Ki mannyer nou kapab ed en etidyan Labib pour progrese ziska batenm​—Dezyenm parti

 1. Ki mannyer nou konnen ki sa travay pour fer disip i sov lavi?

SA TRAVAY pour fer disip i sov lavi! Ki mannyer nou konn sa? Ler Zezi ti donn sa lord ki dan Matye 28:19, 20, i ti dir: “Al kot bann dimoun . . . e fer zot vin mon disip, batiz zot.” Eski batenm i enportan? Nou bezwen batize si nou anvi ganny sove. En dimoun ki anvi batize i bezwen krwar ki sel rezon i kapab ganny sove, i akoz Zezi in donn son lavi konman en ranson e i’n ganny resisite. I pour sa rezon ki zapot Pyer ti dir avek son bann frer ek ser Kretyen: “Batenm . . . pe sov zot . . . gras a rezireksyon Zezi Kri.” (1 Pyer 3:21) Alor, ler en nouvo disip i batize, i kapab annan sa lespwar pour viv pour touzour.

 2. Dapre 2 Timote 4:1, 2, ki kalite ansenyan nou devret ete?

² Pour fer disip, nou bezwen devlop sa abilite pour “ansenny byen.” (Lir 2 Timote 4:1, 2.) Akoz? Parski Zezi ti donn nou sa lord: “Al kot bann dimoun . . . fer zot vin mon disip . . . ansenny zot.” Zapot Pol ti dir “persevere” dan sa travay “parski si ou fer sa, ou pou sov ou prop lekor ek sa bann ki ekout ou.” Pol ti annan rezon pour osi dir: “Toultan vey . . . ou lansennyman.” (1 Tim. 4:16) Si nou anvi fer disip, nou bezwen kapab ansenny byen.

 3. Ki nou pou vwar dan sa lartik konsernan fer bann letid Labib?

³ Nou pe fer letid Labib avek plizyer milyon dimoun partou dan lemonn. Me parey nou’n vwar dan sa lartik avan, nou anvi konnen ki mannyer nou kapab ed plis dimoun parmi sa plizyer milyon ki pe etidye pour batize e vin disip Zezi Kri. Dan sa lartik, nou pou vwar senk lezot keksoz en ansenyan i bezwen fer pour ed son etidyan progrese ziska batenm.

 4. Akoz en ansenyan i bezwen annan kontrol lo son lekor ler i pe fer en letid Labib? (Vwar not.)

⁴ Nou kontan sa ki nou ansennyen sorti dan Parol Bondye. Alor, i kapab ki nou anvi koz en kantite lo la. Par kont, ki swa nou pe kondwir Letid Latour Veyer, Letid Labib kongregasyon oubyen nou pe fer letid avek en dimoun, nou pa devret koz tro bokou. Pour sa ansenyan kapab byen servi Labib pour ansennyen, i bezwen annan kontrol lo son lekor e pa esey eksplik tou sa ki i konnen lo en verse Labib oubyen lo en topik.b (Zan 16:12) Si ou konpar sa ki ou ti konnen ler ou ti batize avek sa ki ou konnen la konmela, ou pou realize ki ler ou ti batize ou ti konn zis bann lansennyman de baz ki dan Labib. (Ebr. 6:1) I’n pran ou plizyer lannen pour aprann tou sa ki ou konnen ozordi, alor pa esey ansenny en nouvo etidyan tou keksoz en sel kou.

 5. (a) Anliny avek 1 Tesalonisyen 2:13, ki nou anvi nou etidyan i konpran konsernan sa ki i pe aprann dan son letid? (b) Ki mannyer nou kapab ankouraz en etidyan pour koz lo sa ki i pe aprann dan Labib?

⁵ Nou anvi ki nou etidyan i konpran ki sa ki i pe aprann i sorti dan Labib. (Lir 1 Tesalonisyen 2:13.) Ki mannyer nou kapab fer sa? Ankouraz sa etidyan pour koz lo sa ki i pe aprann. Olye toultan eksplik bann verse Labib avek sa etidyan, demann li pour eksplik serten sa bann verse avek ou. Ed sa etidyan vwar ki mannyer Parol Bondye i aplik pour li personnelman. Demann li bann kestyon ki pou ed li eksprim sa ki i pe mazinen e santi konsernan bann verse ki i lir. (Lik 10:25-28) Par egzanp, demann li: “Ki mannyer sa verse in ed ou vwar enn bann kalite ki Zeova i annan?” “Ki mannyer sa ki ou pe aprann dan Labib i kapab ed ou?” “Ki mannyer ou santi konsernan sa ki ou’n fek aprann?” (Prov. 20:5, NWT) Sa ki pli enportan i pa lakantite ki en etidyan i konnen me lakantite ki i kontan e aplik sa ki i konnen.

 6. Akoz i kapab byen pour anmenn en proklanmater eksperyanse avek ou ler ou fer letid?

⁶ Si ou anvi vin en pli bon ansenyan, ou bezwen annan limilite. (Konpar Akt 18:24-26.) Eski ou’n deza anmenn lezot proklanmater eksperyanse avek ou ler ou pe fer en letid? Si ou fer sa, ou kapab demann zot ki zot panse konsernan lafason ki ou kondwir sa letid e si ou pe byen servi Labib pour ansennyen. Apre, demann sa proklanmater eksperyanse si i krwar ki sa etidyan i konpran sa ki i pe aprann. Ou kapab osi demann sa menm proklanmater pour fer sa letid si ou pa pou kapab fer pour en semenn oubyen plis. Sa pou fer ki sa letid i regilye e sa etidyan pou vwar ki kantite i enportan pour li fer son letid. Pa zanmen krwar ki sa i “ou” letid e ki personn pa kapab fer sa letid. Apre tou, ou anvi sa ki pli bon pour sa etidyan, pour li kapab fer progre e kontinyen aprann laverite.

 7. Kwa ki pou ed en etidyan pour eksite konsernan sa ki i pe aprann?

⁷ En etidyan i bezwen vwar ki ou kontan e ki ou krwar dan sa ki Labib i dir. (1 Tesa. 1:5) Koumsa sa etidyan pou pli eksite konsernan sa ki i pe aprann. Si i apropriye, ou kapab dir li ki mannyer Labib in ed ou dan ou lavi. Sa pou ed li realize ki Labib i kapab ed li.

 8. Kwa ankor ki ou kapab fer pour ed ou etidyan Labib e akoz ou pou fer sa?

⁸ Pandan sa letid, koz avek sa etidyan lo leksperyans bann frer ek ser ki’n fer fas avek menm problenm parey sa etidyan e ki’n reisi sirmont sa problenm. Si i annan en dimoun dan kongregasyon ki son legzanp i kapab ed sa etidyan, petet ou kapab anmenn sa dimoun avek ou lo sa letid. Oubyen ou kapab trouv bann zoli leksperyans lo jw.org dan sa seri lartik ki annan pour tit “Labib i sanz lavi.”c Sa bann lartik ek video pou ed sa etidyan vwar ki bann prensip Labib i kapab ed li fer bann sanzman dan son lavi.

 9. Ki mannyer ou kapab ankouraz en etidyan pour koz lo sa ki i pe aprann avek son fanmir ek zanmi?

⁹ Si sa etidyan in marye, eski son konzwen pe etidye? Si non, envit son konzwen pour asiste letid. Ankouraz sa etidyan pour koz lo sa ki i pe aprann avek son fanmir ek zanmi. (Zan 1:40-45) Ki mannyer ou kapab fer sa? Petet ou kapab demann li: “Ki mannyer ou ti pou eksplik sa pwen avek ou fanmir?” oubyen “Ki verse ou ti pou servi pour prouv sa pwen avek en zanmi?” Dan sa fason, ou ava pe form sa etidyan pour vin en ansenyan li osi. Pli tar, ler i’n kalifye, i ava konmans partisip dan sa travay predikasyon konman en proklanmater ki pa ankor batize. Ou kapab demann sa etidyan si i konn dimoun ki ti a kontan etidye Labib. Si i konnen, kontakte sa dimoun deswit e ofer li en letid. Montre li sa video Kwa ki pase pandan en letid Labib?d

10. Parey nou vwar dan 1 Tesalonisyen 2:7, 8, ki mannyer en ansenyan i kapab swiv legzanp Pol?

¹⁰ Bann ansenyan i devret demontre lentere personnel dan zot etidyan. Vwar zot konman en fitir frer oubyen ser. (Lir 1 Tesalonisyen 2:7, 8.) I pa fasil pour zot kit zot bann zanmi ki zot annan dan lemonn e pour fer bann sanzman ki neseser pour servi Zeova. Nou bezwen ed zot trouv bann vre zanmi dan kongregasyon. Vin en zanmi pour ou etidyan. Pas letan avek li pa zis ler zot fer letid me pandan lezot lokazyon. Ler ou telefonn li, anvoy li en mesaz oubyen vizit li dan bann letan ki zot pa pe fer letid, sa i montre ki ou kontan li.

11. Ki nou anvi nou bann etidyan i annan dan kongregasyon e akoz?

¹¹ I annan en koze ki dir: “I pran en kominote pour elve en zanfan.” Nou nou kapab dir: “I pran en kongregasyon pour fer en disip.” I pour sa rezon ki bann bon ansenyan i entrodwi zot bann etidyan avek lezot dan kongregasyon ki kapab annan en bon lenfliyans lo zot. Ler zot pas letan avek pep Bondye, sa bann frer ek ser i kapab ed zot pour vin pli bon zanmi avek Zeova e ankouraz zot ler zot annan problenm. Nou anvi ki tou sa bann ki pe etidye i santi ki zot form parti kongregasyon ek nou fanmir spirityel. Nou anvi ki zot ganny atire par sa lanmour ki i annan antre nou. Koumsa i pou pli fasil pour zot aret frekant bann dimoun ki pa ed zot pour kontan Zeova. (Prov. 13:20) Si zot bann zanmi avan i rezet zot, zot pou konnen ki zot kapab annan bann bon zanmi dan lorganizasyon Zeova.​—Mark 10:29, 30; 1 Pyer 4:4.

12. Akoz nou devret koz avek nou etidyan konsernan lenportans pour dedye son lavi avek Zeova e batize?

¹² Ou bezwen koz avek ou etidyan lo ki kantite i enportan pour en dimoun dedye son lavi avek Zeova e batize. Apre tou, rezon akoz nou fer bann letid Labib avek dimoun i pour ed zot vin en disip ki’n batize. Apre ki en etidyan in etidye pour detrwa mwan e sirtou si i’n konmans asiste renyon, sa etidyan i bezwen konpran ki lobzektif son letid i pour ed li vin en Temwen Zeova.

13. Ki en etidyan i bezwen fer pour li kapab batize?

¹³ I annan plizyer keksoz en etidyan Labib ki anvi batize i kapab fer. Premyerman, sa etidyan i aprann konn Zeova, kontan li e met lafwa dan li. (Zan 3:16; 17:3) Sa etidyan i devlop en lanmitye avek Zeova e osi avek bann frer ek ser dan kongregasyon. (Ebr. 10:24, 25; Zak 4:8) Avek letan, sa etidyan i aret fer bann move keksoz e i repantir pour son bann pese. (Akt 3:19) Osi, son lafwa i pous li pour koz avek lezot lo sa ki i’n aprann. (2 Kor. 4:13) Apre, i dedye son lavi avek Zeova e i batize. (1 Pyer 3:21; 4:2) Sa zour ki i batize, i en zour zwaye pour tou dimoun! Anmezir ki sa etidyan i fer bann keksoz ki i bezwen fer pour li batize, kontinyen felisit li e ankouraz li pour kontinyen fer sa bann keksoz.

14. Ki mannyer en ansenyan pour konnen si en etidyan pe progrese?

¹⁴ Nou bezwen annan pasyans ler nou pe ed en etidyan progrese pour li dedye son lavi e batize. Me nou osi bezwen konnen si i anvi servi Zeova. Eski sa etidyan i montre ki i pe esey obei bann komannman Zezi? Oubyen, eski i zis anvi aprann bann keksoz enteresan ki dan Labib?

15. Kwa ki pou montre en ansenyan si en etidyan pe fer progre?

¹⁵ Tanzantan tyeke si sa etidyan pe progrese. Par egzanp, eski i eksprim son santiman pour Zeova? Eski i priy Zeova? (Ps. 116:1, 2) Eski i kontan lir Labib? (Ps. 119:97) Eski i pe asiste renyon regilyerman? (Ps. 22:22) Eski i’n fer bann sanzman ki montre ki i aplik sa ki i pe aprann? (Ps. 119:112, NWT) Eski i’n konmans koz lo sa ki i pe aprann avek son fanmir ek zanmi? (Ps. 9:1) Pli enportan ankor, eski i anvi vin en Temwen Zeova? (Ps. 40:8) Si sa etidyan pa pe fer sa bann keksoz, esey rode akoz e koz lo la avek li dan en fason zantiy me fran.e

16. Kan ki ou devret aret en letid?

¹⁶ Tanzantan demann ou lekor si ou devret kontinyen en letid avek en dimoun. Demann ou lekor: ‘Eski sa etidyan pa prepare pour son letid? Eski i pa anvi vin renyon? Eski i ankor annan bann move labitid? Eski i ankor en manm fo larelizyon?’ Si larepons i wi, sa letid pou parey ou pe esey montre en dimoun ki pa anvi mouye ki mannyer pour naze. Si sa etidyan pa apresye sa ki i pe aprann e i pa pare pour fer bann sanzman, eski i vo lapenn kontinyen fer son letid?

17. Dapre 1 Timote 4:16, ki tou ansenyan Labib i bezwen fer?

¹⁷ I vreman enportan pour nou desarz nou responsabilite pour fer disip e nou anvi ed nou etidyan progrese ziska batenm. I pour sa rezon ki nou pou servi Labib pour ansennyen e nou pou ansenny avek lantouzyazm ek konviksyon. Nou pou ankouraz nou etidyan pour fer zanmi dan kongregasyon. Nou pou osi toultan koz lo dedikasyon ek batenm e tanzantan gete si sa etidyan pe fer progre. (Vwar sa bwat “Sa ki en ansenyan i bezwen fer pour ed son etidyan progrese ziska batenm”.) Nou kontan ki nou kapab partisip dan sa travay ki sov lavi! Annou determinen pour fer nou mye pour fer bann letid Labib ki progrese ziska batenm.