Bann lanz “ki ganny anvoye pour donn led”

“Pa zot bann lespri ki servi Bondye, e ki ganny anvoye pour donn led tou bann ki devre ganny sove?”—EBR. 1:14.

1. Ki rekonfor nou gannyen ler nou lir Matye 18:10 ek Ebre 1:14?

ZEZI KRI ti averti okenn dimoun ki ti a kapab fer tonbe son bann disip: “Fer sir ki zot pa mepriz okenn sa bann pti zanfan, parski mon dir zot, ki dan lesyel zot lanz i toultan dan prezans mon Papa ki dan lesyel.” (Mat. 18:10) Kan zapot Pol ti pe refer avek bann lanz fidel, i ti ekrir: “Pa zot bann lespri ki servi Bondye, e ki ganny anvoye pour donn led tou bann ki devre ganny sove?” (Ebr. 1:14) Sa bann parol i donn nou en lasirans ki rekonfortan, se ki Bondye i servi sa bann lanz pour ed bann imen isi lo later. Ki Labib i dir nou lo bann lanz? Konman ki zot ed nou? Ki leson nou kapab tire atraver zot legzanp?

2, 3. Nonm serten responsabilite ki bann lanz i annan.

² I annan plizyer milyon lanz fidel dan lesyel. Zot tou zot annan “gran pwisans [e] pe fer sa ki [Bondye] i dir.” (Ps. 103:20; lir Revelasyon 5:11.) Sa bann garson Bondye i annan zot prop personnalite, zot kapab demontre bann kalite ki Bondye i annan e zot osi annan sa liberte pour swazir. Zot in ganny byen organize e annan bann pozisyon enportan dan laranzman ki Bondye in fer. I annan en arkanz, oubyen sef lanz, ki apel Misel (non Zezi dan lesyel). (Dan. 10:13; Zid 9) Sa “premye-ne tou kreasyon” i osi apel “Laparol” oubyen Portparol Bondye e se atraver li ki Zeova ti kree tou lezot keksoz.—Kol. 1:15-17; Zan 1:1-3.

³ Anba sa arkanz i annan bann serafen ki fer konnen ki Zeova i sen e ki ede pour gard pep Bondye prop spirityelman. I osi annan bann seriben ki siport souvrennte Zeova. (Zen. 3:24; Iza. 6:1-3, 6, 7) Bann lezot lanz oubyen mesaze, zot ganny diferan latas kot zot akonplir lavolonte Bondye.—Ebr. 12:22, 23.

4. Ki ti reaksyon bann lanz kan later ti ganny etablir, e ki posibilite imen ti pou annan si zot ti’n byen servi zot liberte pour swazir?

⁴ Tou bann lanz ti dan lazwa kan ‘later ti ganny etablir’ e i ti en plezir pour zot akonplir zot latas anmezir later ki parey en bizou inik dan lespas ti devlope pour vin sa landrwa kot imen i reste. (Zob 38:4, 7) Zeova ti kree Adan en pti pe “pli ba ki bann lanz” me dan Son “resanblans.” Alors, sa i permet nou pour osi demontre bann kalite ki nou Kreater i annan ki bokou pli siperyer. (Ebr. 2:7; Zen. 1:26) Si zot ti’n byen servi sa abilite ki zot ti annan pour swazir, Adan, Ev ek zot desandans ti pou’n kapab kontinyen viv ere dan en paradi ki ti pou vin zot lakour, dan sa fanmir iniversel ki konpri bann lanz.

5, 6. Ki kalite rebelyon ti arive dan lesyel e konman Bondye ti azir?

⁵ San okenn dout, bann lezot lanz ti’n bezwen soke kan zot ti vwar serten dan sa fanmir ki Bondye ti’n formen konmans rebele. I ti annan en lanz parmi zot ki ti nepli anvi kontinyen loue Zeova, me i ti anvi ganny adore. Sa lanz ti fer son lekor vin Satan (ki vedir “Opozan”) kan i ti kestyonnen si Zeova i diriz dan en fason drwat, e avek lanbisyon i ti esey etablir son prop dominasyon ki kont Bondye. Atraver sa premye mansonz ki Labib i koz lo la, nou vwar ki Satan ti enfliyans sa de premye imen pour zwenn li dan sa rebelyon kont zot Kreater ranpli avek lanmour.—Zen. 3:4, 5; Zan 8:44.

⁶ San tarde Zeova ti pas en zizman lo Satan ki nou kapab vwar dan sa premye profesi dan Labib: “Mon pou met en laenn ant ou ek sa madanm, ant ou desandans ek son desandans. I pou kraz ou latet e ou pou kraz son talon.” (Zen. 3:15) I ti pou kontinyen annan laenn ant Satan ek “madanm” Bondye. Wi, Zeova ti konsider son lorganizasyon dan lesyel, setadir son bann lanz fidel konman en madanm ki i kontan, ki atase avek li, konmsi li i msye sa madanm. Sa profesi i donn nou en vre rezon pour annan lespwar, menm si bann detay ti ankor en [“sen sekre,” NW] e ki ptitapti ti pou ganny revele. Bondye ti’n deside ki kelken dan son lorganizasyon, sa parti ki dan lesyel, ti pou detrir tou bann rebel e se atraver li ki “tou keksoz dan lesyel e lo later” pou ganny reini ansanm.—Efe. 1:8-10.

7. Ki serten lanz ti fer dan letan Noe e ki konsekans zot ti sibir?

⁷ Dan letan Noe, en bon pe lanz ti kit zot “prop demer” e pran laform imen avek bi pour satisfer zot bann dezir egois isi lo later. (Zid 6; Zen. 6:1-4) Zeova ti zet sa bann rebel dan en fernwanr spirityel e ansanm avek Satan zot ti vin en [“gran larme bann move lespri,” NW] e zot ti vin bann lennmi vreman danzere pour serviter Bondye.—Efe. 6:11-13; 2 Pyer 2:4.

Ki mannyer bann lanz i ed nou?

8, 9. Ki mannyer Zeova in servi bann lanz pour ed bann imen?

⁸ Parmi bann dimoun ki ti ganny led avek bann lanz ti annan Abraam, Zakob, Moiz, Zozye, Izai, Danyel, Zezi, Pyer, Zan ek Pol. Bann lanz fidel ti egzekit zizman Bondye, anons profesi, donn lenstriksyon, e osi transmet lalwa Moiz. (2 Rwa. 19:35; Dan. 10:5, 11, 14; Akt 7:53; Rev. 1:1) Vi ki aprezan nou annan Parol Bondye an antye, petet i pa neseser ki bann lanz i anmenn bann mesaz sorti kot Bondye. (2 Tim. 3:16, 17) Menm si nou pa vwar zot, bann lanz i vreman okipe pe akonplir lavolonte Bondye e pe donn sipor bann serviter Bondye lo later.

⁹ Labib i asir nou: “Lanz Zeova pe kanpe toultour bann ki annan lakrent pour li, e i sov zot.” (Ps. 34:7; 91:11) Lefet ki en kestyon konsernan lentegrite bann imen ti ganny souleve, Zeova i les Satan anvoy tou sort kalite leprev lo nou. (Lik 21:16-19) Osi lontan ki nou lentegrite anver Bondye pe ganny teste, Bondye i konnen ziska ki degre nou kapab andir en leprev ki pou prouve ki nou fidel avek li. (Lir 1 Korentyen 10:13.) Bann lanz i touzour pare pour akord zot led par fer sa ki annakor avek lavolonte Bondye. Bann lanz ti delivre Sadrak, Mesak, Abednego, Danyel ek Pyer. Me zot pa ti anpes Etyenn ek Zak ganny touye dan lanmen zot lennmi. (Dan. 3:17, 18, 28; 6:22; Akt 7:59, 60; 12:1-3, 7, 11) Sirkonstans ek tou sa ki ti enplike dan sa sityasyon ti diferan. Pareyman, serten nou bann frer ki ti dan kan konsantrasyon Nazi ti perdi zot lavi, me de lot kote Zeova ti fer ki lamazorite ti sirviv.

10. Apard led bann lanz, ki led nou kapab gannyen?

¹⁰ Labib pa dir ki sak dimoun lo later i annan en lanz gardyen. Parkont, nou fer lapriyer avek konfyans ki “si nou demann keksoz dapre son lavolonte, [Bondye] pou ekout nou.” (1 Zan 5:14) Byensir, Zeova i kapab anvoy en lanz pour vin ed nou, me nou kapab ganny led dan en lot fason. Nou bann frer ek ser i kapab ganny motive pour ed e rekonfort nou. Bondye i kapab donn nou lasazes ek sa moral ki nou bezwen pour fer fas avek [“en pikan dan [nou] laser,” NW] ki fermal, konmsi ou a krwar nou pe ganny bate avek “en mesaze Satan.”—2 Kor. 12:7-10; 1 Tesa. 5:14, NW.

Imit Zezi

11. Ki mannyer bann lanz ti ed Zezi e ki Zezi ti prouve kan i ti reste fidel avek Bondye?

¹¹ Annou egzaminen konman ki Zeova ti servi bann lanz dan ka Zezi. Zot ti anons son nesans ek rezireksyon e zot ti osi ed li kan i ti lo later. Bann lanz ti’n kapab anpes Zezi ganny arete e touye dan en fason kriyel. Me plito , en lanz ti ganny anvoye pour ankouraz li. (Mat. 28:5, 6; Lik 2:8-11; 22:43) Parey Zeova ti’n plàn, Zezi ti ofer son lekor konman en sakrifis e kan i ti fer sa i ti prouve ki en imen parfe i kapab gard son lentegrite anver Bondye menm si i pas dan bann leprev vreman difisil. An retour, Zeova ti resisit Zezi par donn li en lavi dan lesyel kot zanmen i pou kapab mor ankor, i ti donn li “tou pouvwar” e osi fer bann lanz soumet avek li. (Mat. 28:18; Akt 2:32; 1 Pyer 3:22) Alors, Zezi ti vin sa parti prensipal “desandans” “madanm” Bondye.—Zen. 3:15; Gal. 3:16.

12. Ki mannyer nou kapab imit lafason ki Zezi ti demontre bon balans?

¹² Zezi ti konnen ki si i ti azir dan en fason ki pa saz oubyen iresponsab e apre ekspekte ki bann lanz ti pou vin delivre li, sa ti pou mal akoz si i ti fer sa, i ti ava pe teste Zeova. (Lir Matye 4:5-7.) Alors, annou imit legzanp Zezi par demontre “bon zizman” par evite pran bann risk ki pa neseser, e osi annou met nou pare pour fer fas avek persekisyon.—Tit 2:12, NW.

Sa ki nou kapab aprann avek bann lanz fidel

13. Ki leson nou kapab tire avek bann lanz fidel ki 2 Pyer 2:9-11 i koz lo la?

¹³ Kan i ti pe reprimann sa bann ki ti pe “ensilte” bann serviter ki Zeova ti’n swazir, zapot Pyer ti fer resorti sa bon legzanp ki bann lanz fidel ti donnen. Menm si zot annan bokou pouvwar, avek limilite bann lanz i evite fer okenn lakizasyon pour ziz lezot [“akoz zot annan respe pour Zeova,” NW]. (Lir 2 Pyer 2:9-11.) Annou evite ziz lezot, plito annou respe bann sirveyan dan kongregasyon e les tou keksoz dan lanmen Zeova, sa Ziz Siprenm.—Rom. 12:18, 19; Ebr. 13:17.

14. Ki nou aprann avek bann lanz lefet ki zot servi Bondye avek limilite?

¹⁴ Bann lanz Zeova i akonplir zot servis avek limilite e sa i en bon legzanp pour nou. Serten lanz ti refize dir bann imen ki mannyer zot apele. (Zen. 32:29; Ziz 13:17, 18) Menm si i annan plizyer milyon lanz dan lesyel, Labib i mansyonn zis de par zot non, Misel ek Gabriyel. Petet sa i en rezon akoz nou pa devret donn bann lanz en loner ki zot pa merite. (Lik 1:26; Rev. 12:7) Kan zapot Zan ti tonm ater pour ador en lanz, sa lanz ti konsey li: ‘Atansyon, pa fer sa! Mwan mon en kanmarad travay parey ou, pour ou e parey ou bann frer.’ (Rev. 22:8, 9) Nou devret ador e priy zis Bondye.—Lir Matye 4:8-10.

15. Ki legzanp bann lanz in donn nou konsernan pasyans?

¹⁵ Pasyans i en lot leson ki nou tire avek bann lanz. Menm si zot vreman enpasyan pour konn bann sen sekre Bondye, pa tou keksoz ki ganny revele avek zot. Labib i dir ki “menm bann lanz ti a byen kontan” konn sa bann keksoz. (1 Pyer 1:12) Alors, ki zot fer? Avek pasyans zot espere ziska ki ler in arive kot “lasazes Bondye dan son diferan form” i ganny revele “atraver kongregasyon.”—Efe. 3:10, NW, 11.

16. Ki lefe nou kondwit i annan lo bann lanz?

¹⁶ Bann Kretyen ki pe pas atraver leprev i ‘konman en spektak pour bann lanz.’ (1 Kor. 4:9) Kan nou fer bann aksyon pour demontre nou fidelite, bann lanz i obzerv nou avek gran satisfaksyon e zot menm rezwir kan en dimoun i repantir. (Lik 15:10) Bann lanz i remark bon kondwit bann madanm oubyen ser Kretyen. Labib i dir ki “rezon akoz bann madanm i devre kouver zot latet se akoz bann lanz.” (1 Kor. 11:3, 10) Wi, bann lanz i kontan pour vwar bann madanm Kretyen ek tou lezot serviter Bondye lo later swiv laranzman teokratik e respekte lotorite. Sa lobeisans ki bann madanm i demontre i en bon rapel pour sa bann garson Bondye dan lesyel.

Bann lanz i byen siport sa travay predikasyon

17, 18. Akoz nou kapab dir ki bann lanz pe donn nou sipor dan sa travay predikasyon?

¹⁷ Bann lanz i annan en rol pour zwe dan serten sa bann levennman remarkab ki pe arive diran “Zour Senyer.” Sa bann levennman i enkli, letablisman Rwayonm Bondye an 1914 e kan Satan ek son bann demon ti ganny zete lo later par “Misel avek son bann lanz.” (Rev. 1:10; 11:15; 12:5-9) Zapot Zan ti vwar en “lanz pe anvole atraver lesyel, avek en levanzil eternel pour anons tou zabitan later.” Sa lanz ti dir: “Donn Bondye loner e rann li glwar, parski ler son zizman in arive. Ador sa Enn ki’n fer lesyel, later, lanmer ek bann sours delo.” (Rev. 14:6, 7) Alors, bann serviter Zeova i asire ki zot pou ganny sipor bann lanz anmezir ki zot pres sa bon nouvel konsernan sa Rwayonm ki’n ganny etablir malgre Dyab pe opoz zot severman.—Rev. 12:13, 17.

¹⁸ Ozordi, bann lanz pa koz avek nou pour gid nou ver bann dimoun senser parey i ti leka pour Filip kot lanz ti diriz li ver en Etyopyen. (Akt 8:26-29) Me parkont, i annan en kantite leksperyans ozordi ki montre ki bann lanz i la, kantmenm nou pa kapab vwar zot, pe donn nou sipor dan sa travay predikasyon e pe gid nou ver sa bann ki “annan sa bon kondisyon leker pour lavi eternel.”a (Akt 13:48, NW) Pa i vreman enportan ki nou partisip regilyerman dan predikasyon pour ki nou fer nou par pour rod sa bann ki anvi “ador [Bondye] an-espri e an verite”!—Zan 4:23, 24.

19, 20. Ki rol bann lanz i annan pour zwe dan konklizyon sa sistenm?

¹⁹ Zezi ti pe koz pour nou letan kan i ti dir ki [“pandan konklizyon sa sistenm,” NW] bann lanz ti pou “separ bann ki move avek bann ki bon.” (Mat. 13:37-43, 49) Bann lanz i annan en rol pour zwe pour fer sa dernyen rasanbleman bann Kretyen swazir e pour finalman sel zot. (Lir Matye 24:31; Rev. 7:1-3) Deplis, i pou annan bann lanz avek Zezi kan i pou “separ son mouton ek bann kabri.”—Mat. 25:31-33, 46.

²⁰ “Kan Senyer Zezi pou paret dan lesyel avek son bann lanz pisan” tou sa “bann ki pa konn Bondye ek bann ki pa obei levanzil ki konsern nou Senyer Zezi” pou ganny detrir. (2 Tesa. 1:6-10) Kan Zan ti vwar sa menm levennman dan en vizyon, i ti dir ki Zezi ek son bann larme lanz dan lesyel ti lo bann seval blan ki ti pe galope pour al fer lager dan lazistis.—Rev. 19:11-14.

21. Ki aksyon sa lanz avek “lakle labim ek en gran lasenn dan son lanmen” pou pran kont Satan ek son bann demon?

²¹ Zapot Zan ti osi vwar ‘en lanz desann sorti dan lesyel avek lakle labim ek en gran ­lasenn dan son lanmen.’ Sa i pa lot ki Misel sa arkanz, ki pou ansenn Dyab e san okenn dout bann demon osi e zet zot dan labim. Zot pou ganny large pour en pti pe letan a lafen sa Mil an ki Kris pou dirize e la bann imen parfe pou ganny teste pour en dernyen fwa. Apre sa, Satan ansanm avek tou bann lezot rebel pou ganny detrir. (Rev. 20:1-3, 7-10; 1 Zan 3:8) Tou bann ki rebel kont Bondye pou’n disparet.

22. Ki mannyer bann lanz i enplike dan sa ki pou arive byento e konman nou devret santi anver zot rol?

²² Byento nou pou ganny delivre avek sa move sistenm Satan. Bann lanz pou annan en rol enportan pour zwe dan sa bann levennman enportan ki pou zistifye sa drwa ki Zeova i annan konman Souvren liniver e pour finalman akonplir lavolonte Bondye pour later ek imen dan en fason konplet. Bann lanz fidel i vreman “bann lespri ki servi Bondye, e ki ganny anvoye pour donn led tou bann ki devre ganny sove.” Alors annou remersye Zeova pour lafason ki i servi bann lanz pour ed nou fer son lavolonte e ganny lavi eternel.

[Not anba lo paz 26]

Ki mannyer ou pou reponn?

• Ki mannyer bann lanz i ganny klasifye?

• Ki serten lanz ti fer dan letan Noe?

• Konman Bondye in servi bann lanz pour ed nou?

• Ki rol bann lanz fidel i annan pour zwe dan nou letan?

[Portre lo paz 22]

ann lanz i pran plezir pour fer lavolonte Bondye

[Portre lo paz 24]

Parey dan ka Danyel, bann lanz i touzour pare pour akord zot led annakor avek lavolonte Bondye

[Portre lo paz 25]

Annan kouraz, akoz bann lanz pe donn nou sipor dan sa travay predikasyon!

[Portre lo paz 2262]

Annan kouraz, akoz bann lanz pe donn nou sipor dan sa travay predikasyon!

Globe: Portre tire par NASA