En problenm mondyal, en solisyon mondyal

NOU kapab trouv soufrans partou kote e bokou dimoun ki annan konpasyon i kontan pour ed sa bann ki pe soufer. Par egzanp, bann travayer lopital i travay plizyer erdtan pour ed bann dimoun ki malad ouswa ki’n ganny dimal. Bann ponpye, lapolis, serten zofisye gouvernman ek travayer sekour i travay vreman dir pour ede ouswa anpese ki lezot i soufer. Sa bann kalite zefor i ed bokou dimoun lo en baz personnel, me napa okenn endividi ouswa lorganizasyon ki kapab elimin soufrans dan lemonn antye. Me de lot kote, Bondye i kapab e i pou regle sa problenm mondyal.

Nou kapab trouv sa lasirans dan dernyen liv Labib: “[Bondye] pou eswiy tou larm dan zot lizye. Lanmor pou nepli egziste. Pou nepli annan ni dey, ni plere, ni soufrans, parski lemonn ansyen in disparet.” (Revelasyon 21:4) Remarke ki bokou dimoun pou benefisye avek sa promes. I rezim plan ki Bondye i annan pour elimin tou soufrans. I pou fer sa par elimin lager, lafamin, maladi ek lenzistis, ensi ki bann move dimoun lo later. Napa okenn imen ki kapab fer sa.

Ki Rwayonm Bondye pou fer

Bondye pou akonplir son promes atraver dezyenm personnaz pli pwisan dan liniver e sa i Zezi Kri ki’n ganny resisite. Sa letan pe aprose kot Zezi pou diriz lo later antye konman en Lerwa e personn pa pou opoz li. Bann imen pou nepli ganny gouvernen par bann lerwa, prezidan ouswa politisyen. Plito, en sel Lerwa pou diriz zot atraver Rwayonm Bondye ki pou sa sel gouvernman.

Sa Rwayonm pou elimin tou gouvernman imen. En kantite letan pase Labib ti predir: “Bondye lesyel pou etabli en rwayonm ki pa pou zanmen ganny detrir. Sa rwayonm li menm pa pou pas avek okenn lezot pep. I pou kraz e met en lafen avek tou sa bann rwayonm, e li menm i pou dire pour en letan endefini.” (Danyel 2:44) Dimoun partou lo later pou ini anba Rwayonm Bondye, sa sel gouvernman drwat.

Kan i ti lo later konman en zonm, plizyer fwa Zezi ti koz lo sa Rwayonm. I ti koz lo la dan lapriyer Notreper e enstrir son bann disip pour priy dan sa fason: “Ki ou Renny i ganny etabli; Ki ou lavolonte i ganny akonpli lo later parey dan lesyel.” (Matye 6:10) Remarke ki Zezi ti pe montre ki sa Rwayonm i relye avek lakonplisman lavolonte Bondye lo later, e i lavolonte Bondye pour elimin soufrans dan lemonn antye.

Gouvernman drwat Bondye pou anmenn benediksyon ki okenn gouvernman imen pa’n zanmen kapab anmennen. Rapel byen ki Zeova ti donn son Garson konman en ranson pour ki bann imen i kapab ganny lavi eternel. Anba bon dominasyon sa Rwayonm, bann imen pou ptitapti vin parfe. Avek ki rezilta? Zeova pou “anval lanmor pour touzour, e Souvren Senyer Zeova pou sirman eswiy larm lo tou figir.”—Izai 25:8.

Serten i kapab demande: ‘Akoz Bondye pa’n azir tou sa letan? Ki i pe espere?’ Zeova ti’n kapab azir depi lontan pour elimin e menm anpes tou soufrans arive. I pa pour okenn rezon egois ki i’n les sa bann keksoz kontinyen, me senpleman pour ki son bann zanfan lo later i ganny bann benediksyon eternel. Bann paran ki kontan zot zanfan ti pou kapab les zot pas atraver bann difikilte si zot konnen ki sa pou anmenn bann byenfe dirab pour zot a lavenir. Pareyman, i annan bann bon rezon akoz Zeova in les bann imen soufer tanporerman e sa bann rezon i ganny eksplike dan Labib. Zot enplik bann keksoz parey liberte pour swazir, pese ek kestyon konsernan drwa Zeova pour dirize. Labib i osi eksplike ki pour en peryod letan tre limite, en move lanz in ganny permisyon pour diriz lemonn.a

Nou pa kapab eksplik tou sa bann rezon lo zis sa detrwa paz, me i annan de rezon ki kapab donn nou lespwar ek lankourazman. Premyerman: Zeova pou beni nou plis ki sa bann soufrans ki nou’n eksperyanse. Deplis, Bondye i asir nou: “Bann keksoz dan lepase pa pou vin dan nou lespri, zot pa pou ni vin dan leker.” (Izai 65:17) Bondye pou konpletman e dan en fason permanan, elimin lamizer ek soufrans ki vin akoz lemal ki la tanporerman.

Dezyenmman se ki: Bondye in fikse en letan spesifik pour elimin soufrans. Rapel byen ki profet Abakouk ti demann Zeova ziska kan i pou permet vyolans ek konfli. Zeova ti reponn: “Sa vizyon i pour letan fikse . . . I pa pou an retar.” (Abakouk 2:3) Parey nou pou vwar dan lot lartik, sa “letan fikse” i pros.

[Not anba lo paz]

[Bwat lo paz 7]

Verse Labib ki koz lo en lavenir merveye

POU NEPLI ANNAN LAGER:

“Vini e vwar sa ki Zeova in akonplir, bann keksoz enkrwayab ki i’n fer lo later. I pe fer arete lager ziska dan bann landrwa pli lwen lo later.”—Psonm 46:8, 9.

BANN KI NOU KONTAN I RETOURNEN:

“Tou dimoun bon konman move, pour resisite.”—Akt 24:15.

NOURITIR POUR TOU DIMOUN:

“Legren pou annabondans lo later; i pou annan en kantite anler lo bout montanny.”—Psonm 72:16.

POU NEPLI ANNAN MALADI:

“Okenn zabitan pa pou dir: ‘Mon malad.’”—Izai 33:24.

MOVE DIMOUN POU’N DISPARET:

“Bann mesan zot, zot pou ganny retire lo later; e bann tret, zot pou ganny eliminen.”—Proverb 2:22.

LAZISTIS POU RENNYEN:

“Gete! En lerwa [Kris Zezi] pou rennyen pour ladrwatir, tandis ki bann prens, zot pou dirize konman prens pour lazistis.”—Izai 32:1.

[Portre lo paz 7]

Rwayonm Bondye pou geri tou soufrans ki nou’n kapab eksperyanse