Solisyon pour en Monn meyer

“SA SEL pli gran personnaz—pa senpleman dan sa de milener me dan listwar imen antye—ti Zezi ki ti sorti Nazaret,” magazin Time ti dir. Kan Zezi ti lo later, bokou dimoun ki ti annan leker senser pa ti zis rekonnet ki i ti en zonm remarkab, me zot ti osi rekonnet son konsern pour lezot. Alor, i pa sirprenan ki zot ti anvi fer li vin lerwa. (Zan 6:10, 14, 15) Kantmenm sa, Zezi ti refize pour enplike dan politik.

REAKSYON Zezi ti baze lo omwen trwa fakter: premyerman, pwenn-vi son Papa lo lendepandans imen, ki enkli dominasyon imen; dezyenmman, Zezi ti konnen ki i annan bann lafors pwisan e envizib ki ti pe travay kont bann pli bon zefor ki imen pe fer pour dirize; e trwazyenmman, i ti konn plan Bondye pour etabli en gouvernman seles pour domin later antye. Anmezir ki nou egzamin sa trwa pwen pli oprofon, nou pou vwar akoz zefor imen pour fer sa monn vin en landrwa pli meyer in fel. Nou pou osi vwar konman ki tousala pou kapab ganny akonpli.

Eski Imen i kapab diriz zot Lekor?

Kan Bondye ti kree imen, i ti donn zot lotorite lo zannimo. (Zenez 1:26) Me limanite ti anba lotorite siprenm Bondye. Premye zonm ek fanm ti bezwen prouv zot soumisyon anver Bondye par obeir sa konmann pour pa manz fri en pye dibwa an partikilye, “sa pye konnesans bon e move.” (Zenez 2:17) Malerezman, Adan ek Ev ti abiz zot abilite pour desid lo zot menm e zot ti dezobei Bondye. Pran sa fri ki zot ti’n ganny enterdi pa ti senpleman en vol. I ti form parti rebelyon kont souvrennte Bondye. En not anba lo paz dan The New Jerusalem Bible lo Zenez 2:17, i dir ki Adan ek Ev ti “reklanm lendepandans moral, ki endike ki zonm i refize pour rekonnet son pozisyon konman en kreatir ki’n ganny kree . . . Sa premye pese ti en latak lo souvrennte Bondye.”

Lefe ki bann kestyon moral ki serye ti enplike, Bondye ti permet Adan ek Ev ek zot desandans swazir zot prop fason viv, e zot ti etabli zot prop standar pour sa ki byen ek sa ki mal. (Psonm 147:19, 20; Romen 2:14) An realite, leksperyans pour viv endepandan ti konmanse. Eski sa in anmenn bann bon rezilta? Apre ki nou’n egzamin sa milye lannen ki’n pase, nou kapab dir non! Eklezyast 8:9 i dir: “Zonm in domin zonm ver son ditor.” Rikord regretab konsernan dominasyon imen i konfirm sa laverite dan Zeremi 10:23: “Mon konnen, O Zeova, ki pour zonm ki’n ganny tire dan sirfas later, son semen pa apartenir. I pa apartenir pour zonm ki pe marse pour diriz son lepa.” Listwar in prouve ki imen pa kapab diriz avek sikse san zot Kreater.

Zezi ti totalman dakor avek sa. Pour li, lendepandans avek Bondye ti en keksoz ki i pa ti vreman kontan. “Mon pa fer nanryen par mwanmenm,” i ti dir. “Mon touzour fer sa ki fer [Bondye] plezir.” (Zan 4:34; 8:28, 29) Alor, vi ki Zezi pa ti’n ganny okenn lotorizasyon divin pour resevwar rwayote avek imen, i pa ti ni menm konsider aksepte sa. Parkont, sa pa vedir ki i ti ezite pour ed son prosen. Okontrer, i ti fer tou sa ki ti dan son pouvwar pour ed bann dimoun pour trouv pli gran boner dan zot lavi prezan e dan lavenir. I ti menm donn son lavi pour limanite. (Matye 5:3-11; 7:24-27; Zan 3:16) Me Zezi ti konnen ki “pour tou keksoz i annan en letan fikse,” enkli letan pour Bondye defann klerman son souvrennte lo imen. (Eklezyast 3:1; Matye 24:14, 21, 22, 36-39) Mazinen, ki an Edenn nou premye paran ti soumet avek lavolonte en lespri mesan ki ti koz atraver en serpan vizib. Sa i anmenn nou lo en dezyenm rezon akoz Zezi pa ti enplike dan politik.

Dirizan enkoni Lemonn

Labib i dir nou ki Satan ti ofer Zezi “tou bann rwayonm partou lo later” an lesanz pour en akt ladorasyon. (Matye 4:8-10) An realite, Zezi ti ganny ofer dominasyon lo lemonn—me akondisyon ki i ti fer sa ki Dyab ti demande. Zezi pa ti tonm dan sa tantasyon. Eski i ti vreman en tantasyon? Eski an realite Satan ti ava kapab fer en tel propozisyon enpresyonan? Wi, akoz Zezi li menm ti apel Dyab “sa enn ki gouvern lemonn” e zapot Pol ti dekrir li konman “bondye-zidol sa syek.”—Zan 14:30; 2 Korentyen 4:4; Efezyen 6:12.

Byensir, Zezi ti konnen ki Dyab napa lentere imen aker. I ti dekrir Satan konman en “mertriye” e konman “papa tou mansonz e tou sa ki fo.” (Zan 8:44, The Amplified Bible) Byensir, en monn ki “dan pouvwar” en tel lespri mesan pa pou zanmen kapab vreman ere. (1 Zan 5:19) Me Dyab pa pou annan sa lotorite pour touzour. Zezi, ki aktyelman en kreatir spirityel pwisan, pou byento retir Satan e retir konpletman son lenfliyans.—Ebre 2:14; Revelasyon 20:1-3.

Satan li menm i konnen ki son bann zour konman dirizan sa monn pe ariv ver son lafen. Pour sa rezon, i pe fer tou zefor posib pour fer imen vin telman koronpi, parey i ti fer avan Deliz dan letan Noe. (Zenez 6:1-5; Zid 6) “Maler later ek lanmer,” Revelasyon 12:12 i dir, “parski dyab in desann kot zot avek en gran lakoler, akoz i konnen ki i reste li ankor zis en pti pe letan.” Profesi Labib ek bann levennman mondyal i montre ki nou pe viv pros avek lafen sa “pti pe letan.” (2 Timote 3:1-5) Soulazman i pros.

En Gouvernman ki pou anmenn Boner

En trwazyenm rezon akoz Zezi pa ti enplike dan politik se ki i ti konnen ki dan en letan fikse dan lavenir, Bondye pou etabli en gouvernman dan lesyel pour domin lo later. Labib i apel sa gouvernman Rwayonm Bondye, e i ti tenm prensipal lansennyman Zezi. (Lik 4:43; Revelasyon 11:15) Zezi ti ansenny son bann disip pour priye ki sa Rwayonm i vini, akoz se selman anba son dominasyon ki ‘lavolonte Bondye pou ganny akonpli lo later parey dan lesyel.’ (Matye 6:9, 10) Petet ou kapab demande, ‘Si sa Rwayonm pou domin lo later antye, ki pou arive avek bann gouvernman imen?’

Larepons i trouve dan Danyel 2:44: “E dan bann zour sa bann lerwa la [ki pe dirize pandan lafen sa sistenm aktyel] Bondye lesyel pou etabli en rwayonm ki pa pou zanmen ganny detrir. E sa rwayonm li menm pa pou pas avek okenn lezot pep. I pou kraz e met en lafen avek tou sa bann rwayonm [ki zonm in fer] e li menm i pou dire pour letan endefini.” Akoz Rwayonm Bondye i bezwen “kraz” bann dominasyon lo sa later? Akoz zot ensiste pour mentenir sa leta lespri pour dezobei Bondye, sa leta lespri endepandan ki ti ganny promouvwar par Satan dan zarden Edenn. Apard ki travay kont bann pli bon lentere imen, bann ki esey mentenir sa leta lespri zot met zot met zot lekor an konfli avek Kreater. (Psonm 2:6-12; Revelasyon 16:14, 16) Alor, nou bezwen demann nou lekor, ‘Eski nou an faver oubyen kont dominasyon Bondye?’

Souvrennte lekel ki ou pou swazir?

Pour kapab ed dimoun pour fer en desizyon baze lo konnesans egzakt konsernan dominasyon, Zezi ti ordonn son bann disip pour anons sa “bonn nouvel rwayonm . . . dan lemonn pour tou dimoun konnen” avan ki lafen sa sistenm aktyel i arive. (Matye 24:14) Lekel ozordi ki renonmen dan lemonn antye pour anons Rwayonm Bondye? Se bann Temwen Zeova ki pe prese. Annefe, pour plizyer lannen sa magazin in annan lo son kouvertir sa parol “Pe anons Rwayonm Zeova.” Ozordi, apepre sis milyon Temwen dan plis ki 230 pei pe ed bann dimoun pour ganny konnesans lo sa Rwayonm.a

Benediksyon pour bann Size Rwayonm

Zezi in toultan fer keksoz dan fason ki Bondye i oule. Alor, olye swazir en semen endepandan e esey siport oubyen amelyor sa sistenm ki ti egziste par bann mwayen politik, i ti travay dir pour avans lentere Rwayonm Bondye, sa sel solisyon pour bann problenm sa monn. Pour son fidelite i ti ganny rekonpanse avek en tronn manifik dan lesyel konman Lerwa apropriye sa Rwayonm. En pri merveye pour son soumisyon anver Bondye!—Danyel 7:13, 14.

Denozour, plizyer milyon dimoun ki imit Zezi par met Rwayonm Bondye premye e soumet avek lavolonte Bondye i osi rezwir en kado merveye—privilez pour vin bann size teres Rwayonm Bondye. (Matye 6:33) Anba son dominasyon ranpli avek lanmour, zot pou vin parfe, avek lespwar pour viv pour touzour. (Revelasyon 21:3, 4) 1 Zan 2:17 i dir: “Lemonn pou disparet ek tou son bann dezir; me sa ki fer lavolonte Bondye i reste eternelman.” Ler Satan ek son bann konpanyon pou ganny retire e later pou ganny transformen dan en paradi kot pou napa divizyon nasyonalism, bann sistenm komersyal koronpi, ek bann fo larelizyon, i pou vreman gou pour reste lo sa later pour touzour!—Psonm 37:29; 72:16.

Wi, Rwayonm Bondye i sa vre solisyon pour en monn vreman ere, e sa mesaz ki pe anons li i byen ganny dekrir konman bon nouvel. Si ou pa ankor deza fer li, prosenn fwa ki en Temwen Zeova i vizit ou kot ou lakour, akoz ou pa ekout sa bon nouvel ki zot pe anmenn pour ou?

[Not anba lo paz]

[Portre lo paz 4]

Listwar i prouve ki imen pa kapab diriz avek sikse san Bondye

[Portre lo paz 4]

Lefe ki i domin sa “sistenm” aktyel, Satan ti kapab ofer Zezi “tou bann rwayonm partou lo later”

[Portre lo paz 6]

Zezi ti ansennyen ki anba laranzman Rwayonm Bondye, lemonn pou vin en landrwa merveye