Parol Zeova i vivan

Bann pwen enteresan dan liv Revelasyon—1

KAN i ti dan prizon lo zil Patmos, zapot Zan dan son vye zour ti ganny 16 vizyon enn deryer lot. Dan sa bann vizyon i ti vwar sa ki Zeova ek Zezi Kri ti pou akonplir pandan zour Senyer, setadir sa letan ki ti konmans depi ler Rwayonm Bondye ti ganny etablir an 1914 ziska lafen sa Mil An ki Zezi Kri pou dirize. Liv Revelasyon, ki’n ganny ekrir par Zan anviron lannen 96 N.L., i en liv tre enteresan ki koz konsernan sa bann vizyon.

Annou aprezan egzamin bann pwen enteresan dan Revelasyon 1:1–12:17, ki kouver sa set premye vizyon ki Zan ti gannyen. Sa bann vizyon i enteres nou akoz zot relye avek sa ki pe arive dan lemonn ozordi e zot montre konman Zeova pou pran aksyon byento. Dimoun ki lir avek lafwa sa resi konsernan sa bann vizyon, pou vreman ganny rekonforte e ankouraze.—Ebr. 4:12.

“LANYO” TI DEKASTE SIS PARMI SA SET SELE

(Rev. 1:1–7:17)

Premyerman, Zan ti vwar Zezi Kri ki ti’n ganny resisite dan lesyel e i ti resevwar en seri mesaz pour ‘ekrir dan en liv pour anvoy pour sa set kongregasyon.’ (Rev. 1:10, 11) Apre, dan en lot vizyon i ti vwar en tronn dan son pozisyon dan lesyel. Dan lanmen drwat sa Enn ki ti pe asiz lo sa tronn ti annan en liv dan laform en roulo kaste avek set sele. Sa enn ki ti ganny konsidere “diny pour ouver sa liv” i pa lot ki “sa lyon [sorti] Tribi Zida” oubyen “sa Lanyo . . . [k]i ti annan set korn ek set lizye.”—Rev. 4:2; 5:1, 2, 5, 6.

Sa trwazyenm vizyon ti montre sa ki ti arive kan “Lanyo” ti dekaste sa sis premye sele enn par enn. Kan sa sizyenm sele ti ganny dekaste, i ti annan en gran tranblemandter e sa gran zour lakoler ti arive. (Rev. 6:1, 12, 17) Me dan lot vizyon Zan ti vwar ‘kat lanz pe tenir sa kat divan’ ziska ki sa 144,000 ti fini ganny sele. I ti vwar “en gran lafoul” ki pa ti parmi sa bann ki’n ganny sele pe “debout devan tronn e devan Lanyo.”—Rev. 7:1, 9.

Larepons pour bann kestyon lo Labib:

1:4; 3:1; 4:5; 5:6—Ki sa lekspresyon “set Lespri” i vedir? Sa sif set i reprezant en keksoz ki konplet dapre pwennvi Bondye. Alor, finalman sa mesaz pour “sa set [“kongregasyon,” NW]” i aplik pour tou pep Bondye ki zwenn ansanm dan plis ki 100,000 kongregasyon dan lemonn antye. (Rev. 1:11, 20) Vi ki Zeova i donn lespri sen pour akonplir sa ki i anvi, sa lekspresyon “set Lespri” i montre sa fason konplet ki mannyer lespri sen i travay pour donn konprenezon e anmenn benediksyon pour sa bann ki port latansyon lo sa profesi. I paret ki liv Revelasyon i en liv ki diskit bann levennman ki arive par set letap. Dan sa konteks, nimero set i reprezant en keksoz ki konplet e anfet sa liv i koz konsernan sen “sekre Bondye” ki pou ‘ganny akonplir’ oubyen konplete.—Rev. 10:7.

1:8, 17—Sa tit “konmansman ek lafen [oubyen “Alfa ek Omega,” NW] e osi ‘Premye ek Dernyen’ pe refer avek lekel? Sa tit “Alfa ek Omega” i aplik avek Zeova e i met lanfaz lo lefet ki i napa en lot Bondye tou pwisan avan li e pou napa en lot apre li. Li ki “konmansman ek lafen.” (Rev. 21:6; 22:13) Menm si dan Revelasyon 22:13a Zeova i ganny apele “premye ek dernyen” dan sa sans ki napa personn avan li, ni apre li, konteks dan Revelasyon sapit enn i montre ki sa tit ‘Premye ek Dernyen’ pe refer avek Zezi Kri. I ti sa premye imen ki’n ganny resisite pour en lavi imortel konman en lespri e sa dernyen ki’n ganny resisite par Zeova li menm.—Kol. 1:18.

2:7—Ki si sa sa “paradi Bondye”? Vi ki sa bann parol in ganny adrese avek bann Kretyen swazir, sa paradi i bezwen pe refer avek sa paradi dan lesyel, setadir zot vreman dan prezans Bondye li menm. Sa bann Kretyen fidel ki’n ganny swazir pou ganny rekonpanse pour “manz fri pye dibwa lavi.” Zot pou vin imortel.—1 Kor. 15:53.

3:7—Kan ki Zezi ti resevwar “lakle David” e ki mannyer i pe servi sa lakle? Kan i ti batize lannen 29 N.L., Zezi ti vin sa Lerwa ki’n ganny swazir dan laliny desandans David. Me Zezi ti esper ziska lannen 33 N.L., kan i ti ganny plase dan en o pozisyon lo kote drwat Bondye dan lesyel, pour resevwar lakle David. I ti sa moman ki i ti ganny tou drwa dan sa Rwayonm ki sorti dan desandans David. Depi sa, Zezi pe servi sa lakle pour donn plis loportinite ek privilez dan servis an rapor avek sa Rwayonm. An 1919, Zezi ti konfye “lakle lakaz David” avek “sa lesklav fidel e pridan,” par met sa lesklav “ansarz tou son byen.”—Iza. 22:22; Mat. 24:45, NW, 47.

3:12—Ki “nouvo non” Zezi i annan? Sa non i annan pour fer avek nouvo responsabilite ek privilez ki Zezi ti gannyen. (Fili. 2:9-11) Vi ki napa personn ki konn sa non dan sa fason ki Zezi i konnen, i’n ekrir sa non lo son bann frer fidel dan lesyel, pour fer zot annan en relasyon pros avek li. (Rev. 19:12) I menm partaz son privilez avek zot.

Leson pour nou:

1:3. Vi ki “letan [pour Bondye egzekit son zizman lo lemonn Satan] i pros,” nou bezwen pa tarde pour konpran sa mesaz dan liv Revelasyon e met li an pratik.

3:17, 18. Pour vin ris spirityelman, nou bezwen aste “lor ki’n teste dan dife” avek Zezi. Sa i vedir, ki nou devret fer bokou zefor pour fer en kantite bon aksyon. (1 Tim. 6:17-19) Nou bezwen osi met sa “lenz blan,” ki fer nou ganny rekonnet konman disip Kris e servi en “remed pour lizye,” tel parey bann konsey ki ganny pibliye dan Latour Veyer, pour nou ganny disernman.—Rev. 19:8.

7:13, 14. Sa 24 ansyen i reprezant sa 144,000 Kretyen swazir dan zot pozisyon dan lesyel, konman lerwa ek pret. Dan letan bann Zwif, sa bann pret ki Lerwa David ti organize dan 24 group ti pe reprezant sa 144,000 Kretyen swazir. Enn sa bann ansyen ti revel lidantite sa gran lafoul avek Zan. Alors, rezireksyon bann Kretyen swazir ti’n bezwen konmans en pe letan avan 1935. Akoz nou dir sa? Akoz i ti sa lannen ki vre lidantite sa gran lafoul ti ganny revele avek bann serviter swazir lo later.—Lik 22:28-30; Rev. 4:4; 7:9.

APRE KI SETYENM SELE TI GANNY OUVER, SET TRONPET TI GANNY SOUFLE

(Rev. 8:1–12:17)

Lanyo ti ouver sa setyenm sele. Set lanz ti resevwar set tronpet. Sis parmi sa bann lanz ti soufle zot tronpet, pour anons mesaz zizman lo “en tyer” zabitan later, setadir bann ki pretann dir zot Kretyen. (Rev. 8:1, 2, 7-12; 9:15, 18) Se sa ki Zan ti vwar dan son senkyenm vizyon. Dan sa vizyon ki ti swiv, Zan ti annan en rol pour zwe ladan, i ti manz sa pti liv e i ti mezir sanktyer dan tanp. Apre ki sa setyenm tronpet ti ganny soufle, en lavwa for ti dir: “Rwayonm lemonn in vin rwayonm nou Senyer, e son Kris.”—Rev. 10:10; 11:1, 15.

Sa setyenm vizyon i donn plis lenformasyon lo sa ki’n ganny dir dan Revelasyon 11:15, 17. En gran siny ti aparet dan lesyel. Sa madanm senbolik dan lesyel ti ganny en garson. Dyab ti ganny pouse dan lesyel. Lefet ki i ti ankoler avek sa madanm dan lesyel, i ti al “fer lager kont leres [son] desandans.”—Rev. 12:1, 5, 9, 17.

Larepons pour bann kestyon lo Labib:

8:1-5—Akoz ti annan en silans dan lesyel e kwa ki ti ganny zete lo later apre? Dan en sans senbolik, i ti annan en silans dan lesyel pour ki “lapriyer bann sen” lo later ti kapab ganny tande. Sa ti arive ver lafen sa premye lager mondyal. Bann Kretyen swazir pa ti mont dan lesyel kan letan bann nasyon etranze ti terminen, parey bokou zot ti pe ekspekte. Zot ti pas dan bann moman difisil pandan lager. Alors, a sa moman zot ti priy bokou plis ankor avek senserite pour ganny gidans. Pour reponn zot lapriyer, dan en sans senbolik, sa lanz ti zet en dife lo later ki ti motiv bann Kretyen swazir pour ogmant zot aktivite spirityel. Menm si ti napa bokou zot, zot ti konmans en kanpanny predikasyon kot Rwayonm Bondye ti vin en topik vreman so, sa ti konmsi en dife ki ti’n ganny alimen parmi bann ki pretann dir zot Kretyen. Zis parey loraz, bann lavertisman baze lo Labib ti rezonnen, leklersisman lo laverite dan Labib ti ganny revele e baz lansennyman bann fo larelizyon ti ganny sekwe ziska kot son fondasyon, zis parey bann batiman ki ganny sekwe ler i annan tranblemandter.

8:6-12; 9:1, 13; 11:15—Kan ki sa set lanz ti prepar zot pour soufle zot tronpet, kan e konman sa bann tronpet ti rezonnen? Parmi sa preparasyon ki sa set lanz ti fer pour soufle sa set tronpet ti enkli gidans ki zot ti donn bann Kretyen swazir lo later apartir 1919 ziska 1922, ki ti’n reganny zot lafors. Apre sa, bann Kretyen swazir ti okipe pe organiz travay predikasyon e konstrir bann landrwa pour enprim piblikasyon. (Rev. 12:13, 14) Sa bann tronpet ki ti pe rezonnen, ti reprezant sa mesaz konsernan zizman Zeova ki pep Bondye ti anonse san lafreyer kont lemonn Satan, avek led bann lanz. An realite, sa mesaz ti konmans ganny anonse apartir lasanble ki ti ganny fer Cedar Point, Ohio an 1922 e pou kontinyen ziska sa gran ladetres.

8:13; 9:12; 11:14—Ki mannyer ler sa trwa dernyen tronpet ti ganny soufle, sa bann tapaz ti reprezant “maler”? Vi ki sa kat premye tronpet ti pe devwale ki bann ki pretann dir zot Kretyen ti’n mor dan en sans spirityel, sa trwa dernyen i bann maler dan sa sans ki zot annan pour fer avek bann levennman spesifik. Sa senkyenm tronpet ki ti ganny soufle ti relye avek delivrans pep Bondye dan “labim” an 1919 kot zot ti inaktif e osi sa travay predikasyon ki zot pa ti aret fer, ki ti parey en tourman pour bann ki ti pretann dir zot Kretyen. (Rev. 9:1) Sa sizyenm ti konsernan sa pli gran kavalye dan listwar e sa kanpanny predikasyon mondyal ki ti konmans an 1922. Dernyen tronpet ki ti ganny soufle ti annan pour fer avek sa Rwayonm dan lanmen Kris ki ti ganny etablir.

Leson pour nou:

9:10, 19. Bann parol baze lo Labib dan bann piblikasyon ki montre serten lotorite, sorti kot “sa lesklav fidel e pridan,” i kontyen en mesaz ki fermal pour lezot. (Mat. 24:45, NW) Sa mesaz i konparab avek lake bann sotrel ki annan “dart parey skorpyon” e bann kavalye ki annan ‘lake parey bann serpan.’ Akoz nou dir sa ? Akoz sa bann piblikasyon pe avertir konsernan “zour vanzans [Zeova].” (Iza. 61:2) Annou distribye sa bann piblikasyon avek devouman ek kouraz.

9:20, 21. Bokou dimoun ki annan limilite ki viv dan bann pei ki dimoun i konsider konman bann pei ki pa Kretyen, zot in byen reazir anver sa mesaz ki nou anonse. Annefe, nou pa ekspekte en kantite dimoun, setadir bann ki ganny konsidere konman “lezot zonm,” sorti dan sa bann pei ki pa Kretyen, pour konverti. Parkont, nou kontinyen persevere dan nou minister.

12:15, 16. “Later,” setadir bann dimoun ki form parti lemonn Satan, oubyen bann ki pe dirize dan plizyer pei, zot respekte laliberte relizye. Depi 1940, sa bann dirizan ki annan pouvwar ti “anval sa larivyer [persekisyon] ki sa dragon ti fer sorti dan son lagel.” Vreman, kan Zeova i swazir pour fer sa, i kapab enfliyans bann lotorite dan gouvernman pour akonplir son lavolonte. I apropriye alor ki Proverb 21:1 i dir: “Leker en lerwa i parey larivyer dan lanmen Zeova. I kapab fer li al dan nenport direksyon ki i anvi.” Sa i devret ranforsi nou lafwa dan Bondye.

[Not anba lo paz 30]