek limilite, pa ti ezite pour vin son disip. (Matye 4:18-22; Mark 10:13-16) Vi ki i ti annan konsiderasyon ek respe pour lezot, en kantite madanm ki ti annan respe pour Bondye ti fidel avek li. Serten sa bann madanm ti donn zot letan, kouraz ek keksoz materyel pour pran swen avek Zezi anmezir ki i ti akonpli son minister.—Lik 8:1-3.

 6. Ki santiman profon Zezi ti demontre ler Lazar ti mor?

⁶ Zezi ti demontre son santiman vreman profon ler son bon zanmi Lazar ti mor. Ler i ti vwar sa sagrinasyon ki Mari ek Marta ti ladan, i pa ti kapab gard sa gran latristes anndan, alors i ti “plere.” I “ti emosyonnen,” son leker ti vreman fer mal e i ti dan lapenn menm si i ti konnen ki dan ankor en pti moman i ti pou resisit Lazar. Akoz son lanmour ek konpasyon, Zezi ti servi sa pouvwar sorti kot Bondye pour resisit Lazar.—Zan 11:11-15, 33-35, 38-44.

 7. Akoz nou merite reste fidel avek Zezi? (Vwar bwat lo paz 31.)

⁷ Nou vreman enpresyonnen par sa profon lanmour ki Zezi ti annan pour sa ki byen ek laenn ki ti annan pour sa ki mal ek lipokrizi. De fwa, i ti pran aksyon serye dan tanp pour fer sa bann marsan voras ale. (Matye 21:12, 13; Zan 2:14-17) Deplis, ler i ti lo later i ti rankontre tou sort kalite difikilte, alors i kapab konpran sa bann presyon ek problenm ki nou rankontre ozordi. (Ebre 5:7-9) Zezi in osi konnen ki savedir vin viktim laenn ek lenzistis. (Zan 5:15-18; 11:53, 54; 18:38–19:16) Finalman, avek kouraz i ti les li ganny touye dan en fason kriyel pour akonpli lavolonte son Papa e pour donn bann sitwayen son Rwayonm lavi eternel. (Zan 3:16) Eski sa bann kalite ki Kris i annan pa pous ou pour reste fidel avek li? (Ebre 13:8; Revelasyon 5:6-10) Me ki nou bezwen fer pour kapab vin en sitwayen sa Rwayonm?

Kalifikasyon pour vin en Sitwayen

 8. Ki bann sitwayen Kris i bezwen annan?

⁸ Reflesir lo sa konparezon: Pour vin sitwayen en lot pei normalman i annan serten lenstriksyon ki ou bezwen swiv pour ganny aksepte dan sa pei. Petet ou pou bezwen annan en bon repitasyon e respekte standar lasante sa pei. Pareyman, bann sitwayen Kris i bezwen gard en standar onivo konsernan moralite ek en bon spirityalite.—1 Korentyen 6:9-11; Galat 5:19-23.

 9. Konman nou kapab montre ki nou fidel avek Kris?

⁹ Zezi i osi ekspekte ki son bann sitwayen i fidel avek li ek son Rwayonm. Zot fer sa kan zot fidelman viv an akor avek sa ki i ti ansennyen ler i ti lo later konman sa Lerwa ki’n ganny swazir. Par egzanp, zot met keksoz spirityel ek lavolonte Bondye premye avan keksoz materyel. (Matye 6:31-34) Zot osi fer bokou zefor pour imit personnalite Kris, menm kan zot dan bann sitiasyon vreman difisil. (1 Pyer 2:21-23) Zot osi swiv son legzanp par pran linisyativ pour fer dibyen lezot.—Matye 7:12; Zan 13:3-17.

10. Ki mannyer nou kapab montre ki nou fidel avek Kris (a) dan lafanmiy e (b) dan kongregasyon?

¹⁰ Bann disip Zezi i montre ki zot fidel avek li kan zot imit son bann kalite dan lafanmiy. Par egzanp, bann msye i montre ki zot fidel avek zot Lerwa dan lesyel, ler zot imit Kris dan lafason ki zot tret zot madanm ek zanfan. (Efezyen 5:25, 28-30; 6:4; 1 Pyer 3:7) Bann madanm i montre ki zot fidel avek Kris kan zot annan en lavi moralman prop ek “en lespri bon e trankil.” (1 Pyer 3:1-4; Efezyen 5:22-24) Ler zot obeir zot paran parey Zezi ti fer ler i ti lo later, bann zanfan i montre ki zot fidel avek Kris. Kan i ti ankor en zanfan, Zezi ti soumet avek son paran menm si zot ti enparfe. (Lik 2:51, 52; Efezyen 6:1) Bann sitwayen Kris i fer zefor pour imit li par annan “menm santiman; kontan kanmarad konman frer,” e annan “konpasyon pour kanmarad.” Zot fer bokou zefor pour vin parey Kris, par ‘viv avek limilite, pa rann mal pour mal, ni lensilt pour lensilt.’—1 Pyer 3:8, 9; 1 Korentyen 11:1.

Bann Sitwayen ki obeir Lalwa

11. Ki lalwa bann sitwayen Kris i obeir?

¹¹ En dimoun ki anvi vin sitwayen en lot pei i bezwen swiv lalwa sa pei. Pareyman bann sitwayen Kris i swiv “lalwa Kris” kan zot viv an akor avek sa ki Zezi in ansennyen e komande. (Galat 6:2) Sirtou, zot fidelman obeir sa ‘lalwa rwayal’ lo lanmour. (Zak 2:8) Ki i enplike dan sa bann lalwa?

12, 13. Ki mannyer nou fidelman obeir “lalwa Kris”?

¹² Bann sitwayen Kris i enparfe e zot fer fot. (Romen 3:23) Se pour sa rezon ki zot bezwen kontinyen fer bokou zefor pour annan lafeksyon senser konman frer ek ser, pour zot “kontan kanmarad bokou avek tou zot leker.” (1 Pyer 1:22) Si i annan ki’n “ofans en lot,” bann Kretyen i fidelman aplik lalwa Kris par ‘siport e pardonn kanmarad.’ Kan zot obeir sa lalwa, sa i ed zot pour pa tir lizye lo lenperfeksyon lezot me plito rod fason pour kontan kanmarad. Pa ou kontan ki ou pros avek sa bann ki’n abiy zot avek lanmour, sa “lanmour ki soud tou keksoz parfetman,” akoz zot fidelman soumet avek nou bon Lerwa!—Kolosyen 3:13, 14.

¹³ Anplis ki sa, Zezi ti eksplike ki son lanmour ti pli for ki sa lanmour dimoun i normalman demontre anver kanmarad dan lavi toulezour. (Zan 13:34, 35) Si nou zis kontan sa bann ki kontan nou, nou pa pe fer okenn “keksoz ekstraordiner.” Si sa i leka, alors nou lanmour i pa konplet. Zezi ti ankouraz nou pour imit lanmour son Papa, par kontan nou bann lennmi ek bann ki persekit nou. (Matye 5:46-48) Sa lanmour i osi pous bann sitwayen sa Rwayonm pour persevere dan zot travay pli enportan. Ki travay sa?

Nou fidelite i ganny teste

14. Akoz sa travay predikasyon i vreman enportan?

¹⁴ Bann sitwayen Rwayonm Bondye i annan en travay vreman enportan pour fer. Zot ‘bezwen byen anons Rwayonm Bondye.’ (Akt 28:23) Sa i tre enportan akoz sa Rwayonm pou montre ki Zeova i annan sa drwa pour diriz liniver. (1 Korentyen 15:24-28) Kan nou pres sa bon nouvel, bann ki ekout nou i annan sa loportinite pour vin sitwayen Rwayonm Bondye. Deplis Kris, sa Lerwa, pou ziz limanite dapre lafason ki zot in azir anver sa mesaz. (Matye 24:14; 2 Tesalonisyen 1:6-10) Fason pli enportan ki nou kapab montre nou fidel avek Kris i kan nou obeir son komannman pour al koz lo sa Rwayonm.—Matye 28:18-20.

15. Akoz fidelite bann Kretyen pe ganny teste?

¹⁵ Byensir, Satan pe vey tou lanbeli ki i gannyen pour anpes nou fer sa travay, e bann dirizan dan lemonn ozordi pa rekonnet ki Bondye in donn Kris lotorite. (Psonm 2:1-3, 6-8) Anfet, Zezi ti averti son bann disip: “Okenn serviter pa pli gran ki son met. Si zot in persekit mwan, zot osi, zot pou ganny persekite.” (Zan 15:20) Alors, bann disip Kris pe fer en lager spirityel, kot zot fidelite pe ganny teste.—2 Korentyen 10:3-5; Efezyen 6:10-12.

16. Ki mannyer bann sitwayen sa Rwayonm i rann “Bondye sa ki pour Bondye”?

¹⁶ Me kantmenm sa, bann sitwayen Rwayonm Bondye i reste fidel avek zot Lerwa envizib, e anmenmtan zot respe bann lotorite ki an plas dan sa lemonn ozordi. (Tit 3:1, 2) Zezi ti dir: “Rann Sezar sa ki pour Sezar, e Bondye sa ki pour Bondye.” (Mark 12:13-17) Alors, bann sitwayen Kris i obeir bann lalwa ki gouvernman in etablir ki pa kas lalwa Bondye. (Romen 13:1-7) Me kan lakour siprenm Zwif ti kas lalwa Bondye par demann bann disip pour aret prese, avek determinasyon ek respe zot ti dir: “Nou devre obei Bondye plito ki zonm.”—Akt 1:8; 5:27-32.

17. Akoz avek kouraz nou kapab fer fas avek bann tes ki teste nou fidelite?

¹⁷ Alors, i demann bokou kouraz pour bann sitwayen Kris reste fidel avek zot Lerwa kan zot pe ganny persekite. Kantmenm sa, Zezi ti dir: “Zot byennere, kan en dimoun i ensilte zot, persekit zot, e koz manti pour dir tou sort keksoz mal kont zot akoz zot mon disip. Rezoui e santi zot ere akoz zot annan en gran rekonpans dan lesyel.” (Matye 5:11, 12) Bann premye disip Zezi ti vwar sa parol vin vre dan zot lavi. Kantmenm zot ti’n ganny fwete akoz zot ti pe kontinyen pres lo sa Rwayonm, zot ti byen kontan akoz “zot ti’n ganny konsidere diny pour ganny maltrete pour sa Non Senyer. Toulezour zot ti kontinyen prese dan Tanp ek dan bann lakaz e anons Zezi konman Mesi.” (Akt 5:41, 42) Ou merite ganny felisite, anmezir ki ou reste fidel parey bann premye disip menm si ou pas dan difikilte, fer fas avek maladi, lopozisyon e menm si ou’n perdi en dimoun pros dan lanmor.—Romen 5:3-5; Ebre 13:6.

18. Ki konklizyon nou tire atraver sa parol ki Zezi ti dir Pons Pilat?

¹⁸ Kan i pa ti ankor vin Lerwa, Zezi ti dir Gouverner Romen Pons Pilat: “Mon Rwayonm pa sorti lo sa later. Si mon Rwayonm ti sorti lo sa later, mon bann serviter ti a lager pour defann mwan kont lotorite Zwif. Non mon Rwayonm pa sorti lo sa later.” (Zan 18:36) Alors, bann sitwayen sa Rwayonm, pa partisip dan lager oubyen pran kote dan okenn lager. Vi ki zot anvi reste fidel avek sa “Prens Lape,” zot pa mel dan bann zafer sa lemonn.—Izai 2:2-4; 9:6, 7.

Rekonpans pour bann Sitwayen fidel

19. Akoz bann sitwayen Kris i kapab get lavenir avek konfyans?

¹⁹ Bann sitwayen fidel Kris, ki osi “Rwa-de-rwa,” i get lavenir avek konfyans. Zot vreman enspayan pour vwar Kris demontre son pouvwar konman lerwa lo later antye. (Revelasyon 19:11–20:3; Matye 24:30) Bann Kretyen swazir ki ankor lo later, ki ganny apele ‘bann garson sa Rwayonm’ i enpasyan pour zot ganny sa leritaz presye konman bann lerwa avek Kris dan lesyel. (Matye 13:38; Lik 12:32) Bann ‘lezot mouton’ fidel pe esper avek enpasyans kan zot Lerwa pou dir zot: “Vini, zot ki mon Papa in beni! Vin erit [paradi lo later anba dominasyon sa] Rwayonm ki’n ganny prepare pour zot.” (Zan 10:16; Matye 25:34) Alors, nou ankouraz tou bann sitwayen sa Rwayonm pour kontinyen servi Kris, sa Lerwa, avek determinasyon e avek fidelite.

[Not anba lo paz]

Eski ou kapab eksplike?

• Akoz nou merite reste fidel avek Kris?

• Ki mannyer bann sitwayen Kris i montre ki zot fidel avek li?

• Akoz nou anvi reste fidel avek Kris sa Lerwa?

[Bwat lo paz 31]

LEZOT KALITE REMARKAB DAN KRIS

I pa fer lapliferans—Zan 4:7-30.

Konpasyon—Matye 9:35-38; 12:18-21; Mark 6:30-34.

Met lentere lezot avan—Zan 13:1; 15:12-15.

Fidelite—Mark 7:32-35; Lik 7:11-15; Ebre 4:15, 16.

Konpran lezot—Mark 7:32-35; Lik 7:11-15; Ebre 4:15, 16.

Rezonnab—Matye 15:21-28.

[Portre lo paz 29]

Kan nou kontan kanmarad nou pe fidelman soumet avek “lalwa Kris”

[Portre lo paz 31]

Eski bann kalite dan Kris i pous ou pour servi li fidelman?