Eski ou’n pare pour batize?

 1. Ki en dimoun i bezwen fer avan i konstrir en lakaz?

IMAZIN en dimoun i deside konstrir en lakaz. I konnen ki kalite lakaz i anvi konstrir. Eski deswit i pou al aste materyo e konmans konstrir? Non. Avan i konmanse, i bezwen fer en keksoz enportan. I bezwen kalkile konbyen sa lakaz pou koute. Akoz? Parski i bezwen konnen si i annan ase larzan pour fini konstrir sa lakaz. Si i kalkil byen konbyen i pou koute avan i konmans konstrir, i tre probab ki i pou fini sa konstriksyon.

 2. Dapre Lik 14:27-30, ki ou devret pe reflesir lo la avan ou batize?

² Eski ou lanmour ek lapresyasyon pour Zeova pour sa ki i fer pour ou, i fer ou mazin pour batize? Si i leka, ou bezwen fer en desizyon parey sa zonm ki anvi konstrir en lakaz. Akoz nou kapab dir sa? Annou vwar sa ki Zezi i dir dan Lik 14:27-30. (Lir.) Zezi ti pe dir kwa ki i enplike pour vin son disip. Pour vin son disip, nou bezwen pare pour andir serten difikilte e abandonn serten keksoz. (Lik 9:23-26; 12:51-53) Alor, avan ou batize ou bezwen reflesir byen lo tou sa ki ou pou fer fas avek si ou vin en disip Kris. Apre sa, ou pou pli pare pour kontinyen servi Bondye konman en Kretyen ki’n batize.

 3. Ki nou pou diskite dan sa lartik?

³ Eski i vo lapenn andir serten difikilte e abandonn serten keksoz pour batize e vin en disip Kris? Byensir! En dimoun ki batize pou ganny bokou benediksyon la konmela e a lavenir. Annou vwar serten kestyon enportan konsernan batenm. Sa pou ed ou reponn sa kestyon, “Eski mon pare pour batize?”

 4. (a) Ki savedir dedikasyon? (b) Dapre Matye 16:24, ki savedir “aret viv zis pour [ou] menm?”

⁴ Ki savedir dedikasyon? Avan ou kapab batize, ou bezwen dedye ou lavi avek Zeova. Ler ou dedye ou lavi avek Zeova, ou priy Zeova avek tou ou leker e ou dir li ki ou pou servi li tou dilon ou lavi, pour touzour. Ler ou dedye ou lavi avek Bondye, ou “aret viv zis pour [ou] menm.” (Lir Matye 16:24.) Aprezan ou vin pour Zeova e sa i en gran privilez. (Rom. 14:8) Ou pe dir Zeova ki apartir sa moman, keksoz pli enportan pour ou, i pour servi li e non pa fer plezir ou prop lekor. Ou dedikasyon i en ve oubyen en promes ki ou fer avek Bondye. Zeova pa fors nou pour fer sa promes. Me ler nou fer sa promes, i ekspekte ki nou gard nou promes.​—Ps. 116:12, 14.

 5. Ki fason dedikasyon i relye avek batenm?

⁵ Ki fason dedikasyon i relye avek batenm? Personn pa konnen ler ou dedye ou lavi avek Zeova. Batenm i ganny fer an piblik, devan lezot dimoun e pandan lasanble. Ler ou batize, ou montre lezot ki ou’n fini dedye ou lavi avek Zeova.b Alor ou batenm, i fer lezot konnen ki ou kontan Zeova ou Bondye, avek tou ou leker, avek tou ou nanm, avek tou ou lespri, avek tou ou lafors e ou determinen pour servi li pour touzour.​—Mark 12:30.

6-7. Dapre 1 Pyer 3:18-22, ki de rezon enportan ki fer en dimoun batize?

⁶ Eski i neseser pour batize? Annou vwar sa ki i dir dan 1 Pyer 3:18-22. (Lir.) Lars Noe ti montre dimoun ki Noe ti annan lafwa dan Bondye. Dan menm fason, ou batenm i montre dimoun ki ou’n dedye ou lavi avek Zeova. Me eski i vreman neseser pour batize? Wi, i neseser. Pyer ti donn rezon akoz. Premyerman, batenm i “sov [nou].” Batenm i kapab sov nou, si nou demontre par nou aksyon ki nou annan lafwa dan Zezi, nou krwar ki i’n mor pour nou, ki i’n resisite dan lesyel e ki aprezan i “dan kote drwat Bondye.”

⁷ Dezyenmman, batenm i fer nou annan “en konsyans kler.” Ler nou dedye nou lavi avek Bondye e nou batize, nou annan en relasyon spesyal avek li. Vi ki nou’n senserman repantir e nou annan lafwa dan ranson, Bondye i pardonn nou pese. Alor nou kapab annan en konsyans kler devan Bondye.

 8. Ki rezon ou deside batize?

⁸ Ki rezon ou deside batize? Vi ki ou’n etidye Labib byen, sa in fer ki ou’n aprann en kantite lo Zeova, lo son personnalite ek son fason fer. Sa ki ou’n aprann lo li, i’n tous ou leker e fer ou kontan li en kantite. Ou lanmour pour Zeova i devret sa rezon pli enportan ki ou’n deside pour batize.

 9. Dapre Matye 28:19, 20, ki i vedir batize o non Papa, o non Garson e o non lespri Sen?

⁹ En lot rezon akoz ou deside batize i akoz ou’n aprann sa ki Labib i ansennyen e ou’n aksepte ki sa i laverite. Annou vwar sa ki Zezi ti dir ler i ti donn sa lord pour fer disip. (Lir Matye 28:19, 20.) Dapre Zezi, bann ki batize i devret fer li “o non Papa, o non Garson e o non lespri sen.” Ki sa ti vedir? Ou bezwen krwar avek tou ou leker, bann laverite dan Labib konsernan Zeova, son Garson Zezi ek lespri sen. Sa bann laverite i vreman pwisan e i kapab tous ou leker. (Ebr. 4:12) Annou vwar serten sa bann laverite.

10-11. Ki laverite konsernan Papa ki ou’n aprann e aksepte?

¹⁰ Mazin ler ou ti aprann sa bann laverite konsernan Papa: I “apel Zeova,” i “Tre O lo later antye” e li tousel ki “sa vre Bondye.” (Ps. 83:18; Zer. 10:10) I nou Kreater e “delivrans i dan [son] lanmen.” (Ps. 3:8; 36:9) I’n fer laranzman pour sov nou dan pese ek lanmor e i’n donn nou sa lespwar pour viv pour touzour. (Zan 17:3) Ou dedikasyon ek batenm pou montre ki ou en Temwen Zeova. (Iza. 43:10-12) Ou pou form par en fanmir enternasyonal ki ador Bondye, ki kontan pour port non Bondye e fer lezot konn sa non.​—Ps. 86:12.

¹¹ I en gran privilez pour konpran sa ki Labib i ansennyen lo nou Papa. Ler ou krwar dan sa bann laverite, ou pou anvi dedye ou lavi avek Zeova e batize.

12-13. Ki laverite konsernan Garson ki ou’n aprann e aksepte?

¹² Ki ti ou reaksyon ler ou ti aprann sa bann laverite swivan, konsernan Garson? Zezi i sa dezyenm personnaz pli enportan dan liniver. I ti pare pour donn son lavi konman en ranson pour nou. Ler nou demontre par nou aksyon ki nou annan lafwa dan sa ranson, nou pese i kapab ganny pardonnen, nou devlop en lanmitye avek Bondye e nou ganny lavi eternel. (Zan 3:16) Zezi i nou Granpret. I anvi ed nou ganny bann byenfe atraver sa ranson e pour annan en relasyon pros avek Bondye. (Ebr. 4:15; 7:24, 25) Konman Lerwa dan Rwayonm Bondye, Zeova pou servi Zezi pour sanktifye Son non, retir tou sa ki move e anmenn bann benediksyon dan Paradi a lavenir. (Mat. 6:9, 10; Rev. 11:15) Zezi i sa legzanp ki nou devret swiv. (1 Pyer 2:21) I’n donn son lavi pour fer lavolonte Bondye e dan sa fason, i’n kit en bon legzanp pour nou.​—Zan 4:34.

¹³ Ler ou aksepte sa ki Labib i dir lo Zezi, ou pou kontan Garson Bondye. Sa lanmour i fer ou anvi servi ou lavi pour fer lavolonte Bondye parey Zezi ti fer. Sa pou fer ou anvi dedye ou lavi avek Zeova e batize.

14-15. Ki laverite konsernan lespri sen ki ou’n aprann e aksepte?

¹⁴ Ki ou ti mazinen ler ou ti aprann sa bann laverite swivan konsernan lespri sen? I pa en personnaz me i lafors Bondye an aksyon. Zeova ti servi son lespri sen pour enspir bann zonm pour ekri Labib. Lespri sen i ed nou konpran e aplik sa ki nou pe aprann dan Labib. (Zan 14:26; 2 Pyer 1:21) Atraver son lespri sen, Zeova i donn nou lafors “ki pli pwisan ki nou prop lafors.” (2 Kor. 4:7) Lespri sen i donn nou lafors pour anons sa bon nouvel, pour lager avek tantasyon, pour fer fas avek dekourazman e pour sirmont nou bann difikilte. I ed nou demontre bann zoli kalite ki bann laspe “fri lespri sen.” (Gal. 5:22) Bondye i pare pour donn son lespri sen bann ki annan konfyans dan li e ki senserman demann li son led.​—Lik 11:13.

¹⁵ I rekonfortan pour konnen ki bann adorater Zeova i kapab depan lo lespri sen Zeova, pour ed zot servi Li. Ler ou aksepte laverite ki ou’n aprann konsernan lespri sen, ou pou anvi dedye ou lavi avek Bondye e batize.

16. Ziska prezan, ki nou’n aprann dan sa lartik?

¹⁶ Ou desizyon pour dedye ou lavi avek Bondye e batize i vreman enportan. Parey nou’n aprann, ou bezwen pare pour fer fas avek serten difikilte e abandonn serten keksoz. Me bann benediksyon ki ou pou gannyen i bokou plis ki bann sakrifis ki ou pou fer. Batenm i kapab sov ou e i permet ou pour annan en konsyans kler devan Bondye. Ou lanmour pour Zeova i devret sa rezon pli enportan akoz ou deside batize. Ou osi bezwen krwar avek tou ou leker sa bann laverite ki ou’n aprann konsernan Papa, Garson ek lespri sen. Apre ki ou’n reflesir lo sa ki nou’n diskite ziska la, ki mannyer ou pou reponn sa kestyon, “Eski mon pare pour batize?”

17. Ki bann pa neseser ou bezwen fer avan ou batize?

¹⁷ Si ou santi ki ou pare pour batize, i tre probab ki ou’n fini fer plizyer keksoz pour devlop en relasyon avek Zeova.c Vi ki ou’n fer letid labib regilye, ou’n konn bokou lo Zeova ek Zezi, sa in fer ou devlop lafwa. (Ebr. 11:6) Ou’n met tou ou konfyans dan bann promes Zeova ki trouve dan labib e ou asire ki ou lafwa dan sakrifis Zezi i kapab sov ou dan pese ek lanmor. Ou’n repantir, ou regrete pour bann pese ki ou’n fer e ou’n demann Zeova pour pardonn ou. Ou’n sanz ou lavi, ou’n rezet ou bann move fason viv e ou’n konmans viv dan en fason ki fer plezir Zeova. (Akt 3:19) Ou pou anvi koz avek lezot lo ou lafwa. Ou’n kalifye pour vin en proklanmater non batize e ou’n konmans anons sa bon nouvel ansanm avek kongregasyon. (Mat. 24:14) Zeova i fyer ki ou’n fer sa bann pa neseser. Ou’n fer li vreman kontan.​—Prov. 27:11.

18. Ki lezot keksoz ou bezwen fer avan ou kapab batize?

¹⁸ Avan ki ou kapab batize, i annan lezot keksoz ki ou bezwen fer. Parey nou’n aprann pli boner, ou bezwen dedye ou lavi avek Bondye. Priy li senserman e promet li ki ou pou servi ou lavi pour fer son lavolonte. (1 Pyer 4:2) Apre, fer kordinater konsey ansyen konnen ki ou anvi batize. I pou demann serten ansyen pour zwenn avek ou. Pa bezwen per pour ou vwar zot. Pa bliye ki sa bann frer i deza konn ou e zot kontan ou. Zot pou revwar bann lansennyman de baz sorti dan Labib avek ou, ki ou’n deza aprann. Zot oule fer sir ki ou’n konpran byen sa bann lansennyman e ki ou konn lenportans dedikasyon ek batenm. Si zot vwar ki ou’n pare, zot pou dir ou ki ou kapab batize dan prosen lasanble.

19-20. Ki ou pou bezwen fer apre ou batenm e ki mannyer ou kapab fer li?

¹⁹ Apre ki ou’n batize, ki ou pou bezwen fer?d Mazinen ki dedikasyon i en promes e Zeova i ekspekte ou gard ou promes. Alor, apre ou batenm, ou bezwen gard ou promes ki ou’n fer. Ki mannyer ou kapab fer sa?

²⁰ Reste pros avek ou kongregasyon. Konman en kretyen batize, ou form par en “lasosyasyon tou bann frer.” (1 Pyer 2:17) Ou bann frer ek ser dan kongregasyon i ou fanmir spirityel. Ler ou asiste renyon regilyerman, ou lanmitye avek zot pou vin pli for. Lir e medit lo parol Bondye toulezour. (Ps. 1:1, 2) Apre ki ou’n lir en porsyon dan Labib, pran en pe letan pour reflesir lo sa ki ou’n lir. Apre, sa bann parol pou tous ou leker. “Kontinyen priye.” (Mat. 26:41) Ou lapriyer senser pou fer ou vin pli pros avek Zeova. “Kontinyen rod Rwayonm . . . premye.” (Mat. 6:33) Ou kapab fer sa ler ou fer predikasyon vin en priorite dan ou lavi. Ler ou al anons sa bon nouvel regilyerman, ou lafwa i reste for e ou kapab ed lezot pour ganny lavi eternel.​—1 Tim. 4:16.

21. Ki ou batenm pou permet ou gannyen?

²¹ Sa desizyon ki ou’n pran pour dedye ou lavi avek Zeova e batize i sa desizyon pli enportan ki ou’n fer. I vre ki ou pou bezwen fer fas avek serten difikilte e ou pou bezwen abandonn serten keksoz. Eski tousala i vo lapenn? Wi! Parski nenport difikilte ki ou pou fer fas avek dan sa lemonn i “tanporer e leze.” (2 Kor. 4:17) De lot kote, ou batenm pou permet ou pour annan en lavi pli meyer la konmela e “sa vre lavi” a lavenir. (1 Tim. 6:19) Alor silvouple, priye e mazin seryezman larepons sa kestyon, “Eski mon pare pour batize?”